Skip to content

Skip to table of contents

Bakamboni ba Jehova

Amusale mwaambo Chitonga

Ciyubunuzyo 16:1-21

16  Lino ndakamvwa ijwi pati kuzwa mubusena busalala bwatempele kalyaambila bangelo bali ciloba kuti: “Kamuya mukaitile anyika mitiba iili ciloba yabukali bwa Leza.”  Eelyo wakusaanguna wakaunka akuyootila mutiba wakwe anyika. Mpoonya aabo ibakajisi caando camunyama alimwi ibakali kukomba cikozyanyo cakwe bakaba acilonda cijaya alimwi cibi kapati.  Eelyo wabili wakatila mutiba wakwe mulwizi. Mpoonya lwakasanduka kuba bulowa mbuli bwamuntu uufwide, eelyo cintu coonse cipona cakafwa, inzya zyintu zyamulwizi.  Eelyo watatu wakatila mutiba wakwe mumilonga amutusensa twamaanzi. Mpoonya eezyi zyakasanduka kuba bulowa.  Lino ndakamvwa mungelo uulanganya maanzi kaamba kuti: “Yebo ooliko, iwakaliko alimwi oosyomeka, uliluleme nkaambo waakosola boobu makani,  nkaambo bakatila bulowa bwabasalali abwabasinsimi, eelyo wabapa bulowa kuti banywe; oobu mbobeelede kucitilwa.”  Alimwi ndakamvwa cipaililo kacaamba kuti: “Inzya, Jehova Leza, Singuzuzyoonse, imbeta zyako nzyamasimpe alimwi zililuleme.”  Eelyo wane wakatila mutiba wakwe azuba; mpoonya zuba lyakazumizyigwa kuumpa bantu amulilo.  Lino bantu bakatentwa akupya kutaambiki, pele bakasampaula zyina lya Leza, ooyo uujisi nguzu zyakweendelezya zipenzyo eezyi, alimwi kunyina nobakeempwa akumupa bulemu. 10  Eelyo wasanu wakatila mutiba wakwe acuuno cabwami camunyama. Mpoonya bwami bwakwe bwakasiya mbi, alimwi bakatalika kuliluma milaka akaambo kakucisa, 11  pele bakasampaula Leza wakujulu akaambo kakucisa nkobakamvwa alimwi akaambo kazilonda zyabo, alimwi kunyina nobakeempwa kumilimo yabo. 12  Eelyo wacisambomwi wakatila mutiba wakwe mumulonga mupati wa Filate, mpoonya maanzi aanguwo akayuminina, ikutegwa babambilwe nzila bami bazwa kumazwido aazuba. 13  Mpoonya ndakabona majwi otatwe aasofweede aasololelwa amyuuya aakali kulibonya mbuli bacula kaazwa mukanwa lyasimwaaba amukanwa lyamunyama alimwi amukanwa lyamusinsimi wakubeja. 14  Mubwini, aaya majwi aasololelwa amadaimona alimwi acita zitondezyo, alimwi alaunka kubami bamunyika yoonse kuti ababunganye antoomwe kunkondo yabuzuba bupati bwa Leza Singuzuzyoonse. 15  “Amubone! Ndilaboola mbuli mubbi. Ulikkomene ooyo uupakamana akuzumanana kubamba zisani zyakwe zyaatala, kutegwa ateendi mantanda akuti bantu batalangi cintanda cakwe cijazya nsoni.” 16  Lino akababunganya antoomwe kubusena butegwa Amagedoni mu Chihebulayo. 17  Eelyo waciloba wakatila mutiba wakwe mumuwo. Mpoonya kwakamvwugwa jwi pati kuzwa mubusena busalala bwatempele, kuzwa kucuuno cabwami, ilyaamba kuti: “Cacitika!” 18  Alimwi kwakaba ndabo, majwi alimwi amizumo, alimwi akuzungaana kwanyika kupati ikutanacitikide kuzwa ciindi bantu nobakaba anyika, masimpe ooku kwakali kuzungaana kwanyika kupati kapati. 19  Mpoonya munzi mupati wakaanduka muzibeela zyotatwe, alimwi minzi yamasi yakakolomoka; alimwi Babuloni Mupati wakayeeyegwa a Leza, kuti apegwe nkomeki yawaini yabukali bwakunyema kwakwe. 20  Kunze lyaboobo insumbu zyoonse zyakatija, alimwi zilundu tiizyakajanwa limbi. 21  Lino civwulamabwe cipati cakalokela bantu kuzwa kujulu, ikulema kwabbwe limwi alimwi kwakali kutandila kutalenta* lyomwe, mpoonya bantu bakasampaula Leza akaambo kapenzi lyacivwulamabwe, nkaambo penzi eelyo lyakali pati citaambiki.

Bupanduluzi buyungizyidwe

Naa, “makkilogilamu aasika ku 20.4.”