Skip to content

Skip to table of contents

Bakamboni ba Jehova

Amusale mwaambo Chitonga

Bahebrayo 3:1-19

3  Aboobo, nobakwesu basalala, nomutola lubazu mubwiite bwakujulu, kamuyeeyesya mutumwa amupaizi mupati ngotusyoma*—Jesu.  Wakali kusyomeka kuli Yooyo wakamusala, mbubonya Musa awalo mbwaakali kusyomeka muŋanda ya Leza yoonse.  Nkaambo Jesu ubonwa kuti uleelede kulemekwa kapati kwiinda Musa, mbubonya muntu uuyaka ŋanda mbwalemekwa kapati kwiinda ŋanda njayaka.  Ncobeni, iŋanda iili yoonse kuli wakaiyaka, pele ooyo wakayaka zyintu zyoonse ngu Leza.  Alimwi Musa kali mugwasyi wakali kusyomeka muŋanda yoonse ya Leza, mulimo wakwe kauli bumboni bwazyintu zyakali kuyooambwa kumbele,  pele Kilisito wakali kusyomeka kali Mwana uulanganya ŋanda ya Leza. Swebo tuli ŋanda ya Leza, kufwumbwa kuti twajatisya kwaambaula cakutayoowa alimwi abulangizi mbotulilumbaizizya kusikila mane kumamanino.  Aboobo, mbubonya muuya uusalala mbowaamba kuti: “Sunu ikuti nywebo mwaswiilila jwi lyakwe,  mutayumyi myoyo pe mbuli leliya nimwakandinyemya, mubuzuba obuya nimwakandisunka munkanda,  eelyo bamauso nibakandisunka akundisukusya, nokuba kuti bakaliibwene milimo yangu kwamyaka iili makumi one. 10  Akaambo kaako ndakasesemwa azyalani eelyo akwaamba kuti, ‘Balasweeka lyoonse mumyoyo yabo, alimwi balo beni tabanazizyiba nzila zyangu.’ 11  Aboobo kandinyemede ndakakonka ndilaamba, ‘Tabakanjili pe mukulyookezya kwangu.’” 12  Amucenjele, bakwesu, kuti kutabi muntu akati kanu uuba amoyo mubi uunyina lusyomo kwiinda mukulizandula kuli Leza uupona; 13  pele amuzumanane kukulwaizyanya abuzuba, kufwumbwa kuti kabucaambwa kuti ndi “Sunu,” kutegwa kutabi muntu naba omwe akati kanu uuyuma moyo akaambo kakweenwa anguzu zyacibi. 14  Nkaambo mubwini tuba baabo batola lubazu muli Kilisito lilikke ikuti naa twajatisya lusyomo ndotwakajisi kumatalikilo mane kumamanino. 15  Mbubonya mbokwaambwa kuti: “Sunu ikuti nywebo mwaswiilila jwi lyakwe, mutayumyi myoyo pe mbuli leliya nobakamunyemya.” 16  Ino mbaani aabo ibakamvwa pele ibakamunyemya? Mubwini, sena tabali boonse aabo ibakazwa mu Egepita kabasololelwa a Musa? 17  Kunze lyaboobo, ino mbaani aabo Leza mbaakasesemwa kwamyaka iili makumi one? Sena tabali baabo ibakabisya, ibali amitunta yakaide kwaalabana munkanda? 18  Alimwi ino nkuuli bani nkwaakakonka kuti tabakanjili mukulyookezya kwakwe? Sena teensyi kuli baabo ibatakaswiilila? 19  Aboobo twabona kuti tiibakacikonzya kunjila nkaambo bakanyina lusyomo.

Bupanduluzi buyungizyidwe

Naa, “ngotuzumina kubuleya.”