Skip to content

Skip to table of contents

Bakamboni ba Jehova

Amusale mwaambo Chitonga

2 Bakorinto 6:1-18

6  Mbotubelekela antoomwe anguwe, aswebo tumukulwaizya kuti mutatambuli luzyalo lwa Leza cabuyo.  Nkaambo waamba kuti: “Muciindi ceelede ndakakuswiilila, alimwi mubuzuba bwalufwutuko ndakakugwasya.” Amubone! Ecino ncobeni nceciindi ceelede. Amubone! Obuno mbobuzuba bwalufwutuko.  Tatuciti cintu cili coonse cityompya bamwi, kutegwa mulimo wesu utajaninwi kampenda;  pele muli zyoonse tulatondezya kuti tuli babelesi ba Leza, kwiinda mukuliyumya muzyintu zinji, mbuli mapenzi, kubula ziyandika, buyumuyumu,  kuumwa, kuba muntolongo, lupyopyongano, kubeleka canguzu, kutoona masiku, aziindi notunyina cakulya.  Alimwi tulatondezya kuti tuli babelesi ba Leza kwiinda mubukkale busalala, mukuba aluzyibo, mukuliyumya cakukkazyika moyo, mukuba aluzyalo, mukuba amuuya uusalala, mukuba aluyando lutali lwakuupaupa ameso,  mukwaamba zyamasimpe, mukutondezya nguzu zya Leza; kwiinda mukunyamuna zilwanyo zyabululami kujanza lyalulyo alyalumwensyi.  Alimwi tulacita oobo notulemekwa anotusampaulwa, notwaambwa kuti tuli babi akuti tuli babotu; notubonwa kuti tuli basilweeno kakuli twaamba zyamasimpe,  aleelyo notubonwa kuti tatuzyibidwe pe, kakuli tulizyibidwe kabotu, notubonwa kuti tweelede kufwa, kakuli tucipona, notusubulwa pele katutafwide, 10  notubonwa mbuli bantu bauside kakuli tulikondedwe lyoonse, notubonwa mbuli bantu bapengede, kakuli tugwasya bantu banji kuba bavwubi, notubonwa mbuli bantu banyina ncobajisi, kakuli tulijisi zyintu zyoonse. 11  Twamwaambila cakutainda mumbali nobana Kolinto, alimwi myoyo yesu ilijalukide. 12  Swebo tatusinkili luyando ndotujisi kulindinywe pe, pele nywebo musinkila luyando lwanu kulindiswe. 13  Aboobo, ikutegwa tupane maanzaasokwe, ndimwaambila mbuli bana bangu kuti anywebo amujalule myoyo yanu kulindiswe. 14  Mutanjili mujoko lyomwe abantu batasyomi. Nkaambo ino bululami buswaangene buti abubi? Naa, ino mumuni uswaangene buti amudima? 15  Kunze lyaboobo, ino nkweendelana kuli buti kuliko akati ka Kilisito a Beliyali?* Naa, ino muntu uusyoma uswaangene buti amuntu uutasyomi? 16  Alimwi nkumvwana kuli buti nkolijisi tempele lya Leza amituni? Nkaambo tuli tempele lya Leza muumi; mbubonya Leza mbwaakaamba kuti: “Ndiyookkala akati kabo akweendeenda akati kabo, ndiyooba Le-za wabo abalo bayooba bantu bangu.” 17  “‘Aboobo amuzwe akati kabo, akulyaandaanya,’ mbwaamba Jehova, ‘alimwi amuleke kuguma cintu cisofweede’”; “‘eelyo ndiyoomutambula.’” 18  “‘Alimwi ndiyooba bauso, eelyo nywebo muyooba bana bangu basankwa abasimbi,’ mbwaamba Jehova Singuzuzyoonse.”

Bupanduluzi buyungizyidwe

Nkokuti, “Uunyina Mulimo,” ikwaamba mubi, Saatani