Skip to content

Skip to table of contents

Bakamboni ba Jehova

Amusale mwaambo Chitonga

1 Timoteyo 3:1-16

3  Ikaambo aaka nkamasimpe. Ikuti naa muntu kayanda mulimo wabulangizi, uyanda mulimo mubotu.  Aboobo mulangizi weelede kuba muntu uutakwe kampenda, mulumi uukwete mukaintu omwe, uutaciindizyi muzilengwa, uulibatamika, mulondo, uusamausya, uukonzya kuyiisya kabotu,  ikutali mukolwi, ikutali sinkondo, pele uunyoneka, ikutali sinkazi, ikutali uuyandisya mali,  weelede kuba muntu uubeendelezya kabotu bamuŋanda yakwe, uujisi bana balibombya cakumaninina;  (nkaambo ncobeni ikuti muntu katacizyi kweendelezya bamuŋanda yakwe mwini, ino mbuti mbwakonzya kulanganya mbungano ya Leza?)  ikutali wakasanduka onoono, ikuyoowa kuti inga walitukumuna akubetekwa mbubonya mbuli Diabolosi.  Kunze lyaboobo, weelede kuti kajisi mpuwo mbotu kubantu bakunze, ikutegwa bantu batamusampauli akuti atacegwi mukakole ka Diabolosi.  Mbubonya buyo abalo bakutausi beelede kuba bantu basimide mumizeezo, ikutali basimilaka yobilo, ikutali banywa waini munji, ikutali bayanda kujana mpindu cabumpelenge,  pele ibakakatila kumaseseke aa Leza aajatikizya lusyomo kabajisi manjezyeezya aasalala. 10  Alimwi, aaba beelede kusaanguna kusolwa naa baleelela, nomuya mubalekele kubeleka mulimo wabukutausi, mbwaanga tabajisi butongo. 11  Abalo bamakaintu mbubonya beelede kuba bantu basimide mumizeezo, batabejelezyi bamwi twaambo, bataciindizyi muzilengwa, ibasyomeka muzyintu zyoonse. 12  Bakutausi beelede kuba balumi bakwete mukaintu omwe, ibeendelezya kabotu bana babo alimwi abamumaanda aabo beni. 13  Nkaambo bantu aabo ibabeleka kabotu balijanina mpuwo mbotu alimwi balakonzya kwaamba cakutayoowa abuniini kujatikizya lusyomo lwabo muli Kilisito Jesu. 14  Ndakulembela zyintu eezyi nokuba kuti ndilangilwa kusika ooko nkobede lino-lino, 15  kutegwa ikuti naa ndimuke, uzyibe mboyelede kulilemeka muŋanda ya Leza, iili nimbungano ya Leza uupona, imusemu alimwi cisiko cakasimpe. 16  Masimpe, mapati ncobeni imaseseke aajatikizya kubelekela Leza cakulyaaba aaya aakuti: ‘Wakacitwa kuti alibonye mumubili, wakaambwa kuti mululami mumuuya, wakalibonya kubangelo, wakakambaukwa akati kamasi, wakasyomwa munyika, wakatambulwa kujulu mubulemu.’

Bupanduluzi buyungizyidwe