Skip to content

Skip to table of contents

 CHIIYO 1

“Utakankami, Nkaambo Ndime Leza Wako”

“Utakankami, Nkaambo Ndime Leza Wako”

“Utayoowi, nkaambo ndili ayebo. Utakankami, nkaambo ndime Leza wako. Njookuyumya, njookugwasya.”​—IS. 41:10.

LWIIMBO 7 Jehova Onguzu Zyesu

ZITAYIIGWE *

1-2. (a) Majwi aali muli Isaya 41:10 akamugwasya biyeni muchizi Yoshiko? (b) Jehova wakaalondweda kuti agwasye bani majwi aaya?

MUCHIZI uusyomeka uutegwa Yoshiko wakabuzigwa majwi aayoosya. Dokotela wakamubuzya kuti wakali wasyaalilwa amyeezi miche kuti kachipona. Muchizi ooyu wakachita biyeni? Wakayeeya lugwalo ndwaakali kuyandisya, Isaya 41:10. (Bala.) Yoshiko taakakataazikana loko pe mpawo wakabuzya dokotela kuti taakali kuyoowa pe nkaambo Jehova wakamujisi kuboko. * Majwi aawumbulizya aajanika mulugwalo oolu akamugwasya muchizi ooyu kuti asyome Jehova amoyo woonse. Lugwalo oolu lulakonzya kutugwasya andiswe chiindi nitulwana amasunko. Kuti tumvwisisisye mbulukonzya kutugwasya lugwalo oolu, atulange-lange kuti nkamboonzi Leza naakabuzya Isaya kuti alembe majwi aaya.

2 Kumasaangunino, Jehova wakabuzya Isaya kuti alembe majwi aayo kuti awumbulizye maJuda bakali kuyootolwa mubuzike kuBbabbiloni. Jehova wakazumizya kuti majwi aaya alondolwe kutali kuti agwasye maJuda bakali mubuzike luzutu pesi akuti agwasye bakombi bakwe boonse kuzwa muchiindi eecho. (Is. 40:8; Rom. 15:4) Tulikupona ‘muzyiindi zikataazya,’ nkinkaako, tuyanda kusungwaazigwa amajwi aajanika mubbuku lyaIsaya.​—2 Tim. 3:1.

3. (a) Nziizili zisyomezyo zijanika muli Isaya 41:10, lugwalo lwakasalwa kuti lube lwamunyaka wamu2019? (b) Nkamboonzi nituziyanda zisyomezyo eezi?

3 Muchiiyo eechi, tulalanga-langa zisyomezyo zyaJehova zitatu zipa kuti tube aalusyomo lusimide zili muli Isaya 41:10:  (1) Jehova unooli aandiswe, (2) nguLeza wesu akuti (3) unootugwasya. Tulaziyanda zisyomezyo * eezi nkaambo mbuuli Yoshiko, tuswaana masunko mubuumi. Alubo tulwana aamapenzi azintu zibi zichitika munyika. Bamwi bakombima balikulisimya kukupenzegwa amfulumende zili aalunya. Atulange-lange zisyomezyo eezi zitatu chimwi achimwi.

“NDILI AYEBO”

4. (a) Nchiichili chisyomezyo chakusaanguna nchitutalange-lange? (Langa makani aamunsi.) (b) Jehova utondeezya biyeni kuti ulaandaba andiswe? (c) Majwi aaLeza apa kuti ulimvwe biyeni?

4 Jehova usaanguna aachisyomezyo chakuti: “Utayoowi, nkaambo ndili ayebo.” * Jehova utondeezya kuti ulaandiswe kwiinda mukututondeezya kuti ulaandaba andiswe muzintu zyoonse. Atubone mbatondeezya kuti ulaandaba andiswe naamba kuti: ‘Wakayandika mumeso aangu, wakalemekwa alubo ndakakuyanda.’ (Is. 43:4) Taakwe chintu chikonzya kukasya Jehova kuti atatondeezyi luyando kubantu bamukomba alubo luyando lwakwe lutamani talukazungaanisigwi pe. (Is. 54:10) Luyando lwakwe abweenzuma mbutuli aabo anguwe zipa kuti tutayoowi. Unootukwabilila mbuuli mbaakakwabilila mweenzinyina Abramu (Abrahamu). Jehova wakamubuzya kuti: “Utayoowi, Abramu; ndime intobo yako.”​—Matl. 15:1.

Kwiinda mukugwasigwa aJehova, tulakonzya kwiinda mumapenzi ngituswaana aali mbuuli milonga naakuti mulilo (Langa fuka 5-6) *

5, 6. (a) Tuzi biyeni kuti Jehova ulayanda kutugwasya nituli mumasunko? (b) Nchiichili chiiyo nchitujana kuzwa kuchikozyano chaYoshiko?

5 Tulizi kuti Jehova ulayanda kutugwasya mumasunko ngaswaana umwi awumwi nkaambo usyomezya bakombi bakwe kuti: “Ciindi noinda akati kamaanzi, njooba ayebo. Noinda akati kamilonga, tiikooyookutola. Noenda mukati kamulilo, tokooyoopya pe, amabangabanga taakooyookutenta.” (Is. 43:2) Majwi aaya ambaanzi?

6 Jehova tatusyomezyi kuti ulaagwisya mapenzi ngituswaana mubuumi pesi takazumizyi “milonga” yamapenzi kuti itutole naakuti masunko aali mbuuli ‘mabanga-banga aamulilo’ kuti atukachizye kumukomba amoyo woonse. Utusyomezya kuti unooli aandiswe  akutugwasya kuti ‘twiinde’ mumapenzi aayo. Jehova uyoochitaanzi? Uyootugwasya kuti tutayoowi kuchitila kuti tukkale katusyomeka nikuba chiindi nitwaba muchiimo chipa kuti tufwe. (Is. 41:13) Muchizi Yoshiko waambwa kumasaangunino, wakabona kuti makani aaya ngachoonzyo. Mwana wamuchizi ooyu musimbi wakati: “Twakagamba kubona baama mbubakalyiibide. Twakabona kuti Jehova nguwe wakabapede luumuno lwamumoyo. Kusika mubuzuba mbubakafwa, baama bakali kubuzya manesi abamwi bachiswa atala Jehova azisyomezyo zyakwe.” Chikozyano chaYoshiko chituyiisyaanzi? Kuti andiswe twachisyoma chisyomezyo chaLeza chakuti “njooba ayebo,” tatukayoowi alubo tuyooba aamanguzu aakulwana masunko ngituswaana.

“NDIME LEZA WAKO”

7-8. (a) Nchiichili chisyomezyo chachibili nchitutalange-lange alubo chambaanzi? (b) Nkamboonzi Jehova naakabuzya maJuda bakali mubuzike kuti: ‘Mutakankami’? (c) Ngaali majwi aajanika muli Isaya 46:3, 4, aakagwasya bakombi baLeza kuti batayoowi?

7 Atumvwe chisyomezyo chachibili chijanika mubbuku lyaIsaya chakuti: “Utakankami, nkaambo ndime Leza wako.” Majwi aaya aali atala akukankama aambaanzi? Mulugwalo oolu, bbala lyachiHebbrayo lyakasandululwa kuti “utakankami,” lyaamba kucheba musule akaambo kakuyoowa chimwi chintu naakuti umwi muntu uukonzya kukuchisa naakuti kulanga-langa mumbali akaambo kakuyoowa chimwi chintu.

8 Nkamboonzi Jehova naakabuzizye maJuda bakali kuyooba mubuzike kuBbabbiloni kuti ‘batakankami’? Nkaambo wakalizi kuti bantu bamuchisi eecho bakali kuyooyoowa. Niinzi chakali kuyoopa kuti bayoowe? Kumamanino aaminyaka iili 70 maJuda kabali mubuzike, bantu bakuBbabbiloni bakali kuyoolwanwa amasoja bamaMede amaPersiya bakali aamanguzu. Jehova wakali kuyoobelesya masoja aaba kuti baangunune bakombi bakwe mubuzike kuBbabbiloni. (Is. 41:2-4) Chiindi bantu bakuBbabbiloni abazisi zimwi nibakabona kuti basinkondonyina bazabuza, bakeezya kusimisyania kwiinda mukubuzyania kuti: “Koyuma.” Bakalipangila baleza biingi kabayeeya kuti bakali kuyoobakwabilila. (Is. 41:5-7) Majwi aaJehova akalembedwe aaIsaya akatontozya myoyo yamaJuda nibakali mubuzike. Wakababuzizye kuti: ‘Pesi iwe, O Israyeli [kusiyana azisi zikuzyungulukide] mulanda wangu, . . . Utakankami, nkaambo ndime Leza wako.’ (Is. 41:8-10) Jehova wakaamba kuti: “Ndime Leza wako.” Kwiinda mumajwi aaya, Jehova wakali kugwasya bakombi bakwe basyomeka kuti taakabalubide pe akuti wakachili Leza wabo akuti bakachili bantu bakwe. Wakababuzya kuti: ‘Ndiyoomunyampula alubo ndiyoomuvuna.’ Majwi aaya aasungwaazya akabasimya maJuda bakali mubuzike.​—Bala Isaya 46:3, 4.

9-10. Nkamboonzi nituteelede kuyoowa? Amba chikozyano.

9 Mazubaano, bantu biingi munyika balikukataazikana kwiinda chiindi nkaambo zintu zilikwiindilila kubija. Andiswe zintu eezi zilatuchitikila. Pesi tatweelede kuyoowa zyiindilide pe. Jehova utubuzya kuti: “Ndime Leza wako.” Nkamboonzi majwi aaya naatupa kuti tukkale katutayoowi?

10 Atulange-lange chikozyano eechi: Jim aBen bali mundeke iilikutontwa aaguwo pati. Chiindi ndeke niyatalika kutolwa aluuwo kiitacheendi kabotu, sikweenzya ndeke wati: “Amusunge mabbanti. Mutuyabweenda lino kuli guwo.” Jim watalika kukataazikana loko. Pesi sikweenzya ndeke wayungizya kuti: “Mutakataazikani pe. Ndime ndilikwaamba.” Kuzwa waawo, Jim watikinia mutwe  mpawo wati, “Ulikwaamba choonzyo na muntu ooyu?” Pesi wabona kuti Ben ulilyiibide, talikukataazikana pe. Jim wabuzya Ben kuti: “Nkamboonzi nulyiibide oobu?” Ben kalikuseka-seka wati: “Nkaambo ndilimwizi muntu ooyu ulikweenzya ndeke. NguNdeende!” Mpawo Ben wati: “Leka ndikubuzye zyiingi atala aNdeende. Ndiyeeya kuti wamuziba akuziba mbayenzya ndeke, tukooyoowa pe.”

11. Chikozyano chili atala aBen aJim chituyiisyaanzi?

11 Twiiyaanzi kuchikozyano eechi? Mbuuli Ben, tatukataazikani zyiindilide nkaambo tumuzi kabotu Taateesu uuli kujulu, Jehova. Tulizi kuti uyootugwasya kuti tulisimye kubuyumu-yumu mbutuswaana buli mbuuli guwo mumazubaano aakumamanino aabweende oobu bwazintu. (Is. 35:4) Tusyoma Jehova alubo kuchita oobo kutugwasya kuti tubatame nikuba kuti bantu biingi munyika baliyoowede. (Is. 30:15) Tuchita mbuuli Ben chiindi nitubuzya bamwi twaambo tutugwasya kuti tusyome Leza. Kuchita oobo kuyoopa kuti ambabo basyome kuti Jehova unoobagwasya kumasunko woonse ngibaswaana.

“NJOOKUYUMYA, [ALUBO] NJOOKUGWASYA”

12. (a) Nchiichili chisyomezyo chachitatu nchitutalange-lange? (b) Majwi aakuti “kuboko” kwaJehova atuyeezyaanzi?

12 Atulange-lange chisyomezyo chachitatu chijanika muli Isaya chakuti: “Njookuyumya, njookugwasya.” Isaya wakali wapandulula kale nzila Jehova mbaakali kuyoobasimya bantu bakwe naakati: “Jehova uleza anguzu. Kuboko kwakwe nkokumweendelezezya.” (Is. 40:10) Chiindi chiingi, Bbayibbele libelesya bbala lyakuti “kuboko” kutondeezya manguzu. Nkinkaako, majwi aakuti: “Kuboko kwakwe nkokumweendelezezya” atuyeezya kuti Jehova, Mwaami ulaamanguzu. Wakabelesya manguzu aakwe miingi kugwasya akukwabilila bakombi bakwe bachiindi alubo mazubaano  ulikwiinkilila kunembo kasimya akukwabilila bakombi bakwe bamusyoma.​—Dt. 1:30, 31; Is. 43:10.

Taakwe chilwanisyo chiyoozwidilila kulwana kuboko kwaJehova kutukwabilila kuli aamanguzu (Langa fuka 12-16) *

13. (a) Ndiilili loko Jehova natusyomezya kuti uyootusimya? (b) Ngaali malayilile Jehova ngatupa aapa kuti tulisimye akuti tube aalusyomo?

13 Kapati chiindi basinkondoma nibatupenzya, Jehova utusyomezya kuti ulachizuzikizya chisyomezyo chakwe chakuti: “Njookuyumya.” Muli zimwi zisi mazubaano, basikutukazya balikubeleka changuzu kuti bakasye mulimu wesu wakukambawuka naakuti kukasya mbunga yesu. Nikuba boobo, tatukataazikani zyiindilide pe. Jehova utupa malayilile aatugwasya kuti tulisimye akuti tube aalusyomo. Utusyomezya kuti: ‘Taakwe chilwanisyo chipangilwa kulwana nduwe chiyoozwidilila.’ (Is. 54:17, NW) Majwi aaya atuyeezya twaambo tutatu tuyandikana loko.

14. Nkamboonzi nitutagambi kuti basinkondonyina baLeza balatulwana?

14 Kaambo kakusaanguna nkakuti, mbutuli batobeli baKristu, tulangilila kuti bantu banootuzonda. (Mt. 10:22) Jesu wakaambilizya kuti basikwiiya bakwe bakali kuyoopenzegwa zyiindilide kumazuba aakumamanino. (Mt. 24:9; Joh. 15:20) Kaambo kachibili nkakuti, businsimi bwaIsaya bwakaamba kuti basinkondoma bayootuchitila zyiingi kutali kutuzonda luzutu nkaambo bayoobelesya zilwanisyo zisiyene-siyene kutulwana. Zilwanisyo eezyo ziswaanizya, kwaamba makani aakubeja kabayanda kuti bantu baasyome, kutubejelezya akutupenzya chalunya. (Mt. 5:11, NW) Jehova takabakasyi pe basinkondoma kuti babelesye zibelesyo zyabo kutulwana. (Ef. 6:12; Ciy. 12:17) Pesi tatweelede kuyoowa pe. Nkamboonzi?

15-16. (a) Nkaakali kaambo kachitatu nkitweelede kuyeeya alubo majwi aali muli Isaya 25:4, 5 ayendelana biyeni akaambo aaka? (b) Majwi aali muli Isaya 41:11, 12, apandulula kuti niinzi ziyoochitikila bantu batulwana?

15 Atulange-lange kaambo kachitatu nkitweelede kuyeeya. Jehova wakati ‘Taakwe  chilwanisyo’ chibelesegwa kulwana ndiswe ‘chiyoozwidilila.’ Mbuuli muduli mbuutukwabilila kumvula ilaaguwo pati, Jehova ulatukwabilila ‘kubukali bwabantu balaalunya.’ (Bala Isaya 25:4, 5.) Basinkondoma tabakazwidilili pe kutunyonyoona chakumaninina.​—Is. 65:17.

16 Kuyungizya waawo, Jehova ulalusimya lusyomo lwesu kwiinda mukutupandulwida mpindu nzibabambilidwe bantu ‘batunyemena.’ (Bala Isaya 41:11, 12.) Nikuba kuti basinkondoma beezya biyeni kutulwana naakuti nkondo yayuma biyeni, mpindu njibayoojana njimwi biyo: Basinkondonyina babantu baLeza “bayooba cintu buyo, bayoonyonyooka.”

MBUTUKONZYA KUSYOMA JEHOVA AMOYO WOONSE

Tulakonzya kusyoma Jehova amoyo woonse kwiinda mukubala makani aali atala anguwe muBbayibbele chiindi choonse (Langa fuka 17-18) *

17-18. (a) Kubala Bbayibbele kutugwasya biyeni kuti tusyome Leza? Amba chikozyano. (b) Kutugwasya biyeni kuyeeyesesya atala alugwalo lwamunyaka wamu2019?

17 Tulakonzya kusyoma Jehova amoyo woonse kwiinda mukumuziba kabotu. Nzila iimwi luzutu njitukonzya kumuziba kabotu Leza, nkubala Bbayibbele akuyeeyesesya nzitwali kubala. Bbayibbele lili aamakani aachoonzyo aatondeezya Jehova mbaakakwabilila bakombi bakwe bachiindi. Makani aaya apa kuti tube aachoonzyo chakuti unootukwabilila.

18 Atulange-lange chikozyano chibotu Isaya nchaakabelesya naakali kupandulula Jehova mbatukwabilila. Wakati Jehova, mweembezi mpawo bakombi bakwe nimbelele. Isaya wakati Jehova: “Ulabunganya twana [twambelele] akuboko kwakwe, ulatukumbatila akaango kakwe.” (Is. 40:11) Chiindi nitubona nzila Jehova mbatukumbatila amaboko aakwe, tulimvwa katukwabilidwe alubo katulyiibide. Kuti tukkale katubateme chiindi nituli mumapenzi, muzike uuchenjede alubo uusyomeka wakasala Isaya 41:10 yaamba kuti “Utakankami, nkaambo ndime Leza wako,” kuti lube lugwalo lwamunyaka wamu2019. Yeeyesesya atala amajwi aaya aasungwaazya. Ayookusimya waakuswaana mapenzi kunembo.

LWIIMBO 38 Uyoomuyumya

^ par 5 Lugwalo lwakasalwa kuti lube lwamunyaka wamu2019 lulaatwaambo tutatu tutugwasya kuti tukkale katubateme nikuba zintu zibi nizyachitika munyika naakuti mubuumi bwesu. Muchiiyo eechi, tulalanga-langa twaambo ootu mbututugwasya kuti tutakataazikani loko akuti tusyome Jehova. Yeeyesesya atala alugwalo lwamunyaka. Luzibe amutwe kuti kukonzya. Kuchita oobo kuyookugwasya kuti ulisimye kubuyumu-yumu mbuyooswaana kunembo.

^ par 1 Langa Ngaziyakulinda yaChikuwa yamuJuly 2016, peji 18.

^ par 3 BUPANDULUZI BWAMABALA: Chisyomezyo makani aachoonzyo aatondeezya kuti chimwi chintu chizoochitika nikuba kuti kwaba biyeni. Zisyomezyo Jehova nzyatupa zitugwasya kuti tutakataazikani loko atala abuyumu-yumu mbutuswaana mubuumi.

^ par 4 Bbala lyakuti “Utayoowi” lyaambidwe tutatu muli Isaya 41:10, 13, 14. Mumavesi aaya, kubelesedwe mabala aakuti “ndime” aliti “mebo” (kwaamba Jehova). Nkamboonzi Jehova naakazulwida Isaya kuti abelesye mabala aaya kwaziindi zyiingi? Wakachitila kuti atondeezye kuti tulakonzya kukuzunda kuyoowa kuti twamusyoma amoyo woonse.

^ par 52 BUPANDULUZI BWAZIFANIKISYO: Bamumpuli balikuswaana masunko kumulimu, kuchiswa, kukukambawuka akuchikolo.

^ par 54 BUPANDULUZI BWAZIFANIKISYO: Bakamboni balikuchita muswaangano chakusisikizya mung’anda mpawo bajatwa amapulisa pesi tabayoowede pe.

^ par 56 BUPANDULUZI BWAZIFANIKISYO: Kukomba kwaMpuli kuchitwa chiindi choonse kutugwasya kuti tulisimye.