Skip to content

Skip to table of contents

 Chiiyo 26

Gwasya Bamwi Kuti Bazunde Kukataazikana

Gwasya Bamwi Kuti Bazunde Kukataazikana

“Nyoonse amube amuzeezo omwe, amweetelelane, amutondezye luyando lwabunyina, amube amoyo mutete walubomba alimwi amulicesye.”—1 PET. 3:8.

LWIIMBO 107 Citondezyo ca Leza Caluyando

ZITAYIIGWE *

1. Kujana twamutobelezya biyeni Taateesu Jehova uuli aaluyando?

JEHOVA utuyanda loko. (Joh. 3:16) Tweelede kutobelezya Taateesu uuli aaluyando. Nkinkaako, tuleezya ‘kubeetelela, kubatondeezya luyando lwabunyina akuba aamoyo mutete walubomba’ kubantu boonse pesi kapati “ibaciinga cesu calusyomo.” (1 Pet. 3:8; Gal. 6:10) Chiindi bakombima nibaswaana zyiimo zipa kuti bakataazikane, tweelede kubagwasya.

2. Tulalanga-langaanzi muchiiyo eechi?

2 Bantu boonse bayanda kuba mumpuli yaJehova, bayooswaana zyiimo zipa kuti bakataazikane. (Mk. 10:29, 30) Tulangilila kuswaana buyumu-yumu bwiingi mbukunga bweende bwanyika eeyi bwaba aafwiifwi kumana. Nga tulagwasyania biyeni? Atulange-lange nzitwiiya kuzikozyano zyamuBbayibbele ziswaanizya Loti, Jobu aNawomi. Alubo, tulalanga-langa buyumu-yumu mbubaswaana bakombima mazubaano akubona mbutukonzya kubagwasya kuti balwane buyumu-yumu oobo.

BAAMOYO MULAMFU

3. Nkuukuli kutasala kabotu nkwaakachita Loti kulembedwe muli 2 Petro 2:7, 8 alubo kusala kwakwe kwakeeta mpinduunzi?

3 Loti wakasala chabufuba-fuba naakasala kuyookkala abantu bakatali kulijata kabotu bakuSodoma. (Bala 2 Petro 2:7, 8.) Muunzi ooyu wakali aabunoti pesi Loti wakaswaana buyumu-yumu akaambo kakuyookkala mumuunzi ooyo. (Matl. 13:8-13; 14:12) Kulakonzeka kuti mukayintu wakwe wakali kuyandisya muunzi ooyo naakuti bamwi bantu bamumo, zyakapa  kuti ataswiilili Jehova. Wakasweekelwa buumi bwakwe chiindi Leza naakalosya mulilo asalufa mumuunzi ooyo. Alubo yeeya atala abana basimbi baLoti babili. Bakatuminidwe kubaalumi bakafwa muSodoma. Loti wakasweekelwa muunzi wakwe, zintu nzyaakalaazyo alubo chichisa loko, wakafwidwa mukayintu wakwe. (Matl. 19:12-14, 17, 26) Muchiindi eechi chikataazya, Jehova wakaleka na kutondeezya Loti moyo mulamfu? Peepe, taakaleka pe.

Chaluzyalo, Jehova wakatuma bangelo kuti bakavune Loti ampuli yakwe (Langa chiiyo fuka 4)

4. Jehova wakamutondeezya biyeni Loti moyo mulamfu? (Langa chifanikisyo chili aachivumbyo.)

4 Nikuba kuti Loti wakasala kukkala muSodoma, Jehova wakamufwida luzyalo kwiinda mukutuma bangelo kuti bakamuvune ampuli yakwe. Loti taakaaswiilila chakufwambaana pe malayilile aakali kuzwa kubangelo aakuti azwe muSodoma pesi wakachili “kuwayawaya.” Bangelo bakamujata kuboko akumugwasya kuti azwe mumuunzi ooyo ampuli yakwe. (Matl. 19:15, 16) Mpawo bakamubuzya kuti achijile kuzilundu. Muchiindi chakuti Loti aswiilile Jehova, wakakumbila kuti ayinke kumuunzi wakali aafwiifwi. (Matl. 19:17-20) Jehova wakamuswiilila Loti akumuzumizya kuti ayinke kumuunzi ooyo. Mukuya kwachiindi, Loti wakasaanguna kuyoowa kukkala mumuunzi ooyo, mpawo wakazooyinka kuzilundu, ooko Jehova nkwaakamubuzizye kuti achijile nkuko kumasaangunino. (Matl. 19:30) Jehova wakatondeezya Loti moyo mulamfu. Kujana twamutobelezya biyeni Jehova?

5-6. Kujana twaabelesya biyeni malayilile aali muli 1 Batesalonika 5:14 nitutobelezya Leza?

5 Mbuuli Loti, umwi mukombima ulakonzya kusala chabufuba-fuba akulinjizya mumapenzi. Kujana twachita biyeni kuti eezi zyachitika? Tulakonzya kufwambaana kuyeeya kuti, watebula nchaakabyala alubo kulakonzeka kuti makani aaya ngachoonzyo. (Gal. 6:7) Pesi tulakonzya kutachita oobo. Tulakonzya kumugwasya mbuuli Jehova mbaakagwasya Loti. Kujana twazichita biyeni?

6 Jehova wakatuma bangelo kuti bakachenjezye Loti akuti bakamugwasye kuti ataswaani mapenzi aakali kuyanda kuchitikila muunzi waSodoma. Andiswe tweelede kuchenjezya mukombima kuti twabona kuti nzyalikuchita zilakonzya kupa kuti anjile mumapenzi. Tulakonzya kusala kumugwasya. Tweelede kuba aamoyo mulamfu, nikuba kuti uliikunonoka kubelesya malayilile aamuBbayibbele ngaakapegwa. Tweelede kuba mbuuli bangelo babili. Tatweelede kufwambaana kumutakata mukombima pesi tweelede kuyanduula nzila zyakumugwasya. (1 Joh. 3:18) Kulakonzeka kuti kuyandikana kuti tumujate kuboko munzila yakukozyanisya akumugwasya kuti abelesye malayilile ngapegwa.—Bala 1 Batesalonika 5:14.

7. Kujana twamutobelezya biyeni Jehova kunzila njaakali kumubonaayo Loti?

7 Kaansinga Jehova wakali kuyanda, wakali kunoosala kulanga kubisya kwaLoti. Pesi mukuya kwachiindi, Leza wakazulwida mwaapostolo Petro kulemba kuti Loti wakali muntu uululeme. Kulabotezya kuziba kuti Jehova ulatulekelela kuti twabisya. (Int. 130:3) Tulakonzya na kumutobelezya Jehova kunzila njaakali kumubonaayo Loti? Kuti twalanga buntu bubotu mbubali aabo bakombima, tulakonzya kubatondeezya moyo mulamfu. Kuchita oobo kuyoopa kuti bazumine chiindi nitubagwasya.

BAALWEETELELO

8. Kweetelela bamwi kupa kuti tuchiteenzi?

8 Kusiyana aLoti, Jobu taakaswaana mapenzi akaambo kakutasala kabotu. Pesi wakaswaana mapenzi aasiyene-siyene aaswaanizya kusweekelwa zintu nzyaakali aazyo,  mpuwo njakalaayo muchilawu alubo wakaba aabulwazi buchisa. Kwiinda zyoonse, bana babo boonse bakafwa. Jobu wakatamikizigwa aabeenzinyina batatu bakubeja. Nkaakali kamwi kaambo kakapa kuti basikumuumbulizya batatu bakubeja batamweeteleli? Teebakazimvwisisisya pe zyakali kuchitika kuli Jobu. Eezi zyakapa kuti bayeeye kuti kuli nzyaakabisya mpawo bakamwaambila majwi aachisa. Kujana twachita biyeni kuti tutachiti mbuuli mbabo? Tweelede kuyeeya kuti Jehova nguwe alikke uuzi zintu zyoonse zichitika kumuntu umwi awumwi. Tweelede kuswiilisisya chiindi muntu uuli mumapenzi nalikwaamba zimukataazya. Tatweelede kumuswiilila luzutu pesi tweelede kweezya kulibikka muchiimo chakwe. Kuchita oobo, kuyootugwasya kuti tubeetelele bakombima.

9. Kuba aalweetelelo kupa kuti tuleke kuchitaanzi alubo nkamboonzi?

9 Kuba aalweetelelo kupa kuti tutaambuuli zintu zibi atala amapenzi ngibalikuswaana bamwi. Muntu uuvwiya bamwi tayaki mbungano pesi uliimwaya. (Tus. 20:19; Rom. 14:19) Waambuula katayeeyede pe alubo takwe luzyalo, majwi aakwe alakonzya kupa kuti chiimo chamuntu uukataazikene chiindilile kubija. (Tus. 12:18; Ef. 4:31, 32) Tweelede kulanga buntu bubotu bwabamwi akubona mbutukonzya kubagwasya kuti balwane kukataazikana nkubaswaana!

Muswiilile amoyo woonse mukombinyokwe nalikwaambuula ‘chaambaambe’ mpawo umubuzye majwi aawumbulizya aachiindi cheelede (Langa fuka 10-11) *

10. Majwi aali muli Jobu 6:2, 3 atuyiisyaanzi?

10 Bala Jobu 6:2, 3. Zimwi ziindi, Jobu wakali kwaamba “caambaambe.” Mukuya kwachiindi, wakazumina kuti zimwi zintu nzyaakali kwaamba teezyakali kabotu pe. (Job. 42:6) Mbuuli Jobu, muntu uulikulwana aapenzi, ulakonzya kwaambuula makani aapa kuti mukuya kwachiindi azoolisole. Tweelede kumusandula biyeni? Tweelede kumweetelela kutali kumwaambila majwi aatali kabotu.  Tutalubi kuti Jehova tayandi pe kuti tuswaane mapenzi. Nkinkaako, teechaali pe chiindi mukombi waJehova uusyomeka naambuula majwi aatayaki nakataazikene aali atala aJehova naakuti aali atala andiswe. Tatweelede kufwambaana kumunyemena pe naakuti kumubeteka kuti waamba majwi aali boobo.—Tus. 19:11.

11. Kujana baalu bachitobelezya biyeni chikozyano chaElihu chiindi nibagwasya bamwi?

11 Chimwi chiindi, muntu uukataazikane, uyandikana kugwasigwa. (Gal. 6:1) Kujana baalu bamugwasya biyeni? Beelede kutobelezya Elihu wakaswiilila Jobu akulibikka muchiimo chakwe. (Job. 33:6, 7) Elihu wakagwasya Jobu naakamvwisisisya mbaakali kulimvwa. Baalu batobelezya chikozyano chaElihu, balaswiilila akweezya kumvwisisisya chiimo chamuntu uukataazikene. Nibamugwasya, baambuula munzila iimusika aamoyo muntu uukataazikene.

WUMBULIZYA BAMWI

12. Nawomi wakamvwa biyeni chiindi mulumaakwe abana bakwe balombe babili nibakafwa?

12 Nawomi wakali mukayintu uusyomeka wakali kuyanda Jehova. Pesi chiindi mulumaakwe abana bakwe balombe babili nibakafwa, wakayanda kuchincha zina lyakwe lyakuti Nawomi akuba “Mara” chaamba kuti “Kulula.” (Rut. 1:3, 5, 20, makani aamunsi, 21) Mukamwana waNawomi uutegwa Rute, wakakakatila kuli nguwe nikuba nibakali mumapenzi. Rute wakali kugwasya Nawomi kuti ajane ziyandikana akumuumbulizya. Rute wakatondeezya Nawomi kuti wakali kumuyanda akumugwasya muzintu ziniini amumajwi.—Rut. 1:16, 17.

13. Nkamboonzi nitweelede kugwasya muntu wakafwidwa ngwaakakwetenaawe?

13 Kuti mukombima wafwidwa muntu ngwakwetenaawe, tweelede kumugwasya. Bantu bakwetene bali mbuuli minsamu iibili, umwi kawumenede aafwiifwi awumwi. Nikwayinda minyaka, miyanda yayo ilapiyana. Kuti umwi munsamu wanyukulwa akufwa, wasyaala ngatawuchiponi kabotu pe. Munzila iikozyenie, kuti umwi mulukwatano wafwidwa ngwaakakwetenaawe, uusyaala, ngawakataazikana kwachiindi chilamfu. Paula, * wakafwidwa aamulumi katayeeyeli, wakati: “Buumi bwakandichinchila alubo ndakalimvwa kanditachigwasyi pe. Ndakasweekelwa mweenzuma. Mulumaangu ndakali kumubuzya zintu zyoonse. Twakali kubotelwa akugwasyania muziindi ziyumu. Wakali kundiswiilila nindakali kumubuzya zyakali kundikataazya. Ndakalimvwa mbuuli kuti ndakali ndapandulwa aakati.”

Kujana twamugwasya biyeni muntu uutachikwe ngwaakakwetenaawe? (Langa fuka 14-15) *

14-15. Kujana twamuumbulizya biyeni muntu wakafwidwa ngwaakakwetenaawe?

14 Kujana twamuumbulizya biyeni muntu wakafwidwa ngwaakakwetenaawe? Chintu chakusaanguna, nkwaambuula anguwe nikuba kuti chimwi chiindi kulakonzya kutuyumina naakuti katutazi zyakwaamba. Paula waambwa musule, wakati: “Ndilazimvwisisisya kuti kufwidwa kupa kuti bamwi bantu batakkalinkani. Ngabalikataazikene kuti balakonzya kwaamba zintu zitali kabotu. Pesi kuumuna kuchisa loko kwiinda kwaamba zintu zitali kabotu.” Muntu wakafwidwa talangilili kuti twaambe majwi aagwasya chiindi choonse. Paula wakati: “Zyakanduumbulizya chiindi bantu nibakali kundibuzya kuti, ‘Amapenzi aaya.’”

15 William wakafwidwa mukayintu muminyaka yayinda, wakati: “Ngandalumba chiindi bamwi nibaambuula atala azintu zibotu zyakali kuchitwa aamukayintu wangu alubo eezi zinditondeezya kuti bakali kumuyanda akumulemeka. Kugwasigwa munzila iili boobo kulandisimya. Majwi ngibaamba alanduumbulizya  nkaambo ndakali kumuyanda loko mukayintu wangu alubo wakali kundigwasya loko mubuumi.” Mukamufu uutegwa Bianca wakati: “Kulanduumbulizya chiindi bamwi nibakomba andime anibandibalila lugwalo lumwi naakuti aabili. Alubo kulandigwasya chiindi nibaambuula atala amulumaangu achiindi nibandiswiilila nindilikwaambuula atala azyakwe.”

16. (a) Kujana twamugwasya biyeni muntu wakafwidwa ngwaakakwetenaawe? (b) Kweendelana amajwi aali muli Jakobo 1:27 nguuli mulimu ngutuli aawo?

16 Mbuuli Rute mbaakakakatila mukamufu Nawomi, andiswe tweelede kwiinkilila kunembo kugwasya muntu wakafwidwa ngwaakakwetenaawe. Paula waambwa musule wakati: “Mulumaangu naakafwa, bantu bakandigwasya loko. Mukuya kwachiindi, bantu bakasaanguna lubo kujatikana kumilimu yabo. Pesi buumi bwangu bwakali bwachincha loko. Kulamuumbulizya muntu wakafwidwa kuti twiinkilila kunembo kumugwasya kwamyeezi naakuti kwaminyaka.” Nisimpe, bantu balisiyene. Bamwi balafwambaana kuzibila chiimo chabo chipya. Pesi bamwi ngabasaanguna kuyeeya muntu ngubakakwetenaawe chiindi nibachita chimwi chintu nchibakali kuchitaamwi anguwe. Bantu balila munzila zisiyene. Tutalubi kuti Jehova utupede mulimu wakuumbulizya akugwasya muntu wakafwidwa ngwaakakwetenaawe.—Bala Jakobo 1:27.

17. Nkamboonzi nitweelede kugwasya muntu wakalekana aamuntu ngwaakakwetenaawe?

17 Bamwi bantu balakataazikana chiindi nibalekana amuntu ngubakakwetenaawe. Joyce, wakalekwa alubo mulumaakwe wakakwata uumbi mukayintu. Wakati: “Nzyaakachita mulumaangu zyakandichisa loko kwiinda kuti kaansinga wakafwa. Kaansinga wakabbewuka  naakuti kuchiswa mpawo wafwa, nikuli teenguwe wakalisalila kuchita oobo. Pesi wakasala kundileka. Ndakaba aabweeme akulimvwa kuti tandigwasyi pe.”

18. Niinzi nzitukonzya kuchita kuti tugwasye muntu uutachikwe ngwaakakwetenaawe?

18 Kutondeezya luzyalo kumuntu uutachikwe ngwaakakwetenaawe nikuba muzintu ziniini, kutondeezya kuti tulamuyanda. Muntu ooyu uyanda beenzinyina balikabotu nkaambo lino wasyaala alikke. (Tus. 17:17) Kujana wachita biyeni kuti ube mweenzinyina uuli kabotu? Ulakonzya kumutamba kuti muzoolye aamwi. Alubo ulakonzya kusala kuba aachiindi chakubaamwi anguwe akubelekaamwi mumulimu wakukambawuka. Alubo chimwi chiindi, ulakonzya kumutamba mukukomba kwampuli. Kuti wachita oobo, Jehova ulabotelwa nkaambo ‘ulaafwiifwi abaabo batyompedwe mumoyo’ alubo ‘mukwabilizi wabamukabafu.’—Int. 34:18; 68:5.

19. Majwi aali muli 1 Petro 3:8 atugwasya kuti tuchiteenzi?

19 Lino-lino Bwaami bwaLeza bwaakweendelezya nyika yoonse, “mapenzi aakaindi ayoolubwa.” Tuchilangilila aameso aasalala chiindi ‘zintu zyachiindi nizitachinooyeeyegwi lubo pe nikuba kusika mumoyo.’ (Is. 65:16, 17) Kusikila buzuba oobo busike, atuzumanane kugwasyania akutondeezya kuti tulabayanda bakombima, mumajwi amumichito.—Bala 1 Petro 3:8.

LWIIMBO 111 Twaambo Tutupa Kukkomana

^ par 5 Loti, Jobu aNawomi bakali kukomba Jehova kabasyomeka pesi chimwi chiindi bakeelede kulwana kukataazikana nkubakali kuswaana mubuumi. Muchiiyo eechi, tulabona nzitwiiya kulimbabo. Alubo, tulabona mbukuyandikana kuba aamoyo mulamfu akweetelela bamwi, akuumbulizya bakombima nibaswaana buyumu-buyumu.

^ par 13 Mazina ngitwabelesya muchiiyo eechi akachinchwa.

^ par 57 BUPANDULUZI BWAZIFANIKISYO: Mukwesu uunyemede alubo waambuula ‘chaambaambe,’ mwaalu ulikumuswiilila. Nikwamana kunyema, mwaalu wamugwasya munzila yaluzyalo.

^ par 59 BUPANDULUZI BWAZIFANIKISYO: Mukwesu amukayintu wakwe baliikwiizya amukwesu wakafwidwa mukayintu wakwe lino-lino. Balikumutondeezya zintu zibotu nzibakali kuchitaamwi amukayintu wakwe.