Skip to content

Skip to table of contents

Bakamboni ba Jehova

Amusale mwaambo Chitonga

Johane 11:1-57

11  Lino kwakali mwaalumi umwi wakacisidwe, Lazalo waku Betaniya, wamumunzi muzwa Maliya amwanaakwabo musimbi Maata.  Mubwini, Maliya uulya wakananika Mwami mafwuta aanunkila akumupukuta kumaulu amasusu aakwe nguwakajisi munyinandumi Lazalo ooyo wakacisidwe.  Aboobo bacizyi bakwe bakamutumina mulomo balaamba: “Mwami, bona! Ooyo ngoyandisya ulaciswa.”  Pele Jesu naakamvwa boobo wakati: “Bulwazi oobu tabuli bwalufwu pe, pele mbwabulemu bwa Leza ikutegwa Mwana wa Leza alemekwe kwiinda muli mbubo.”  Lino Jesu wakali kumuyanda Maata amwanaakwabo musimbi a Lazalo.  Nokuba boobo, naakamvwa kuti wakali kuciswa, wakakkala mazuba ambi obilo kubusena ooko nkwaakabede.  Mpoonya wakaambila basikwiiya bakwe kuti: “Atuunke mu Judaya alimwi.”  Basikwiiya bakwe bakamwaambila kuti: “Labbi, caino-ino aawa bana Judaya bakali kuyanda kukupwaya mabwe, aboobo sena nkoyanda kuunka alimwi?”  Jesu wakaingula kuti: “Sena buzuba tabujisi mawoola aali kkumi mwaabili aamumuni? Ikuti muntu keenda mumumuni, talinontoli kucintu cili coonse nkaambo ubwene mumuni wanyika eeyi. 10  Pele ikuti muntu keenda masiku, ulalinontola kucintu cimwi nkaambo mumuni tuuko mulinguwe.” 11  Naakamana kwaamba zyintu eezyi, wakayungizya kuti: “Lazalo mulongwe wesu uloona, pele ndilaunka kuyoomubusya.” 12  Aboobo basikwiiya bakwe bakati kulinguwe: “Mwami, ikuti naa uloona, ulapona.” 13  Nokuba boobo Jesu wakali kwaamba zyalufwu lwakwe. Pele balo bakali kuyeeya kuti wakali kwaamba koona kwaŋonzi. 14  Aboobo aciindi eeco, cakutainda mumbali Jesu wakabaambila kuti: “Lazalo wafwa, 15  alimwi ndakondwa akaambo kandinywe kuti tiindaliko, ikutegwa musyome. Pele atuunke kulinguwe.” 16  Aboobo Tomasi, iwakali kwiitwa kuti Wamaanga, wakaambila basikwiiyanyina kuti: “Atuunke andiswe, ikutegwa tukafwe anguwe.” 17  Lino Jesu naakasika, wakajana kwakaindide kale mazuba one kali mucuumbwe. 18  Lino ku Betaniya kwakali kufwaafwi aku Jelusalemu, wakali buyo musinzo wamakkilomita aatandila kuli otatwe. 19  Aboobo ba Juda banji bakaliboolede kukuumbulizya Maata a Maliya ibakafwidwa munyinandumi. 20  Eelyo Maata naakamvwa kuti Jesu wakali kuboola, wakamucingauzya; pele Maliya walo wakalikkede aŋanda. 21  Aboobo Maata wakati kuli Jesu: “Mwami, ikuti nowakaliko kuno, mukwesu naatakafwa. 22  Nokuba boobo, ndilizyi noliba lino kuti nozivwula buti zyintu nzyolomba Leza, Leza ulakupa.” 23  Jesu wakati kulinguwe: “Imunyoko ulabuka.” 24  Maata wakati kulinguwe: “Ndilizyi kuti uyoobuka mububuke mubuzuba bwamamanino.” 25  Jesu wakati kulinguwe: “Mebo ndendime bubuke alimwi abuumi. Ooyo uundisyoma, nokuba kuti wafwa uyooba muumi alimwi; 26  alimwi woonse uupona akundisyoma kunyina nayoofwa. Sena ulaasyoma makani aaya?” 27  Wakati kulinguwe: “Inzya Mwami; Ndasyoma kuti nduwe Kilisito Mwana wa Leza, Ooyo weelede kuboola munyika.” 28  Naakamana kwaamba majwi aaya, wakaunka akuyooita Maliya mucizyi wakwe, wakamwaambila kumbali ulaamba: “Mwiiyi wasika ulakwiita.” 29  Maliya naakamvwa boobu, wakanyamuka cakufwambaana akuunka kuyoomucinga. 30  Mubwini Jesu tanaakaninga kunjila mumunzi, pele wakacili kubusena nkwaakamujanide Maata. 31  Mpoonya ba Juda mbocakali limwi muŋanda alimwi ibakali kumuumbulizya bakabona Maliya kanyamuka cakufwambaana akuzwa. Bakamutobela kabayeeya kuti wakali kuunka kucuumbwe kuyoolilila nkuko. 32  Maliya naakasika ooko nkwaakabede Jesu akumubona, wakawida kumaulu aakwe akumwaambila kuti: “Mwami, ikuti nowakaliko kuno, mukwesu naatakafwa.” 33  Aboobo Jesu naakabona Maliya kalila aba Juda ibakaboola anguwe kabalila, wakanyongana kapati mumoyo alimwi wakapenga; 34  mpoonya wakati: “Ino mwakamuzikkila kuli?” Bakamwaambila kuti: “Mwami, koboola ubone.” 35  Jesu yakamweenda misozi. 36  Aboobo ba Juda bakatalika kwaamba kuti: “Amubone, eelyo kaka wakali kumuyanda!” 37  Pele bamwi akati kabo bakati: “Sena muntu ooyu iwakajalula meso aamoofwu tanaakali kukonzya kumulesya kufwa mwaalumi ooyu?” 38  Aboobo Jesu naakanyongana alimwi mumoyo, wakasika kucuumbwe. Cuumbwe eeco yakali mpangala alimwi kumulyango kwakajalidwe bbwe. 39  Jesu wakati: “Amuligusye bbwe.” Maata, imucizyi wasikwaazwa wakamwaambila kuti: “O Mwami, lino weelede kuti ulanunka nkaambo kwainda mazuba one.” 40  Jesu wakati kulinguwe: “Sena tiindakwaambila kuti, ikuti naa wasyoma ulabona bulemu bwa Leza?” 41  Aboobo bakaligusya bbwe. Mpoonya Jesu wakalanga kujulu akwaamba kuti: “Taata, ndakulumba nkaambo wandimvwa. 42  Masimpe, ndalizyi kuti lyoonse ulandimvwa; pele akaambo kankamu eeyi iindizingulukide ndaamba boobu, ikutegwa basyome kuti wakandituma.” 43  Eelyo naakamana kwaamba majwi aaya, wakoompolola ajwi ipati kuti: “Lazalo, kozwa oomo!” 44  Imuntu ooyo wakafwide wakazwa kazambaidwe zisani kumaulu akumaanza alimwi kavwumbidwe cisani kubusyu bwakwe. Jesu wakati kuli mbabo: “Amumuzambulule mumuleke ayende.” 45  Aboobo ba Juda banji ibakaboolede kuli Maliya, alimwi ibakabona ncaakacita Jesu bakamusyoma; 46  pele bamwi bakaunka kuba Falisi akuyoobaambila zyintu nzyaakacita Jesu. 47  Aboobo basilutwe babapaizi aba Falisi bakabungana mu Nkuta Mpati Yaba Juda akutalika kwaamba kuti: “Ino tulacita nzi, nkaambo muntu ooyu ucita zitondezyo zinji? 48  Ikuti tumuleke buyo boobu, boonse balamusyoma eelyo bana Loma balaboola akubweza busena bwesu acisi cesu.” 49  Pele umwi akati kabo, Kayafa, iwakali mupaizi mupati mwaka ooyo wakati kuli mbabo: “Kunyina ncomuzyi pe, 50  alimwi tamubwene kuti ndinywe ngocigwasya ikuti muntu omwe afwide bantu muciindi cakuti cisi coonse cinyonyoonwe.” 51  Eeci tanaakacaamba mukuyanda kwakwe mwini pe; pele akaambo kakuti wakali mupaizi mupati mwaka ooyo, wakasinsima kuti Jesu wakali kuyoofwida cisi cabo, 52  alimwi ikutali cisi cabo cilikke, pele akuti ababunganye antoomwe bana ba Leza bamwaikide. 53  Aboobo kuzwa buzuba oobo bakamvwana kuti bamujaye. 54  Eelyo Jesu tanaakacili kweenda antangalala akati kaba Juda, pele wakazwa ooko akuunka kubusena bwakali afwaafwi ankanda mumunzi uutegwa Efulemu, nkwaakaakukkala abasikwiiya bakwe. 55  Lino Pobwe lya Kwiindilila lyaba Juda lyakali afwaafwi, alimwi bantu banji bamunyika eeyo bakatanta kuya ku Jelusalemu kutegwa bakalisalazye kweelana acilengwa cabo kalitanatalika Pobwe lya Kwiindilila. 56  Lino bakatalika kumuyandaula Jesu alimwi nobakali kwiima-ima mutempele bakali kubuzyanya kuti: “Ino muyeeya buti? Sena muyeeya kuti takooboolela limwi kupobwe?” 57  Pele basilutwe babapaizi aba Falisi bakapede malailile aakuti kufwumbwa muntu uuzyiba nkwaakabede, wakeelede kubaambila ikutegwa bamujate.

Bupanduluzi buyungizyidwe