Skip to content

Skip to table of contents

Bakamboni ba Jehova

Amusale mwaambo Chitonga

Johane 19:1-42

19  boobo aciindi eeco Pilato wakabweza Jesu akumukwibbaula.  Mpoonya basikalumamba bakaluka musini wamamvwa akumusamika kumutwe alimwi bakamusamika acisani caatala cacisombo;  mpoonya bakali kuboola kulinguwe akwaamba kuti: “Wabonwa, O Mwami waba Juda!” Alimwi bakamuuma mbayi kumeso.  Mpoonya Pilato wakazwida anze alimwi akwaambila nkamu yaba Juda kuti: “Amubone! Ndamuleta anze kulindinywe ikutegwa muzyibe kuti kunyina mulandu ngundajana mulinguwe.”  Aboobo Jesu wakazwida anze, kasamide musini wamamvwa acisani caatala cacisombo. Mpoonya Pilato wakati kuli mbabo: “Amulange! Ngomwaalumi ooyu!”  Pele basilutwe babapaizi abakapaso nobakamubona, bakoompolola kuti: “Mugagaile acisamu! Mugagaile acisamu!” Pilato wakati kuli mbabo: “Amumutole nobeni mukamugagaile acisamu, nkaambo kunyina mulandu ngundajana mulinguwe.”  Iba Juda bakamwiingula kuti: “Tulijisi mulawo, eelyo kweelana amulawo muntu ooyu weelede kufwa, nkaambo wakalyaamba kuti Mwana wa Leza.”  Aboobo, Pilato naakamvwa nzyobakali kwaamba, wakayoowa kapati;  eelyo wakanjila muŋanda yakwe yabweendelezi alimwi, akubuzya Jesu kuti: “Ino uzwa kuli?” Pele Jesu taakamwiingula pe. 10  Aboobo Pilato wakati kulinguwe: “Sena tokoondiingula? Sena tozyi kuti ndilijisi nguzu zyakukwaangununa alimwi anguzu zyakukugagaila acisamu?” 11  Jesu wakamwiingula kuti: “Notajisi nguzu zili zyoonse kujatikizya ndime nowatakapegwa nzizyo kuzwa kujulu. Nkakaambo kaako muntu ooyo wakandaaba kulinduwe ujisi cibi cipati kapati.” 12  Akaambo kaceeci Pilato wakasoleka kujana nzila yakuti amwaangunune. Pele ba Juda bakoompolola kuti: “Ikuti naa umwaangunune muntu ooyu, nkokuti toli mulongwe wa Kaisala. Kufwumbwa muntu uulyaamba kuti mwami, ukazyanya a Kaisala.” 13  Aboobo naakamvwa majwi aaya, Pilato wakaleta Jesu anze, akukkala acuuno calubeta kubusena butegwa Ibbuwa Lyakayalwa Mabwe, pele mu Chihebulayo ibutegwa Gabbata. 14  Lino bwakali buzuba bwakulibambila Pobwe lya Kwiindilila; ciindi cakali afwaafwi awoola lyacisambomwi.* Eelyo wakaambila ba Juda kuti: “Amubone! Ngooyu mwami wanu!” 15  Pele bakoompolola balaamba: “Mulobye! Mulobye! Mugagaile acisamu!” Pilato wakati kuli mbabo: “Sena ndimugagaile acisamu mwami wanu?” Basilutwe babapaizi bakaingula kuti: “Tunyina mwami umbi kunze lya Kaisala.” 16  Aboobo aciindi eeco wakamupa kuli mbabo kutegwa bakamugagaile acisamu. Mpoonya basikalumamba bakamutola Jesu. 17  Kanyamwide cisamu cakwe cakupenzyezya, wakazwa akuya kubusena butegwa Cipapa Camutwe, ibutegwa Gologota mu Chihebulayo; 18  eelyo ooko bakamugagaila acisamu, abantu bamwi bobilo ibakali anguwe, kulubazu alumwi kakuli omwe, pele walo Jesu kali akati. 19  Alimwi Pilato wakalemba zyina lyabulemu akulibikka acisamu cakupenzyezya. Lyakalembedwe kuti: “Jesu muna Nazaleta Mwami waba Juda.” 20  Aboobo iba Juda banji bakalibala zyina eeli, nkaambo ibusena ooko nkwaakagagaililwa Jesu bwakali afwaafwi amunzi; alimwi lyakalembedwe mu Chihebulayo, mu Chilatini amu Chigiliki. 21  Pele basilutwe babapaizi baba Juda bakatalika kwaambila Pilato kuti: “Utalembi kuti ‘Mwami waba Juda,’ pele kolemba kuti wakaamba kuti, ‘Ndili Mwami waba Juda.’” 22  Pilato wakaingula kuti: “Eeco ncindalemba, ndalemba.” 23  Lino basikalumamba nobakamana kumugagaila acisamu Jesu, bakabweza zisani zyakwe zyaatala akuzizapaula muzibeela zyone, sikalumamba aumwi wakabweza cibeela comwe. Alimwi bakabweza acisani cakwe camukati. Pele cisani eeci kunyina mpocakaswaanganizyidwe amuluko wantali, mbwaanga cakali buyo comwe kuzwa mujulu kusikila ansi. 24  Aboobo bakaambauzyanya kabati: “Tutacizapuli pe, pele atuume cisolo kutegwa tubone naa cilaba cani.” Bakacita boobo kutegwa luzuzikizyigwe lugwalo lwaamba kuti: “Bakaabana zisani zyangu zyaatala, alimwi cisani cangu camukati bakacuumina cisolo.” Aboobo basikalumamba bakazicita ncobeni zyintu eezyi. 25  Pele munsi aacisamu ca Jesu cakupenzyezya kwakaimvwi banyina, mwanaakwabo banyina mukaintu, Maliya muka Kilopa a Maliya Magadalene. 26  Aboobo Jesu naakabona banyina alimwi asikwiiya ngwaakali kuyanda kabaimvwi munsi-munsi, wakaambila banyina kuti: “Amubone! Ngooyo mwana wanu!” 27  Mpoonya wakaambila sikwiiya ooyo kuti: “Bona! Mbaabo banyoko!” Aboobo kuzwida ciindi eeco sikwiiya ooyo wakabatola kuŋanda yakwe. 28  Musyule lyazyintu eezyi, Jesu naakazyiba kuti lino zyintu zyoonse zyazuzikizyigwa, ikutegwa azuzikizye lugwalo wakati: “Ndafwa nyota.” 29  Aawo kwakali nongo yakazwide waini uupapide. Aboobo bakasomeka nsinsa iinyikidwe muwaini ooyo uupapide kukasamu kahisopo akwiitambikizya kumulomo wakwe. 30  Lino naakaulabila waini uupapide, Jesu wakati: “Zyazuzikizyigwa!” Mpoonya wakakotama, waleka kuyoya. 31  Mpoonya, ikutegwa mibili itazumanani kiili azisamu zyakupenzyezya mu Sabata mbwaanga bwakali Buzuba bwa Kulibambila, (nkaambo buzuba bwa Sabata eeyo bwakali bupati,) iba Juda bakalomba Pilato kuti maulu aabo atyolaulwe akuti mibili yabo igusyigwe. 32  Aboobo basikalumamba bakaboola akutyola maulu aamwaalumi wakusaanguna aamwaalumi ooyo uumbi wakali antoomwe anguwe. 33  Pele nobakasika aali Jesu, bakabona kuti ulifwide kale, aboobo kunyina nobakaatyola maulu aakwe. 34  Nokuba boobo, umwi wabasikalumamba wakamuyasa sumo mumabambo, eelyo mpoonya aawo kwakazwa bulowa amaanzi. 35  Eelyo ooyo iwakalibonena zyintu eezyi wapa bumboni, kumane bumboni bwakwe mbwamasimpe alimwi muntu ooyo ulizyi kuti waamba zyintu zyamasimpe, ikutegwa anywebo musyome. 36  Mubwini, zyintu eezyi zyakacitika ikutegwa luzuzikizyigwe lugwalo lwaamba kuti: “Kunyina cifwuwa cakwe niciba comwe iciyootyolwa.” 37  Alimwi lugwalo lumbi lwaamba kuti: “Bayoolanga kuli yooyo ngobakayasa.” 38  Lino zyintu eezyi nozyakainda, Josefa waku Alemateya, sikwiiya wa Jesu iwakali kulisisa akaambo kakuyoowa ba Juda, wakalomba Pilato kuti agusye mubili wa Jesu; eelyo Pilato wakamuzumizya. Aboobo wakaboola akutola mubili wakwe. 39  Nikodemo imuntu uulya wakaswaya Jesu masiku ciindi cakusaanguna, awalo wakaboola alimwi wakaleta cibbudu catununkilizyo twamulo alimwi aaloye, icilema makkilogilamu aatandila kumakumi otatwe aatatu. 40  Aboobo bakabweza mubili wa Jesu akuuvwungaila mumilembo antoomwe atununkilizyo, kweelana acilengwa caba Juda cakulibambila kuzikka. 41  Lino kubusena ooko nkwaakagagaidwe acisamu kwakali muunda, alimwi mumuunda ooyo kwakali cuumbwe cipya catakaninga kuzikkwa muntu. 42  Akaambo kakuti bwakali Buzuba bwa Kulibambila bwaba Juda, alimwi mbwaanga cuumbwe cakali afwaafwi, bakamuzikka Jesu oomo.

Bupanduluzi buyungizyidwe

“Nkokuti afwaafwi a 12 kiloko yamasyikati, kutalika kubala kuzwa mpolizwida zuba.”