Skip to content

Skip to table of contents

Bakamboni ba Jehova

Amusale mwaambo Chitonga

Baroma 11:1-36

11  Aboobo ndibuzya kuti, Sena Leza wakabakaka bantu bakwe? Peepe! Nkaambo andime ndili muna Isilayeli, uuzwa mulunyungu lwa Abulahamu alimwi amumukowa wa Benjamini.  Leza kunyina pe naakabakaka bantu bakwe aabo mbaakasaanguna kubikkila maano. Sena tamuzyi ncaamba Magwalo kujatikizya Elija, nakombelezya Leza kuti abasubule bana Isilayeli?  Wakati: “O Jehova, bantu aaba bajaya basinsimi bako, bazinyonyoona zipaililo zyako alimwi mebo endikke ndime ndasyaala, eelyo lino bayandaula buumi bwangu.”  Pele ino Leza wakamwiingula buti? Wakati: “Ndicijisi baalumi bali 7,000 batamufwugamina Baala.”  Aboobo munzila eeyi, kwaciindi cino alimwi nkobali basyeede aabo bakasalwa kwiinda muluzyalo lwa Leza.  Lino ikuti naa bakasalwa akaambo kaluzyalo lwa Leza, ikusala ooku takucili akaambo kamilimo pe; nokwali boobo, luzyalo lwa Leza nilwatacili luzyalo pe.  Aboobo ino twaambe nzi? Cintu eeco ncobayandaulisya bana Isilayeli tiibakacijana pe, pele aabo bakasalwa bakacijana. Aaba bamwi boonse bakaba basicinguni;  mbubonya mbokulembedwe kuti: “Leza wakabacitya kuti babe muŋonzi zyakumuuya, babe ameso aataboni alimwi amatwi aatamvwi kusikila buzuba buno.”  Awalo Davida waamba kuti: “Tebulu lyabo beni alibabede kakole, diba, cilebyo alimwi acisubulo; 10  meso aabo aasiye mbi kutegwa bataboni, alimwi lyoonse kaboongomene misana.” 11  Aboobo andibuzye kuti, Sena bakalebwa akuwida limwi? Peepe! Pele kuwa kwabo kwakabapa lufwutuko bantu bamasi kutegwa babape kuba abbivwe. 12  Lino ikuti naa kuwa kwabo caamba zilongezyo kunyika, alimwi ikuceya kwabo caamba zilongezyo kubantu bamasi, elo kaka kuyooba zilongezyo zinji akaambo kamweelwe wabo uukkwene! 13  Lino ndaambaula andinywe nobantu bamasi. Mbwaanga ndili mutumwa kuli bamasi, ndilaulemeka mulimo wangu, 14  ikutegwa ikuti naa cakonzyeka ndicitye baabo bamusyobo wangu kuba abbivwe akufwutula bamwi akati kabo. 15  Nkaambo ikuti kukakwa kwabo kwaamba luyanzano kunyika, ino kutambulwa kwabo kulaamba nzi? Sena tacikabi buyo mbuli kubuka kuzwa kubafwu? 16  Alimwi, ikuti cibeela cibonwa kuti micelo mitaanzi kacisalala, nkokuti mulwi woonse wafulawulu uukandidwe awalo ulasalala; alimwi ikuti muyanda kuusalala, nkokuti ayalo mitabi ilasalala. 17  Nokuba boobo, ikuti naa mitabi imwi yakagonkwa pele nywebo, nokuba kuti muli mutabi wacisamu camaolifa camusyokwe, mwakalumikizyigwa akati kanjiyo akulya zyintu zinono zizwa kumiyanda yacisiko camusamu wamaolifa, 18  mutanoolisumpuli kujatikizya mitabi eeyo. Pele ikuti kamulisumpula kujatikizya njiyo, kamuyeeya kuti tamuli ndinywe pe nomutabilila miyanda, pele miyanda njiimutabilila. 19  Aboobo inga mwaamba kuti: “Mitabi eeyo yakagonkwa kutegwa kulumikizyigwe ndime.” 20  Aayo masimpe! Akaambo kakubula lusyomo kwabo bakagonkwa, pele nywebo muliimvwi akaambo kalusyomo. Lino mutalisumpuli, pele kamuyoowa. 21  Nkaambo ikuti naa Leza tanaakailekela kuzumanana mitabi iini-ini, nkokuti andinywe takamulekeli kuzumanana pe. 22  Aboobo amubone luzyalo lwa Leza abukali bwakwe. Kuli bukali kuli baabo bakawa, pele kulindinywe kuli luzyalo lwa Leza, kufwumbwa kuti mwazumanana muluzyalo lwakwe; buyo-buyo, anywebo muyookwezyulwa. 23  Abalo mbubonya, ikuti tiibazumanana kubula lusyomo, bayoolumikizyigwa; nkaambo Leza ulakonzya kubalumikizya kucinyina alimwi. 24  Nkaambo ikuti nywebo nomwakagonkwa kucisamu camaolifa camusyokwe mwakalumikizyigwa kucisamu camaolifa cisyangidwe mumuunda kakuli tabusyi mboceelede kuba, cinooli cuuba-uba kapati kaka kumitabi eeyi iini-ini kulumikizyigwa alimwi kucisamu camaolifa icinyina! 25  Nkaambo tandiyandi kuti nywebo bakwesu kamutaazyi maseseke aa Leza aaya, kutegwa mutacenjeli mumeso aanu nobeni; kuti cibeela cimwi cabana Isilayeli baba basicinguni, kusikila mweelwe uukkwene wabantu bamasi uyobololwe, 26  aboobo munzila eeyi bana Isilayeli boonse bayoofwutulwa. Mbubonya mbokulembedwe kuti: “Imuvwuni uyooboola kuzwa mu Ziyoni akubalesya kucita micito mibi balunyungu lwa Jakobo. 27  Alimwi eeci ncizuminano cangu ambabo, ndaakugusya zibi zyabo.” 28  Masimpe, ikujatikizya makani mabotu balo mbaasinkondo akaambo kandinywe, pele ikujatikizya baabo mbasala Leza balo mbayandwa akaambo kabamausyi. 29  Lino Leza takausi kujatikizya baabo mbapa zipego akwiita. 30  Nkaambo mbubonya andinywe mbomwatakali kumuswiilila Leza, pele lino mwakafwidwa luse akaambo kakutaswiilila kwabo, 31  mbubonya buyo abalo aaba lino tabaswiilili calo capa kuti mufwidwe luse, kutegwa abalo beni kubagama bafwidwe luse lino. 32  Nkaambo boonse Leza wabajalila antoomwe mukutaswiilila, ikutegwa boonse abafwide luse. 33  Eelyo talweeli kaka lubono, busongo aluzyibo lwa Leza! Eelyo kaka tazitobeleki mbeta zyakwe alimwi kunyina uunga waziteelela nzila zyakwe zyoonse! 34  Nkaambo “ino nguni waizyiba mizeezo ya Jehova, naa nguni waba sikumulaya?” 35  Naa, “Ino nguni wasaanguna kumupa cintu kutegwa cipilusyigwe kulinguwe?” 36  Nkaambo zyintu zyoonse zyakazwa kulinguwe alimwi nkozili kwiinda mulinguwe alimwi akaambo kanguwe. Kulinguwe akube bulemu kukabe kutamani. Ameni.

Bupanduluzi buyungizyidwe