Skip to content

Skip to table of contents

Bakamboni ba Jehova

Amusale mwaambo Chitonga

1 Johane 2:1-29

2  Nobana bangu bayandwa, ndimulembela zyintu eezyi kutegwa mutabisyi. Pele, ikuti umwi wabisya, tulijisi mugwasyi kuli Taata, Jesu Kilisito, imululami.  Alimwi walo ncipaizyo cakumanya zibi zyesu akutuyanzanya a Leza, pele ikutali buyo zyesu zilikke, pele azyanyika yoonse.  Lino oobu mbotuzyiba kuti tulimuzyi kabotu, ikuti naa twazumanana kubamba milawo yakwe.  Ooyo waamba kuti: “Ndilimuzyi kabotu,” pele tabambi milawo yakwe, mubeji alimwi kasimpe takako pe mumuntu ooyo.  Pele kufwumbwa muntu uubamba jwi lyakwe, luyando ndwajisi muntu ooyo kuli Leza lwalondolwa ncobeni. Oobu mbotuzyiba kuti tulikamantene anguwe.  Ooyo waamba kuti lyoonse ulikamantene anguwe alimwi weelede kuzumanana kweenda mbubonya mbwaakeenda walo.  Nobayandwa, tandimulembeli mulawo mupya pe, pele mulawo wakaindi ooyo ngomwajisi kuzwa kumatalikilo. Imulawo wakaindi ooyu ndijwi eelyo ndimwakamvwa.  Pele lino ndimulembela mulawo mupya, iwamasimpe kujatikizya nguwe alimwi andinywe, nkaambo mudima uyaabumana eelyo mumuni wini-wini watalika kale kumweka.  Ooyo waamba kuti uli mumumuni pele kwamana boobo kasulaika munyina, ucili mumudima ambuli sunu. 10  Ooyo uuyanda munyina ulazumanana kuba mumumuni, alimwi mulinguwe munyina cilebyo. 11  Pele ooyo uusulaika munyina uli mumudima alimwi weenda mumudima, alimwi takuzyi pe nkwaya nkaambo mudima waofwaazya meso aakwe. 12  Ndilembela ndinywe, nobana bangu bayandwa, nkaambo mwalekelelwa zibi zyanu akaambo kazyina lyakwe. 13  Ndilembela ndinywe nomatata, nkaambo mulimuzyi kabotu ooyo uuliko kuzwa kumatalikilo. Ndilembela ndinywe nobalombwana, nkaambo mwamuzunda ooyo imubi. Ndilembela ndinywe nobana baniini, nkaambo mulimuzyi kabotu Taata. 14  Ndilembela ndinywe nomatata, nkaambo mulimuzyi kabotu ooyo uuliko kuzwa kumatalikilo. Ndilembela ndinywe nobalombwana, nkaambo muli bayumu alimwi jwi lya Leza molili mulindinywe ciindi coonse alimwi mwamuzunda ooyo imubi. 15  Mutanooyandi nyika noziba zyintu zili munyika. Ikuti naa muntu kayanda nyika, nkokuti iluyando lwa Taata taluko pe mulinguwe; 16  nkaambo zyintu zyoonse zili munyika—zisusi zyanyama alimwi azisusi zyameso amambonwa akaambo kazyintu nzyajisi muntu—tazizwi kuli Taata pe, pele zizwa munyika. 17  Kunze lyaboobo, inyika iyaabumana antoomwe azisusi zyayo, pele ooyo uucita kuyanda kwa Leza unooliko lyoonse mane kukabe kutamani. 18  Nobana baniini, ecino nciindi camamanino, alimwi mbubonya mbomwakamvwa kuti sikulwana Kilisito ulaboola, noliba lino kuli basikulwana Kilisito banji ibalibonya kale; eeco cituzyibya kuti ecino nciindi camamanino. 19  Bakazwa akati kesu, pele tiibakali bamwi besu; nkaambo ikuti nobakali bamwi besu, nobakazumanana kuba andiswe. Pele bakazwa ikutegwa kulibonye caantangalala kuti tabali boonse pe ibategwa mbamwi besu. 20  Alimwi nywebo mulinanikidwe ayooyo uusalala alimwi nyoonse muli aluzyibo. 21  Tandimulembeli boobu akaambo kakuti tamukazyi kasimpe pe, pele nkaambo mulikazyi, alimwi nkaambo kunyina bubeji buzwa mukasimpe. 22  Ino nguni mubeji kunze lyayooyo uukaka kuti Je-su ngu Kilisito? Ooyu ngonguwe sikulwana Kilisito, ooyo uukaka Taata alimwi a Mwana. 23  Muntu uuli woonse uukaka Mwana tamujisi a Taata. Ooyo uuzumina Mwana ulimujisi awalo Taata. 24  Lino nywebo, eeco ncomwakamvwa kumatalikilo ceelede kuzumanana mulindinywe. Ikuti naa eeco ncomwakamvwa kumatalikilo cazumanana mulindinywe, nkokuti alimwi munookamantene a Mwana alimwi a Taata. 25  Kunze lyaboobo, eeci ncecintu ncaakatusyomezya walo mwini, ibuumi butamani. 26  Ndimulembela zyintu eezyi kujatikizya baabo ibasola kumweena. 27  Lino nywebo, ikunanikwa nkomwakatambula kuzwa kulinguwe kulazumanana mulindinywe, alimwi tamuyandiki muntu uuli woonse wakumuyiisya; pele kunanikwa ooku ikuzwa kulinguwe nkokumuyiisya zyintu zyoonse, alimwi nkwamasimpe, takuli kwakubeja pe. Mbubonya mbokwamuyiisya, amuzumanane kukamantana anguwe. 28  Aboobo nobana bangu bayandwa, amuzumanane kukamantana anguwe ikutegwa aakuyubununwa tukacikonzye kwaamba cakutayoowa, tutakausyigwi nsoni akuzwa kulinguwe kuciindi cakubako kwakwe. 29  Ikuti naa kamuzyi kuti uliluleme, nkokuti mulizyi kuti muntu woonse uucita bululami wakazyalwa kuzwa kulinguwe.

Bupanduluzi buyungizyidwe