Skip to content

Skip to table of contents

Bakamboni ba Jehova

Amusale mwaambo Chitonga

Ciyubunuzyo 15:1-8

15  Mpoonya ndakabona citondezyo acimbi kujulu, cipati alimwi cigambya, ibangelo bali ciloba kabajisi zipenzyo zili ciloba. Eezyi nzyamamanino nkaambo kwiinda mulinzizyo ibukali bwa Leza bulamanizyigwa.  Alimwi ndakabona icakali kulibonya mbuli lwizi luŋaima mbuli gilazi iluvwelene amulilo, alimwi abaabo ibazunda munyama, cikozyanyo cakwe alimwi anamba yazyina lyakwe. Bakaliimvwi mumbali aalwizi luŋaima mbuli gilazi, kabajisi tulumbu twa Leza.  Alimwi baimba lwiimbo lwa Musa imuzike wa Leza alwiimbo lwa Mwanaambelele, kuti: “Milimo yako mipati alimwi ilagambya, Jehova Leza, Singuzuzyoonse. Inzila zyako zililuleme alimwi nzyamasimpe, O Mwami walyoonse alyoonse.  Ino mubwini nguni uutakookuyoowa O Jehova akulemeka zyina lyako, nkaambo nduwe olikke uusyomeka? Imasi oonse ayooboola akukomba kumbele lyako, nkaambo milawo yako iiluleme yalibonya.”  Nozyakamana zyintu eezyi ndakalanga, eelyo ndakabona busena busalala bwatente lyabumboni bwakajalulwa kujulu,  mpoonya bangelo bali ciloba ibajisi zipenzyo zili ciloba bakazwa mubusena busalala bwatempele, kabasamide zisani zyuuba-uba zitakwe tombe, iziŋaima, alimwi kuzyamba zyabo bakalyaangide ntambo zyangolida.  Mpoonya cimwi cazilenge zyuumi zyone cakapa bangelo bali ciloba mitiba yangolida iili ciloba iyakazwide bukali bwa Leza, ooyo uupona lyoonse mane kukabe kutamani.  Lino busena busalala bwatempele bwakazula busi akaambo kabulemu bwa Leza alimwi akaambo kanguzu zyakwe, eelyo kunyina wakali kukonzya kunjila mubusena busalala bwatempele kusikila mane nizyakamanizyigwa zipenzyo zili ciloba zyabangelo bali ciloba.

Bupanduluzi buyungizyidwe