Skip to content

Skip to table of contents

 CHIIYO 2

Tembawula Jehova Mumbungano

Tembawula Jehova Mumbungano

“Njookutembaula akati kambungano.”​—INT. 22:22.

LWIIMBO 59 Atumutembaule Jehova

ZITAYIIGWE *

1. Davida wakalimvwa biyeni atala aJehova alubo eezi zyakapa kuti achiteenzi?

MWAAMI DAVIDA wakalemba kuti: “Jehova mupati, uleelede kutembaulwa loko.” (Int. 145:3) Wakali kumuyanda Jehova, nkinkaako, luyando oolu lwakapa kuti ‘atembawule Leza aakati kambungano.’ (Int. 22:22; 40:5) Anduwe ulamuyanda Jehova, nkinkaako, ulazuminana amajwi aDavida aakuti: “Kolumbwa, O Jehova Leza wa-Israyeli tateesu, lyoonse alyoonse mane kukabe kutamani.”​—1 Mak. 29:10-13.

2. (a) Kujana twamutembawula biyeni Jehova? (b) Ndiilili penzi bamwi ndibaswaana alubo tulalanga-langaanzi?

2 Mazubaano, imwi nzila njitukonzya kutembawula Jehova, nkusandula kumiswaangano yachiKristu. Nikuba boobo, kuli penzi ndibaswaana bakwesu abachizi. Balayanda kusandula pesi balayoowa. Niinzi chikonzya kubagwasya kuti batayoowi? Alubo nziizili nzila zikonzya kutugwasya toonse kuti katwaamba nsandulo zisungwaazya? Katutanasandula mibuzyo eeyi, atusaangune kulanga-langa twaambo tuli 4, tupa kuti katusandula kumiswaangano.

NKAMBOONZI NITUSANDULA KUMISWAANGANO?

3-5. (a) Kweendelana amajwi aali muli BaHebrayo 13:15, nkamboonzi nitusandula kumiswaangano? (b) Toonse tweelede kusandula munzila iikozyenie na? Pandulula.

3 Toonse Jehova utupede chilongezyo chakumutembawula. (Int. 119:108) Nsandulo nzitwaamba kumiswaangano ‘nchipayizyo chakulumba’ alubo taakwe muntu uukonzya kutuchitila  chipayizyo eecho. (Bala BaHebrayo 13:15.) Jehova uyanda kuti toonse katupa chipayizyo naakuti nsandulo zikozyenie na? Peepe!

4 Jehova ulizi kuti tuchita zintu munzila iisiyene akuti zyiimo zyesu zilisiyene alubo uzibona kaziyandikana zipayizyo nzitumupa. Yeeya atala azipayizyo nzyaakali kutambula kumaIsrayeli. Bamwi maIsrayeli bakali kupa mbelele naakuti mpongo. Pesi muIsrayeli wakali kufwaba, wakali kukonzya kupa “inziba zyobile nanka twana twankwilimba tobile.” Alubo kuti muIsrayeli katakonzyi kujana tuyuni tubili, Jehova wakali kuchitambula “cipanzi cakumi cacisuwo [chafulawa mbotu].” (Lev. 5:7, 11) Fulawa teeyakali kudula pe pesi Jehova wakali kuchitambula chipayizyo eechi kuti ‘fulawa eeyo kayili mbotu.’

5 Nikuba mazubaano, Leza wesu siluzyalo uchilimvwa mbuboobo. Nitusandula, Leza talangilili kuti katunanta kwaambuula mbuuli Apolo naakuti tube mbuuli Pawulu wakali kwaambuula munzila iipa kuti bantu bafwambaane kusyoma. (Inc. 18:24; 26:28) Nzyayanda Jehova nkuti twaambe nsandulo zisungwaazya, kweendelana ambutukonzya. Yeeya mukamufu wakapa tukkobili tubili. Kuli Jehova, wakali kuyandikana loko nkaambo wakapa kweendelana anzyaakali aazyo.​—Lk. 21:1-4.

Kusandula kumiswaangano kugwasya ndiswe abatuswiilila (Langa fuka 6-7) *

6. (a) Kweendelana amajwi aali muli BaHebrayo 10:24, 25, nsandulo nzibaamba bamwi zipa kuti tulimvwe biyeni? (b) Kujana watondeezya biyeni kuti ulazilumba nsandulo nzibaamba bamwi?

6 Nsandulo zyesu zisungwaazya bamwi. (Bala BaHebrayo 10:24, 25.) Toonse tulasungwaazigwa kumvwa nsandulo zisiyene-siyene kumiswaangano yesu. Kulatubotezya kumvwa mwana nasandula mumajwi mawuba. Alubo kulatubotezya kumvwa nsandulo yawumwi kaamba kasimpe kamwi nkaakajana. Tulabalumba bakombima ‘batayoowi’ kwaamba nsandulo nikuba kuti balaabweeme naakuti balikwiiya mulaka. (1 Tes. 2:2) Kujana twatondeezya biyeni kuti tulazilumba nzibachita? Niyamana miswaangano, tulakonzya kubalumba akaambo kansandulo zisungwaazya nzibaamba. Alubo kusandula kwesu, njiimwi nzila iitondeezya kuti tulazilumba nsandulo zyabo. Kuchita oobo kupa kuti tutasungwaazigwi luzutu pesi kupa kuti andiswe tusungwaazye bamwi.​—Rom. 1:11, 12.

7. Kusandula kutugwasya biyeni?

 7 Kusandula kupa kuti tugwasigwe. (Is. 48:17) Kutugwasya biyeni? Chakusaanguna, kuba aachiyandisyo chakuyoosandula kumiswaangano, kupa kuti tulibambile kabotu. Kulibambila kabotu kutugwasya kuti tulimvwisisisye Jwi lyaLeza. Alubo, kulimvwisisisya Jwi lyaLeza kutugwasya kuti kutuubile kubelesya nzitwiiya. Chabili, tuyoobotelwa kumiswaangano nkaambo andiswe tunoosandula. Chatatu, akaambo kakuti tunooli twabeleka changuzu kulibambila kuti tusandule, tatukazilubi chakufwambaana nsandulo nzitwaamba.

8-9. (a) Kweendelana amajwi aali muli Malaki 3:16, ubonaanga Jehova umvwa biyeni atala ansandulo zyesu? (b) Mbuubuli bumwi buyumu-yumu bamwi mbubaswaana?

8 Kwaamba nzitusyoma kupa kuti Jehova abotelwe. Tuli achoonzyo chakuti Jehova ulatuswiilila akuti ulabotelwa akaambo kakubeleka changuzu nkutuchita kuti tusandule. (Bala Malaki 3:16.) Ulatulongezya akaambo kakubeleka changuzu kuti tuchite zimubotezya.​—Malk. 3:10.

9 Zili aantanganana kuti kuli twaambo tumvwika tupa kuti katusandula kumiswaangano yambungano. Nikuba boobo, bamwi balayoowa kutambika kumiswaangano. Kuti kulimvwa oobo anduwe, utalengwaani pe. Atulange-lange zimwi njiisyo zyamuBbayibbele, zikozyano azimwi zikonzya kutugwasya kuti katusandula kwaziindi zyiingi kumiswaangano.

KULWANA PENZI LYAKUYOOWA

10. (a) Nkuukuli kuyoowa toonse nkutumvwa? (b) Kuyoowa kutondeezya kuti mbuubuli buntu bubotu mbuli aabo?

10 Ngawafwelukwa mwida na kutambika kuboko chiindi nuyanda kusandula? Kuti kulimvwa oobo, teenduwe pe awulikke. Simpe ndyakuti, chimwi chiindi toonse ngatwayoowa nituyanda kusandula. Kuti ukonzye kulwana penzi lipa kuti kuyoowa, weelede kuziba chipa kuti uyoowe. Uyoowa kuti ulaziluba na nzuyanda kusandula naakuti uyoowa kuti  ulaamba zitali nzizyo? Uyoowa kuti nsandulo yako tiinooli mbotu na mbuuli zyabamwi? Kulimvwa munzila iili boobu, kuli kabotu. Kutondeezya kuti ulalibombya akuti ubona kuti bamwi bachita kabotu kwiinda nduwe. Jehova ulabayanda bantu balibombya. (Int. 138:6; Flp. 2:3) Pesi Jehova uyanda kuti umutembawule akuti usungwaazye bakombinyokwe kumiswaangano. (1 Tes. 5:11) Ulakuyanda alubo uyookugwasya kuti utayoowi.

11. Nziizili njiisyo zyamuMagwalo zikonzya kutugwasya?

11 Atulange-lange njiisyo zyamuMagwalo zigwasya. Bbayibbele lyaamba kuti toonse tulabisya muzintu nzitwaambuula ambutuzyaamba. (Jak. 3:2) Jehova abakombima tabalangilili kuti tube bantu bamaninide. (Int. 103:12-14) Tuli mpuli iimwi yamubukombi ambabo alubo balatuyanda. (Mk. 10:29, 30; Joh. 13:35) Balizi kuti chimwi chiindi nsandulo zyesu tatuzyaambi mbuuli mbutwali kuyanda.

12-13. Twiiyaanzi kuchikozyano chaNehemiya achaJona?

12 Yeeya atala azimwi zikozyano zyamuBbayibbele zikonzya kukugwasya kulwana penzi lyakuyoowa. Yeeya chikozyano chaNehemiya. Wakali kubeleka munkuta yamwaami wakali aamanguzu. Nehemiya wakali wuside nkaambo wakali wamvwa kuti miduli amageedi aakuJerusalemu zyakachidilikide. (Neh. 1:1-4) Yeeya mbukwakamufweluka mwida, mwaami naakamubuzya kuti aambe zyakamupede kuusa! Nehemiya wakasaanguna kukomba mpawo wakasandula. Kuzwa waawo, mwaami wakachita zyiingi kuti agwasye bakombi baLeza. (Neh. 2:1-8) Alubo yeeya atala aJona. Chiindi Jehova naakabuzya Jona kuti akakambawukile bantu bakuNineve, Jona wakayoowa mpawo wakachijila kumbi. (Jon. 1:1-3) Akaambo kakugwasigwa aaJehova, Jona wakawuchita mulimu ngwaakatumidwe. Alubo majwi ngaakaamba akabagwasya loko bantu bakuNineve. (Jon. 3:5-10) Chikozyano chaNehemiya chituyiisya kuti tweelede kukomba katutanasandula. Alubo kuli Jona, twiiya kuti Jehova ulakonzya kutugwasya kuti tumukombe nikuba kuti katuyoowede. Kwaamba choonzyo, mpiili na mbungano iiyoosya mbuuli kwakabede kukambawukila bantu bakuNineve?

13 Nziizili nzila zikonzya kukugwasya kuti waambe nsandulo zisungwaazya kumiswaangano yambungano? Atulange-lange ziche biyo.

14. Nkamboonzi nitweelede kulibambila kabotu miswaangano alubo tweelede kulibambila lili?

14 Libambile muswaangano umwi awumwi. Kuyanda kuyoosandula akulibambila kabotu, zipa kuti utakayoowi kusandula. (Tus. 21:5) Nikuba boobo, tulibambila muziindi zisiyene. Muchizi Eloise mukamufu uuli aaminyaka iili kuma80, usaanguna kulibambila chiiyo chaNgaziyakulinda kumasaangunino aamviki. Waamba kuti: “Ilandinoneezya miswaangano kuti ndalibambila kakuchili  chiindi.” Muchizi Joy uubeleka mulimu wakumubili ulibambila chiiyo chaNgaziyakulinda muMugibelo. Waamba kuti: “Kuchita oobo kupa kuti kandichiziyeeyede nzindalibambila.” Mwaalu uutegwa Ike uuli aazyiingi zyakuchita alubo uupayona waamba kuti: “Kulanduubila kulibambila chiiyo mbichaani-mbichaani mumviki yoonse kwiinda kulibambila kwachiindi chilamfu mubuzuba bumwi.”

15. Kujana wachita biyeni kuti ulibambile kabotu miswaangano?

15 Niinzi ziswaanizidwe mukulibambila miswaangano? Kutanasaanguna kulibambila, talika kukomba kuli Jehova kukumbila muuya uusalala. (Lk. 11:13; 1 Joh. 5:14) Mpawo ulange-lange chiiyo choonse kwachiindi chifwiifwi. Langa-langa mutwe, tutwe tuniini, zifanikisyo atubbokesi tuli muchiiyo. Nwatalisya kubala mafuka, bala magwalo oonse aabikkidwe kuti kukonzya. Yeeyesesya atala amakani ngulikubala akulangisisya twaambo ntuyanda kuyoosandula. Kulibambila kabotu kupa kuti ugwasigwe akuti ukonzye kusandula.​—2 Kor. 9:6.

16. Nziizili zibelesyo nzukonzya kubelesya alubo kujana wazibelesya biyeni?

16 Kuti kazichita, belesya zibelesyo zijanika mumulaka ngumvwisisisya. Kabelesya mbunga yakwe, Jehova wakatupa zibelesyo zitugwasya kuti katulibambila kabotu miswaangano. JW Library® app, itugwasya kuti tudawunilode mabbuku katubelesya mafooni amatebbuleti. Mpawo tulakonzya kulibambila, kubala naakuti kuswiilizya zyakalekkoodwa kufumbwa nkutubede kufumbwa chiindi. Bamwi babelesya chibelesyo eechi kulibambila miswaangano sikati, chiindi nibali kulyookezya kumulimu, kuchikolo anibali mulweendo. Watchtower Library a-Watchtower ONLINE LIBRARYzipa kuti kutuubile kuyanduulisisya makani ngituyanda kumvwisisisya.

Ndiilili nulibambila miswaangano? (Langa fuka 14-16) *

17. (a) Nkamboonzi nikuli kabotu kulibambila nsandulo zyiingi? (b) Wayiyaanzi mukavidiyo kati Bamweenzinyina waJehova​—Libambile Mbutasandule?

17 Kuti kazichita, libambile nsandulo zyiingi muchiiyo chimwi achimwi. Nkamboonzi? Nkaambo zilakonzeka kuti sikuchitisya chiiyo takookwaamba pe kuti usandule nwaatambika. Kuli bamwi banga balitambikide chiindi nwaatambika alubo sikuchitisya chiiyo ulakonzya kwaamba umwi kuti asandule. Kuti ajate chiindi, sikuchitisya chiiyo ulakonzya kwaamba bantu bache kuti basandule. Nkinkaako, utanyemi pe kuti sikuchitisya chiiyo taakwaamba kuti usandule kumatalikilo aachiiyo. Kulibambila nsandulo zyiingi, kupa kuti ujane mweenya wakusandula. Imwi nsandulo njukonzya kupa ilakonzya kuswaanizya kubala lugwalo. Pesi kuti kukonzya, libambile kusandula mumajwi aako. *

18. Nkamboonzi nitweelede kwaamba nsandulo mfwiifwi?

 18 Wamba nsandulo mfwiifwi. Chiindi chiingi, nsandulo mfwiifwi nzizyo zisungwaazya. Nkinkaako, yezya kunoowamba nsandulo mfwiifwi. Yezya kusandula mumasekkoondi aali 30. (Tus. 10:19; 15:23) Kuti waba aaminyaka myiingi kusandula kumiswaangano, uli aamulimu mupati wakuba chikozyano chibotu kwiinda mukwaamba nsandulo mfwiifwi. Kuti kwaamba nsandulo ziyumu kwachiindi chilamfu, bamwi balakonzya kuyoowa kabayeeya kuti tabazookonzyi pe kusandula mbuuli nduwe. Alubo, nsandulo mfwiifwi zipa kuti bantu biingi bajane mweenya wakusandula. Kuti nduwe wasaanguna kusandula, wamba nsandulo mfwiifwi iisandula mubuzyo. Utaambi twaambo toonse tuli mufuka. Kuti kaambo kapati kasandulwa, ulakonzya kwaamba zimwi zyiiyo zili mufuka zyakuyungizya.​—Langa kabbokesi kati, “ Kujana Ndasandula Biyeni?

19. Kujana sikuchitisya chiiyo wakugwasya biyeni pesi niinzi nzweelede kuchita?

19 Buzya sikuchitisya chiiyo, fuka nduyanda kusandula. Kuti kuyanda kuchita oobo, buzya sikuchitisya chiiyo, miswaangano kayitanasaanguna pe. Nimwasika aafuka eelyo, fwambaana kutambika kuboko alubo utambikisye, kuchitila kuti sikuchitisya chiiyo akubone.

20. Miswaangano yambungano ikozyenie biyeni achakulya nchitulya abeenzuma?

20 Miswaangano yambungano weelede kwiibona mbuuli kulyaamwi abeenzinyokwe. Atuteedi watambwa kuti muzoolyaamwi abamwi bamumbungano mpawo wabuzigwa kuti ulibambile chimwi chakulya kuti muzooyengezye. Walikunoochita biyeni? Nisimpe kuti walikunookataazikana pesi walikunoojika chakulya nchibayanda bantu boonse. Jehova Sikututamba, utubambila chakulya chinono kumiswaangano yesu. (Int. 23:5; Mt. 24:45) Alubo ulabotelwa azipo zyoonse zibotu nzitumupa nikuba kazili ziniini. Nkinkaako, libambile kabotu alubo usandule kwaziindi zyiingi. Kuchita oobo takupi kuti ulye kutebbulu lyaJehova luzutu pesi kupa kuti weete chipo nchukonzya kwaabana abamwi mumbungano.

LWIIMBO 2 Jehova Ndezina Lyako

^ par 5 Mbuuli sintembawuzyo Davida, toonse tulamuyanda Jehova alubo tulakuyanda kumutembawula. Tuli aachilongezyo chibotu loko chakutondeezya mbutumuyanda Leza chiindi nitusandula kumiswaangano yambungano. Nikuba boobo, bamwi balayoowa kusandula kumiswaangano. Kuti kakukuyumina kusandula, chiiyo eechi chiyookugwasya kuti uzibe zintu zipa kuti uyoowe kusandula ambukonzya kuzunda kuyoowa ooko.

^ par 17 Yebela kavidiyo kati Bamweenzinyina waJehova​—Libambile Mbutasandule. kujw.org. Langa aalembedwe kuti MAVIDIYO > BANA.

^ par 63 BUPANDULUZI BWAZIFANIKISYO: Bamumbungano balikubotelwa kutola lubazu muchiiyo chaNgaziyakulinda.

^ par 65 BUPANDULUZI BWAZIFANIKISYO: Bakwesu abachizi mbitwabwene kabali kusandula muChiiyo chaNgaziyakulinda. Nikuba kuti bali aazyiimo zisiyene, umwi awumwi wakabamba chiindi nakonzya kulibambila chiiyo chiyooyiigwa kumuswaangano.