Skip to content

Skip to table of contents

Bakamboni ba Jehova

Amusale mwaambo Chitonga

2 Petro 3:1-18

3  Nobayandwa, oolu lino ndugwalo lwabili ndondimulembela, oomo mbubonya mbuli mulugwalo lwangu lwakusaanguna, mondisensemuna mizeezo yanu mibotu kwiinda mukumuyeezya,  ikutegwa mwiibaluke majwi aakaambwa musyule abasinsimi basalala alimwi amulawo wa Mwami alimwi Mufwutuli wesu kwiinda mubatumwa banu.  Cakusaanguna, amuzyibe kuti kumazuba aamamanino kuyooboola basikasampusampu akusampaula kwabo, ibayootobela zisusi zyabo beni  kabaamba kuti: “Ino nkuli ikubako kwakwe ooko kwakasyomezyegwa? Kayi, kuzwa buzuba bamatata nobakoona mulufwu, izyintu zyoonse zilazumanana mbubonya mbozyakabede kuzwa kumatalikilo aazilenge.”  Nkaambo acaali tabakabikkili maano kaambo kakuti kwiinda mujwi lya Leza, ikaindi kwakali majulu alimwi anyika njumu yakasumpwidwe atala amaanzi alimwi yakazingulukidwe amaanzi;  alimwi kwiinda muzyintu eezyi inyika yakuciindi eciya yakanyonyoonwa noyakapaizyigwa maanzi aazambangulwe.  Pele kujwi ndimunya eelyo majulu alimwi anyika ziliko lino zyabambilwa mulilo alimwi zyayobolwa kusikila mubuzuba bwalubeta abwalunyonyooko lwabantu basampaula Leza.  Nokuba boobo nobayandwa, mutakalubi kaambo aaka kakuti, buzuba bomwe kuli Jehova buli mbuli myaka iili cuulu alimwi myaka iili cuulu ili mbuli buzuba bomwe.  Jehova tamukide pe kujatikizya cisyomezyo cakwe kweelana ambobayeeya bamwi kuti wamuka, pele umukkazyikila moyo nkaambo tayandi kuti muntu uuli woonse anyonyoonwe, pele uyanda kuti boonse bakonzye kweempwa. 10  Nokuba boobo, buzuba bwa Jehova buyoosika mbuli mubbi, eelyo majulu naayooloba amuzuzumo mupati mukulaba kwaliso, pele zyintu zyakujulu mbwaanga ziyoopya kapati, ziyooenzemuka alimwi nyika amilimo iili mumo ziyoobikkwa antangalala. 11  Mbwaanga zyintu eezyi zyoonse ziyooenzemuka boobu, amuyeeye buyo naa mweelede kuba bantu bali buti mubukkale busalala alimwi amilimo yakubelekela Leza cakulyaaba, 12  nomulindila akuyeeyesya kubako kwabuzuba bwa Jehova, eelyo majulu naayoonyonyoonwa mumulilo uuvwilima alimwi zyintu zyakujulu ziyoonyenguluka akupya kutaambiki! 13  Pele kuli majulu mapya anyika mpya nzyotulindila swebo kweelana acisyomezyo cakwe, alimwi muli zyeezyi muyooba bululami. 14  Aboobo, nobayandwa, mbwaanga nywebo mulindila zyintu eezyi, amusoleke kusikila mpomugolela kuti kumamanino akamujane kamutajisi kabala nokaba kampenda alimwi kamuli muluumuno. 15  Kuyungizya waawo, amubone kukkazyika moyo kwa Mwami wesu kuti ndufwutuko, mbubonya awalo mukwesu uuyandwa Paulo mbwaakamulembela kweelana abusongo mbwaakapegwa, 16  kaamba zyintu eezyi mbubonya mbwacita mumagwalo aakwe oonse. Nokuba boobo, mulingawo kuli zyintu zimwi zikatazya kumvwa, alimwi zyintu eezyi nzyobapilinganya ibantu aabo batakwe luzyibo alimwi batakkalikene mbubonya mbobacita Magwalo aambi, cakuti balalinyonyoona beni. 17  Aboobo nywebo nobayandwa, mbomujisi kale luzyibo oolu, amucenjele kutegwa mutaleyi antoomwe ambabo kwiinda mukulubizya kwabantu babi alimwi akusweekelwa kuzyandamana kwanu. 18  Citabi boobo pe, pele amuzumanane kukomena muluzyalo lwa Leza amuluzyibo lwa Mwami a Mufwutuli wesu Jesu Kilisito. Kulinguwe akube bulemu lino alimwi mane kukabe kutamani.

Bupanduluzi buyungizyidwe