Skip to content

Skip to table of contents

Bakamboni ba Jehova

Amusale mwaambo Chitonga

Matayo 12:1-50

12  Kuciindi eeco Jesu wakainda mumyuunda yamaila mu Sabata. Lino basikwiiya bakwe bakafwa nzala, mpoonya bakatalika kupulula myaangala yamaila akulya.  Nobakabona boobo, ba Falisi bakamwaambila kuti: “Bona! Basikwiiya bako bacita citazumizyidwe mu Sabata.”  Wakabaambila kuti: “Sena tiimwakabala ncaakacita Davida ciindi walo abaalumi mbaakali limwi nobakafwa nzala?  Sena tanaakanjila muŋanda ya Leza akulya zinkwa zyacituuzyo, eezyo walo abaabo mbaakali limwi nzyobatakazumizyidwe kulya ccita buyo bapaizi balikke?  Naa sena tiimwakabala mu Mulawo kuti mu Sabata, bapaizi mutempele balabeleka pele tabakwe mulandu?  Pele ndimwaambila kuti imupati kwiinda tempele mpali aano.  Ikuti nimwalizyi ncaamba majwi aaya aakuti, ‘Ndiyanda luse kutali cipaizyo,’ nomwatabeteka batakwe mulandu.  Nkaambo Mwana wamuntu ngo Mwami wa Sabata.”  Naakazwa kubusena oobo, wakaunka mucikombelo cabo, 10  eelyo kwakali mwaalumi wakapuutide janza. Aboobo kutegwa bamujanine kaambo, bakamubuzya kuti, “Sena cilizumizyidwe kuponya mu Sabata?” 11  Wakabaingula kuti: “Nguni akati kanu uunga kajisi mbelele yomwe, eelyo ikuti naa yawida mumulindi mu Sabata uutakonzyi kwiijata akwiigusya? 12  Aboobo, muntu ulayandika kapati kwiinda mbelele. Nkokuti cilizumizyidwe kucita cintu cibotu mu Sabata.” 13  Mpoonya wakaambila mwaalumi ooyo kuti: “Kovwungulula janza lyako.” Eelyo wakalivwungulula, alimwi lyakaba kabotu mbuli lyeenzinyina. 14  Pele ba Falisi bakazwa anze akuyoomvwana ikutegwa bamujaye. 15  Jesu naakazyiba boobu, wakazwa ooko. Alimwi bantu banji bakamutobela, eelyo wakabaponya boonse, 16  pele wakalomya kubalailila kuti batamuzyibyi kubantu, 17  ikutegwa azuzikizyigwe aayo aakaambwa kwiinda mumusinsimi Izaya iwakaamba kuti: 18  “Amubone! Mubelesi wangu ngondakasala, ngweyandisya, ooyo ngwebotelwa! Ndiyoobikka muuya wangu alinguwe, eelyo uyoozyibya bululami kuli bamasi. 19  Takakazyanyi nokuba koongolola; alimwi taakwe uuyoomvwa jwi lyakwe mumigwagwa. 20  Takatyoli tete lifwuyukide alimwi takazimi kamuni kalambe kasunta busi kusikila akape bululami kuzunda. 21  Masimpe, masi ayoolangila muzyina lyakwe.” 22  Mpoonya bakamuletela mwaalumi wakanjidwe daimona, moofwu alimwi syaataambi, eelyo wakamuponya cakuti syaataambi ooyu wakatalika kwaambaula akubona. 23  Mpoonya makamu oonse aabantu akagambwa akutalika kwaamba kuti: “Sena ooyu inga katali ngo Mwana wa Davida?” 24  Nobakamvwa boobu, ba Falisi bakaamba kuti: “Muntu ooyu utanda madaimona kwiinda munguzu zya Belezebule, imweendelezi wamadaimona.” 25  Mbwaakazyi mizeezo yabo, wakabaambila kuti: “Bwami buli boonse bwaandeene bulanyonyooka, amunzi naa ŋanda iili yoonse iyaandeene ilawa. 26  Ncimwi buyo, ikuti Saatani utanda Saatani, nkokuti waandaana mwini; aboobo ino bwami bwakwe bulaima buti? 27  Alimwi ikuti nditanda madaimona munguzu zya Belezebule, ino bana banu baatanda munguzu zyani? Nkakaambo kaako bayoomubeteka. 28  Pele ikuti naa nditanda madaimona munguzu zyamuuya wa Leza, nkokuti Bwami bwa Leza ncobeni bwamusikila kamutabuyeeyeli. 29  Naa, ino mbuti umwi mbwakonzya kunjila muŋanda yamuntu singuzu akubweza zyintu zyakwe? Ccita kuti wasaanguna kumwaanga singuzu ooyo, ndendilyo nakonzya kusaala ŋanda yakwe. 30  Ooyo uutali kulubazu lwangu mulwani wangu, ayooyo uutabunganyi antoomwe andime ulamwaya. 31  “Aboobo ndimwaambila kuti: Bantu bayoolekelelwa cibi cili coonse akusampaula kuli koonse, pele tabakalekelelwi ikuti basampaula muuya.* 32  Mucikozyanyo, kufwumbwa uusampaula Mwana wamuntu, uyoolekelelwa, pele kufwumbwa uusampaula muuya uusalala takalekelelwi pe mubweende bwazyintu buno naa oobo buciza. 33  “Nywebo nobantu ndinywe mupa kuti cisamu cibote amicelo yaco ibote naa kuti cibije amicelo yaco ibije, nkaambo cisamu cilazyibwa kumicelo yaco. 34  Nobana babacisasa, ino mbuti mbomukonzya kwaamba zyintu zibotu kakuli muli babi? Nkaambo mulomo waamba zizwide mumoyo. 35  Nkaambo muntu mubotu ulagusya zyintu zibotu kuzwa muciyobwedo cakwe cibotu, kakuli muntu mubi ulagusya zyintu zibi kuzwa muciyobwedo cakwe cibi. 36  Ndimwaambila kuti mu Buzuba bwa Lubeta, bantu bayoolyaambilila kujatikizya majwi oonse aanyina mpindu ngobaamba, 37  nkaambo kumajwi aako uyooambwa kuti uli mululami, alimwi kumajwi aako uyoopegwa mulandu.” 38  Lino mukumwiingula balembi aba Falisi bamwi bakaamba kuti: “Mwiiyi, tuyanda kubona citondezyo kulinduwe.” 39  Mpoonya wakabaingula kuti: “Izyalani libi alimwi lyabumambe lizumanana kuyanda kupegwa citondezyo, pele kunyina citondezyo ncoliyoopegwa ccita buyo citondezyo ca Jona musinsimi. 40  Nkaambo mbubonya Jona mbwaakali mwida lyamuswi kwamazuba otatwe isyikati amasiku, awalo Mwana wamuntu uyooba mukati kanyika kwamazuba otatwe isyikati amasiku. 41  Bantu baku Nineve bayoobusyigwa mu Buzuba bwa Lubeta antoomwe azyalani eeli, eelyo bayoolipa mulandu nkaambo balo bakeempwa kumakani ngaakakambauka Jona, pele amubone! Imupati kwiinda Jona mpali aano. 42  Mwami mukaintu wakumusanza uyoobusyigwa mu Buzuba bwa Lubeta antoomwe azyalani eeli, eelyo uyoolipa mulandu, nkaambo walo wakaboola kuzwa kumagolelo aanyika kutegwa amvwe busongo bwa Solomoni, pele amubone! Imupati kwiinda Solomoni mpali aano. 43  “Ciindi muuya uusofweede nuuzwa mumuntu, ulainda mumasena aatakwe maanzi kuyandaula busena bwakulyookezyezya, pele taujani busena pe. 44  Mpoonya ulaamba kuti, ‘Ndilapiluka kuŋanda yangu nkondakazwa,’ eelyo wasika ulajana taakwe uukkala muŋanda eeyo alimwi ilikukwidwe akubambwa kabotu. 45  Lino ulaunka kuyooleta myuuya iimbi iili ciloba mibi kwiinda nguwo, eelyo yanjila mukati ilakkala mumonya oomo, eelyo bukkale bwamamanino bwamuntu ooyo bulabija kapati kwiinda bwakusaanguna. Oobo mbociyooba kuzyalani libi eeli.” 46  Naakacili kwaambaula amakamu aabantu, amubone! Banyina abanabokwabo bakaima anze alimwi bakali kuyanda kwaambaula anguwe. 47  Mpoonya muntu umwi wakamwaambila kuti: “Bona! Banyoko abanabokwanu baliimvwi anze bayanda kwaambaula anduwe.” 48  Lino ikwiingula muntu ooyo wakati: “Ino bamaama mbaani abakwesu mbaani?” 49  Eelyo wakatondeka basikwiiya bakwe akwaamba kuti: “Bona! Mbaaba bamaama abakwesu! 50  Nkaambo kufwumbwa uucita kuyanda kwa Taata uuli kujulu, ooyo ngomukwesu, ngomucizyi wangu alimwi mbabamaama.”

Bupanduluzi buyungizyidwe

Kusampaula ooku kwaamba kusampaula Leza naa zyintu zisetekene.