Skip to content

Skip to table of contents

Bakamboni ba Jehova

Amusale mwaambo Chitonga

Ciyubunuzyo 1:1-20

1  Ciyubunuzyo cakapegwa a Jesu Kilisito, eeco ncaakamupa Leza kuti atondezye bazike bakwe izyintu zyeelede kucitika lino-lino. Eelyo walo wakatuma mungelo wakwe akuciyubununa muzitondezyo kwiinda mulinguwe kumuzike wakwe Johane,  ooyo iwakapa bumboni kujwi ndyaakaamba Leza akubumboni mbwaakapa Jesu Kilisito, inzya, kuzyintu zyoonse nzyaakabona.  Ulikkomene ooyo waabala cakupozya alimwi abaabo bamvwa majwi aabusinsimi oobu, alimwi ibabamba zyintu zilembedwe mumo; nkaambo ciindi cibikkidwe cili afwaafwi.  Ndime Johane nendilembela mbungano zili ciloba zili mucooko ca Asiya kuti: Amube aluzyalo lwa Leza alimwi aluumuno kuzwa kuli “Yooyo uuliko, wakaliko alimwi uuboola,” alimwi akuzwa kumyuuya ili ciloba eeyo iili kumbele lyacuuno cakwe cabwami,  alimwi akuzwa kuli Jesu Kilisito, “Kamboni Uusyomeka,” “Mutaanzi kuzyalwa kuzwa kubafwu,” alimwi “Muleli wabami bamunyika.” Kuli yooyo uutuyanda alimwi wakatwaangununa kuzibi zyesu kwiinda mubulowa bwakwe mwini—  alimwi wakatupa kuti tube Bwami, bapaizi kuli Leza wakwe alimwi Usyi—inzya, kulinguwe akube bulemu alimwi anguzu lyoonse mane kukabe kutamani. Ameni.  Amubone! Ulaboola amakumbi, eelyo meso oonse ayoomubona, antoomwe abaabo bakamuyasa; alimwi bantu bamisyobo yoonse anyika bayoolyuuma acamba akulila akaambo kanguwe. Akube boobo, Ameni.  “Ndime Alefa a Omega,”* mbwaamba Jehova Leza, “Ooyo uuliko, wakaliko alimwi uuboola, Singuzuzyoonse.”  Mebo nde Johane, ndemunyoko alimwi nenditola lubazu andinywe mumapenzi, mu Bwami alimwi amukuliyumya mukuyanzana a Jesu, ndakazyi kuba ansumbu iitegwa Patimo akaambo kakwaamba zya Leza akupa bumboni bwa Jesu. 10  Kwiinda mumuuya ndakazyi kuba mubuzuba bwa Mwami, mpoonya kusyule lyangu ndakamvwa ijwi pati lili mbuli kulila kwamweembo, 11  kalyaamba kuti: “Eeco ncotiibone ucilembe mubbuku lyakuvwunga akulitumina kumbungano izili ciloba, mu Efeso, mu Simuna, mu Pegamo, mu Tiyatila, mu Sade, mu Filadelufiya alimwi amu Laodikeya.” 12  Lino ndakacenguluka kutegwa ndibone yooyo iwakali kwaambaula andime, eelyo nondakacenguluka, ndakabona zibikkilo zyamalambe zyangolida izili ciloba, 13  alimwi akati kazibikkilo zyamalambe kwakali umwi uuli mbuli mwana wamuntu, wakasamide cisani cilamfwu icakali kusika kumaulu, alimwi kucamba wakalyaangide lutambo lwangolida. 14  Kunze lyaboobo, imutwe wakwe alimwi amasusu aakwe zyakali kutuba bu mbuli boya bwambelele butuba, mbuli caanda, alimwi meso aakwe akali mbuli mulilo uuvwilima; 15  alimwi maulu aakwe akali mbuli mukuba mubotu nouŋaima mubbibi lyamulilo; alimwi ijwi lyakwe lyakali mbuli kuvwuuma kwamaanzi manji. 16  Alimwi mujanza lyakwe lyalulyo wakajisi nyenyeezi zili ciloba, alimwi mukanwa lyakwe mwakali kuzwa panga damfwu libosya, ilikwengedwe koonse-koonse, alimwi busyu bwakwe bwakali mbuli zuba mbolimweka nolibala kapati. 17  Lino nindakamubona, ndakawida kumaulu aakwe mbuli muntu uufwide. Mpoonya wakandijata ajanza lyakwe lyalulyo akwaamba kuti: “Utayoowi pe. Ndili Mutaanzi a Musyaalizi, 18  alimwi ooyo uupona; ndakalifwide, pele bona, ndilapona lyoonse mane kukabe kutamani, alimwi ndijisi makkii aalufwu aa Cikkalilo Cabafwu.* 19  Aboobo kozilemba zyintu nzyowabona, azyintu iziliko lino alimwi azyeezyo zitiicitike zyainda eezyi. 20  Lino kujatikizya maseseke aa Leza aanyenyeezi zili ciloba nzyowabona mujanza lyangu lyalulyo, alimwi aazibikkilo zyamalambe zyangolida izili ciloba: Inyenyeezi zili ciloba ziiminina bangelo bambungano zili ciloba, mpoonya zibikkilo zyamalambe zili ciloba ziiminina mbungano zili ciloba.

Bupanduluzi buyungizyidwe

Naa, “Ndime Matalikilo a Mamanino.”
Amubone Makani Aayungizyidwe 8.