Skip to content

Skip to table of contents

Bakamboni ba Jehova

Amusale mwaambo Chitonga

Johane 10:1-42

10  “Ncobeni ndimwaambila kuti, Ooyo uutanjili mucaanda cambelele kwiinda kumulyango, pele uutanta akunjilila kumbi, muntu ooyo mubbi alimwi ngusikusaala.  Pele ooyo uunjilila kumulyango ngomweembezi wambelele.  Imulindizi wamulyango ulamujalwida, eelyo imbelele zilaliswiilila jwi lyakwe alimwi wiita mbelele zyakwe mazyina akuzisolweda kuya anze.  Naagusya mbelele zyakwe zyoonse, ulazisolweda, eelyo zilamutobela nkaambo zililizyi jwi lyakwe.  Imweenzu kunyina nozimutobela naaceya, pele zilamutija nkaambo tazilizyi ijwi lyabeenzu.”  Jesu wakabaambila maambilambali aaya; pele tiibakazyiba ncozyakali kwaamba zyintu eezyi nzyaakali kubaambila.  Aboobo Jesu wakaamba alimwi kuti: “Ncobeni ndimwaambila kuti, Ndili mulyango wambelele.  Boonse ibakaboola mubusena bwangu kabalyaamba kuti ndime, mbabbi alimwi mbaasikusaala; pele mbelele tiizyakabaswiilila.  Ndili mulyango; kufwumbwa uunjila kwiinda mulindime uyoofwutulwa, alimwi unoonjila akuzwa akujana macelelo. 10  Mubbi tabooli buyo, pele uboolela kubba, kujaya akunyonyoona. Ndakaboolela kuti zibe abuumi akupona buumi butamani. 11  Ndili mweembezi mubotu; mweembezi mubotu utuulila mbelele buumi bwakwe. 12  Imubelesi sikuvwozyegwa buyo mali, uutali mweembezi alimwi uutali mukamwini mbelele, abona umpe kaboola ulazisiya mbelele akutija—eelyo umpe ulaziluma akuzimwaya— 13  nkaambo mubelesi sikuvwozyegwa buyo mali alimwi takwe makani ambelele. 14  Ndili mweembezi mubotu alimwi mbelele zyangu ndilizizyi alimwi azyalo zilindizyi, 15  mbubonya Taata mbwandizyi andime mbondimuzyi Taata; alimwi ndituulila mbelele buumi bwangu. 16  “Alimwi ndilijisi mbelele zimbi izitali zyamucaanda ecino; azyalo eezyo ndeelede kuzileta alimwi ziyooswiilila jwi lyangu, eelyo ziyooba itanga lyomwe alimwi zinooli amweembezi omwe. 17  Eeci ncandiyandila Taata, nkaambo ndituula buumi bwangu kutegwa ndikabutambule alimwi. 18  Kunyina muntu wandinyanga mbubo, pele ndime ndemwini ndalisungula kubutuula. Ndilijisi nguzu zyakubutuula anguzu zyakubutambula alimwi. Malailile aaya ndakaatambula kuli Taata.” 19  Kwakaba kwaandaana alimwi akati kaba Juda akaambo kamajwi aaya. 20  Bunji bwabo bakali kwaamba kuti: “Unjidwe daimona alimwi ulisondokede. Nkaambo nzi ncomumuswiilila?” 21  Bamwi bakali kwaamba kuti: “Aaya taali majwi aamuntu uunjidwe daimona. Sena daimona lilakonzya kujalula meso aabantu boofwu?” 22  Aciindi eeco pobwe lyakwaaba tempele lyakacitika mu Jelusalemu. Cakali ciindi camupeyo, 23  alimwi Jesu wakali kweenda mutempele mukkoce lya Solomoni. 24  Aboobo ba Juda bakamuzinguluka akutalika kumwaambila kuti: “Ino ulatupa kuzumbauzya kwaciindi cilamfwu buti? Ikuti koli ndonduwe Kilisito, kotwaambila cakutainda mumbali.” 25  Jesu wakabaingula kuti: “Ndamwaambila kale, pele tamusyomi pe. Imilimo njondicita muzyina lya Taata, njiipa bumboni kujatikizya ndime. 26  Pele tamusyomi pe nkaambo tamuli mbelele zyangu. 27  Imbelele zyangu zilaliswiilila ijwi lyangu, ndilizizyi alimwi zilanditobela. 28  Ndizipa buumi butamani, aboobo kunyina noziyoonyonyoonwa limbi, alimwi kunyina uuyoozikwempa mujanza lyangu. 29  Ncaandipa Taata ncintu cipati kwiinda zyintu zyoonse, alimwi kunyina uunga wazikwempa mujanza lya Taata. 30  Mebo a Taata tuli bamwi.” 31  Iba Juda bakabweza mabwe alimwi kuti bamupwaye. 32  Jesu wakati kuli mbabo: “Ndakamutondezya milimo mibotu minji iizwa kuli Taata. Mulimo nzi akati kayeeyi ngomuyanda kundipwayila mabwe?” 33  Iba Juda bakamwiingula kuti: “Tuyanda kukupwaya mabwe ikutali akaambo kamulimo mubotu, pele akaambo kakutukila Leza, nkaambo yebo nokuba kuti uli muntu uulya maila, ulibikka kuba leza.” 34  Jesu wakabaingula kuti: “Sena takulembedwe mu Mulawo wanu kuti, ‘Ndakaamba kuti: “Muli baleza”’? 35  Ikuti aabo jwi lya Leza mbolyakapa mulandu wakabaita kuti ‘baleza,’ alimwi Magwalo taakonzyi kuba aabuyo, 36  sena mebo nendakasalazyigwa akutumwa a Taata munyika mundaambila kuti, ‘Utukila Leza,’ akaambo kakuti ndaamba kuti, Ndili Mwana wa Leza? 37  Ikuti tandiciti milimo ya Taata, mutandisyomi pe. 38  Pele ikuti kandicita njiyo, nokuba kuti tamundisyomi, amusyome milimo kutegwa muzyibe akuzumanana kuzyiba kuti mebo a Taata tulikamantene.” 39  Aboobo bakasola kumujata alimwi; pele wakatijila nkobatakali kukonzya kusika. 40  Aboobo wakaunka alimwi mutala lya Jodano kubusena nkwaakali kubbapatizyila Johane kusaanguna, akuyookkala ooko. 41  Alimwi bantu banji bakaunka kulinguwe akutalika kwaamba kuti: “Johane masimpe kunyina naakacita citondezyo nociba comwe, pele zyintu zyoonse nzyaakaamba Johane kujatikizya muntu ooyu zyakali zyamasimpe.” 42  Alimwi ooko banji bakamusyoma.

Bupanduluzi buyungizyidwe