Skip to content

Skip to table of contents

 Chiiyo 10

Niinzi Chindikachizya Kubbabbatizigwa?

Niinzi Chindikachizya Kubbabbatizigwa?

‘Bakaselukila mumaanzi boonse bobile, Filipi amuzibe, wamubbabbatizya.’—INC. 8:38.

LWIIMBO 52 Kulyaaba kwa Bunakristo

ZITAYIIGWE *

1. Adamu aEva bakasweekelwaanzi alubo zyakeeta mpinduunzi?

UBONAANGA ngwani weelede kutubikkila milawu iili atala akusala chibotu achibi? Chiindi Adamu aEva nibakalya muchelo wamunsamu wakuziba chibotu achibi, bakatondeezya kuti tabamusyomi pe Jehova amilawu yakwe. Bakasala kulibikkila milawu yabo iili atala achibotu achibi. (Matl. 3:22) Pesi yeeya nzibakasweekelwa. Bakasweekelwa bweenzinyina aJehova. Bakasweekelwa chilongezyo chakupona kukabe kutamani alubo bakatabukizya bana babo chibi alufu. (Rom. 5:12) Kusala kwaAdamu aEva kwakeeta mapenzi.

Naakatambula Jesu, mu-Itiyopiya muzibe wakayanda kubbabbatizigwa mpawaawo (Langa fuka 2-3)

2-3. (a) Mu-Itiyopiya muzibe wakachitaanzi chiindi Filipi naakamukambawukila? (b) Nziizili zilongezyo nzitujana akaambo kakubbabbatizigwa alubo njiili mibuzyo njitutalange-lange?

2 Bona kusiyana kuliwo kunzila Adamu aEva njibakachitaayo amu-Itiyopiya muzibe mbaakachita chiindi Filipi naakamukambawukila. Mu-Itiyopiya wakazilumba nzyaakachitilwa aJehova aJesu zyakuti chakufwambaana, wakabbabbatizigwa. (Inc. 8:34-38) Nitulipeda kuli Leza akubbabbatizigwa mbuuli zyakachitwa amu-Itiyopiya, tutondeezya kuti tulamusyoma Jehova amilawu yakwe. Tutondeezya kuti tulazilumba nzitwakachitilwa aJehova aJesu. Alubo, tutondeezya kuti tulamusyoma Jehova akubona kuti nguwe weelede kutubikkila milawu iili atala achibotu achibi.

3 Yeeya zilongezyo nzitujana akaambo kakukomba Jehova! Chimwi chilongezyo nchakuti, Jehova uyootupa zyoonse Adamu aEva nzibakasweekelwa, kuswaanizya kupona kukabe kutamani. Jehova ulatulekelela zibi zyesu akupa kuti moyo  wesu utatupi mulandu nkaambo tuli alusyomo muli Jesu Kristu. (Mt. 20:28; Inc. 10:43) Alubo tuba aakati kampuli yaJehova iili abantu bamukomba kabali abulangilizi bubotu bwabuumi bwakunembo. (Joh. 10:14-16; Rom. 8:20, 21) Nikuba kuti tulangilila kujana zilongezyo eezyo, bamwi bakayiya atala aJehova, balalengwaana kutobelezya chikozyano chamu-Itiyopiya muzibe. Niinzi chibakachizya kubbabbatizigwa? Alubo kujana babuzunda biyeni buyumu-yumu oobo?

BUYUMU-YUMU BUKACHIZYA BAMWI KUTI BABBABBATIZIGWE

Buyumu-yumu bamwi mbubaswaana kabatanabbabbatizigwa

Kutalisyoma (Langa fuka 4-5) *

4-5. Mbuubuli buyumu-yumu mbwaakalaabo Avery aHannah?

4 Kutalisyoma. Bazyali baAvery, Mbaakamboni baJehova. Wisi uyizulwida kabotu mpuli yakwe alubo mwaalu uuyiisya kabotu. Nikuba boobo, Avery taakali kuyanda pe kubbabbatizigwa. Nkamboonzi? Wakati: “Ndakali kuyeeya kuti tandizookonzyi pe kuba mbuuli Ndeende.” Alubo Avery wakali kubonaanga tazookonzyi pe kuchita milimu njaakali kuyoopegwa kunembo. Wakayungizya kuti: “Ndakali kukataazikana kuti ndizookonzya na kukomba aakati bantu, kupa nkani naakuti kuchitisya muswaangano wamulimu wakukambawuka.”

5 Musimbi uutegwa Hannah, uuli aminyaka iili 18, wakali apenzi lyakutalisyoma. Wakakomezegwa abazyali bakomba Jehova. Nikuba boobo, taakalikwe choonzyo pe kuti uzookonzya kupona kweendelana amilawu yaJehova. Nkamboonzi? Nkaambo Hannah taakali kulisyoma pe. Zimwi ziindi wakali kukataazikana zyakuti wakali kulichisa achaali pesi kuchita oobo kwakali kupa kuti penzi lyakwe likomene. Wakati: “Taakwe muntu ngundakabuzya, nikuba bazyali bangu alubo ndakali kuyeeya kuti Jehova tazooyandi pe kuti ndimukombe akaambo kazintu nzindakali kuchita.”

Kweenwa aabeenzumaMbukonzya kubuzunda buyumu-yumu oobu (Langa fuka 6) *

6. Niinzi chakali kukachizya Vanessa kuti abbabbatizigwe?

6 Kweenwa aabeenzuma. Musimbi uutegwa Vanessa ulaaminyaka iili 22, wakati: “Ndakali aamweenzuma ngundakamvwananaawe kwaminyaka iiyanda kusika ku10.” Pesi mweenzinyina waVanessa taakali kumusungwaazya pe kuti abbabbatizigwe. Eezi zyakamuchisa Vanessa alubo wakati: “Kulandiyumina kujana beenzuma alubo ndakali kukataazikana kuti tandizoomujani lubo pe umwi mweenzuma, kuti ndaleka kumvwananaawe.”

Kuyoowa kuzoobisya (Langa fuka 7) *

7. Makayla wakali kuyoowaanzi alubo nkamboonzi?

7 Kuyoowa kuzoobisya. Musimbi uutegwa Makayla wakali aminyaka iili 5, chiindi munyandumaakwe naakagwisigwa mumbungano. Naakali kuyabukomena, wakali kubona  mbubakali kulimvwa bazyali bakwe akaambo kazintu zyakachitwa amunyaandumaakwe. Makayla wakati: “Ndakali kuyoowa kuti, kuti ndabbabbatizigwa mpawo ndazoobisya, ndizoogwisigwa mumbungano mpawo bazyali bangu bazoochisigwa moyo loko.”

Kuyoowa kukazigwa (Langa fuka 8) *

8. Mulombe uutegwa Miles wakali kuyoowaanzi?

8 Kuyoowa kukazigwa. Wisi aMiles amukayintu wakazookwatana awisi, mbakombi baJehova pesi banyina teeKamboni pe. Miles wakati: “Ndakakkala abaama kwaminyaka iili 18 pesi ndakali kuyoowa kubabuzya kuti ndiyanda kubbabbatizigwa. Ndakali kubona mbubakali kuchita chiindi Ndeende naakaba Kamboni. Ndakali kuyoowa kuti bazoondipenzya.”

KUJANA WABUZUNDA BIYENI BUYUMU-YUMU MBUSWAANA?

9. Niinzi chiyoochitika kuti wayiya atala aJehova mbali aluyando amoyo mulamfu?

9 Adamu aEva bakasala kutakomba Jehova nkaambo teebakali kumuyanda amoyo woonse. Nikuba boobo, Jehova wakabalekela kuti bapone kusikila nibakaba abana akuti balibikkile milawu iili atala akukomezya bana babo. Mpindu zyakaba akaambo kakusala kuteendelezegwa aaJehova kwakachitwa aAdamu aEva, zyakatondeezya antanganana kuti bakasala chabufuba-fuba. Mwanaabo mutaanzi, wakajaya mwanikaakwe wakatalikwe mulandu alubo mukuya kwachiindi kulwana akuliyanda zyakavula mubantu. (Matl. 4:8; 6:11-13) Nikuba boobo, Jehova wakali aanzila yakukwabilila bana baAdamu aEva boonse bakali kuyanda kumukomba. (Joh. 6:38-40, 57, 58) Kwiiya atala aJehova mbali aluyando amoyo mulamfu, kuyoopa kuti kumuyanda kukomene. Tukoosala mbuuli Adamu aEva pesi uyoosala kulipeda kuli Jehova.

(Langa fuka 9-10) *

10. Nkamboonzi kuyeeyesesya majwi aali muli Intembauzyo 19:7, nikukonzya kukugwasya kuti ukombe Jehova?

10 Yinkilila kunembo kwiiya atala aJehova. Kwiinkilila kunembo kwiiya atala aJehova kuyoopa kuti usyome kuti uyoozwidilila kumukomba. Avery waambwa kumatalikilo wakati: “Ndakazunda kutalisyoma kwiinda mukubala akuyeeyesesya atala achisyomezyo  chijanika muli Intembauzyo 19:7.” (Bala.) Avery naakabona Jehova mbaakali kuzuzikizya chisyomezyo eecho kulinguwe, zyakapa kuti amuyande. Luyando talutugwasyi kuti tutayoowi luzutu pesi lutugwasya kulangilila kuli Jehova akuchita nzyayanda. Hannah, waambwa kumatalikilo wakati: “Kubala Bbayibbele kandili andilikke akuyeeyesesya, kwakandigwasya kubona kuti chiindi nindilichisa achaali, ngandilikuchisa Jehova.” (1 Pet. 5:7) Hannah wakaba ‘sikuchita Jwi lyaLeza.’ (Jak. 1:22) Zyakeeta mpinduunzi? Wakati: “Kubona mbundakagwasigwa akaambo kakuswiilila Jehova, kwakapa kuti kumuyanda kukomene. Lino ndili achoonzyo chakuti Jehova unoolaandime chiindi nindiyanda kuti andigwasye.” Hannah wakalizunda penzi lyakulichisa achaali. Wakalipeda kuli Jehova mpawo wakazoobbabbatizigwa.

(Langa fuka 11) *

11. Vanessa wakachitaanzi kuti abe abeenzinyina bali kabotu alubo twiyaanzi kulinguwe?

11 Sala beenzinyokwe chabusongo. Vanessa waambwa kumatalikilo, wakazoobona kuti mweenzinyina wakali kupa kuti atakombi Jehova. Wakaleka kumvwananaawe. Mpawo wakachita zyiingi. Wakayanduula beenzinyina bapya mumbungano. Wakati chikozyano chaNowa ampuli yakwe chakamugwasya loko. Wakayungizya kuti: “Bakali kukkala aabantu batamuyandi pe Jehova pesi Nowa ampuli yakwe bakali kumvwanana.” Naakabbabbatizigwa, Vanessa wakasaanguna kupayona. Lino waamba kuti: “Kuchita oobo kundigwasya kuti ndibe abeenzuma bali kabotu, mumbungano yesu amuli zimwi mbungano.” Anduwe ulakonzya kuba abeenzinyokwe kuti wabeleka changuzu kuchita mulimu Jehova ngwatupede.—Mt. 24:14.

(Langa fuka 12-15) *

12. Nkuukuli kuyoowa Adamu aEva nkubakatalikwaako alubo niinzi zyakachitika?

12 Belekela kuba akuyoowa kuli kabotu. Kumwi kuyoowa kuli kabotu. Muchikozyano, tweelede kuyoowa kubisizya Jehova. (Int. 111:10, NW) Kaansinga Adamu aEva bakali akuyoowa kuli boobu, teebakali kunoomupapila pe Jehova. Pesi bakamupapila. Nibakachita oobo, meso aabo akajulika nkaambo bakazoobona kuti bakali babisya. Eezi  zyakapa kuti batabukizye bana babo chibi alufu. Alubo bakamvwisisisya kuti bakali bakachilwa kuswiilila mulawu waLeza, nkinkaako bakaba aabweeme nkaambo bakali baziba kuti teebakazweete pe mpawo bakalivumba.—Matl. 3:7, 21.

13-14. (a) Kweendelana amajwi aali muli 1 Petro 3:21, nkamboonzi nituteelede kuluyoowa zyiindilide lufu? (b) Ntuutuli twaambo tupa kuti tuyande Jehova?

13 Nikuba kuti tweelede kuyoowa Jehova pesi tatweelede kuluyoowa zyiindilide lufu. Jehova wakachita mabambe aakuti tukajane buumi butamani. Kuti twabisya pesi twachincha amoyo woonse, Jehova ulatulekelela. Uyootulekelela akaambo kakuti tuli alusyomo muchinunuzyo chaMwanaakwe. Imwi nzila iiyandikana iitondeezya kuti tuli alusyomo, nkulipeda kuli Leza akubbabbatizigwa.—Bala 1 Petro 3:21.

14 Tuli atwaambo twiingi tupa kuti tuyande Jehova. Jehova tatupi zintu zibotu nzituyanda buzuba abuzuba luzutu pesi utuyiisya kasimpe kali atala anguwe amakanze aakwe. (Joh. 8:31, 32) Utupede mbungano yachiKristu iituzulwida akutugwasya. Ulatugwasya mumapenzi ngituswaana akupa kuti tube abulangilizi bwakuyoopona kukabe kutamani kunembo. (Int. 68:19; Ciy. 21:3, 4) Kuyeeyesesya zintu Jehova nzyaakatuchitila zitondeezya kuti ulatuyanda, kupa kuti tumuyande. Alubo kupa kuti tube akuyoowa kuli kabotu. Tulimvwa katuyoowa kubisizya Ooyo wakatutondeezya luyando lupati.

15. Makayla wakalizunda biyeni penzi lyakuyoowa kubisya?

15 Makayla waambwa kumatalikilo, wakalizunda penzi lyakuyoowa kubisya, naakamvwisisisya mbatulekelela Jehova. Wakati: “Ndakazoobona kuti toonse tuli achibi akuti tulabisya. Alubo ndakamvwisisisya kuti Jehova ulatuyanda akuti ulatulekelela kabelesya chinunuzyo.” Kuyanda Jehova kwakapa kuti Makayla alipede akubbabbatizigwa.

(Langa fuka 16) *

16. Miles wakagwasigwa biyeni kuti azunde kuyoowa kukazigwa?

16 Miles wakali kuyoowa kuti banyina balamukazya akaambo kakuti wakali kuyanda kubbabbatizigwa, wakakumbila kugwasigwa amulangizi wabbazu. Miles wakati: “Mulangizi wabbazu anguwe wakakomezegwa mumpuli mwakali muzyali uumwi wakali Kamboni. Wakandigwasya kuti ndiyeeye mbundikonzya kubuzya baama kuti bamvwisisisye kuti ndime ndakali kuyanda kubbabbatizigwa kutali kuti ndakali kusungilizigwa aaNdeende.” Banyina baMiles teebakabotelwa pe akusala kwakwe. Miles, wakazwa aang’anda aali banyina pesi taakachincha pe makanze aakwe. Wakati: “Kwiiya atala azintu zibotu Jehova nzyaakandichitila, kwakandisika aamoyo. Kuyeeyesesya atala achinunuzyo chaJesu, kwakandigwasya kubona mbandiyanda Jehova. Kumvwisisisya makani aaya kwakapa kuti ndilipede kuli Jehova akubbabbatizigwa.”

 KAKATILA KUZINTU NZWAAKASALA

Tulakonzya kutondeezya kuti tulazilumba zintu Leza nzyaakatuchitila (Langa fuka 17)

17. Nguuli mweenya ngutuli aawo?

17 Chiindi Eva naakalya muchelo wamunsamu wamumuunda waEdeni, wakatondeezya kupapila Wisi. Adamu naakaba kubbazu lyaEva, wakatondeezya kutalumba zintu zyoonse zibotu Jehova nzyaakamupede. Toonse tuli aamweenya wakutondeezya kuti tatukutobeli kusala kwaAdamu aEva. Tuyanda kutondeezya kuti tulazilumba zyoonse Jehova nzyaakatuchitila. Nitubbabbatizigwa, tutondeezya Jehova kuti nguwe uli aacheelelo chakutubikkila milawu iili atala achibotu achibi. Alubo tutondeezya kuti tulamuyanda Taateesu akuti tulamusyoma.

18. Niinzi chikonzya kukugwasya kuti uzwidilile kukomba Jehova?

18 Nitwabbabbatizigwa, tweelede kwiinkilila kunembo kupona kweendelana amilawu yaJehova kutali yesu. Mamiliyoni aabakombi baLeza balikuchita oobo munyaka amunyaka. Ulakonzya kuba mbuuli mbabo kwiinda mukuyungizya luzibo lwako atala aJwi lyaLeza, Bbayibbele, kuliswaanizya abakombinyokwe chiindi choonse akusungwaala kubuzya bamwi nzwaakayiya atala aTaateesu uuli aluyando. (Heb. 10:24, 25) Nusala zyakuchita, tobela malayilile Jehova ngakupa kabelesya Jwi lyakwe ambunga yakwe. (Is. 30:21) Mpawo uyoozwidilila muzintu zyoonse nzuchita.—Tus. 16:3, 20, NW.

19. Niinzi nchweelede kukkala kuyeeya alubo nkamboonzi?

19 Kwiinkilila kunembo kubona mbukukugwasya kutobela malayilile aaJehova, kupa kuti umuyande amalayilile aakwe. Alubo taakwe chintu Saatani nchakupa, chikonzya kupa kuti uleke kukomba Jehova. Yeeya kakuli kwiinda minyaka iili 1 000. Uyoobona kuti kusala nkwaakachita kuti ubbabbatizigwe, kwakali kusala kubotu loko!

LWIIMBO 28 Ikumvwana a Jehova

^ par 5 Kusala kupati nkweelede kuchita, nkwakuti uyoobbabbatizigwa na, naakuti pe. Nkamboonzi kusala ooku nikuyandikana? Muchiiyo eechi, tulalanga-langa nsandulo yamubuzyo ooyu. Alubo, chilagwasya aabo bayanda kubbabbatizigwa kuti bazunde buyumu-yumu bukonzya kubakachizya kubbabbatizigwa

^ par 56 BUPANDULUZI BWAZIFANIKISYO: Kutalisyoma: Mulombe ulikuyoowa kusandula nalikuswiilila wisi kali kusandula kumiswaangano yambungano.

^ par 58 BUPANDULUZI BWAZIFANIKISYO: Beenzuma: Kali amweenzinyina uutali kabotu, Kamboni uuchikula waba abweeme nabona bamwi Bakamboni.

^ par 60 BUPANDULUZI BWAZIFANIKISYO: Kubisya: Musimbi ulikukataazikana kuti uzoobisya nabona munyandumaakwe wakagwisigwa mumbungano kali kuzwa aang’anda.

^ par 62 BUPANDULUZI BWAZIFANIKISYO: Kukazigwa: Mulombe ulikuyoowa kukomba banyina batakombi nibamulangide. Mpawo wabapandulwida nzyasyoma katayoowi.

^ par 64 BUPANDULUZI BWAZIFANIKISYO: Kutalisyoma: Mulombe walipa chiindi chiingi chakuchita chiiyo chakwe alikke.

^ par 66 BUPANDULUZI BWAZIFANIKISYO: Beenzuma: Kamboni uuchikula wasaanguna kulitondeezya kuti nguKamboni.

^ par 68 BUPANDULUZI BWAZIFANIKISYO: Kubisya: Musimbi wasala kuti kasimpe kabe kakwe mpawo wabbabbatizigwa.

^ par 70 BUPANDULUZI BWAZIFANIKISYO: Kukazigwa: Mulombe ulikubapandulwida nzyasyoma banyina batakombi.