Skip to content

Skip to table of contents

Bakamboni ba Jehova

Amusale mwaambo Chitonga

Bahebrayo 5:1-14

5  Nkaambo mupaizi mupati uuli woonse uubwezyegwa akati kabantu usalilwa kubeleka mulimo wa Leza uugwasya bantu, ikutegwa katuula zipego azipaizyo akaambo kazibi.  Ulakonzya kubafwida lubomba bantu batazyi ibalubizya mbwaanga awalo mwini ulapenga akubula nguzu kwakwe,  alimwi akaambo kaceeci weelede kutuulila zibi zyakwe mwini mbubonya mbwacitila zyabantu.  Kunze lyaboobo, kunyina muntu uulipa bulemu oobu mwini pe, pele lilikke naitwa a Leza, mbubonya awalo Aloni mbwaakaitwa.  Mbubonya buyo, Kilisito awalo tanaakalipa bulemu kwiinda mukulibikka kuba mupaizi mupati, pele wakapegwa bulemu ayooyo iwakamwaambila kuti: “Uli mwanaangu; imebo sunu ndaba bauso.”  Alimwi kubusena bumbi waamba kuti: “Uli mupaizi mane kukabe kutamani mbubonya mbuli Melekisedeki.”  Naakali kupona anyika Kilisito wakapaila mipailo yakukombelezya akulomba kuli Yooyo wakali kukonzya kumufwutula kulufwu, kacita boobo cakulila kapati akuzwa misozi, eelyo wakamvwugwa nkaambo wakali kuyoowa Leza.  Nokuba kuti wakali Mwana, wakaiya kumvwida kuzyintu nzyaakapenga;  alimwi eelyo naakalondolwa, wakapegwa mukuli wakupa lufwutuko lutamani kuli baabo boonse bamumvwida, 10  nkaambo Leza mwini nguwamubikka kuba mupaizi mupati mbubonya mbuli Melekisedeki. 11  Tujisi makani manji aakwaamba kujatikizya nguwe, pele nciyumu kwaapandulula nkaambo muli akazilukwa mukumvwa kwanu. 12  Nkaambo nokuba kuti lino mwaleelede kuba bamayi, muciyandika muntu wakumuyiisya buya alimwi kuzwa kumatalikilo kwini injiisyo zyantalisyo zijatikizya makani aasetekene aa Leza; alimwi mwapilukila musyule akuba bantu bayandika mukupa, ikutali cakulya ciyumu pe. 13  Nkaambo muntu woonse uuzumanana kunywa mukupa talizyi pe jwi lyabululami, nkaambo mwana musyoonto. 14  Pele cakulya ciyumu ncabantu basimide, aabo ibali amaano aayiisyidwe kwaandaanya ciluzi acitaluzi kwiinda mukwaabelesya.

Bupanduluzi buyungizyidwe