Skip to content

Skip to table of contents

Bakamboni ba Jehova

Amusale mwaambo Chitonga

1 Bakorinto 4:1-21

4  Imuntu amana kutulingula atubone kuti tuli babelesi ba Kilisito alimwi ababanzi bamaseseke aa Leza.  Kunze lyaboobo, kujatikizya makani aaya, iciyandika mubabanzi ncakuti bakajanike kabasyomeka.  Lino kulindime tacikwe makani abuniini kuti ndeelede kulingulwa andinywe naa ankuta yabantu. Nondiba ndime tandililinguli ndemwini pe.  Nkaambo manjezyeezya aangu alisalede munzila zyoonse. Pele eeci tacindipi kululama pe, pele ooyo undilingula ngu Jehova.  Aboobo mutabeteki cintu cili coonse kacitanasika ciindi ceelede, kusikila Mwami akaboole. Walo uyooyubununa zyintu zyamaseseke zicitilwa mumudima akubikka antangalala makanze aamumyoyo yabantu, mpoonya umwi aumwi uyoolumbaizyigwa a Leza kweelana amilimo yakwe.  Lino bakwesu, ndaamba zyintu eezyi kujatikizya ndime alimwi a Apolo kububotu bwanu kutegwa kujatikizya ndiswe mwiiye mulawo ooyu wakuti: “Mutaindilili zyintu zilembedwe,” kutegwa mutalisumpuli akubona umwi kuti mubotu kwiinda umbi.  Nkaambo ino nguni uukupa kwiindana amuntu umbi? Mubwini, ino ncinzi ncojisi ncowatakapegwa buya? Lino ikuti naa mubwini wakapegwa buya, ino nkaambo nzi ncolidunda mbuli kuti tiiwakapegwa buya?  Sena nobaalumi nywebo mwakazijana kale zyoonse nzyomuyandika? Sena mwakavwuba kale? Sena mwakatalika kale kulela kamuli bami swebo katutako? Ncobeni ndiyeeya kuti nocali cibotu ikuti nomwalitalikide kale kulela kamuli bami, kutegwa andiswe tulele katuli bami andinywe.  Nkaambo kulindime cilibonya kuti Leza swebo tobatumwa watucita kuba bamamanino kuya acibumbili katuli bantu beelede kufwa, nkaambo twaba ceebezyo mubbuwa lyazisobano kunyika, kubangelo alimwi akubantu. 10  Tuli bafwubafwuba akaambo ka Kilisito, pele nywebo mulicenjede muli Kilisito; tatujisi nguzu, pele nywebo muli anguzu; nywebo mulalumbaizyigwa, pele swebo tulasampaulwa. 11  Nokuba kusikila kuciindi cino tulazumanana kufwa nzala, kufwa nyota, kubula zisani, kudinkaulwa, kutuntulika, 12  alimwi akubeleka milimo iiminya amaanza eesu. Ibantu batutukila, tulabaleleka; notupenzyegwa tulaliyumya cakukkazyika moyo; 13  ibatubejelezya tulabaingula amoyo mubombe; kusikila lino twaba mbuli mafwuse aanyika, mbuli tombe lyazyintu zyoonse. 14  Ndimulembela zyintu eezyi, ikutali kuti ndimuusye nsoni, pele kuti ndimulaye mbuli bana bangu bayandwa. 15  Nkaambo nokuba kuti mulakonzya kuba abasolozi* bali 10,000 muli Kilisito, mubwini tamujisi bamauso banji pe; nkaambo muli Kilisito Jesu ndaba uso kwiinda mumakani mabotu. 16  Aboobo ndimukombelezya kuti mwiiye ndime. 17  Nkakaambo kaako ndimutumina Timoteyo, mbwaanga mwanaangu uuyandwa alimwi uusyomeka mu Mwami; eelyo uyoomwiibalusya nzila zyangu kujatikizya Kilisito Jesu, mbubonya mbondili mukuyiisya mumasena oonse mumbungano imwi aimwi. 18  Bamwi akati kanu balalisumpula mbuli kuti tandikabooli kulindinywe. 19  Pele ikuti kakuli kuyanda kwa Jehova ndilaboola kulindinywe cakufwambaana, alimwi tandikabikkili maano kukuzyiba zyintu nzyobaamba aabo balisumpula, pele kukuzyiba nguzu zyabo. 20  Nkaambo mubuumi bwamuntu, Bwami bwa Leza tabutondezyegwi kwiinda muzyintu nzyaamba pe, pele nkwiinda mukuba anguzu zya Leza. 21  Ino ncinzi ncomuyanda? Sena ndikaboole amusako kulindinywe, naa aluyando alimwi amoyo mubombe?

Bupanduluzi buyungizyidwe

Nkokuti, “bantu ibakali kulanganya naa kukwabilila bana.”