Skip to content

Skip to table of contents

Bakamboni ba Jehova

Amusale mwaambo Chitonga

Luka 11:1-54

11  Lino aciindi cimwi wakali kupaila kubusena bumwi mpoonya naakamanizya, umwi wabasikwiiya bakwe wakamwaambila kuti: “Mwami, kotuyiisya mbotweelede kupaila mbubonya Johane awalo mbwaakayiisya basikwiiya bakwe.”  Mpoonya wakabaambila kuti: “Nomupaila, amwaambe kuti: ‘Taata, alisalazyigwe zyina lyako. Abuboole Bwami bwako.  Kotupa cakulya cesu cabuzuba bwasunu kweelana acakulya ciyandika buzuba buno.  Alimwi kotulekelela zibi zyesu, nkaambo andiswe tulabalekelela boonse bajisi milandu kulindiswe, alimwi utatunjizyi mumusunko.’”  Alimwi wakabaambila kuti: “Atwaambe kuti umwi akati kanu kajisi mweenzinyina eelyo akati kamasiku waunka kulinguwe akumwaambila kuti, ‘Musa, kondigwasya* zinkwa zyotatwe  nkaambo lino aawa ndaswaigwa mweenzuma uuli mulweendo, pele ndinyina cakumupa.’  Pele ooyo kali muŋanda wamwiingula kuti: ‘Koleka kundikatazya. Mulyango wajalwa kale, alimwi bana bangu basyoonto boona kale tulede limwi abulo; tandikonzyi kubuka akukupa cintu cili coonse.’  Ndimwaambila kuti: Masimpe ulabuka natayandi akumupa zyoonse nzyayanda ikutali akaambo kakuti mweenzinyina, pele akaambo kakuti wazumanana kumukombelezya.  Aboobo ndimwaambila kuti: Amuzumanane kulomba, eelyo muyoopegwa nzyomulomba; amuzumanane kuyandaula, eelyo muyoojana; amuzumanane kukonkomona, eelyo muyoojalwidwa. 10  Nkaambo muntu uuli woonse uulomba ulatambula, alimwi uuli woonse uuyandaula ulajana, alimwi imuntu uuli woonse uukonkomona uyoojalwidwa. 11  Nkaambo sena nkwali usyi akati kanu uunga ikuti mwanaakwe wamulomba nswi, ulamupa nzoka muciindi canswi? 12  Naa ikuti walomba ji, sena ulamupa kabanze? 13  Aboobo ikuti nywebo nokuba kuti muli babi, mulicizyi kupa zipego zibotu kubana banu, nkokuti Taata uuli kujulu uyooinda kupa muuya uusalala kuli baabo bamulomba!” 14  Aciindi cimwi wakali kutanda daimona lyakali kulesya muntu kwaambaula. Nolyakazwa daimona, muntu ooyo syaataambi wakaambaula. Eelyo makamu aabantu akagambwa. 15  Pele bamwi akati kabo bakati: “Utanda madaimona kwiinda munguzu zya Belezebule imweendelezi wamadaimona.” 16  Nokuba boobo, bamwi ikusola kumusunka bakatalika kumulomba citondezyo kuzwa kujulu. 17  Mbwaakazyi kuyeeya kwabo, wakabaambila kuti: “Bwami buli boonse bwaandeene bulanyonyooka, aŋanda yaandeene ilawa. 18  Aboobo ikuti awalo Saatani waandaana mwini, ino bwami bwakwe bulaima buti? Nkaambo kayi mwaamba kuti nditanda madaimona munguzu zya Belezebule. 19  Ikuti mebo kanditanda madaimona munguzu zya Belezebule, ino bana banu baatandya nguzu zyani? Akaambo kaceeci bayoomubeteka. 20  Pele ikuti munwe wa Leza ngonditandya madaimona, nkokuti Bwami bwa Leza ncobeni bwamusikila kamutabuyeeyeli. 21  Muntu singuzu uuli azilwanyo zikkwene nalindilila ŋanda yakwe, lubono lwakwe lunookwabilidwe kabotu. 22  Pele ikuti umwi uujisi nguzu kumwiinda wamulwana akumuzunda, ulamunyanga zilwanyo zyakwe zyoonse eezyo nzyaakali kusyoma, akwaabanya bamwi zyintu nzyaasaala kulinguwe. 23  Ooyo uutali kulubazu lwangu mulwani wangu, ayooyo uutabunganyi antoomwe andime ulamwaya. 24  “Ciindi muuya uusofweede nuuzwa mumuntu, ulainda mumasena aatakwe maanzi kuyandaula busena bwakulyookezyezya, alimwi watabujana busena waamba kuti, ‘Ndilapiluka kuŋanda yangu nkondakazwa.’ 25  Eelyo wasika ulajana ŋanda eeyo ilikukwidwe akubambwa kabotu. 26  Lino ulainka kuyooleta myuuya iimbi iili ciloba mibi kwiinda nguwo, eelyo yanjila mukati ilakkala mumonya oomo. Aboobo bukkale bwamamanino bwamuntu ooyo bulabija kapati kwiinda bwakusaanguna.” 27  Lino naakacili kwaamba majwi aaya, mukaintu umwi munkamu yabantu wakoompolola akumwaambila kuti: “Ulikkomene mutumbu wakakuyumwide mwida lyakwe akukunyonsya!” 28  Pele Jesu wakati: “Peepe, ibakkomene mbaabo baswiilila jwi lya Leza akulicita!” 29  Lino makamu aabantu naakali kubungana antoomwe, wakatalika kwaamba kuti: “Izyalani eeli ndibi; liyanda kupegwa citondezyo. Pele kunyina citondezyo ncoliyoopegwa ccita buyo citondezyo ca Jona. 30  Nkaambo mbubonya Jona mbwaakaba citondezyo kubantu bamu Nineve, awalo Mwana wamuntu uyooba citondezyo kuzyalani eeli. 31  Mwami mukaintu wakumusanza uyoobusyigwa mu Buzuba bwa Lubeta antoomwe abantu bamuzyalani eeli, eelyo uyoobapa mulandu, nkaambo walo wakaboola kuzwa kumagolelo aanyika kutegwa amvwe busongo bwa Solomoni. Pele amubone! Imupati kwiinda Solomoni mpali aano. 32  Bantu bamu Nineve bayoobusyigwa mu Buzuba bwa Lubeta antoomwe azyalani eeli, eelyo bayoolipa mulandu, nkaambo bakeempwa kumajwi ngaakakambauka Jona. Pele amubone! Imupati kwiinda Jona mpali aano. 33  Amana kuyasya lambe, muntu talisisi naa kulivwunika cisuwo, pele ulalibikka acibikkilo calambe kutegwa aabo banjila bamunikilwe. 34  Liso ndelambe lyamubili. Ikuti liso lyako kalilangide buyo acintu comwe,* mubili wako woonse ulaba mumumuni awalo, pele ikuti liso lyako kalilangide acintu cibi, mubili wako woonse ulaba mumudima awalo. 35  Aboobo, cenjela kutegwa mumuni uuli mulinduwe utabi mudima. 36  Eelyo ikuti mubili wako woonse kaumweka, kuunyina cibeela cili coonse camudima, mubili ooyo woonse unoomweka mbubonya mbuli lambe likumunikila.” 37  Naakamana kwaamba majwi aaya, mu Falisi umwi wakamulomba kuti akalye anguwe. Aboobo wakanjila akukkala kuti balye. 38  Pele mu Falisi ooyo wakagambwa kubona kuti wakaile kulya katasambide kumaanza.* 39  Pele Mwami wakamwaambila kuti: “Lino nywebo noba Falisi, musanzya buyo kunze aankomeki amutiba pele mumyoyo yanu muzwide buyo bulyato abubi. 40  Nywebo nobafwubafwuba! Sena ooyo wakapanga anze tali ngonguwe wakapanga amukati? 41  Nokuba boobo, amupe zyintu zili mumyoyo yanu kazili zipego zyaluse,* eelyo zyintu zyanu zimwi zyoonse ziyoosalala. 42  Pele maawe kulindinywe noba Falisi, nkaambo mulapa cakkumi cazisyu zyaluyuni azisyu zimwi zyoonse, pele tamubikkili maano kubululami aluyando lwa Leza! Eezyi zyintu mwakaleelede kuzicita, pele eezyo zyintu zimwi tiimwakeelede kuzisotoka azyalo. 43  Maawe kulindinywe noba Falisi, nkaambo muyanda zyuuno zyakumbele muzikombelo akwaanzyigwa mumisika! 44  Maawe kulindinywe, nkaambo muli mbuli zyuumbwe eezyo zitalibonyi cakuti bantu baleenda aalinzizyo pele kabatazyi!” 45  Mukwiingula, umwi wabaabo bazyi Mulawo wakamwaambila kuti: “Mwiiyi, mukwaamba boobo watutukila andiswe.” 46  Mpoonya wakati: “Maawe akulindinywe nomuzyi Mulawo nkaambo mutukka bantu mikuli iiminya kunyamuna, pele nywebo nobeni tamusoli kwiiguma mikuli eeyo nokuba akanwe buyo! 47  “Maawe kulindinywe nkaambo muyaka zyuumbwe zyabasinsimi, kakuli bamauso mbabakabajaya! 48  Ncobeni muliizyi micito yabamauso alimwi mulaizuminizya, nkaambo balo bakajaya basinsimi pele nywebo muyaka zyuumbwe zyabo. 49  Akaambo kaceeci busongo bwa Leza abwalo bwakati: ‘Ndiyoobatumina basinsimi abatumwa, eelyo bamwi bayoobajaya akubapenzya, 50  aboobo mulandu wakutila bulowa bwabasinsimi boonse bakajaigwa kuzwa kumalengelo aanyika* uyoopegwa zyalani eeli, 51  kuzwa kubulowa bwa Abelo kusikila kubulowa bwa Zakaliya, iwakajaigwa akati kacipaililo atempele.’ Inzya, ndimwaambila kuti: Mulandu ooyu uyoopegwa zyalani eeli. 52  “Maawe kulindinywe nomuzyi Mulawo, nkaambo mwakanyanga bantu kkii waluzyibo; nywebo nobeni tiimwakanjila alimwi aabo bakali kunjila mwakali kubasinkila!” 53  Lino naakazwa ooko, balembi aba Falisi bakatalika kumubumba canguzu akumubuzya mibuzyo aimbi minji, 54  kabamuteyede kutegwa aamba majwi amwi bamupe mulandu.

Bupanduluzi buyungizyidwe

Mu Chigiliki, “Ndikweletesye.”
Amubone bupanduluzi buyungizyidwe kuli Mt 6:22, 23.
Ooku nkusamba kweendelana acilengwa caba Falisi. Amubone Mk 7:3.
Amubone bupanduluzi buyungizyidwe kuli Mt 6:2.
Amubone bupanduluzi buyungizyidwe kuli Mt 25:34.