Skip to content

Skip to table of contents

Bakamboni ba Jehova

Amusale mwaambo Chitonga

1 Petro 3:1-22

3  Mbubonya buyo, anywebo nobakaintu, amulibombye kubalumi banu, ikutegwa naa kuli bataliswiilili ijwi, bakonzye kukwelelezyegwa kakunyina kubelesya jwi pele kwiinda mubukkale bwabakaintu babo,  akaambo kakulibonena bukkale bwanu busalala antoomwe akuba abulemu kapati.  Kulisakatizya kwanu kutabi buyo kwaatala—kwakuluka masusu akusama zyintu zyangolida naa zisani zidula kapati—  pele akube kulisakatizya kwamuntu wamukati kamoyo uusamide cisani citanyonyooki camoyo uukkede alimwi mubombe, ooyo uuyandika kapati mumeso aa Leza.  Nkaambo oobu mbobakali kulisakatizya bamakaintu basalala ibakali kulangila Leza kaindi, kabalibombya lwabo beni kubalumi babo,  mbubonya Sala mbwaakaswiilila Abulahamu, akumwiita kuti “mwami.” Alimwi nywebo mwaba bana bakwe kufwumbwa kuti muzumanane kucita zibotu akutayoowa cintu cili coonse.  Nywebo nobalumi, amuzumanane kukkala mbubonya oobo ambabo kweelana aluzyibo. Amubape bulemu mbubonya mbuli cibelesyo cipwaika buyo, mbobali bakaintu, nkaambo alimwi muli basikukonanyina ambabo ibabuumi bupegwa akaambo kaluzyalo lwa Leza, ikutegwa mipailo yanu itasinkilwi.  Camamanino, nyoonse amube amuzeezo omwe, amweetelelane, amutondezye luyando lwabunyina, amube amoyo mutete walubomba alimwi amulicesye.  Mutapilusyi cibi kucibi naa matusi kumatusi. Muciindi caboobo, amuleleke, nkaambo mwakaitilwa bukkale oobu, ikutegwa mukakone cileleko. 10  Nkaambo, “kufwumbwa ooyo uuyanda buumi akubona mazuba mabotu weelede kuujata mulaka wakwe kukwaamba zibyaabi amilomo yakwe kukwaamba lweeno. 11  Azifwutatile izyintu zibyaabi akucita zibotu; ayandaule luumuno akusungwaala kulutobela. 12  Nkaambo meso aa Jehova ali kubalulami, amatwi aakwe aswiilila mipailo yabo yakukombelezya; pele busyu bwa Jehova bulabasyuuluka aabo bacita zibi.” 13  Nkaambo ncobeni, ino nguni uunga wamucisa ikuti kamuli basungu mukucita zibotu? 14  Pele nokuba kuti mulakonzya kupenga akaambo kabululami, mulakkomana. Nokuba boobo, mutayoowi ncobayoowa balo, nokuba kunyongana. 15  Pele mumyoyo yanu amubone Kilisito kuti Mwami akuti ulasalala, kamulibambilide lyoonse kuliiminina kumuntu uuli woonse uukonzya kumubuzya kaambo kajatikizya bulangizi mbomujisi, pele amucite boobo amoyo mubombe alimwi abulemu kapati. 16  Amuzumanane kuba amanjezyeezya mabotu ikutegwa kufwumbwa nobamwaamba zyintu zibi, aabo bamwaamba zyintu zibi bafwe nsoni akaambo kabukkale bwanu bubotu mbomuli basikutobela Kilisito. 17  Nkaambo cili kabotu kupenga akaambo kakuti mucita zibotu, ikuti kakuli kuyanda kwa Leza, ikutali akaambo kakuti mucita zibi. 18  Nkaambo naba Kilisito wakafwa ciindi comwe buyo kukabe kutamani kujatikizya zibi, muntu uululeme kufwida bantu bataluleme, kutegwa amusololele kuli Leza. Wakajaigwa kali amubili wanyama pele wakabusyigwa amubili wamuuya. 19  Alimwi muciimo eeci nciconya wakaunka akuyookambaukila myuuya muntolongo 20  eeyo yatakali kuswiilila ciindi Leza naakali kulindila cakukkazyika moyo kumazuba aa Nowa, ibwato nobwakali kupangwa, oomo bantu basyoonto buyo, nkokuti bantu bali lusele mobakafwutulwa kumaanzi. 21  Lubbapatizyo, ilukozyenye aceeci, alwalo lulamufwutula lino, (ikutali kusamba tombe lyaamubili pe, pele ikulomba manjezyeezya mabotu kuli Leza,) kwiinda mububuke bwa Jesu Kilisito. 22  Walo wakaunka kujulu eelyo lino uli kujanza lyalulyo lya Leza; alimwi bangelo, beendelezi abasinguzu bakabikkwa ansi aanguwe.

Bupanduluzi buyungizyidwe