Skip to content

Skip to table of contents

Bakamboni ba Jehova

Amusale mwaambo Chitonga

2 Timoteyo 1:1-18

1  Ndime Paulo, mutumwa wa Kilisito Jesu kwiinda mukuyanda kwa Leza ikweelana acisyomezyo cabuumi bujanwa kwiinda muli Kilisito Jesu,  nendalembela nduwe Timoteyo, omwanaangu uuyandwa kuti: Iluzyalo, luse alimwi aluumuno ikuzwa kuli Leza Taata akuli Kilisito Jesu Mwami wesu azibe anduwe.  Ndamulumba Leza, ooyo ngondibelekela mulimo uusetekene amanjezyeezya aasalala mbubonya mbobakacita bamatata, cakuti kunyina nondileka kukwiibaluka mumipailo yangu yakukombelezya, masiku amasyikati.  Ndilayandisisya kukubona, nondiibaluka misozi yako, ikutegwa ndikondwe kapati.  Nkaambo ndilalwiibaluka lusyomo ndojisi ilutali lwakuupaupa ameso, oolo cakusaanguna ilwakali muli bakaapanyoko ba Loisi amuli banyoko ba Yunisi, pele ndondisyoma kuti moluli amuli nduwe.  Akaambo kaceeci ndikwiibalusya kuti ucivwilimye mbuli mulilo cipego ca Leza cili mulinduwe ncowakapegwa nindakabikka maanza aangu alinduwe.  Nkaambo Leza tanaakatupa muuya wabukandu pe, pele wakatupa muuya wanguzu aluyando alimwi akuyeeya kabotu.  Aboobo utafwi nsoni kucitila bumboni kujatikizya Mwami wesu naa kujatikizya ndime, ndemwaange akaambo kanguwe, pele kolibambila kupengela makani mabotu kwiinda mukusyoma nguzu zya Leza.  Wakatufwutula akutwiita abwiite busalala, ikutali akaambo kamilimo yesu pe, pele akaambo kamakanze aakwe mwini alimwi aluzyalo lwakwe. Luzyalo oolu wakatupa muli Kilisito Jesu ikale-kale, 10  pele lino lwalibonya antangalala kwiinda mukuyubunuka kwa Mufwutuli wesu, Kilisito Jesu, ooyo iwamanizya lufwu akumunikila buumi akutabola kwiinda mumakani mabotu, 11  aayo ngondakasalilwa kuti ndibe mukambausi, mutumwa alimwi imwiiyi. 12  Nkakaambo kaako ncondipengela boobu alimwi, pele tandifwi nsoni pe. Nkaambo ndilimuzyi ngondisyoma, alimwi ndilisinizyide kuti ulakonzya kucibamba eeco ncendibikkide mumaanza aakwe mane kusikila kubuzuba oobo. 13  Kozumanana kukakatila kucitondezyo* camajwi mabotu alimwi meni-meni ngookamvwa kulindime icalusyomo aluyando lujanwa akaambo kakukamantana a Kilisito Jesu. 14  Kocibamba kabotu cintu eeci ciyandisi cibikkidwe mumaanza aako kwiinda mumuuya uusalala uuli mulindiswe. 15  Ulaazyi makani aaya aakuti bantu boonse mucooko ca Asiya bandimwaika akundisiya, kubikkilizya a Fugelo alimwi a Hemogene. 16  Mwami abafwide luse baŋanda ya Onesifolo, nkaambo ziindi zinji wakali kundikulwaizya, alimwi kunyina naakafwa nsoni pe akaambo kanketani zyangu. 17  Muciindi caboobo, naakali mu Loma, wakasungwaala kundiyandaula kusikila mane wandijana. 18  Mwami amupe kuti akafwidwe luse a Jehova mubuzuba oobo. Alimwi yebo uliizyi kabotu milimo yoonse njaakabeleka ku Efeso.

Bupanduluzi buyungizyidwe

Naa, “kuceelelo, kububambe.”