Skip to content

Skip to table of contents

Bakamboni ba Jehova

Amusale mwaambo Chitonga

Bafilipi 3:1-21

3  Camamanino bakwesu, amuzumanane kukondwa mu Mwami. Takundiminyi pe ikumulembela zyintu nzimunya lyoonse, mbwaanga kucita boobo kulamukwabilila.  Amubacenjelele babwa,* amubacenjelele bacita milimo mibi, amubacenjelele ibatenda mubili.*  Nkaambo swebo ndiswe tujisi bupalule bwini-bwini, mbwaanga tubeleka mulimo uusetekene kwiinda mumuuya wa Leza alimwi tulalilumbaizya muli Kilisito Jesu alimwi tatusyomi muzyintu zyakumubili,  nokuba kuti mebo, ikwiinda muntu umbi uuli woonse ndijisi twaambo tundipa kusyoma muzyintu zyakumubili. Ikuti kakuli muntu umbi uuyeeya kuti ujisi twaambo tumupa kusyoma muzyintu zyakumubili, mebo ndamwiinda:  ndakapalulwa mubuzuba bwalusele, ndili waluzubo lwa Isilayeli kuzwa kumusyobo wa Benjamini, ndimu Hebulayo wakazyalwa kuba Hebulayo; kujatikizya mulawo, ndakali mu Falisi;  kujatikizya busungu, ndakapenzya mbungano; alimwi kujatikizya bululami ikwiinda mukutobela mulawo, ndakali muntu wakanyina kampenda.  Pele zyintu izyakajisi mpindu kulindime, eezyi ndizibona kuti nzyabuyo akaambo ka Kilisito.  Ncobeni, akaambo kaceeci zyintu zyoonse ndizibona kuti nzyabuyo akaambo kampindu mpati yaluzyibo lwa Kilisito Jesu Mwami wangu. Akaambo kanguwe izyintu zyoonse ndizibona kuti nzyabuyo akuti mulwi buyo wazifwuse, ikutegwa ndijane Kilisito  alimwi akujanwa kandikamantene anguwe, ikutali akaambo kabululami bwangu ndemwini ibuzwa kukutobela mulawo, pele akaambo kabululami ibuzwa kulusyomo muli Kilisito—ibululami buzwa kuli Leza akaambo kalusyomo. 10  Makanze aangu ngakuti ndimuzyibe walo alimwi anguzu zyabubuke bwakwe akutola lubazu mukupenga kwakwe, akulibombya kulufwu luli mbuli lwakwe, 11  ikutegwa ikuti kacikonzyeka ndikabe mububuke bwakusaanguna kuzwa kubafwu. 12  Takuli kuti ndakabutambula kale bulumbu oobo naa kuti ndililondokede kale pe, pele ndili mukusolekesya kutegwa ndibone naa andime inga ndabujana bulumbu oobo mbwaakandisalila Kilisito Jesu. 13  Bakwesu, tandiliboni kuti ndakabujana kale bulumbu oobu pe; pele cintu comwe camasimpe nceeci: Kwiinda mukuziluba zyintu zyoonse zili musyule akugama buyo zyintu zili kumbele, 14  ndisolekesya kusika ambaakani eeyo mane ndikabujane bulumbu bwakujulu mbwatwiitila Leza kwiinda muli Kilisito Jesu. 15  Aboobo aabo basimide akati kesu, ababe amuzeezo ngoonya ooyu; alimwi ikuti naa kuli cintu cimwi ncomuyeeyela bumbi, Leza ulamuyubunwida muzeezo ooyu uuluzi. 16  Nokuba boobo, kweelana akuyaambele nkotwacita kale, atuzumanane kweenda kabotu acilengwa nciconya eeci. 17  Bakwesu, nyoonse amwiiye ndime, alimwi amubalangisye aabo beenda munzila yeendelana acikozyanyo ncitwakamupa. 18  Nkaambo mbanji mbondakali kubandauka lyoonse pele lino mbondibandauka kumwi kandilila, ibeenda kabali basinkondo bacisamu cakupenzyezya ca Kilisito. 19  Mamanino aabo ndunyonyooko, leza wabo ndida lyabo, ibulemu bwabo mubwini bujatikizya zyintu zijazya nsoni nzyobacita alimwi mizeezo yabo baibikkide azyintu zili anyika. 20  Pele ibusicisi bwesu buli kujulu, alimwi caluyandisisyo tulangila mufwutuli uuzwa nkuko, Mwami wesu Jesu Kilisito, 21  ooyo uuyoobelesya nguzu zyakwe zitalivwulili kusandula mibili yesu yaansi kuti ibe mbuli mubili wakwe wabulemu akubombya zyintu zyoonse kulinguwe.

Bupanduluzi buyungizyidwe

Nkokuti, ibantu basesemya mubukkale bwabo.
Nkokuti, aabo ibapalula.