Skip to content

Skip to table of contents

Bakamboni ba Jehova

Amusale mwaambo Chitonga

Baroma 6:1-23

6  Aboobo ino twaambe nzi? Sena tuzumanane kubisya ikutegwa luzyalo lwa Leza luvwule?  Peepe! Mbwaanga twakafwa kucibi, ino mbuti mbotukonzya kuzumanana kupona mucibi?  Naa sena tamuzyi kuti swebo toonse notwakabbapatizyigwa muli Kilisito Jesu twakabbapatizyigwa mulufwu lwakwe?  Aboobo twakazikkwa anguwe kwiinda mulubbapatizyo lwesu mulufwu lwakwe, kutegwa mbuli Kilisito mbwaakabusyigwa kuzwa kubafwu kubulemu bwa Usyi, mbubonya oobo andiswe tweelede kupona buumi bupya.  Nkaambo ikuti naa twakamantana anguwe mulufwu luli mbuli lwakwe, nkokuti masimpe tuyookamantana alimwi anguwe mububuke buli mbuli bwakwe;  nkaambo tulizyi kuti buntu bwesu bwakaindi bwakagagailwa anguwe acisamu, ikutegwa mubili wesu mubi kuutacikwe nguzu alindiswe akuti tutazumanani kuba bazike bacibi.  Nkaambo muntu wafwa waangununwa kucibi cakwe.  Kunze lyaboobo, ikuti katufwide a Kilisito, tusyoma kuti tuyoopona alimwi anguwe.  Nkaambo tulizyi kuti Kilisito, lino mbwaanga wakabusyigwa kubafwu, takonzyi kufwa alimwi pe; lufwu talucikwe nguzu pe kulinguwe. 10  Nkaambo lufwu ndwaakafwa, wakafwa buyo ciindi comwe kukabe kutamani kuti agusye cibi; pele buumi mbwapona, uponena Leza. 11  Mbubonya buyo andinywe: amulibone kuti mulifwide cakumaninina kucibi, pele kuti mulapona kuli Leza kwiinda muli Kilisito Jesu. 12  Aboobo mutalekeli cibi kuzumanana kweendelezya mbuli mwami mumibili yanu iifwa ikutegwa kamutobela zisusi zyayo. 13  Alimwi mutazumanani kwaaba zizyo zyanu kucibi kazili zilwanyo zyakutalulama, pele amulyaabe kuli Leza mbuli bantu baumi bakabusyigwa kuzwa kubafwu, alimwi amwaabe zizyo zyanu kuli Leza kazili zilwanyo zyabululami. 14  Mutalekeli cibi kuba simalelaanu, mbwaanga tamweendelezyegwi amulawo pe, pele mweendelezyegwa aluzyalo lwa Leza. 15  Ino twaambe nzi? Sena tweelede kubisya akaambo kakuti tatweendelezyegwi amulawo pele tweendelezyegwa aluzyalo lwa Leza? Peepe! 16  Se-na tamuzyi kuti, ikuti naa kamulyaaba kuli umwi mbuli bazike bamvwida, muli bazike bamuntu ooyo ngomuswiilila? Aboobo ikuti kamuli bazike bacibi muyootambula lufwu, pele ikuti kamuli bazike bakuswiilila muyootambula bululami. 17  Pele aalumbwe Leza kuti nokuba kuti mwakali bazike bacibi, mwakaziswiilila kuzwa ansi amoyo injiisyo eezyo nzyomwakapegwa. 18  Inzya, mbwaanga mwakaangununwa kucibi, mwakaba bazike babululami. 19  Akaambo kakubula nguzu kwamibili yanu, ndibelesya majwi ngobazyi kabotu bantu: nkaambo mbubonya ciindi cimwi mbomwakaaba zizyo zyanu cakumaninina kuti mube bazike kubusofwaazi akububi kutegwa mucite buyo bubi, lino amwaabe zizyo zyanu cakumaninina kamuli bazike kubululami kutegwa mube bantu basalala. 20  Nkaambo nomwakali bazike bacibi, mwakalaangulukide kubululami. 21  Lino micelo nzi njomwakali kutebula kuciindi eeco? Nzyintu eezyo lino zimuusya nsoni. Nkaambo mamanino aazyintu eezyo ndufwu. 22  Pele lino akaambo kakuti mwakaangununwa kucibi akuba bazike ba Leza, imicelo njomutebula mbusalali, eelyo kumamanino mbuumi butamani. 23  Nkaambo cakuvwola ncocipa cibi ndufwu, pele cipego ncapa Leza mbuumi butamani kwiinda muli Kilisito Jesu Mwami wesu.

Bupanduluzi buyungizyidwe