Skip to content

Skip to table of contents

Bakamboni ba Jehova

Amusale mwaambo Chitonga

Ciyubunuzyo 18:1-24

18  Nozyakamana zyintu eezyi ndakabona mungelo aumwi kaseluka kuzwa kujulu anguzu zinji; mpoonya nyika yakamweka abulemu bwakwe.  Eelyo wakoongolola ajwi lyanguzu ulaamba: “Wawa! Babuloni Mupati wawa, alimwi waba busena bukkala madaimona abwina bwamuuya uuli woonse uusofweede alimwi amayubilo aabayuni boonse basofweede alimwi basulaikidwe!  Nkaambo akaambo kawaini waluunyaunya lwabwaamu bwakwe, masi oonse acegwa, alimwi bami bamunyika bakacita bwaamu anguwe, alimwi basambazi* bakavwuba kwiinda munguzu zyalubono lwakwe lunji ndwatakaanya cakutalisenda.”  Mpoonya ndakamvwa jwi alimbi kuzwa kujulu kalyaamba kuti: “Amuzwe mulinguwe, nobantu bangu, ikuti kamutayandi kujatikizyigwa azibi zyakwe, alimwi ikuti kamutayandi kusikilwa zipenzyo zyakwe zimwi.  Nkaambo zibi zyakwe zyalundana kusikila kujulu alimwi Leza waiyeeya micito yakwe iitaluleme.  Amumucitile mbubonya mbwaakabacitila bamwi, inzya, amuyungizye ziindi zyobilo kumucitila zyintu eezyo nzyaakacita walo; munkomeki oomo mwaabikkide zyakunywa zyamuvwele-vwele, amumuyungizizye ziindi zyobilo kumubikkila zyakunywa zyamuvwele-vwele.  Mbubonya buyo mbwaali kulipa bulemu alimwi akutakaanya lubono lwakwe lunji cakutalisenda, mbubonya oobo mbomweelede kumupenzya akumulizya. Nkaambo mumoyo wakwe uzumanana kwaamba kuti, ‘Ndilikkede aano ndemwami mukaintu, tandili mukamufwu alimwi kunyina pe nondiya koomoka kulila.’  Nkakaambo kaako mubuzuba bomwe buyo mapenzi aakwe ayoomusikila, lufwu, koomoka kulila alimwi anzala, alimwi uyooumpwa amulilo mane akalote, nkaambo Jehova Leza iwakamubeteka, uli anguzu.  “Lino bami bamunyika ibakacita bwaamu anguwe akutakaanya lubono lunji cakutalisenda bayoomulila akulyuuma acamba akaambo kakuusa, baakubona busi bwakupya kwakwe ibuuntumuka. 10  Bayooimina alaale akaambo kakuyoowa kupenzyegwa kwakwe akwaamba kuti, ‘Maawe, maawe, omunzi mupati, Babuloni omunzi muyumu, nkaambo muwoola lyomwe buyo lubeta lwako lwasika!’ 11  “Abalo basambazi bamunyika balamulila akoomoka nkaambo kunyina uucuula makwebo aabo oonse, 12  makwebo oonse aangolida, aansiliva, aamabwe mayandisi, aangale, aazisani zibotu zyuuba-uba, zyacisombo, zyandeketela alimwi azisalala pyu; alimwi azyintu zyoonse zipangwa kuzwa kuzisamu zinunkila amisyobo iili yoonse yazyintu zipangwa aminyanga yabazovwu alimwi amisyobo iili yoonse yazyintu zipangwa kuzwa kuzisamu zidula kapati alimwi akuzwa kumukuba, butale alimwi abbweluuma lyeebeka; 13  alimwi asinamoni, amomo,* tununkilizyo, mafwuta aanunkila, tununkilizyo twalibano, waini, mafwuta aaolifa, busu busetede, maila, ŋombe ambelele, alimwi amabbiza, ŋola, bazike alimwi abuumi bwabantu. 14  Inzya, micelo mibotu njowakali kulombozya yazwa kulinduwe, alimwi zyintu zyoonse zibotu kapati alimwi zyeebeka zyakumanina do, tazikajanwi limbi pe. 15  “Basambazi ibakali kusambala zyintu eezyi, ibakavwuba akaambo kanguwe, bayooimina alaale akaambo kakuyoowa kupenzyegwa kwakwe alimwi bayoolila akoomoka, 16  kabaamba kuti, ‘Maawe, maawe—omunzi mupati, iwakali kusama zisani zibotu zyuuba-uba, zyacisombo alimwi azisalala pyu, alimwi akulibotya kapati azyintu zyakapangwa angolida, mabwe mayandisi alimwi angale, 17  nkaambo muwoola lyomwe buyo oluya lubono lutalivwulili lwanyonyoonwa!’ “Alimwi mupati wabasikweenzya mato uuli woonse amuntu uuli woonse weendeenda alwizi, alimwi abasimato abaabo boonse baponena alwizi, bakaima alaale 18  akoongolola nobakali kulanga busi bwakupya kwakwe ibwakali kuuntumuka akwaamba kuti, ‘Ino munzi nzi uuli mbuli munzi mupati ooyu?’ 19  Mpoonya bakalitila vwu amitwe yabo akoongolola, kabalila akoomoka balaamba, ‘Maawe, maawe—omunzi mupati, oomo mobakavwubila boonse aabo ibakajisi mato mulwizi akaambo kalubono lwakwe, nkaambo muwoola lyomwe buyo wanyonyoonwa!’ 20  “Amusekelele akaambo kaceeco cacitika kulinguwe nojulu, alimwi andinywe nobasalali, nobatumwa alimwi anobasinsimi, nkaambo Leza wamubetekela akumupeda cisubulo kulinguwe!” 21  Mpoonya mungelo singuzu wakanyamuna bbwe lili mbuli ziyo pati akuliwaala mulwizi, ulaamba: “Oobu mbombubo Babuloni imunzi mupati mbuuyoowaalwa ansi mukulaba kwaliso, alimwi kunyina limbi nuuyoojanwa. 22  Alimwi mulinduwe kunyina limbi nokuyoomvwugwa jwi lyabaimbi baimba kumwi kabalizya tulumbu twabo naa lyabaimbi bambi buyo naa basimintolilo nobaba basimyeembo. Alimwi mulinduwe tamukajanwi limbi basyaabupampu mumulimo uuli woonse, alimwi takukamvwugwi limbi kuziya kwaziyo mulinduwe. 23  Alimwi kunyina limbi nuuyoomunika mulinduwe mumuni walambe, alimwi takukamvwugwi limbi jwi lyasibwiinga alyanabwiinga mulinduwe. Nkaambo basambazi bako mbambabo bakali basizyuuno zyaatala bamunyika, mbwaanga kwiinda mumicito yako yakusyoma mizimo masi oonse akeenwa. 24  Inzya, mulinguwe mwakajanwa bulowa bwabasinsimi abwabasalali alimwi abwabantu boonse buyo ibakajaigwa anyika.”

Bupanduluzi buyungizyidwe

Naa “basambazi beendeenda.”
Naa, “tununkilizyo twaku India tulungwa mucakulya.”