Skip to content

Skip to table of contents

“Ulakatalusya Bakatede”

“Ulakatalusya Bakatede”

Lugwalo lwamunyaka wa2018: ‘Aabo babikkide myoyo yabo kuli Jehova nguzu zyabo ziyoobusilizigwa.’​—IS. 40:31.

NYIMBO: 3, 47

1. Ngaali mapenzi ngituswaana alubo niinzi chipa kuti Jehova abotelwe akaambo kabakombi bakwe basyomeka? (Langa chifanikisyo chili kumatalikilo achiiyo.)

BUUMI munyika buvulide mapenzi. Bakwesu abachizi biingi balachiswa. Bamwi nikuba kuti bakomena pesi bachilangania nzubo zyabo zyakachembaala. Bamwi balikubeleka changuzu kuti basanine mpuli zyabo. Alubo bamwi balakonzya kuti basikilwa amapenzi asiyene-siyene muchiindi chomwe. Eezi zyaamba kuti mubeleka changuzu kuyanduula mali kuti mujane ziyandikana akuti mukonzye kulisilisya. Nikuba boobo, mulazumanana kusyomeka kuli Leza alubo muli abulangilizi muzisyomezyo zyakwe. Nzimuchita zilamubotezya Jehova.

2. Lugwalo lwaIsaya 40:29 lutusungwaazya biyeni pesi njiili miyeeyo njituteelede kubaayo?

2 Kuli nunga wamana manguzu na akaambo kabuyumu-yumu mbuswaana? Kuti kakuli boobo tuli awulikke pe. Bbayibbele litondeezya kuti, nikuba bakombi baJehova bachiindi bakali kulimvwa munzila eeyi. (1 Bam. 19:4; Job. 7:7) Pesi bakalangilila kuli Jehova kuti abape manguzu. Alubo wakabagwasya nkaambo Bbayibbele lyaamba kuti, “batakwe inguzu ulabayumya.” (Is. 40:29) Pesi chuusisya nchakuti,  bamwi bakombi baJehova mazubaano bakasala ‘kusiya kukomba Jehova’ nkaambo bakalimvwa kuti kulaminia kutali kuti nchilongezyo. Nkinkaako bakachita ziyandwa aSaatani kuleka kubala Bbayibbele, kunjila miswaangano akukambawuka.

3. (a) Kujana twachita biyeni kuti tuzunde Saatani? (b) Tuyoolanga-langaanzi muchiiyo eechi?

3 Dyabbulosi ulizi kuti kubeleka changuzu mumilimu yabukombi kulatusimya, nkinkaako tayandi kuti tukkale katusimide. Chiindi nimulimvwa kamutakwe manguzu akaambo kabuyumu-yumu, tamweelede kuleka kubelekela Jehova. Mweelede kuswena kuli nguwe nkaambo “ulamupa inguzu akumuzyatika.” (1 Pet. 5:10; Jak. 4:8) Muchiiyo eechi, tuyoolanga-langa zintu zikonzya kupa kuti tuleke kubelekela Leza alubo tuyoobona kuti malayilile aamuBbayibbele atugwasya biyeni kuti tuzunde mapenzi aaya. Pesi lino atulange-lange mbulukonzya kutugwasya lugwalo lwaIsaya 40:26-31 kubona nzila Jehova njatusimyaayo.

AABO BABIKKIDE MYOYO YABO KULI JEHOVA NGUZU ZYABO ZIYOOBUSILIZIGWA

4. Nziizili zyiiyo nzitujana muli Isaya 40:26?

4 Bala Isaya 40:26. Taakwe muntu uukonzya kubala nyenyeezi. Basayensi bayeeyela kuti Kkondo Lyabasimpongo lili anyenyeezi zisika ku400 bbiliyoni. Pesi Jehova uzyiita amazina zyoonse. Eezi zituyiisyaanzi? Kuti Jehova kabikkila maanu zilenge zyakwe zitaponi, zili antanganana kuti ulababikkila maanu bakombi bakwe bamubelekela. (Int. 19:1, 3, 14) Ndeende wesu ulizizi zintu zitukataazya. Bbayibbele lyaamba kuti: “Masusu aali amitwe yanu alibalidwe oonse.” (Mt. 10:30) Alubo sintembawuzyo wakaamba kuti: ‘Jehova ulaazi mazuba abantu batakwe kampenda.’ (Int. 37:18) Ulabubona buyumu-yumu mbutuswaana alubo ulakonzya kutupa manguzu aakuti tubuzunde.

5. Niinzi chitupa kuba achoonzyo chakuti Jehova ulakonzya kutusimya?

5 Bala Isaya 40:28. Jehova Nkasensa kamanguzu. Muchikozyano, atulange manguzu ngaakabikka kuzuba. Umwi sikulanga-langa makani aasayensi uutegwa David Bodanis wakapandulula kuti: “Nzila njilipyaayo Zuba musekkondi iimwi kukozyanisigwa akudubuka kwamabbomba miingi.” Alubo umwi sikulanga-langa zyasayensi wakayungizya kuti: “Musekkondi iimwi zuba ligwisya kupya kukonzya kubelesegwa abantu kwaminyaka iili 200 000!” Muntu uupa kuti zuba lipye munzila eeyi, kujana wakachilwa na kutupa manguzu aakuti tulisimye chiindi nituli mumapenzi?

6. Kuziba kuti jokwe lyaJesu lilatulemununa kutugwasya biyeni?

6 Bala Isaya 40:29. Kubelekela Jehova kupa kuti tubotelwe. Jesu wakabuzya basikwiiya bakwe kuti: “Amulikulike ijokwe lyangu.” Mpawo wakayungizya kuti: ‘Mulakatulukwa mumyoyo yanu, nkaambo ijokwe lyangu talilemi awalo mukuli wangu muuba.’ (Mt. 11:28-30) Majwi aaya ngachoonzyo! Chimwi chiindi tulakonzya kulimvwa katukatede nituya kumiswaangano naakuti kukukambawuka. Pesi ngatwalimvwa biyeni nitwaboola? Ngatwalimvwa katusimide zyakuti ngatwalibambila kulwana buyumu-yumu mbutuli aabo. Nisimpe kuti jokwe lyaJesu lilatulemununa!

7. Amba chikozyano chitondeezya kuti majwi aali mulugwalo lwaMatayo 11:28-30 ngachoonzyo?

7 Umwi muchizi ngututiite kuti Kayla  wakali kuchiswa bulwazi bwakumana manguzu, wakali kukataazikana mumizeezo alubo wakali kuchiswa mutwe uutaponi pe. Eezi zyakali kupa kuti chimwi chiindi akachilwe kuya kumiswaangano yambungano. Nikuba boobo, chiindi naakiinka kuli umwi muswaangano wakaamba kuti: “Nkani yakali kwaambuula atala akumana manguzu. Mukwesu wakali kupa nkani eeyi wakaambuula munzila yakubikkila maanu, eezi zyakandipa kuti ndilile. Zyakandiyeezya kuti tandeelede kuleka pe kuya kumiswaangano.” Eezi zyakamubotezya loko muchizi ooyu nkaambo wakaliwo amuswaangano ooyo.

8, 9. Mwaapostolo Pawulu wakali kwaambaanzi naakalemba kuti: ‘Chiindi ninditaakwe nguzu, nchechiindi nindijisi nguzu’?

8 Bala Isaya 40:30. Nikuba kuti twaba achiindi chilamfu katuli mukasimpe pesi kuli zintu nzitutakonzyi kuchita amanguzu eesu. Toonse tweelede kuziba makani aaya. Mwaapostolo Pawulu wakalisimide muzintu zyabukombi pesi kuli zintu nzyaakali kukachilwa kuchita. Naakabuzya Leza zyakali kumukataazya, Leza wakamusandula kuti: ‘Inguzu zyangu zilalondolwa mukubula kwako nguzu.’ Pawulu wakaamvwisisisya majwi aaya mpawo wakaamba kuti: ‘Chiindi ninditakwe nguzu, nchechiindi nindijisi nguzu.’ (2 Kor. 12:7-10) Wakali kwaambaanzi mumajwi aaya?

9 Pawulu wakabona kuti taakali kukonzya kuchita zintu zyiingi kuti taagwasigwa aLeza. Muuya uusalala waLeza wakali kukonzya kumupa manguzu. Alubo muuya uusalala wakapa kuti Pawulu akonzye kuchita zintu nzyaatakali kukonzya kuchita amanguzu aakwe. Mbukubede akulindiswe. Manguzu ngatupa Jehova ayoopa kuti tusime!

10. Jehova wakamugwasya biyeni Davida kuti alwane buyumu-yumu mbwaakaswaana?

10 Sintembawuzyo Davida wakabona muuya uusalala mbuwakamugwasya mubuumi bwakwe. Wakalemba kuti: “Kulugwasyo lwako ndakonzya kulwisya impi, kulugwasyo lwa-Leza wangu ndakonzya kusotoka bulambo.” (Int. 18:29) Amwi mapenzi tatukonzyi kwaazunda kuti teetwagwasigwa aJehova.

11. Pandulula mbuukonzya kutugwasya muuya uusalala kuti tulwane mapenzi ngituswaana.

11 Bala Isaya 40:31. Gumbe nilyuuluka talibelesyi manguzu aalyo luzutu. Muuya uukasala upa kuti lijane manguzu akuuluka. Nkinkaako, kuti waswaana buyumu-yumu bukumana manguzu weelede kuyeeya zichitika kugumbe. Weelede kukumbila Jehova kuti akupe ‘Mugwasyi, Muuya Uusalala.’ (Joh. 14:26) Chibotezya nchakuti tulakonzya kumukumbila kuti atugwasye kufumbwa chiindi. Alubo kulayandikana kuti tukumbile lugwasyo chiindi nitwatamvwanana amukombima. Nkamboonzi chimwi chiindi nitukonzya kutamvwanana abamwi mumbungano?

12, 13. (a) Nkamboonzi chimwi chiindi maKristu nibakonzya kutamvwanana? (b) Zyakachitika kuli Josefa zituyiisyaanzi atala aJehova?

12 Tulakonzya kutamvwanana abamwi akaambo kakuti tatumaninide pe. Nkinkaako, zimwi ziindi tulakonzya kwaambuula nikuba kuchita zintu zibanyemya naakuti abalabo balakonzya kuchita zintu zitunyemya. Eezi zilakonzya kusunka lusyomo lwesu. Pesi Jehova ulaazumizya masunko aaliboobu kuti tutondeezye kuti tulasyomeka kulinguwe kwiinda mukubelekelaamwi abakwesu nikuba kabatamaninide pe.

Jehova wakagwasya Josefa alubo uyookugwasya anduwe (Langa fuka 13)

13 Zyakachitika kuli Josefa zitondeezya kuti Jehova ulaazumizya masunko kuti atuchitikile. Kachili muniini, Josefa wakuuzigwa abakulana bakwe mpawo  wakatolwa kubuzike kuEgepita. (Matl. 37:28) Jehova wakali kububona buyumu-yumu mbwaakali kuswaana Josefa alubo eezi zyakali kumuchisa. Nikuba boobo, taakanjilila pe munkani yakwe. Chiindi Josefa nakabikkwa muntolongo akaambo kakutamikizigwa kuti wakali kuyanda kuvumpila mukayintu waPotifara, Jehova wakazibona alubo taakanjilila pe. Jehova wakamulekelezya na Josefa? Peepe, nkaambo Bbayibbele lyaamba kuti: “Jehova wakali awe [Josefa] azintu zyoonse nzyaakacita, Jehova wakazibotezya.”​—Matl. 39:21-23.

14. ‘Kuleka’ kunyema kutugwasya biyeni?

14 Atulange-lange chimwi chikozyano. Mbache bantu baswaana buyumu-yumu buli mbuuli bwaDavida. Davida taakazumizya kuti zintu zibi nzyaakali kuchitilwa zimunyonganie. Nikuba boobo, wakalemba kuti: “Leka kunyema, sowa bukali. Utalipenzyi, nkaambo kulaleta bubi buyo.” (Int. 37:8) Kaambo kapa kuti ‘tutanyemeni’ bakwesu nkakuti tuyanda kutobelezya Jehova ‘utatuchitili mbuuli zibi zyesu.’ (Int. 103:10) Alubo kuli zimwi zintu zitondeezya kuti ‘kutanyema’ kulagwasya. Kunyema-nyema kupa kuti tube amalwazi aali mbuuli BP akutayoya kabotu. Kulakonzya kupa kuti chini akalambalala zitabeleki kabotu akuti chakulya chitagayigwi kabotu mwida. Alubo kuti muntu kanyemede takonzyi pe kuyeeya kabotu. Eezi zilakonzya kupa kuti muntu alimvwe kakataazikene mumizeezo. Kusiyana azeezi, Bbayibbele lyaamba kuti: “Moyo uukede ulaponya mubili.” (Tus. 14:30) Kujana twachita biyeni kuti bamwi batubisizya? Tweelede kubelesya malayilile aamuBbayibbele.

CHIINDI MUKOMBIMA NAATUBISIZYA

15, 16. Tweelede kuchita biyeni kuti umwi watubisizya?

15 Bala BaEfeso 4:26. Kuti bantu bamunyika batujata bubi, nkuuba kuti tubalekelele. Pesi kuti mukombima naakuti wamumpuli watubisizya zilakonzya kutuyumina kumulekelela. Chimwi chiindi kulakonzya kutuyumina kuluba zyakachitika. Kujana twakkala katumunyemenede na kwaminyaka myiingi naakuti tuyootobela malayilile aamuBbayibbele aakubamba makani chakufwambaana? Kuti twaleka kubambulula kutamvwanana chakufwambaana, kuyootuyumina kuti tube aaluumuno abakwesu.

16 Atuti umwi mumbungano wakubisizya mpawo wabona kuti zilikukuyumina kuti umulekelele. Kujana wachita biyeni kuti mube aaluumuno? Weelede kukomba kuli Jehova chamoyo woonse, kulikukumbila kuti akugwasye kuti ukonzye  kwaambuulaawe munzila iilikabotu. Weelede kuyeeya kuti alakwe mukombi waJehova. (Int. 25:14) Leza ulamuyanda. Jehova ubafwida luzyalo beenzinyina alubo uyanda kuti andiswe tuchite oobo. (Tus. 15:23; Mt. 7:12; Kol. 4:6) Kuzwa waawo, yeeyesesya nzutakaambe. Utalibuzyi kuti mukombinyokwe wakakubisizya aachaali. Libuzye kuti amwi kuli chimwi chintu nchwaakachita chakapa kuti mutamvwanani. Ulakonzya kwaamba kuti, “Amwi ndilafwambaana kunyema pesi zintu nzwakaamba jilo zyakapa kuti ndilimvwe . . .” Kuti teemwamvwanana, yanduula chimwi chiindi chakuti muzoowambuuzyanie. Pesi utaleki pe kukomba kuli Jehova kukumbila kuti amugwasye muzintu nzyachita. Kumbila Leza kuti akugwasye kubona bube bubotu mbwali aabo mukombinyokwe. Kufumbwa zitachitike, baachoonzyo chakuti Jehova uyoobotelwa, nkaambo wabeleka changuzu kuti mube aaluumuno amukombinyokwe.

KUKATAAZIKANA AKAAMBO KAZINTU ZIBI NZITWAKACHITA CHIINDI

17. Jehova utugwasya biyeni kuti twachita chibi chipati alubo nkamboonzi nitweelede kutambula lugwasyo ndwatupa?

17 Bamwi balimvwa kabateeleli pe kuti babelekele Jehova akaambo kazibi zipati nzibakachita. Kulipa mulandu kulakonzya kutukataazya. Mwaami Davida wakali kukataazikana azibi nzyaakachita chiindi, wakalemba kuti: “Nindakaumwide buyo, mubili wangu wakali kuya bumana, ndakali kutongela buzuba boonse. Nkaambo isikati amasiku ijanza lyako lyakandilemena.” Davida wakalizunda biyeni penzi eeli? Wakalemba kuti: “Ndakalyaambawida cibi cangu kulinduwe. . . Nkabela wakandilekelela mulandu wazibi zyangu.” (Int. 32:3-5) Kuti wakachita chibi chipati, Jehova ulakonzya kukugwasya. Weelede kuyanduula lugwasyo ndwapa kabelesya mbungano. (Tus. 24:16; Jak. 5:13-15) Weelede kufwambaana kubweza ntaamu nkaambo zyaamba buumi bwako. Pesi weelede kuchita biyeni kuti kukkala kulipa mulandu nikuba kuti wakalekelelwa chiindi?

18. Chikozyano chaPawulu, kujana chabagwasya biyeni bantu balimvwa kabateeleli kukomba Jehova akaambo kazintu zibi nzibakachita?

18 Chimwi chiindi, mwaapostolo Pawulu wakali kulipa mulandu akaambo kazibi nzyaakachita. Wakaamba kuti: “Ime ndimuniini wabo baapostolo boonse, nseeledwe izina lyabaapostolo, nkaambo ndakapenzya imbungano ya-Leza.” Nikuba boobo, Pawulu wakayungizya kuti: “Pele luzyalo lwa-Leza ndulwakandicita mbumbede.” (1 Kor. 15:9, 10) Jehova wakali kumuyanda nikuba kuti wakachita zibi alubo Leza wakali kuyanda kuti Pawulu azibe kuti ulamuyanda. Mbukunga Jehova ulalekelela, nkinkaako kuti kuli wakaleka chachoonzyo kuchita zintu zibi weelede kusyoma kuti Jehova wakakulekelela chamoyo woonse!​—Is. 55:6, 7.

19. Lugwalo lwamunyaka wa2018 lutyeni alubo nkamboonzi nilweelela?

19 Mbukunga nyika eeyi yabaafwiifwi kunyonyoonwa, tulangilila kuti mapenzi alavula aalawo. Atusyome kuti Jehova ulakonzya kutusimya kuti twiinkilile kunembo katumukomba nkaambo “ulakatalusya bakatede, abaabo batakwe inguzu ulabayumya.” (Is. 40:29; Int. 55:22; 68:19) Mumunyaka wa2018, tuyooyeezegwa atala akasimpe aaka chiindi nitunjila miswaangano muNg’anda yaBwaami. Majwi akasimpe aako alimulugwalo lwamunyaka luti: ‘Aabo babikkide myoyo yabo kuli Jehova nguzu zyabo ziyoobusilizigwa.’​Is. 40:31.