Skip to content

Skip to table of contents

Bakamboni ba Jehova

Amusale mwaambo Chitonga

Johane 17:1-26

17  Jesu naakamana kwaamba zyintu eezyi, wakalanga kujulu akwaamba kuti: “Taata, ciindi casika lino; komulemya mwanaako kuti awalo akulemeke,  ikutegwa mbubonya walo mbowamupa nguzu zyakweendelezya bantu boonse, akonzye kupa buumi butamani kumweelwe woonse wabaabo mbomupede.  Eeci caamba buumi butamani, ikuti bakuzyiba yebo O Leza mwini-mwini ooli olikke, ayooyo ngookatuma, Jesu Kilisito.  Ndakulemeka anyika, kwiinda mukumanizya mulimo ngookandipa kuti ndicite.  Aboobo Taata kondilemya lino kumbali lyako abulemu mbondakajisi nendakacili anduwe inyika kaitanaba.  “Ndabazyibya zyina lyako bantu mbookandipa munyika. Bakali bako, pele wakabapa kulindime alimwi balibamba jwi lyako.  Lino bazyiba kuti zyintu zyoonse nzyookandipa zyakazwa kulinduwe;  nkaambo ndabaambila majwi ngowakandipa, eelyo baatambula akusinizya kuti ndakaboola kandili mwiiminizi wako alimwi basyoma kuti nduwe wakandituma.  Ndalomba kujatikizya mbabo; tandilombi cili coonse kujatikizya nyika, pele kujatikizya buyo baabo mbondipede; nkaambo mbibako, 10  alimwi zyintu zyangu zyoonse nzizyako azyako nzizyangu, alimwi ndalemekwa akati kabo. 11  “Alimwi tandicili munyika, pele balo bali munyika, mebo ndiboola kulinduwe. Taata Oosalala, kobakwabilila akaambo kazyina lyako eelyo ndyookandipa, ikutegwa babe bamwi mbubonya mbotubede swebo. 12  Nendakali ambabo ndakali kubakwabilila akaambo kazyina lyako ndyookandipa; alimwi ndababamba eelyo kunyina umwi wabo wasweeka ccita buyo mwana walunyonyooko, ikutegwa lugwalo luzuzikizyigwe. 13  Pele lino ndiboola kulinduwe, alimwi ndaamba zyintu eezyi munyika kutegwa kukondwa kwangu kuzyulile muli mbabo. 14  Ndabapa jwi lyako, pele nyika yabasula, nkaambo tabali banyika mbubonya mebo mbonditali wanyika. 15  “Tandikulombi kuti ubagusye munyika, pele kuti ubakwabilile akaambo kamubi. 16  Tabali banyika mbubonya mebo mbonditali wanyika. 17  Kobasalazya akasimpe; ijwi lyako nkasimpe. 18  Mbubonya yebo mbowakandituma munyika, andime ndakabatuma munyika. 19  Alimwi ndazumanana kusalala akaambo kambabo, ikutegwa abalo basalazyigwe akasimpe. 20  “Tandilombeli baaba balikke pe, pele ndilabalombela abaabo bandisyoma kwiinda mumajwi aabo; 21  ikutegwa boonse babe bamwi mbubonya yebo Taata andime mbotukamantene, ikuti abalo kabakamantene andiswe, ikutegwa nyika isyome kuti nduwe wakandituma. 22  Alimwi ndabapa bulemu mbondipede, ikutegwa babe bamwi mbubonya swebo mbotuli bamwi. 23  Mebo ambabo tukamantane alimwi ayebo ukamantane andime, ikutegwa babe bamwi cakulondola, ikuti nyika izyibe kuti nduwe wakandituma akuti ulabayanda balo mbubonya mbowali kundiyanda mebo. 24  Taata, ndiyanda kuti aabo mbowandipa abalo bakabe andime ooko nkweyooba, ikutegwa bakabone bulemu mbowandipa, nkaambo wakandiyanda kaitanaba nyika. 25  Taata ooluleme, inyika ncobeni taikuzyi pe; pele mebo ndilikuzyi alimwi bantu aaba balizyi kuti nduwe wakandituma. 26  Alimwi ndabazyibya zyina lyako alimwi ndiyoolizyibya ikutegwa luyando ndookali kundiyanda andulo lube muli mbabo alimwi mebo ambabo tukamantane.”

Bupanduluzi buyungizyidwe