Skip to content

Skip to table of contents

Bakamboni ba Jehova

Amusale mwaambo Chitonga

Luka 4:1-44

4  Mpoonya Jesu kazwide muuya uusalala wakazwa ku Jodano, eelyo wakasololelwa amuuya munkanda  kwamazuba aali makumi one kumwi kasunkwa a Diabolosi. Alimwi kuciindi coonse eeco kunyina ncaakalya, aboobo mazuba aayo naakamana wakafwa nzala.  Aboobo Diabolosi wakamwaambila kuti: “Ikuti naa uli mwana wa Leza, ambila bbwe eeli kuti libe cinkwa.”  Pele Jesu wakamwiingula kuti: “Kulilembedwe kuti: ‘Muntu teelede kupona acinkwa calo pe.’”  Eelyo wakamutola atala acilundu akumutondezya mami oonse aamunyika mukaindi kaniini buyo.  Mpoonya Diabolosi wakati kulinguwe: “Ndilakupa bweendelezi boonse oobu abulemu bwangawo nkaambo ndakapegwa mbubo, alimwi kufwumbwa ngwendiyanda kupa, ndilamupa mbubo.  Aboobo ikuti wandikomba, boonse bulaba bwako.”  Mukumwiingula Jesu wakamwaambila kuti: “Kulilembedwe kuti: ‘Ngu Jehova Leza wako ngoelede kukomba, alimwi ngonguwe alikke ngoelede kubelekela mulimo uusetekene.’”  Kunze lyaboobo wakamutola ku Jelusalemu akumwiimika atala abwaanda bwakazingulukide tempele akumwaambila kuti: “Ikuti naa uli mwana wa Leza, koliwaala ansi kuzwa waano, 10  nkaambo kulilembedwe kuti: ‘Uyoolailila bangelo bakwe kutegwa bakakukwabilile, 11  alimwi bayookutemba amaanza aabo kutegwa utakabi nolinontola kubbwe.’” 12  Mukumwiingula Jesu wakamwaambila kuti: “Kwaambidwe kuti: ‘Utasunki Jehova Leza wako.’” 13  Aboobo Diabolosi naakamanizya misunko yakwe yoonse, wakamuleka kusikila aciindi cimbi ceelede. 14  Lino Jesu munguzu zyamuuya wakapiluka ku Galilaya. Eelyo mpuwo yakwe mbotu yakamwaika mucisi coonse. 15  Alimwi wakatalika kuyiisya muzikombelo zyabo alimwi wakalemekwa abantu boonse. 16  Eelyo wakaboola ku Nazaleta nkwaakakomenena, alimwi kweelana acilengwa cakwe mubuzuba bwa Sabata, wakanjila mucikombelo mpoonya wakanyamuka kutegwa abale. 17  Aboobo wakapegwa bbuku lyamusinsimi Izaya, eelyo wakalivwungulula akujana aakalembedwe kuti: 18  “Muuya wa Jehova uli alindime nkaambo wakandinanika kuti ndaambile bacete makani mabotu; wakandituma kuti ndaambilizye kwaangununwa kubaange akupona kuboofwu, ikwaangununa badyaaminidwe, 19  kukambauka mwaka mubotu wa Jehova.” 20  Eelyo wakalivwunga bbuku, walipilusya kumugwasyi, akukkala ansi, lino boonse bakali mucikombelo bakamulangisisya. 21  Mpoonya wakatalika kubaambila kuti: “Sunu oolu lugwalo ndomwamvwa lwazuzikizyigwa.” 22  Lino boonse bakatalika kumulumbaizya akugambwa akaambo kamajwi mabotu ngaakali kubaambila, eelyo bakatalika kubuzya kuti: “Sena ooyu tali mwana wa Josefa?” 23  Mpoonya wakabaambila kuti: “Cakutadooneka muyoondaambila kaambyo aaka kakuti: ‘Omusilisi, kolisilika omwini; zyintu nzitwakamvwa kazicitika ku Kapenauma, kozicita amomuno mumunzi wakwanu.’” 24  Pele wakati: “Ncobeni ndimwaambila kuti kunyina musinsimi uutambulwa mumunzi wakwabo. 25  Mucikozyanyo, ndimwaambila camasimpe kuti: Kwakali bamukabafwu banji mu Isilayeli kumazuba aa Elija imvwula noyatakali kuwa kwamyaka yotatwe amyezi iili cisambomwi, cakuti kwakaba nzala mpati munyika yoonse. 26  Pele Elija kunyina naakatumwa kuli umwi wabanakazi aabo, pele buyo kuli mukamufwu mu Zalefati mucisi ca Sidoni. 27  Alimwi kwakali basicinsenda banji mu Isilayeli kuciindi camusinsimi Elisha; pele kunyina naba omwe wabo wakasalazyigwa ccita buyo Naamani mwaalumi waku Siliya.” 28  Lino boonse ibakali kumvwa zyintu eezyi mucikombelo bakakalala kapati, 29  aboobo bakanyamuka akumutola cakufwambaana anze amunzi, eelyo bakaunka anguwe atala acilundu aawo aakayakidwe munzi wabo, kuti bakamutonkele mujeleele. 30  Pele walo wakaandulula akati kabo ngooyo waunka. 31  Lino wakaselemukila ku Kapenauma, munzi waku Galilaya. Eelyo wakali kubayiisya mu Sabata; 32  alimwi bakagambwa kapati ambwaakali kuyiisya nkaambo majwi aakwe akali anguzu. 33  Lino mucikombelo mwakali muntu wakanjidwe daimona, imuuya uusofweede, eelyo wakoompolola ajwi pati kati: 34  “Aa! Ino tujisi kaambo nzi anduwe Jesu omuna Nazaleta? Sena walonda kuti utunyonyoone? Ndilikuzyi kabotu kuti uli Musalali wa Leza.” 35  Pele Jesu wakalikalalila kati: “Umuna, kozwa mumuntu ooyu.” Eelyo nolyakamuwisyila ansi muntu ooyo kabalangilila, daimona eelyo lyakazwa mulinguwe kakunyina kumucisa. 36  Babone boobo bantu boonse bakakankamana akutalika kulyaambauzya akati kabo kabati: “Ino majwi aali buti aaya, nkaambo cabweendelezi acanguzu ulalailila myuuya iisofweede, eelyo ilazwa?” 37  Aboobo mpuwo yakwe yakamwaika koonse-koonse mucisi eeco. 38  Naakazwa mucikombelo, wakaakunjila muŋanda ya Simoni. Lino banyinazyala Simoni bakalicisidwe, bakali kupya mubili kapati, aboobo bantu bakamulomba kuti abagwasye. 39  Aboobo wakaima aawo mpobakalede akutapatila bulwazi kuti buzwe, eelyo bwakazwa. Ndilyonya bakanyamuka akutalika kubakutaukila. 40  Pele nolyakali kubbila zuba, boonse aabo ibakali abantu baciswa malwazi aaindene-indene bakabaleta kulinguwe. Kwiinda mukubikka maanza aali umwi aumwi wabo wakabaponya. 41  Alimwi madaimona akali kuzwa mubantu banji, kaaongolola akwaamba kuti: “Uli Mwana wa Leza.” Pele wakali kwaakalalila, tanaakali kwaazumizya kwaambaula, nkaambo akalimuzyi kuti ngu Kilisito. 42  Pele nobwakaca, wakazwa akuya kubusena bunyina bantu. Pele makamu aabantu akatalika kumuyandaula mane aakusika ooko nkwaakabede, eelyo bakasoleka kumukasya kuti atabasiyi. 43  Pele wakati kuli mbabo: “Akuminzi imbi ndileelede kwaambilizya makani mabotu aa Bwami bwa Leza, nkaambo eeci ncindakatuminwa.” 44  Aboobo wakaunka kayaabukambauka muzikombelo zyamu Judaya.

Bupanduluzi buyungizyidwe