Skip to content

Skip to table of contents

Bakamboni ba Jehova

Amusale mwaambo Chitonga

Ciyubunuzyo 21:1-27

21  Lino ndakabona julu ipya alimwi anyika mpya; nkaambo julu lyakaindi anyika yakaindi zyakamana, alimwi lwizi taluciko pe.  Ndakabona munzi uusalala, Jelusalemu Mupya, kauboola ansi kuzwa kujulu kuli Leza alimwi kaubambidwe kabotu mbuli nabwiinga walisakatizyila mulumaakwe.  Mpoonya ndakamvwa jwi pati kuzwa kucuuno cabwami kaliti: “Amubone! Tente lya Leza lili aabantu, alimwi uyookkala ambabo, eelyo bayooba bantu bakwe. Alimwi Leza lwakwe uyooba ambabo.  Eelyo uyoosindula misozi yoonse kumeso aabo, alimwi lufwu talukooyoobako limbi, akwalo koomoka, kulila nokuba kucisa takukooyoobako limbi. Zyintu zyakaindi zyamana.”  Mpoonya Ooyo uukkede acuuno cabwami wakati: “Amubone! Ndilabambulula zyintu zyoonse kuti zibe zipya.” Alimwi, waamba kuti: “Lemba, nkaambo majwi aaya alasyomeka alimwi ngamasimpe.”  Alimwi wakandaambila kuti: “Zyacitika! Ndime Alefa a Omega, imatalikilo amamanino. Muntu woonse uufwide nyota ndiyoomupa cabuyo maanzi aazwa kukasensa kamaanzi aabuumi.  Woonse uuzunda uyookona zyintu eezyi, alimwi mebo ndiyooba Leza wakwe mpoonya walo uyooba mwanaangu.  Pele ibakandu, ibanyina lusyomo, ibasesemya mubusofwaazi bwabo, ibajayi, basibwaamu, ibasyoma mizimo, basikukomba mituni alimwi ababeja boonse, busena bwabo buyooba muzyiba liyaka mulilo asulufa. Eeci caamba lufwu lwabili.”  Mpoonya umwi wabangelo bali ciloba ibakajisi mitiba iili ciloba eeyo yakazwide zipenzyo zyamamanino zili ciloba, wakaboola akundaambila kuti: “Boola, eelyo ndilakutondezya nabwiinga, imukaintu wa Mwanaambelele.” 10  Aboobo wakandibweza munguzu zyamuuya akunditola kucilundu cipati alimwi citalilampili, mpoonya wakanditondezya munzi uusalala, Jelusalemu, kauboola ansi kuzwa kujulu kuli Leza 11  alimwi wakajisi bulemu bwa Leza. Kumweka kwawo kwakali mbuli kwabbwe lidula kapati, mbuli bbwe lyajasipa liŋaima alimwi libalangalisya. 12  Wakali abwaanda bupati alimwi butalilampili alimwi wakali amilyango iili kkumi aibili, mpoonya kumilyango eeyo kwakali bangelo bali kkumi ababili, alimwi amilyango eeyo kwakalembedwe mazyina aamisyobo iili kkumi aibili yabana ba Isilayeli. 13  Kujwe kwakali milyango yotatwe, kunyika kwakali milyango yotatwe, kumusanza kwakali milyango yotatwe mpoonya kumbo kwakali milyango yotatwe. 14  Alimwi ibwaanda bwamunzi ooyu bwakajisi mabwe aantalisyo aali kkumi aabili, eelyo amabwe aayo kwakali mazyina aali kkumi aabili aabatumwa bali kkumi ababili ba Mwanaambelele. 15  Lino ooyo iwakali kwaambaula andime wakajatide tete lyangolida lyakupimya, kutegwa apime munzi, milyango yawo alimwi abwaanda bwanguwo. 16  Imunzi ooyo ujisi mbazu zyone zyeelene, alimwi bulamfwu bwawo abwaamba bwawo zileelene. Mpoonya wakapima munzi atete eelyo, akujana kuti wakali kulampa makkilomita aatandila ku 2,200;* ibulamfwu bwawo, ibwaamba alimwi abulamfwu bwakuya mujulu zileelene. 17  Kunze lyaboobo, wakapima bwaanda bwanguwo, bwakali kulampa tukokola tuli 144,* ikweelana akupima kwamuntu alimwi akupima kwamungelo. 18  Lino bwaanda bwanguwo bwakayakidwe amabwe aajasipa, mpoonya munzi ooyo wakayakidwe angolida yini-yini iibalangala mbuli gilazi. 19  Intalisyo zyabwaanda bwamunzi zyakabotezyedwe amabwe mayandisi aaindene-indene: intalisyo yakusaanguna yakali yamabwe aajasipa, yabili aasafilo, yatatu aakalikedo, yane aaemalodi, 20  yasanu aasadoni, yacisambomwi aasadiyo, yaciloba aakulusolito, yalusele aabelulo, yafwuka aatopaziyo, yakkumi aakulusopulazo, yakkumi aimwi aahuwakinto, yakkumi azibili aamutusito. 21  Alimwi, imilyango eeyo iili kkumi aibili yakali yangale zili kkumi azibili; imulyango umwi aumwi wakabambidwe angale. Mpoonya mugwagwa mupati wamunzi ooyo wakali wangolida yini-yini, iibalangala mbuli gilazi. 22  Lino tiindakabona tempele mulinguwo, nkaambo Jehova Leza Singuzuzyoonse alimwi a Mwanaambelele ngotempele lyawo. 23  Alimwi munzi ooyu tuuyandiki kumunikilwa azuba naa mwezi pe, nkaambo bulemu bwa Leza bwakali kuumunikila, alimwi lambe lyanguwo lyakali Mwanaambelele. 24  Lino masi ayooenda mumumuni wawo, alimwi bami bamunyika bayooleta bulemu bwabo mulinguwo. 25  Alimwi milyango yanguwo tiikajalwi pe isyikati, nkaambo masiku kunyina naayoobako. 26  Eelyo bayooleta bulemu alulemeko lwamasi mulinguwo. 27  Pele cintu cili coonse cisofweede alimwi amuntu uuli woonse uucita cintu cisesemya alimwi silweeno takanjili pe mulinguwo; balikke aabo balembedwe mubbuku lyabuumi lya Mwanaambelele mbabayoonjila.

Bupanduluzi buyungizyidwe

Mu Chigiliki, “Imasitadiya aali 12,000.” Sitadiya nceeleko camusinzo cakaindi caba Giliki.
Mamita aatandila ku 64.