Skip to content

Skip to table of contents

Bakamboni ba Jehova

Amusale mwaambo Chitonga

Juda 1:1-25

1  Ndime Juda, muzike wa Jesu Kilisito pele imunyina Jakobo, nendilembela baabo bakaitwa ibayandwa a Leza Taata alimwi ibabambilidwe Jesu Kilisito kuti:  Amuyungizyilwe luse, luumuno alimwi aluyando.  Nobayandwa, nokuba kuti ndakali kusoleka kusikila mpondigolela kuti ndimulembele makani aalufwutuko ndotujisi toonse, ndakabona kuti ndeelede kumulembela makani aakumukulwaizya kuti muyume kulwanina lusyomo ilwakapegwa ciindi comwe buyo kubasalali.  Ndacita boobo nkaambo kuli bantu bamwi ibali kunjila akati kanu cakusobelela, aabo kuzwa kaindi ibasalidwe a Magwalo kuti babe alubeta oolu—ibantu basampaula Leza, ibasandula luzyalo lwa Leza kuba cilitamizyo cakuba abukkale busesemya, alimwi batasyomeki kuli yooyo Mukamwini alimwi Mwami wesu uuli alikke, Jesu Kilisito.  Nokuba kuti mulizizyi kabotu zyintu zyoonse eezyi, ndiyanda kumuyeezya kuti Jehova wakabafwutula bantu bamwi kuzwa munyika ya Egepita, pele kumbele wakabanyonyoona aabo ibatakali kutondezya lusyomo.  Alimwi ibangelo batakazumanana mubusena bwabo bwakusaanguna pele ibakasiya busena bwabo bwakukkala bubeelede ulibayobwede kabaangidwe nketani lyoonse mumudima uusiya mbi kusikila nobayoobetekwa mubuzuba bupati.  Mbubonya buyo, Sodoma a Gomola alimwi aminzi yakali munsi-munsi, ayalo yakacita bwaamu butaambiki akutobela zisusi zyanyama zitondwa. Eeyi ibikkidwe kumbele lyesu kuti cibe cikozyanyo cakutucenjezya kwiinda mukwiibeteka akwiipa cisubulo camulilo uutamani.  Nokuba boobo, bantu aaba abalo mbaasikulota, basofwaazya mubili, banyansya beendelezi alimwi basampaula baabo balemekwa.  Pele Mikayeli silutwe wabangelo naakaimpana a Diabolosi alimwi naakali kukazyanya anguwe kujatikizya mubili wa Musa, kunyina naakasola kumubeteka cakumusampaula pe, pele wakati: “Jehova akukalalile.” 10  Nokuba boobo, bantu aaba basampaula zyintu zyoonse nzyobatamvwisyi ncobeni. Alimwi zyintu zyoonse nzyobamvwisya kweelana aluzyibo ndobakalengwa andulo mbubonya mbuli banyama batayeeyi, nzyobazumanana kulisofwaazya anzizyo. 11  Maawe kuli mbabo, nkaambo batobela nzila ya Kaini, alimwi babalikila munzila iilubide ya Balamu kutegwa bajane bulumbu, alimwi banyonyooka muŋambawido yabuzangi ya Kola! 12  Aaba bantu mabwe aatalibonyi mumaanzi mumapobwe aanu aaluyando ciindi nobalya andinywe, mbeembezi balisanina beni cakutayoowa; makumbi aatakwe maanzi aapepululwa amuwo ooku akooku; masamu aatazyede micelo kuciindi cangawo,* aafwide ziindi zyobilo, aazyulidwe; 13  mayuwe aamulwizi aayoosya aagusya ccovwu lyawo lyazyintu zyuusya nsoni; ninyenyeezi zitakwe nzila ini-ini moziinda, iziyobwedwe mudima uusiya mbi mane kukabe kutamani. 14  Inzya, Enoki, imuntu waciloba mumulongo kuzwa kuli Adamu awalo wakasinsima kujatikizya mbabo, naakati: “Amubone! Jehova wakaboola amakumi-makumi aazyuulu zyabangelo bakwe basalala, 15  kuti abeteke bantu boonse, akubazula boonse basampaula Leza mumicito yabo iisampaula Leza njobakacita munzila iisampaula Leza, alimwi akujatikizya zyintu zyoonse ziyumya mate nzyobakali kumwaamba basizibi basampaula Leza.” 16  Aaba bantu mbaasikuŋuŋuna, lyoonse balatongooka kujatikizya bukkale bwabo, batobela zisusi zyabo beni, alimwi milomo yabo yaamba majwi aakulidunda, kulubazu lumwi balumbaizya bantu kutegwa baligwasye lwabo beni. 17  Pele nywebo nobayandwa, amuyeeye majwi aakaambwa musyule abatumwa ba Mwami wesu Jesu Kilisito, 18  mbobakali kumwaambila kuti: “Kuciindi camamanino kuyooba basikasampusampu, ibayootobela zisusi zyabo beni kutegwa bacite zyintu zisampaula Leza.” 19  Aaba mbabantu baandaanya bamwi, ibajisi zilengwa zyabunyama, ibatabikkili maano kuzyintu zyakumuuya.* 20  Pele nywebo, nobayandwa, amuliyake nobeni antalisyo yalusyomo lwanu lusalalisya alimwi kamupaila amuuya uusalala 21  ikutegwa muzumanane kukkala muluyando lwa Leza, eelyo nomulindila luse lwa Mwami wesu Jesu Kilisito ilusololela kubuumi butamani. 22  Kunze lyaboobo, amuzumanane kubafwida luse aabo bamwi ibadooneka; 23  amubafwutule kwiinda mukubakwempa kuzwa mumulilo. Pele amuzumanane kubafwida luse bamwi, kamucita boobo cakuyoowa, kumwi kamusulaika nociba cisani cabisyigwa amubili wanyama. 24  Lino kuli yooyo uukonzya kumukwabilila kutegwa mutalebwi alimwi akumupa kwiima nji cakukondwa kapati kamutakwe kampenda kumbele lyabulemu bwakwe, 25  kuli Leza omwe buyo Mufwutuli wesu kwiinda muli Jesu Kilisito Mwami wesu, akube bulemu, bupati, nguzu alimwi abweendelezi kuzwa lili alili asunu alimwi alyoonse mane kukabe kutamani. Ameni.

Bupanduluzi buyungizyidwe

Mu Chigiliki, “kumamanino aaciindi (citegwa) lituba maila.”
Mu Chigiliki, “ibatajisi muuya.”