Skip to content

Skip to table of contents

Bakamboni ba Jehova

Amusale mwaambo Chitonga

Matayo 16:1-28

16  Lino ba Falisi aba Saduki bakaboola kulinguwe, aboobo kutegwa bamusunke, bakamwaambila kuti abatondezye citondezyo kuzwa kujulu.  Mpoonya wakabaingula kuti: “[[Kwaba kumangolezya mulizyibide kwaamba kuti, ‘Buyooca kabotu, nkaambo kujulu kwasubila,’  alimwi mafwumofwumo mulaamba kuti ‘Sunu kunooli mpeyo amvwula nkaambo kujulu kwasubila pele kuli makumbi aasiya.’ Mulizyi kupandulula mbokulibonya kujulu, pele tamukonzyi kupandulula zitondezyo zyaziindi eezyi.]]*  Izyalani libi alimwi lyabumambe liyandisya kupegwa citondezyo, pele kunyina citondezyo ncoliyoopegwa ccita buyo citondezyo ca Jona.” Mpoonya wakaunka wabasiya.  Lino basikwiiya bakazabukila mutala eliya, alimwi bakaluba kubwezelezya zinkwa.  Jesu wakabaambila kuti: “Amulangisye alimwi amucenjele abumena bwaba Falisi aba Saduki.”  Aboobo bakatalika kwaambilana kuti: “Tiitwabwezelezya cinkwa nociba comwe.”  Naakazyiba boobo, Jesu wakati: “Sena nkaambo kakuti tamujisi zinkwa ncomwaambilana boobu nywebo nobasilusyomo luniini?  Sena tamunakabona kaambo, naa sena mwaluba zinkwa zyosanwe nzibakalya bantu bali 5,000 alimwi amweelwe wamitaanga yabufwefwelenga njomwakabweza? 10  Naa sena mwaluba zinkwa zili ciloba nzibakalya bantu bali 4,000 alimwi amweelwe wamitaanga mipati yabufwefwelenga njomwakabweza? 11  Ino nkaambo nzi tiimwazyiba kuti tiindali kumwaambila makani aazinkwa? Pele amucenjele abumena bwaba Falisi aba Saduki.” 12  Mpoonya bakazyiba kuti wakali kwaamba kuti bacenjelele njiisyo zyaba Falisi aba Saduki kutali bumena bwazinkwa. 13  Lino naakasika mucooko ca Kaisaleya Filipi, Jesu wakabuzya basikwiiya bakwe kuti: “Ino bantu baamba kuti Mwana wamuntu nguni?” 14  Bakaingula kuti: “Bamwi baamba kuti Johane Mubbapatizi, bamwi balati Elija, pele ibamwi baamba kuti Jelemiya naa umwi wabasinsimi.” 15  Eelyo wakababuzya kuti: “Ino nywebo mwaamba kuti ndime ni?” 16  Simoni Petulo wakaingula kuti: “Nduwe Kilisito, Mwana wa Leza muumi.” 17  Mpoonya Jesu wakamwaambila kuti: “Ulilelekedwe Simoni omwana wa Jona, nkaambo tali muntu uulya maila pe wakuyubunwida, pele ngu Taata uuli kujulu. 18  Andime ndikwaambila kuti: Nduwe Petulo, aboobo amwala ooyu mpondiyooyakila mbungano yangu alimwi taikazundwi amilyango ya Cikkalilo Cabafwu.* 19  Ndiyookupa makkii aa Bwami bwakujulu, eelyo kufwumbwa ncoyooanga anyika cinooli cakaangwa kale kujulu, alimwi kufwumbwa ncoyooangulula anyika cinooli cakaangululwa kale kujulu. 20  Mpoonya wakalomya kulailila basikwiiya kuti bataambili muntu uuli woonse kuti ngo Kilisito. 21  Kuzwa ciindi eeco, Jesu Kilisito wakatalika kutondezya basikwiiya bakwe kuti weelede kuunka ku Jelusalemu akuyoopenzyegwa kapati abapati, basilutwe babapaizi abalembi mane akujaigwa, mpoonya akuyoobusyigwa mubuzuba bwatatu. 22  Lino Petulo wakamutola ambali akutalika kumukalalila kati: “Kolyeengelela Mwami; eeci tacikakucitikili pe.” 23  Pele Jesu wakamufwutatila Petulo akumwaambila kuti: “Koya kusyule lyangu, Saatani! Uli cilebyo kulindime nkaambo uli amizeezo yabantu ikutali ya Leza.” 24  Mpoonya Jesu wakaambila basikwiiya bakwe kuti: “Ikuti umwi kayanda kunditobela, aliimye akunyamuna cisamu cakwe cakupenzyezya akuzumanana kunditobela. 25  Nkaambo kufwumbwa uuyanda kufwutula buumi bwakwe uyoobusweekelwa, pele kufwumbwa uusweekelwa buumi bwakwe akaambo kandime uyoobujana. 26  Nkaambo nimpindu nzi muntu njajana ikuti wavwuba nyika yoonse pele wasweekelwa buumi bwakwe? Naa, ncinzi muntu ncayoopa kuti anunune buumi bwakwe? 27  Nkaambo Mwana wamuntu uyooboola abangelo bakwe mubulemu bwa Bausyi, mpoonya uyoopilusyizya umwi aumwi kweelana amilimo yakwe. 28  Ncobeni ndimwaambila kuti nkobali bamwi ibaimvwi aano batakafwi kusikila bakasaangune kubona Mwana wamuntu kaboola mu Bwami bwakwe.”

Bupanduluzi buyungizyidwe

Makoma atondezya majwi aatamo mumabbuku amwi aakaindi pele aajanika muli amwi.
Amubone Makani Aayungizyidwe 8.