Skip to content

Skip to table of contents

Bakamboni ba Jehova

Amusale mwaambo Chitonga

Baroma 16:1-27

16  Ndiyanda kumuzyibya zya Febe mucizyi wesu, uubelekela mumbungano iili mu Kenkileya,  kuti mumutambule kabotu mu Mwami munzila yeelede basalali, alimwi akuti mumugwasye mumakani aali woonse mwanga wayandika lugwasyo, nkaambo awalo wakagwasya bakwesu banji, kubikkilizya andime lwangu.  Amundaanzyizye Pulisika a Akula basimilimoma muli Kilisito Jesu,  ibakalibambilide kukosolwa nsingo kutegwa kandili muumi, aabo ibalumbwa ikutali andime buyo pele ambungano zyoonse zyabamasi.  Alimwi amwaanzye mbungano iili muŋanda yabo. Amwaanzye muyandwa wangu Epeneto, ooyo uuli njemicelo yakusaanguna ya Kilisito mu Asiya.  Amumwaanzye Maliya, ooyo iwamubelekela milimo minji.  Amumwaanzye Anduloniko a Juniya ibamukowa wangu alimwi baangema, ibaalumi bazyibidwe kapati abatumwa alimwi ibali kutobela Kilisito kwaciindi cilamfwu kwiinda ndime.  Amundaanzyizye Ampiliyato muyandwa wangu mu Mwami.  Amumwaanzye Ubano similimoma muli Kilisito, amuyandwa wangu Sitaku. 10  Amumwaanzye Apele, uusyomeka muli Kilisito. Amubaanzye aabo bamuŋanda ya Alisitobulo. 11  Amumwaanzye Helodiyona wamukowa wangu. Amubaanzye basikwiiya ba Mwami bamuŋanda ya Nakiso. 12  Amubaanzye ba Tulufena a Tulufosa, bamakaintu ibabeleka canguzu mu Mwami. Amumwaanzye Pesida imuyandwa wesu, nkaambo wakabeleka milimo minji mu Mwami. 13  Amumwaanzye Lufo imusale mu Mwami, alimwi abanyina ibali mbabamaama andime. 14  Amumwaanzye Asunikilito, Felego, Heme, Patuloba, Hema abakwesu bali ambabo. 15  Amumwaanzye Filologo a Juliya, Neleya amucizyi wakwe, a Olumpa, alimwi abasalali boonse bali ambabo. 16  Kamwaanzyanya akumyontana kusalala. Ibambungano zya Kilisito boonse balamwaanzya. 17  Lino bakwesu ndimukulwaizya kuti mubacenjelele bantu aabo ibaleta kwaandaana azyintu eezyo izinga zyatyompya bamwi mukwiimpana anjiisyo nzyomwakaiya, alimwi amubatantamuke. 18  Nkaambo bantu bamusyobo ooyu tabali bazike ba Mwami wesu Kilisito pe, pele mbazike bazisusi* zyabo beni; alimwi kwiinda mumajwi aalweeno alimwi aabumpelenge boongelezya myoyo yabantu batakwe luuni. 19  Kumvwida kwanu kwazyibwa abantu boonse, aboobo ndilakondwa akaambo kandinywe. Pele ndiyanda kuti mube bantu basongo kuzyintu zibotu, pele ibanyina mulandu kuzyintu zibi. 20  Eelyo Leza uupa luumuno ulapwayaula Saatani kunsi aamaulu aanu lino-lino. Iluzyalo lwa Mwami wesu Jesu alube andinywe. 21  Timoteyo similimoma ulamwaanzya, abalo bamukowa wangu ba Lukiya, Jasoni alimwi a Sosipata balamwaanzya. 22  Andime nde Tetiyo, nendalemba lugwalo oolu, ndamwaanzya mu Mwami. 23  Simeenzu wangu Gayo, mukamwini ŋanda oomo imuswaanganina mbungano yoonse, ulamwaanzya. Elasito imuyobozi wamali aamunzi ulamwaanzya, alimwi a Kwato imwanookwabo. 24  —— 25  Lino kuli Leza uukonzya kumuyumya kweelana amakani mabotu ngondaambilizya amukukambaukwa kwa Jesu Kilisito, kweelana aciyubunuzyo camaseseke aa Leza aakasisidwe kwaciindi cilamfwu 26  pele lino aayubununwa akuzyibisyigwa kwiinda mumagwalo aabusinsimi kuli bamasi boonse kwiinda mukulailila kwa Leza uutamani kutegwa kube kumvwida kwiinda mulusyomo; 27  kuli Leza ooyu uuli ngomusongo alikke, akube bulemu kwiinda muli Jesu Kilisito mane kukabe kutamani. Ameni.

Bupanduluzi buyungizyidwe

Naa, “mada.”