Skip to content

Skip to table of contents

Bakamboni ba Jehova

Amusale mwaambo Chitonga

1 Johane 5:1-21

5  Muntu woonse uusyoma kuti Jesu ngu Kilisito uzyedwe kuli Leza, alimwi muntu woonse uuyanda yooyo wakapa kuti azyalwe ulamuyanda ooyo uuzyedwe kuli yooyo.  Oobu mbotuzyiba kuti tulabayanda bana ba Leza, notumuyanda Leza akucita ncoyaamba milawo yakwe.  Nkaambo kuyanda Leza caamba kuti katubamba milawo yakwe; alimwi buya milawo yakwe tiiminyi,  nkaambo muntu woonse* uuzyedwe kuli Leza ulaizunda nyika. Alimwi oolu ndoluzundo ilwazunda nyika, ilusyomo lwesu.  Ino nguni uunga wazunda nyika? Sena tali yooyo uujisi lusyomo lwakuti Jesu Mwana wa Leza?  Ooyu ngonguwe wakaboola kwiinda mumaanzi abulowa, Jesu Kilisito; ikutali amaanzi buyo pe, pele maanzi alimwi abulowa. Alimwi muuya nguupa bumboni, nkaambo muuya nkakasimpe.  Nkaambo kuli bakamboni botatwe,  imuuya, maanzi alimwi abulowa, alimwi eezyi zyotatwe zilazuminana.  Ikuti naa tulabuzumina bumboni bwabantu, ibumboni bwa Leza mbupati kapati. Nkaambo oobu mbobumboni mbwapa Leza, kuti wapa bumboni kujatikizya Mwanaakwe. 10  Muntu uuli alusyomo mu Mwana wa Leza ulijisi bumboni mulinguwe mwini. Imuntu uutajisi lusyomo muli Leza wapa kuti abe mubeji, nkaambo tanaasyoma bumboni mbwaapa Leza kujatikizya Mwanaakwe. 11  Lino oobu mbobumboni bwapegwa, kuti Leza wakatupa buumi butamani, alimwi ibuumi oobu buli mu Mwanaakwe. 12  Ooyo uujisi Mwana ulibujisi buumi oobu; ooyo uutajisi Mwana wa Leza tabujisi pe buumi oobu. 13  Ndimulembela zyintu eezyi kutegwa muzyibe kuti mujisi buumi butamani, nywebo nomujisi lusyomo muzyina lya Mwana wa Leza. 14  Alimwi oolu ndolusinizyo ndotujisi mulinguwe, kuti kufwumbwa cintu ncotumulomba ceendelana akuyanda kwakwe, ulatumvwa. 15  Kuyungizya waawo, ikuti katuzyi kuti ulatumvwa kujatikizya cintu cili coonse ncotulomba, tulizyi kuti tuyooba azyintu nzyotulomba mbwaanga twazilomba kulinguwe. 16  Ikuti umwi wabona munyina kacita cibi citaleteli lufwu, uyoolomba, alimwi Leza uyoopa buumi kuli yooyu, inzya kuli baabo bataciti cibi cikonzya kuletela lufwu. Kuli cibi ciletela lufwu. Eeci ncecibi ncenditamwaambili kuti amulombele. 17  Kutalulama koonse ncibi; nokuba boobo kuli cibi citaleteli lufwu. 18  Tulizyi kuti muntu woonse uuzyedwe kuli Leza tazumanani pe kucita cibi, pele Ooyo* uuzyedwe kuli Leza ulamulinda, alimwi ooyo mubi takonzyi kumujata pe. 19  Tulizyi kuti tuzwa kuli Leza, pele nyika yoonse ili mumaanza aamubi. 20  Pele tulizyi kuti Mwana wa Leza waboola, alimwi watupa maano kutegwa tukonzye kuba aluzyibo lwayooyo mwini-mwini. Alimwi tulikamantene ayooyo mwini-mwini kwiinda mu Mwanaakwe, Jesu Kilisito. Ooyu ngo Leza mwini-mwini alimwi mbobuumi butamani. 21  Nobana bangu bayandwa, amwiitantamuke mituni.

Bupanduluzi buyungizyidwe

Mu Chigiliki, “cintu coonse.”
“Ooyo uuzyedwe kuli Leza,” nkokuti Jesu Kilisito Mwana wa Leza kweelana akapango 1.