Skip to content

Skip to table of contents

Bakamboni ba Jehova

Amusale mwaambo Chitonga

Baefeso 2:1-22

2  Kunze lyaboobo, Leza wakamupa buumi nokuba kuti mwakalifwide mumilandu amuzibi zyanu,  oomo momwakali kweenda aciindi cimwi kweelana abweende bwazyintu bwanyika eeyi, kweelana amuleli uujisi bweendelezi bwamuwo, nkokuti imuuya ooyo lino uubeleka mubana batamvwi.  Inzya, akati kabo cimwi ciindi toonse twakali kulilemeka kweelana azisusi zyanyama yesu, katucita zisusi zyanyama amizeezo yesu, alimwi twakazyalwa katuli bana babukali mbubonya mbuli bamwi boonse.  Pele Leza uuli aluse kapati, alimwi akaambo kaluyando lwakwe lupati ndwajisi kulindiswe,  wakatupa buumi antoomwe a Kilisito, nokuba kuti twakalifwide mumilandu—nkaambo mubwini mwafwutulwa aluzyalo lwa Leza.  Kunze lyaboobo, wakatubusya antoomwe anguwe akutukkazyika antoomwe anguwe mumasena aakujulu katukamantene a Kilisito Jesu,  kutegwa mubweende bwazyintu bwiindene-indene ibuboola Leza akatondezye luzyalo lwakwe luzwide zyintu zibotu zitalivwulili kwiinda mukututondezya buuya bwakwe swebo notukamantene a Kilisito Jesu.  Ikwiinda muluzyalo lwa Leza oolu mwafwutulwa akaambo kalusyomo; alimwi eeci tacili akaambo kandinywe pe. Pele, ncipego buyo ca Leza.  Peepe, eeci tacili akaambo kamilimo pe, ikutegwa kutabi muntu uukonzya kuba akaambo kakulilumbaizizya. 10  Tuli cilenge ca Leza; twakalengwa katukamantene a Kilisito Jesu kutegwa tucite milimo mibotu, eeyo Leza njaakasalila limwi kuti katweenda mulinjiyo. 11  Aboobo kamuyeeya kuti kuciindi cimwi nywebo, nobantu bamasi kumubili, ndendinywe nomwakali kwiitwa kuti “batapalwidwe” abaabo “bapalwidwe” kumubili amaanza abantu. 12  Kuciindi eeco mwakanyina Kilisito, mwakalizandukide kucisi ca Isilayeli, alimwi mbwaanga mwakali beenzu, mwakanyina lubazu muzizuminano zyacisyomezyo, mwakanyina bulangizi alimwi mwakanyina Leza munyika eeyi. 13  Pele lino mukukamantana a Kilisito Jesu, nywebo musyule oomu nomwakali kule a Leza, mwaba afwaafwi anguwe kwiinda mubulowa bwa Kilisito. 14  Nkaambo walo ndoluumuno lwesu, ooyo wakaswaanganya nkamu zyobilo kuba yomwe akumwaya bwaanda bwakali akati oobo ibwakali kubaandaanya. 15  Amubili wakwe wakamanizya businkondo bwakaliko, nkokuti Mulawo uujisi milawo amalailile, ikutegwa aswaanganye nkamu zyobilo ikuba muntu mupya omwe uukamantene anguwe akuleta luumuno; 16  akuti ayanzanye bantu aabo bobilo cakumaninina mumubili omwe kuli Leza kwiinda mucisamu cakupenzyezya, nkaambo amubili wakwe wakabujaila limwi businkondo boonse bwakaliko. 17  Alimwi wakaboola akwaambilizya makani mabotu aaluumuno kulindinywe nomwakali kule a Leza, alimwi aluumuno kuli baabo bali afwaafwi anguwe, 18  nkaambo kwiinda mulinguwe swebo, tobantu bankamu zyoonse zyobilo, tulaangulukide kusika kuli Taata kwiinda mumuuya omwe. 19  Aboobo, ncobeni lino tamucili beenzu abasikukkala buyo bamuzwakule pe, pele mu-li basicisinyina abasalali ali-mwi muli baŋanda ya Leza, 20  alimwi mwakayakwa antalisyo yabatumwa abasinsimi, kakuli walo Kilisito Jesu kumugama ndebbwe lyantalisyo lyakukaswi. 21  Mukukamantana anguwe, mbwaanga zibeela zyaŋanda zyoonse ziliswaanganizyidwe kabotu-kabotu, ŋanda eeyo yoonse iyaabukomena kuba tempele lisalala lya Jehova. 22  Mukukamantana anguwe, anywebo mulayakwa antoomwe kuti mube busena mwakkala Leza kwiinda mumuuya.

Bupanduluzi buyungizyidwe