Njiisyo zyamu Bbaibbele mpaayeeme mbotulubona lwiiyo. Kamboni umwi aumwi ubelesya manjezyeezya aakwe aayiisyidwe Bbaibbele kubona mbwakonzya kubelesya njiisyo zyamu Bbaibbele mutwaambo tutobela. *

 Lwiiyo lulayandika

Lwiiyo lugwasya muntu kuba ‘abusongo bugwasya alimwi akuyeeya kabotu,’ ibube bukulwaizyigwa kapati mu Bbaibbele. (Tusimpi 2:​10, 11; 3:​21, 22) Kuyungizya waawo, Jesu wakaambila basikumutobela kuba bamayi bazintu nzyaakabalailila. (Matayo 28:19, 20) Aboobo, tulabakulwaizya basimbungano kuba alwiiyo luzulide, kubikkilizya akubala, kulemba, kubandika * alimwi aluzyibo kujatikizya zikombelo zimbi azilengwa.​—1 Bakorinto 9:​20-​22; 1 Timoteyo 4:​13.

Mfwulumende azyalo zilizyi mboluyandika lwiiyo mane buya kanji-kanji ziyanda kuti bana kabaiya lwiiyo lwakupulaimali akusekondali. Tulaitobela milawo eeyi nkaambo ileendelana amulawo wakuti: “Muntu uuli woonse kalibombya kubeendelezi,” naa kumfwulumende. (Baroma 13:1) Kuyungizya waawo, tulabakulwaizya bana besu kubeleka canguzu kucikolo kutali kwiinzya buyo mulawo. * Mbubwenya Jwi lya Leza mbolyaamba kuti: “Kufwumbwa ncomucita, amucicite camoyo woonse mbuli kuti mubelekela Jehova, ikutali bantu pe.”​—Bakolose 3:23.

Lwiiyo lulatugwasya kujanina banamukwasyi nzyobayandika. Bbaibbele lyaamba kuti, “ikuti muntu katababambi kabotu bamukwasyi wakwe, ikapati aabo bamuŋanda yakwe, nkokuti walukaka lusyomo alimwi mubi kapati kwiinda muntu uunyina lusyomo.” (1 Timoteyo 5:8) Lwiiyo lwakumubili lulakonzya kutugwasya kutobela ncolyaamba Bbaibbele kujatikizya kujanina banamukwasyi nzyobayandika. Bbuku litegwa The World Book Encyclopedia lyaamba kuti makanze aalwiiyo “ngakugwasya bantu kuzwidilila mubuumi bwabo . . . akuba babelesi bankutwe.” Muntu uuyiide cilakonzya kumuubila kujana mulimo uuyoomugwasya kulanganya mukwasyi wakwe kwiinda muntu watakanjila cikolo.​—Tusimpi 22:29.

Bazyali abalo balabagwasya bana babo kulibambila buumi bwakumbele, alimwi kubanjizya cikolo inga cabagwasya mumakani aaya. (2 Bakorinto 12:14) Tukulwaizya bazyali kubanjizya cikolo bana babo nokuba kuti bakkala mumasena mobabbadelesya, naa nkocikatazya kujana zikolo naa oomo zilengwa mozitazumizyi kuyiisya bana. * Alimwi tulapa mizeezo iikonzya kubagwasya bazyali kubikkila maano mbwacita mwanaabo kucikolo. *

 Lwiiyo lweelede kubonwa munzila yeelede

Tulabikkila maano ciindi notusala lwiiyo lwakumubili. Bbaibbele lyaamba kuti: “Muntu mufwubafwuba ulaasyoma makani oonse, pele ooyo uucenjede ulakkala ansi kuyeeya ntaamu zyakwe.” (Tusimpi 14:15) Tulaibelesya njiisyo eeyi kwiinda mukubikkila maano ciindi notusala lwiiyo lwakumubili twamanizya lwiiyo lwakusekondali, akulanga-langa mali aakonzya kubbadelwa alimwi ambolukonzya kutugwasya. Mucikozyanyo, kubweza kkoosi nsyoonto kulakonzya kumugwasya kucaabanya kabotu ciindi.

Lwiiyo lwakumuuya lulaampindu kapati kwiinda lwakumubili. Mukwiimpana alwiiyo lwakumubili, lwiiyo lwakumuuya iluyeeme aa Bbaibbele lulapa luzyibo lwa Leza ilusololela kubuumi. (Johane 17:3) Alimwi lulayiisya “cintu ciluleme, ciluzi alimwi cibotu, nkokuti bukkale boonse bubotu.” (Tusimpi 2:9) Mwaapostolo Paulo wakaiya lwiiyo ndotukonzya kweezyanisya alwiiyo lwakuyunivesiti mazuba aano, nokuba boobo wakabona “mpindu mpati yaluzyibo lwa Kristo Jesu.” (Bafilipi 3:8; Milimo 22:3) Mbubwenya buyo amazuba aano, Bakamboni ba Jehova banji batambula lwiiyo lwakumubili, nokuba boobo babona kuti lwiiyo lwakumuuya ndolulaampindu kapati. *

Lwiiyo lwakumuuya lugwasya kuba azilengwa zibotu

 Lwiiyo lwaatala lulakonzya kunyonganya zilengwa zibotu akuleta ntenda kumuuya

Kasimpi kamwi kamu Bbaibbele kaamba kuti: “Muntu uucenjede abona mapenzi ulayuba.” (Tusimpi 22:3) Bakamboni ba Jehova balimvwa kuti mayunivesiti aamwi naa masena mucitilwa lwiiyo lwaatala anyonganya zilengwa zibotu alimwi akuleta ntenda kumuuya. Akaambo kaceeci, Bakamboni banji tabayandi kuunka kumasena aali boobu naa kutola bana babo. Balizyi kuti mumasena aali boobu, bakulwaizya kutobela mizeezo iilubide mbuli yeeyi:

  • Muzeezo uulubide: Mali alakwabilila alimwi akuleta lukkomano

    Kanji-kanji lwiiyo lwaatala lubonwa kuti ndolupa muntu kubeleka mulimo uuvwolwa mali manji, aboobo basicikolo banji basala kuunka kuyunivesiti kutegwa bakajane mulimo uuvwolwa mali manji. Bamwi bayeeya kuti mali alabaletela lukkomano akuliiba, pele Bbaibbele lilayubununa mbokutaluzi kuyeeya kuli boobu. (Mukambausi 5:​10) Kuyungizya waawo, liyiisya kuti “kuyandisya mali ngomuyanda wamisyobo yoonse yazintu zibyaabi” alimwi kanji-kanji kusololela kukusweekelwa lusyomo. (1 Timoteyo 6:​10) Bakamboni ba Jehova balasolekesya kukukaka “koongelezya kwalubono.”​—Matayo 13:22.

  • Muzeezo uulubide: Lwiiyo lwaatala lulakonzya kupa muntu kuba ampuwo

    Mucikozyanyo, Nika Gilauri, iwakali mweendelezi ku Georgia, wakalemba kujatikizya mbobayeeya banji kubusena nkwazwa: “Kuba adigiri yakuyunivesiti nceelelo buya mu Georgia. . . . [Kaindi,] bakubusi batakajisi digiri bakali kuleta masampu mumukwasyi.” * Mukwiimpana, Bbaibbele lilacenjezya kujatikizya kuba ampuwo munyika eeyi. Jesu wakabaambila boobu basololi bazikombelo ibakali kuyandisya kuba ampuwo: “Ino inga mwasyoma buti, kakuli muzumina bulemu mbomupana mulicanu?” (Johane 5:​44) Kuyunivesiti kukulwaizya kuba amuuya wakulisumpula, walo Leza ngwatayandi.​—Tusimpi 6:​16, 17; 1 Petro 5:5.

  • Muzeezo uulubide: Umwi aumwi weelede kulisalila kujatikizya ciluzi acitaluzi

    Bakamboni ba Jehova balazitobela zyeelelo zya Leza zijatikizya ciluzi acitaluzi. (Isaya 5:​20) Pele cibalo cimwi cakamwaigwa mubbuku litegwa Journal of Alcohol and Drug Education, cakaamba kuti kuyungana kumayunivesiti kupa kuti basicikolo “basale zintu zikazyanya azyeelelo zijatikizya ciluzi acitaluzi.” * Eeci cileendelana anjiisyo yamu Bbaibbele yakuti: “Kuyanzana abantu babyaabi kunyonganya zilengwa zibotu.” (1 Bakorinto 15:33) Kuyunivesiti, micito njakasya Leza, mbuli bukolwi, kubelesya misamu iikola, akoonana kwabantu batakwetene ilidumide kapati alimwi ilakulwaizyigwa.​—1 Bakorinto 6:​9, 10; 2 Bakorinto 7:1.

  • Muzeezo uulubide: Lwiiyo lwaatala njenzila iinda kubota yakusumpula bukkale munyika

    Tulizyi kuti banji bayanda lwiiyo lwaatala, kutali akaambo kakuyanda kujana lubono, mpuwo naa kulikondelezya, pele akaambo kakuyanda kusumpula buumi bwabo abukkale munyika. Makanze aaya ali buyo kabotu, pele Bakamboni ba Jehova basala kucita ciindene. Mbubwenya mbuli Jesu, tusyoma kuti Bwami bwa Leza mbobulangizi bulikke buyoopa kuti bukkale bube kabotu munyika. (Matayo 6:​9, 10) Nokuba boobo, tatwiile kukkala buyo akulindila Bwami kuti bukagusye mapenzi aamunyika. Muciindi caboobo, mbubwenya mbuli Jesu, tulaambilizya “makani mabotu aa Bwami” munyika yoonse, kugwasya bantu banji mwaka amwaka kubambulula buumi bwabo kuti bube kabotu. *​—Matayo 24:14.

^ munc. 2 Bakamboni bakubusi ibacikkala abazyali babo batobela nzyobaamba bazyali kujatikizya lwiiyo kufwumbwa buyo kuti kazitakazyanyi amilawo ya Leza.​—Bakolose 3:​20.

^ munc. 8 Akaambo kaceeci, twakamwaya mabbuku aainda ku 11 miliyoni aagwasya kubala akulemba mbuli yakuti Sungwaala Kukubala Akukulemba. Alimwi tulayiisya kubala akulemba kakunyina kubbadelesya nyika yoonse mumyaambo iinda ku 120. Akati kamwaka wa 2003 a 2017, twakayiisya bantu babalilwa ku 70,000 kucizyiba kubala akulemba.

^ munc. 9 Amubone cibalo cakuti “Sena Ndicileke Cikolo?

^ munc. 11 Mucikozyanyo, tukulwaizya bazyali kutola bana babo kucikolo kutali buyo basankwa pele abasimbi. Amubone cibalo cakuti “Should My Child Go to School?” mu Ngazi Yamulindizi yamu Cingisi ya March 15, 2003.

^ munc. 14 Amubone a jw.org acibeela cakuti “Nzyobaamba Bamwi Kujatikizya Mbobwakatalika Buumi.”

^ munc. 20 Bbuku litegwa Practical Economics: Economic Transformation and Government Reform in Georgia 2004​—2012, peeji 170.

^ munc. 22 Volume 61, No. 1, April 2017, peeji 72.

^ munc. 24 Amubone a jw.org acibeela cakuti “Ibbaibbele Lilakonzya Kubacinca Bantu” kutegwa mubone zyakuluula zitondezya nguzu nzyolijisi Jwi lya Leza alimwi amulumbe wa Bwami.