Skip to content

Skip to table of contents

Bakamboni ba Jehova

Amusale mwaambo Chitonga

1 Bakorinto 6:1-20

6  Umwi akati kanu najisi kaambo kumweenzinyina, nkaambo nzi ncaunka kunkuta kubantu bataluleme, muciindi cakuunka kubasalali?  Naa sena tamuzyi kuti basalali bayooibeteka nyika? Alimwi ikuti naa nywebo muyooibeteka nyika, sena tamweeleli kubeteka tukani tuniini kapati?  Sena tamuzyi kuti tuyoobeteka bangelo? Aboobo sena tatweeleli kubeteka makani aamubuumi oobu?  Aboobo ikuti kamujisi makani aamubuumi oobu aaelede kubetekwa, sena mbantu basampaulwa mumbungano mbomubikka kuba babetesi?  Ndili mukwaamba boobu kutegwa ndimuusye nsoni. Sena masimpe kuti kunyina musongo naba omwe akati kanu uukonzya kubeteka makani akati kababunyina?  Muciindi caboobo, mukwesu utola munyina kunkuta, kubantu ibatasyomi!  Masimpe, ikutolana kunkuta nkomucita akati kanu kwaamba kuti mwazundwa kale cakumaninina. Nkaambo nzi muciindi caboobo ncomutalekeli buyo kuti mubisizyigwe ndinywe? Nkaambo nzi muciindi caboobo ncomutalekeli kuti nywebo lwanu muuninwe?  Pele muciindi caboobo, mulabisya akuunina, alimwi mbomucitila boobo mbanabokwanu.  Sena tamuzyi kuti bataluleme tabakabukoni Bwami bwa Leza? Mutalyeeni pe. Nobaba basibwaamu, nobaba basikukomba mituni, nobaba basimamambe, nobaba baalumi boonwa abaaluminyina, nobaba baalumi boona baaluminyina, 10  nobaba babbi, nobaba basyaacivwulemwangu, nobaba bakolwi, nobaba basimatusi, nobaba bafwumpi, tabakabukoni Bwami bwa Leza. 11  Lino oobo mbobakabede bamwi akati kanu. Pele mwakasanzyigwa, mwakasalazyigwa, akwaambwa kuti muli balulami muzyina lya Mwami wesu Jesu Kilisito amumuuya wa Leza wesu. 12  Zyintu zyoonse zilizumizyidwe kulindime; pele tazili zyintu zyoonse zili ampindu. Zyintu zyoonse zilizumizyidwe kulindime; pele tandikalekeli cintu cili coonse kundeendelezya. 13  Izyakulya zyakapangilwa da, alimwi da lyakapangilwa zyakulya; pele Leza uyoonyonyoona zyoonse zyobilo ida azyakulya. Lino mubili tauli wabwaamu pe, pele ngwa Mwami; alimwi Mwami ngomukamwini mubili. 14  Pele Leza wakamubusya Mwami alimwi andiswe uyootubusya kuzwa kulufwu kwiinda munguzu zyakwe. 15  Sena tamuzyi kuti mibili yanu nzizyo zya Kilisito? Aboobo sena ndibweze zizyo zya Kilisito akuziswaanganya kumukaintu muvwuule? Peepe! 16  Sena tamuzyi kuti ooyo uuliswaanganya kumukaintu muvwuule uba mubili omwe anguwe? Nkaambo Leza waamba kuti, “Aaba bobilo bayooba mubili omwe.” 17  Pele ooyo uuliswaanganya ku Mwami uba muuya omwe anguwe. 18  Amubutije bwaamu. Cibi cimbi cili coonse muntu ncanga wacita cili kunze aamubili wakwe, pele ooyo uucita bwaamu ubisizya mubili wakwe mwini. 19  Sena tamuzyi kuti mubili wanu nditempele lyamuuya uusalala ngomujisi kuzwa kuli Leza? Alimwi buumi mbomujisi tabuli bwanu nobeni pe, 20  nkaambo mwakaulwa acintu cidula. Aboobo ziyume zitete, amumulemeke Leza mumibili yanu nywebo nobantu.

Bupanduluzi buyungizyidwe