Skip to content

Skip to table of contents

Bakamboni ba Jehova

Amusale mwaambo Chitonga

Bahebrayo 2:1-18

2  Nkakaambo kaako cilayandika kuti tubikkile maano kapati kuzyintu nzyotwamvwa kutegwa tutaleyi akusweeka.  Nkaambo ikuti naa jwi ilyakaambwa kwiinda mubangelo lyakasyomeka, akuti cisubulo cakapegwa mubululami kujatikizya kusotoka mulawo kuli koonse alimwi akutaswiilila;  ino tuyoofwutuka buti swebo ikuti katutabikkili maano kulufwutuko lutalikomeneni boobo oolo Mwami wesu ndwaakasaanguna kukambauka alimwi lwakasinizyigwa kulindiswe abaabo ibakamumvwa?  Eelyo Leza awalo wakatola lubazu mukupa bumboni kwiinda muzitondezyo azyintu zigambya amilimo mipati yiindene-indene alimwi akwiinda mumuuya uusalala waabilwa kweelana amakanze aakwe.  Nkaambo tabali bangelo pe mbaakapa kweendelezya nyika njotwaamba eeyo iiboola.  Pele aciindi cimwi kamboni umwi wakalemba kuti: “Ino muntu ncinzi ooyo ngoyeeya lyoonse, naa mwana wamuntu ooyo ngolanganya?  Wakamucesya aniini kwiinda bangelo; wakamusamika musini wabulemu abwami, alimwi akumubikka kulanganya milimo yamaanza aako.  Zyintu zyoonse wakazibombya kunsi aamaulu aakwe.” Kwiinda mukubombya zyintu zyoonse kulinguwe, Leza tanaakasiya cintu cili coonse citalibombyi kulinguwe. Pele lino, tatunabona zyintu zyoonse kazilibombya kulinguwe.  Nokuba boobo tulibwene kuti Jesu, ooyo wakacesyegwa aniini kwiinda bangelo, lino usamide musini wabulemu abwami akaambo kakupenga kusikila kulufwu, kutegwa kwiinda muluzyalo lwa Leza afwide muntu uuli woonse. 10  Nkaambo cakaleelede ku-ti ooyo zyintu zyoonse ngozyakabeda alimwi uupa kuti zyintu zyoonse kaziliko kwiinda mulinguwe, mukuleta ba-na banji kubulemu, ape Musololi Mupati walufwutuko lwabo kulondoka kwiinda mumapenzi. 11  Nkaambo ooyo uusalazya alimwi abaabo ibasalazyigwa boonse bazwa kumuntu omwe, eelyo akaambo kakaambo aaka tafwi nsoni pe kubaita kuti “bakwesu,” 12  mbubonya mbwaamba kuti: “Ndiyooambilizya zyina lyako kubakwesu; akati kambungano ndiyookutembaula munyimbo.” 13  Alimwi waamba kuti: “Mebo ndiyoomusyoma.” Kunze lyaboobo waamba kuti: “Bona! Mebo alimwi abana basyoonto, aabo Jehova mbaakandipa.” 14  Aboobo, mbwaanga “bana basyoonto” aabo bali abulowa alimwi amubili wanyama, awalo mbubonya wakaba azyintu eezyi kutegwa kwiinda mulufwu lwakwe akonzye kumunyonyoona ooyo uujisi nguzu zyakuleta lufwu, nkokuti, Diabolosi; 15  akuti abaangunune boonse aabo ibakali mubuzike mubuumi bwabo boonse akaambo kakuyoowa lufwu. 16  Nkaambo mubwini tagwasyi bangelo pe, pele ugwasya lunyungu lwa Abulahamu. 17  Aboobo wakaleelede kuba mbuli “banabokwabo” mumbazu zyoonse, ikutegwa abe mupaizi mupati uuli aluse alimwi uusyomeka kuzyintu zya Leza, kutegwa atuule cipaizyo cakumanya zibi zyabantu akubayanzanya a Leza. 18  Mbwaanga walo wakapenga naakali kusunkwa, ncobeni ulakonzya kubagwasya aabo ibasunkwa.

Bupanduluzi buyungizyidwe