Skip to content

Skip to table of contents

Bakamboni ba Jehova

Amusale mwaambo Chitonga

Baroma 7:1-25

7  Sena nkokuti bakwesu tamuzyi, (nkaambo ndaambila baabo ibazyi mulawo,) kuti Mulawo ngosimalelo wamuntu kufwumbwa kuti muntu ooyo kacipona?  Mucikozyanyo, kweelana amulawo, imukaintu uukwetwe ulaangidwe kumulumaakwe nacipona; pele ikuti naa mulumaakwe wafwa, ulaangununwa kumulawo wamulumaakwe.  Aboobo, ikuti wakwatwa kumwaalumi umbi mulumaakwe kacipona, inga waambwa kuti ngusimamambe. Pele ikuti mulumaakwe wafwa, ulaangunuka kumulawo wakwe, eelyo takategwi ngusimamambe ikuti wakwatwa kumwaalumi umbi.  Aboobo nobakwesu, andinywe mwakafwa kujatikizya Mulawo kwiinda mumubili wa Kilisito, kutegwa mube bamuntu uumbi, bayooyo wakabusyigwa kuzwa kubafwu, kutegwa tumuzyalile micelo Leza.  Nkaambo notwakacili kutobela zisusi zyanyama, zisusi eezyo izyakali kuyubunuka akaambo ka Mulawo zyakali kubeleka muzizyo zyesu kutegwa tuzyale micelo yalufwu.  Pele lino twaangununwa ku Mulawo ooyo, nkaambo twafwa kuli ceeco cakatwaangide, kutegwa tube bazike munzila mpya kwiinda mumuuya, ikutali munzila yakaindi kwiinda mumulawo uulembedwe.  Ino lino tulaamba nzi? Sena Mulawo ncibi? Peepe! Mubwini nindatakacizyiba cibi nowatakaliko Mulawo; alimwi mucikozyanyo, nindatakazyiba kuti kulikumbuzya nkubi ikuti Mulawo nowatakaamba ku-ti: “Utalikumbuzyi.”  Pele akaambo kamulawo, cibi cakajana nzila yakubusya kulikumbuzya kwamusyobo uuli woonse mulindime, nkaambo kayi eelyo nokwakanyina mulawo cibi cakalifwide.  Aciindi cimwi ndakali muumi eelyo nokwakanyina mulawo; pele mulawo nowakasika, cibi cakabukuluka, pele mebo ndakafwa. 10  Alimwi mulawo iwakeelede kunditola kubuumi, ndakajana kuti unditola kulufwu. 11  Nkaambo akaambo kamulawo nguwenya ooyu, cibi cakajana nzila yakundoongelezya akundijaya. 12  Aboobo, Mulawo kuugama ulasalala, awalo mulawo ooyu ulasalala, uliluleme alimwi mubotu. 13  Sena nkokuti cibotu cakapa kuti ndifwe? Peepe! Pele cibi ncicakacita boobo, kutegwa citondezyegwe kuti ncecindiletela lufwu kwiinda mucintu eeco cibotu; kutegwa cibi ciindile kubija akaambo kamulawo. 14  Nkaambo tulizyi kuti Mulawo ngwamuuya; pele mebo ndili wanyama, iwakasambalwa kuba muzike wacibi. 15  Lino tandizizyi pe nzyondicita. Nkaambo ncondilombozya, tandiciciti pe; pele ncondisulide ncondicita. 16  Pele ikuti nconditalombozyi ncondicita, ndazumina kuti Mulawo mubotu. 17  Pele tandicili ndime ndicicita pe, pele ncibi cikkede mulindime. 18  Nkaambo ndilizyi kuti mulindime, nkokuti mumubili wangu, munyina cibotu ciliko; nkaambo walo moyo ulapya, pele tandijisi nguzu zyakucita cibotu. 19  Nkaambo cibotu ncondilombozya tandiciciti pe, pele cibi nconditalombozyi ncondicita lyoonse. 20  Lino, ikuti eeco nconditalombozyi ncondicita, ooyo uucicita tandicili ndime pe, pele ncibi cikkede mulindime. 21  Lino, kulindime ndijana mulawo ooyu wakuti: ndayanda kucita cibotu, icibi cili andime. 22  Mumoyo wangu ndilabotelwa kapati amulawo wa Leza, 23  pele mumubili wangu ndibona mulawo uumbi uulwana mulawo uuli mumizeezo yangu, alimwi uundipa kuba mwaange wamulawo wacibi ooyo uuli muzizyo zyangu. 24  Maawe ndemucaangu! Ino nguni utiindivwune kumubili ooyu uunditola kulufwu oolu? 25  Aalumbwe Leza kaka iwandivwuna kwiinda muli Jesu Kilisito Mwami wesu! Aboobo, mumizeezo yangu mebo ndemwini ndili muzike kumulawo wa Leza, pele mumubili wangu ndili muzike kumulawo wacibi.

Bupanduluzi buyungizyidwe