Skip to content

Skip to table of contents

Nkamboonzi Nitweelede Kupa Ooyo Uuli Azintu Zyoonse?

Nkamboonzi Nitweelede Kupa Ooyo Uuli Azintu Zyoonse?

“O Leza wesu, iswe tulakulumba akutembaula izina lyako lilemu.”​—1 MAK. 29:13.

NYIMBO: 80, 50

1, 2. Jehova uzibelesya biyeni zintu nzyalaazyo?

JEHOVA mwaabi. Zintu zyoonse nzitulaazyo zyakazwa kulinguwe. Zintu zili munyika zili mbuuli ngolida, nsiliva azimwi nzizyaJehova alubo wakatupa kuti zitugwasye mubuumi. (Int. 104:13-15; Hag. 2:8) Bbayibbele litondeezya kuti Jehova wakabelesya zintu eezi kuti agwasye babelesi bakwe.

2 MaIsrayeli nibakali munkanda kwaminyaka iili 40, Jehova wakabapa maanzi achakulya. (Kul. 16:35) Nkinkaako, “taakwe ncibakabula.” (Neh. 9:20, 21) Musinsimi Elisha kagwasigwa aJehova wakachita chigambyo chakuti mafuta amukamufu uusyomeka atamani. Eezi zyakapa kuti mukamufu ajane mali yakuti abbadale chikwelete alubo yakasyaala wakiibelesya kuti alisanine abana bakwe. (2 Bam. 4:1-7) Jehova wakapa Jesu manguzu aakuti achite chigambyo chakusanina bantu biingi akuti ajane mali.​—Mt. 15:35-38; 17:27.

3. Tuyoolanga-langaanzi muchiiyo eechi?

3 Jehova uli azintu zyiingi nzyakonzya kubelesya kuti  agwasye zilenge zyakwe. Nikuba boobo, uyanda kuti bakombi bakwe babelesye zintu nzibalaazyo kuti bagwasilizye mulimu uuchitwa munyika yoonse. (Kul. 36:3-7; bala Tusimpi 3:9.) Nkamboonzi Jehova nayanda kuti tumupe zintu nzyaakatupa? Bakombi baJehova bachiindi, bakabagwasilizya biyeni bayiminini baJehova mumakani amali? Mazubaano mali njitusanga ibelesegwa biyeni mumbunga? Mibuzyo eeyi iyoosandulwa muchiiyo eechi.

NKAMBOONZI NITWEELEDE KUPA JEHOVA?

4. Kupa Jehova zintu nzitulaazyo kutondeezyaanzi?

4 Tupa Jehova zintu nzitulaazyo akaambo kakuti tulamuyanda akuti tuyanda kumulumba. Nitubona zintu zibotu nzyakatuchitila Jehova, zitupa kuti andiswe tuyande kumuchitila chimwi chintu. Naakali kupandulula makani ali atala akuyakwa kwatempele, Davida wakaamba kuti zintu zyoonse nzitulaazyo zyakazwa kuli Jehova alubo zintu nzitumupa nzizyakwe.​—Bala 1 Makani 29:11-14.

5. Magwalo atondeezya biyeni kuti tweelede kupa zipo?

5 Kupa ninzila yakukomba Jehova. Muchilengaano nchaakabona Johane wakamvwa bangelo kabati: “Uuelede, O Mwami, kutambula bulemu alulemeko anguzu, nkaambo nduwe wakalenga zintu zyoonse, nkaambo kabukanze bwako nkizibeda, ankizyakalengelwa.” (Ciy. 4:11) Nisimpe, Jehova uleelela kuti tumulemeke kwiinda mukumupa zintu nzitulaazyo! Jehova wakabuzya maIsrayeli kuti bakeelede kusekelela mapobwe tutatu amunyaka. Mbukunga mapobwe aayo akali kuswaanizya kukomba Jehova, maIsrayeli teebakeelede ‘kuboola kubusyu bwaJehova chinkwamaanza.’ (Dt. 16:16) Mbukubede amazubaano, kupa zipo kulayandikana nkaambo kutondeezya kuti tulamulumba Jehova akuti tuyanda kugwasilizya mulimu uliikuchitwa ambunga yakwe.

6. Kupa kutugwasya biyeni? (Langa chifanikisyo chili kumatalikilo achiiyo.)

6 Kupa kulatugwasya alubo kulabotezya kwiinda kupegwa. (Bala Tusimpi 29:21, NW.) Tulakonzya kuyeeya atala amwana uwulila bazyali bakwe chipo nikuba kuti mbabo bakamupede mali. Bazyali balachilumba chipo eecho. Bana bali mumulimu wachiindi choonse balakonzya kugwasya bazyali babo kwiinda mukubapa kamali. Nikuba kuti bazyali tabalangilili kuti bajane mali kubana babo pesi balachitambula chipo eecho nkaambo balizi kuti ninzila bana babo njibatondeezya kuti balabalumba. Jehova ulizi kuti tulabotelwa kuti twamupa zintu nzitulaazyo.

MBUBAKALI KUPA BANTU CHIINDI

7, 8. Bakombi baJehova bachiindi, bakatusiila chikozyano chilibiyeni chakupa zipo (a) nikwakali kuyanda kuyakwa (b) zigwasilizya bantu bakwe?

7 Magwalo atondeezya chaantanganana kuti kupa zipo kulayandikana. Chimwi chiindi, bakombi baJehova bakali kupa zipo kuti kakuyanda kuchitwa chimwi chintu. Muchikozyano, Musa wakabuzya bantu kuti bape zipo nibakali kuyanda kuyaka tente lyakukombela alubo Davida wakabuzya bantu kuti bape zipo nibakali kuyanda kuyaka tempele. (Kul. 35:5; 1 Mak. 29:5-9) Kuchiindi chaMwaami Jehowasi, bapayizi  bakabelesya mali yakapedwe kuti babambulule ng’anda yaJehova. (2 Bam. 12:4, 5) Nikwakaba nzala, maKristu bakusaanguna bakabamba “umwi umwi kulubono lwakwe, bakasoleka kutumina cakugwasya kulibabunyina abakali mu-Judaya.”​—Inc. 11:27-30.

8 Chimwi chiindi, bakombi baJehova bakali kupa zipo kuti bagwasilizye bantu bakali kubazulwida. MuMulawu waMusa maLevi teebakali kupegwa lukono pe. Aboobo, maIsrayeli bakali kugwisya chakkumi kuti bagwasye maLevi kuti biinkilile kunembo amulimu wabo kutente lyakukombela. (My. 18:21) Alubo bamwi banakazi bakagwasya Jesu abasikwiiya bakwe kwiinda ‘mukubalela alubono lwabo.’​—Lk. 8:1-3.

9. Bakombi bachiindi, bakali kuzijana kuli zintu nzibakali kupa?

9 Zintu nzibakali kupa bakombi bachiindi bakali kuzijana munzila zisiyene-siyene. Nibakali kupa zipo zyakuti kuyakwe tente lyakukombela, maIsrayeli bakapa zintu nzibakazaazyo kuEgepita. (Kul. 3:21, 22; 35:22-24) Mumwaanda wamunyaka wakusaanguna, bamwi maKristu bakuuzya myuunda amaanda mpawo bakapa baapostolo mali njibakajana. Baapostolo bakapa bantu bakali kuyanda lugwasyo mali eeyo. (Inc. 4:34, 35) Bamwi bakali kubikka kumbali mali yakusanga. (1 Kor. 16:2) Eezi zyakapa kuti bafwaba abanotede bakonzye kusanga.​—Lk. 21:1-4.

MBUTUKONZYA KUPA MAZUBAANO

10, 11. (a) Kujana twachita biyeni kuti tube baabi mbuuli bakombi baJehova bachiindi? (b) Ulimvwa biyeni akaambo kachilongezyo chakugwasilizya mulimu waBwaami?

10 Mazubaano, tulakonzya kukumbilwa kuti tupe zipo zyakugwasilizya kuti kuchitwe umwi mulimu. Muchikozyano, tulakonzya kukumbilwa kuti tupe zipo zyakugwasilizya kuti kuyakwe Ng’anda yaBwaami naakuti ibambululwe. Chimwi chiindi tulakonzya kukumbilwa kuti tupe zipo zyakugwasilizya kubambulula wofesi yamutabi, kubamba muswaangano wabbooma nikuba kugwasilizya bakombima bachitikilwa amapenzi aalichitikila. Zipo nzitupa zigwasilizya bantu babelekela kuBbeteli akumawofesi mapati. Zimwi zigwasilizya mamishinali, mapayona aachiindi choonse abalangizi bamabazu. Alubo mbungano imwi ayimwi ipa zipo zigwasilizya kuyaka Maanda aaBwaami aMaanda Aakuchitila Miswaangano Mipati.

11 Toonse tulakonzya kupa zipo zyakugwasilizya mulimu uuchitwa munyika yoonse. Zimwi zipo tuzipa kakutakwe muntu uutubwene. Tulakonzya kusanga katubelesya tubbokesi twakusanga tuli muMaanda aaBwaami. Chimwi chiindi tulakonzya kubonaanga mali njitusanga ninche. Mulonga uzula abuyobo-yobo nkinkaako mali nyingi iijanwa mumbunga izwa kubantu basanga mali nche. Bamwi bakwesu balafwaba pesi bachita mbuuli maKristu bakuMakkedoniya bakakumbila chamoyo woonse kuti bape zipo nikuba kuti bakali “mubucete bunji.”​—2 Kor. 8:1-4.

12. Zipo nzitusanga zibelesegwa biyeni mumbunga yesu?

12 BamuKabunga Keendelezya balakomba kuti Jehova abagwasye kuti babelesye zipo nzitupa munzila yakusyomeka ayakuchenjela. (Mt. 24:45) Zipo nzitupa zilalangwa-langwa mbuzikonzya kubelesegwa kabotu. (Lk. 14: 28) Chiindi, bantu bakapedwe mulimu wakujata mali bakali kuba achoonzyo chakuti balikwiibelesezya kuzintu ziyandikana. Muchikozyano, Ezra naakali kubweeda kuJerusalemu mwaami waPersiya wakamupa ngolida, nsiliva azimwi zintu zyakali kusika mali yiinda ku$100 miliyoni (U.S.). Ezra wakabona zipo eezi mbuuli kuti zyapegwa Jehova, nkinkaako wakabikka bubambe bwakuti zipo eezi zibambwe kabotu akuti zikwabililwe chiindi nibakali mulweendo. (Ezr. 8:24-34) Mwaapostolo Pawulu wakakumbila maKristu bakuKkorinto kuti basange mali yakugwasilizya bakombinyina bakuJudaya. Alubo wakaba achoonzyo chakuti aabo bakali kulangania zipo eezyo bakachita “zibotu koonse koonse, nikuba kumeso aa-Mwami nikuba kumeso aabantu.” (Bala 2 BaKorinto 8:18-21.) Mazubaano, mbunga ibelesya mali iisangwa munzila iilikabotu mbuuli zyakachitwa aEzra aPawulu.

13. Tweelede kukubona biyeni kuchesya milimu nkuyakachita mbunga?

13 Kuti mpuli kiiyanda kuyungizya mulimu wabo mukubelekela Jehova, balakonzya kulanga-langa mbubakonzya kuchesya zintu nzibawula kuti bapone buumi buuba. Nzizyo zyakachitwa ambunga yaJehova. Minyaka yakiinda kwakali zintu zyiingi zyakali kuyanda kuchitwa. Eezi zyakapa kuti kubelesegwe mali nyingi yiinda njitwakali kujana. Nkinkaako, mbunga yakalanga-langa mbiikonzya kuchesya milimu kuti mali iisangwa ibelesegwe munzila iilikabotu.

MBUZIBELESEGWA ZIPO

Zipo zyesu zigwasilizya mulimu uliikuchitwa munyika yoonse (Langa fuka 14-16)

14-16. (a) Njiili milimu iliikuchitwa ambunga kakubelesegwa zipo? (b) Alubo milimu eeyi ikugwasya biyeni?

14 Bamwi baba aachiindi kabali Bakamboni, bakabona kuti mazubaano kuli zintu zyiingi loko zitugwasya mubukombi. Tulakonzya kuyeeya atala ajw.org apulogilamu yaJW Broadcasting. Alubo Bbayibbele lyaNew World Translation of the Holy Scriptures lilikusandululwa mumilaka myiingi loko. Kuzwa mu2014 amu2015, kwakachitwa Muswaangano Wazisi Zisiyene-siyene munyika zili 14, wakali amutwe uti “Keep Seeking First God’s Kingdom!” Bantu bakanjila muswaangano ooyu bakabotelwa loko.

 15 Bantu biingi batondeezya kulumba kuzintu nzitulikuchitilwa ambunga yaJehova. Muchikozyano, imwi mpuli iikkala kuAsia yakali kulumba pulogilamu yaJW Broadcasting. Bakati: “Tubelekela mukadolopo kaniini. Chimwi chiindi ngatwabonaanga tulibache alubo eezi zitupa kuti tulube kuti mulimu ooyu uliikuchitwa munyika yoonse. Pesi kweebela pulogilamu yaJW Broadcasting kutugwasya kubona kuti tubelekelaamwi abakombima bamunyika yoonse. Bakwesu abachizi bamuchilawu mutukkala baliiyanda pulogilamu eeyi. Bamwi baamba kuti kweebela Broadcasting kupa kuti babazibe kabotu bamuKabunga Keendelezya. Balalidunda akaambo kakuba mumbunga yaJehova.”

16 Munyika yoonse kuli Maanda aaBwaami aali 2 500 alikuyakwa akubambululwa. Bakwesu bakuHonduras nibakasaanguna kubelesya Ng’anda yaBwaami mpya bakaamba kuti: “Nchilongezyo chipati loko kuba mumbunga yaJehova ilaabakwesu abachizi bakatugwasya kuti tube aaNg’anda yaBwaami muchilawu chesu.” Bantu biingi balabotelwa nibajana Bbayibbele aamwi mabbuku ambunga mumulaka wabo, anibagwasigwa kuti bachitikilwa amapenzi aalichitikila alubo bamwi balabotelwa kuti bajana bantu baswiilila nibakambawukila mumasena mujanika bantu biingi naakuti mubukambawusi bwaantanganana.

17. Zintu zichitwa ambunga zitondeezya biyeni kuti tulikugwasigwa aaJehova?

17 Bantu biingi tabazimvwisisisyi pe kuti tuzwidilila biyeni kuchita milimu yoonse eeyi katubelesya zipo zyakuliyandila. Umwi mupati wakkampani naakaswaya imwi wofesi yamutabi iidinda mabbuku wakagamba naakamvwa kuti bantu babelekela mpawo tababbadalwi pe, kubelesegwa zipo zyakuliyandila akuti mabbuku aadindwa tawuzigwi. Wakati zintu nzibakali kuchita tazikonzeki pe. Nzyakali kwaamba nichoonzyo, nkaambo Jehova nguwe ulikutugwasya kuti tuzwidilile kuchita milimu eeyi.​—Job. 42:2.

KUPA JEHOVA KWEETA ZILONGEZYO

18. (a) Nziizili zilongezyo nzitujana kuti twapa zipo zigwasilizya mulimu waBwaami? (b) Kujana twabayiisya biyeni bana abapya mukasimpe kuti babe baabi?

18 Jehova utondeezya kuti ulatulemeka kwiinda mukutuzumizya kuti tugwasilizye milimu iliikuchitwa mumbunga yakwe. Alubo utusyomezya kuti tuyoojana zilongezyo kuti twagwasilizya mulimu waBwaami. (Malk. 3:10, NW) Bbayibbele lyaamba kuti muntu mwaabi uyoozwidilila. (Bala Tusimpi 11:24, 25.) Alubo Bbayibbele lyaamba kuti, “kupa kulakkomanisya kapati kwiinda kupegwa.” (Inc. 20:35, NW) Nkinkaako, zintu nzitwaambuula anzituchita zilakonzya kuyiisya bana abapya mukasimpe kuti babe baabi akuti bajane zilongezyo zyeetwa aakupa.

19. Chiiyo eechi chakugwasya biyeni?

19 Zintu zyoonse nzitulaazyo zyakazwa kuli Jehova. Kumupa zipo kutondeezya kuti tulamuyanda akuti tulamulumba. (1 Mak. 29:17) Chiindi maIsrayeli nibakapa zipo zyakugwasilizya kuyaka tempele, “bantu bakasekelela nkaambo kazipo izyakaletwa, nkaambo bakali kupa Jehova camoyo woonse.” (1 Mak. 29:9) Kuti twiinkilila kunembo kupa Jehova zintu nzitulaazyo, tuyoobotelwa.