Skip to content

Skip to table of contents

Swiilila Akuba Alusyomo Mbuuli Nowa, Daniyele aJobu

Swiilila Akuba Alusyomo Mbuuli Nowa, Daniyele aJobu

‘Nowa, Daniyele aJobu, . . bakalivuna akaambo kabululami bwabo.’—EZK. 14:14.

NYIMBO: 89119

1, 2. (a) Nkamboonzi nitweelede kutobelezya chikozyano chaNowa, Daniyele aJobu? (b) Niinzi zyakali kuchitika Ezekkiyele naakalemba majwi aali muli Ezekiele 14:14?

ULIKUSWAANA mapenzi aali mbuuli kuchiswa, kubula mali naakuti kupenzegwa na? Ngawalimvwa kutabotelwi na mukubelekela Jehova? Kuti kakuli boobo, chikozyano chaNowa, Daniyele aJobu chilakonzya kukugwasya. Teebakamaninide pe mbuuli ndiswe alubo bakaswaana mapenzi ngituswaana. Nikuba boobo, bakazumanana kusyomeka kuli Jehova alubo bakatusiila chikozyano chilikabotu.—Bala Ezekiele 14:12-14.

2 Ezekkiyeli wakalemba majwi aali mulugwalo luzulwida chiiyo chesu kali kuBbabbiloni mumunyaka wa612 B.C.E. *  (Ezk. 1:1; 8:1) Muunzi waJerusalemu wakali waba afwiifwi kunyonyoonwa. Bantu bache bakali alusyomo luli mbuuli lwaNowa, Daniyele aJobu mbabo bakali achitondeezyo chakuti bakali kuyoofutuka. (Ezk. 9:1-5) Bamwi bakali kusyomeka nguJeremiya, Bbarukki, Ebbedi-melekki amaRekkabbu.

3. Tuyooyiyaanzi muchiiyo eechi?

3 Yaakunyonyoonwa nyika eeyi, bantu bayoofutuka mbaabo balaalusyomo mbuuli Nowa, Daniyele aJobu. (Ciy. 7:9, 14) Atulange-lange kuti nkamboonzi baalumi aaba nibali zikozyano zilikabotu zyakusyomeka. Alubo tuyoolanga-langa (1) mapenzi ngibakaswaana (2) ambutukonzya kutobelezya zikozyano zyabo.

NOWA WAKASWIILILA AKUTONDEEZYA LUSYOMO KWAMINYAKA IILI 900

4, 5. Ngaali mapenzi ngaakaswaana Nowa alubo nkamboonzi kulisimya kwakwe nikutubotezya?

4 Mapenzi ngaakaswaana Nowa. Muchiindi chaInokki bantu bakali kuchita zintu zibi loko aanyika. Bakali kwaambuula ‘majwi aakusampawula’ Jehova. (Jud 14, 15) Kwakavulide kulwana. Mumazuba aaNowa “nyika yakazula luuni.” Bangelo babi bakalichincha akuba bantu mpawo bakakwata banakazi, bakazyala mabbabbani bakalaalunya. (Matl. 6:2-4, 11, 12) Pesi Nowa wakalisiyene abantu aabo. Bbayibbele lyaamba kuti: “Nowa wakafwidwa luzyalo mumeso aa-Jehova. . . . Nowa wakali muntu uululeme, katajisi kampenda, akati kabasaanyina. Nowa wakali kweenda a-Leza.”—Matl. 6:8, 9.

5 Atubone kuti majwi aaya atondeezyaanzi atala aNowa. Kakutanachitika Zambangulwe, Nowa wakeenda aaLeza kutali kwaminyaka iili 70 naakuti 80 njitupona mazubaano pesi kwaminyaka iisika ku600! (Matl. 7:11) Kusiyana andiswe, taakalikwe bakombinyina naakuti bamumpuli bakali kukonzya kumusimya. *

6. Nowa wakatondeezya biyeni kuti taakali kuyoowa?

6 Nikuba kuti Nowa wakalibukkede pesi wakali “mukambausi wabululami.” Eezi zitondeezya kuti wakali alusyomo lusimide kuli Jehova. (2 Pet. 2:5) Mwaapostolo Pawulu wakaamba kuti Nowa “wakiisampaula inyika” akaambo kalusyomo ndwaakalaalo. (Heb. 11:7) Zilaantanganana kuti bantu bakali kumuseka akumukazya alubo zilakonzeka kuti bamwi bakali kuyanda kumuuma. Nikuba boobo, ‘taakayoowa bantu’ pe. (Tus. 29:25) Jehova wakamusimya mbuuli mbachita kubakombi bakwe basyomeka.

7. Ngaali mapenzi ngaakaswaana Nowa naakali kuyaka bwaato?

7 Nikwakiinda minyaka iili 500 Nowa kalikweenda aaLeza, Jehova wakamubuzya kuti ayake bwaato bwakali kuyoofutula bantu abanyama. (Matl. 5:32; 6:14) Nikuba kuti mulimu ooyu wakali muyumu alubo kuuchita kwakamweetela mapenzi aambi! Bantu bakali kumuseka akumukazya. Pesi Nowa wakaswiilila Leza. Bbayibbele lyaamba kuti: “Wakacita obo.”—Matl. 6:22.

8. Nowa wakatondeezya biyeni kuti wakali kusyoma kuti Jehova Mugwasilizi wakwe?

8 Limwi penzi ndyaakali aalyo Nowa ndyakusanina mpuli yakwe. Zambangulwe kalitanachitika bantu bakali kubeleka changuzu kuti bajane chakulya alubo Nowa mbaakali kuchita alakwe. (Matl. 5:28, 29) Nikuba boobo wakabikka Leza mubusena bwakusaanguna kutali zintu zyakumubili. Alubo kwaminyaka iili 40 naakuti 50 njaakabeleka  kalikuyaka bwaato, wakiinkilila kunembo kabikka zintu zyabukombi mubusena bwakusaanguna. Nikuba Zambangulwe nilyakiinda, wakiinkilila kunembo kachita oobo kwaminyaka iili 350. (Matl. 9:28) Nisimpe kuti Nowa wakatusiila chikozyano chilikabotu chakuswiilila akusyomeka.

9, 10. (a) Kujana twachitobelezya biyeni chikozyano chaNowa? (b) Jehova ubabona biyeni bantu bakakatila kuzyeelelo zyakwe?

9 Kujana twachitobelezya biyeni chikozyano chaNowa? Tulakonzya kuchita oobo kwiinda mukukakatila kubululami bwaLeza, kutatola lubazu mutwaambo twanyika akubikka Bwaami bwaLeza mubusena bwakusaanguna. (Mt. 6:33; Joh. 15:19) Nzila njituponaayo ipa kuti bantu batatuyandi. Tulizi kuti kukakatila kumilawu yaLeza iili atala alukwatano amakani azyakoonana kupa kuti bantu batutantamuke. (Bala Malaki 3:17, 18.) Pesi tutobelezya chikozyano chaNowa chakuyoowa Jehova kutali bantu. Jehova nguwe luzutu uukonzya kutupa buumi butamani.—Lk. 12:4, 5.

10 Pesi kutegwani anduwe kukugama? Uyooyinkilila kunembo na ‘kuyenda aaLeza’ nikuba bamwi kabakuseka, kabakufubaazya naakuti waswaana penzi lyakubula mali? Weelede kuba achoonzyo chakuti Jehova uyookugwasya mbuuli mbaakachita kuli Nowa.—Flp. 4:6, 7.

DANIYELE WAKASWIILILA AKUSYOMEKA MUCHISI CHAKAZWIDE BUBI

11. Ngaali mapenzi Daniyele abeenzinyina ngibakaswaana nibakali kuBbabbiloni? (Langa chifanikisyo chili kumatalikilo achiiyo.)

11 Mapenzi ngaakaswaana Daniyele. Daniyele wakali muzike kuBbabbiloni, bantu bamuchisi eechi bakali kukomba baleza bakubeja akuchita zintu zyachidimoni. Kuyungizya waawo, bantu bakuBbabbiloni bakali kubalangilaansi maJuda alubo bakali kubasampawula aLeza wabo Jehova. (Int. 137:1, 3) Eezi zyakali kubachisa maJuda bakali kusyomeka mbuuli Daniyele! Daniyele abeenzinyina batatu Hananiya, Misayeli aAzariya bakali kuyooswaana mapenzi nkaambo bakasalwa kuti babelekele kung’anda yamwaami. Alubo bakabuzigwa kuti bakeelede kuchincha chakulya. Eezi zyakabeetela mapenzi nkaambo Daniyele wakalibeteka kuti ‘atalisofwaazyi azilyo zinono zyamwaami.’—Dan. 1:5-8, 14-17.

12. (a) Mbuubuli bube bubotu Daniyele mbwaakali aabo (b) Jehova wakali kumubona biyeni Daniyele?

12 Limwi penzi ndyaakaswaana Daniyele lyakeetwa akaambo kabusongo mbwaakali aabo, zyakapa kuti apegwe milimu yakuchita kuBbabbiloni. (Dan. 1:19, 20) Nikuba boobo, taakali mumvwa zyakwe pesi wakali kulibombya alubo wakali kulemeka Jehova kwiinda mukuzumina kuti nguwe wakali kumupa busongo. (Dan. 2:30) Chiindi Jehova nakaambuula atala akuti Nowa, Daniyele aJobu bakali kusyomeka, Daniyele wakachili mukubusi. Daniyele wakapa kuti Jehova awuse na? Peepe! Daniyele wakasyomeka kusikila naakafwa. Naakaba aminyaka iili kuma90, mungelo waLeza wakamubuzya kuti: “O Daniele, muntu uuyandwa loko.”—Dan. 10:11.

13. Daniyele wakabagwasya biyeni maJuda?

13 Jehova wakapa kuti Daniyele abe aachuuno chilaajulu kuBbabbiloni akuPersiya. (Dan. 1:21; 6:1, 2) Zilakonzya kuti Jehova wakabelesya Daniyele kuti agwasye bakombi bakwe mbuuli mbaakachita kuli Josefa kuEgepita akuli Esita aModekkayi kuPersiya. * (Dan. 2:48) MaJuda bakali  kubuzike kuswaanizya aEzekkiyele bakasungwaazigwa loko nibakabona nzila Jehova njakabagwasyaayo!

Jehova ulabayanda bantu bazumanana kusyomeka kulinguwe (Langa fuka 14 a15)

14, 15. (a) Buumi mbutupona bukozyenie biyeni abwaDaniyele? (b) Kujana bazyali bayiyaanzi kuzwa kubazyali baDaniyele?

14 Kujana twachitobelezya biyeni chikozyano chaDaniyele? Mazubaano, tukkala aabantu bachita zintu zitali kabotu zisungwaazigwa aaBbabbiloni Mupati “bukalo bwamadaimona.” (Ciy. 18:2) Andiswe tuswaana penzi lyakuti bantu balatuseka akaambo kakuti tatuchiti zintu nzibachita. (Mk. 13:13) Atubeleke changuzu kuti tuswene aafwiifwi aJehova Leza mbuuli Daniyele. Jehova uyootuyanda kuti twalibombya akumusyoma.—Hag. 2:7.

15 Kujana bazyali bayiyaanzi kuzwa kubazyali baDaniyele? Nikuba kuti muchisi chaJuda kwakazwide bantu bakali kuchita zibi pesi Daniyele wakakomena kayanda Jehova. Eezi teezyakalichitikila pe. Zitondeezya kuti bazyali bakwe bakamuyiisya munzila iilikabotu. (Tus. 22:6) Zina lyakuti Daniyele lyaamba kuti ‘Leza Mubetesi Wangu.’ Zina eeli litondeezya kuti bazyali baDaniyele bakali kukomba Leza. (Dan. 1:6) Bazyali tabeelede kukatala pe kuyiisya bana babo pesi beelede kuba amoyo mulamfu. (Ef. 6:4) Alubo mweelede kukomba kamulaamwi. Kuti mwazumanana kubayiisya kasimpe bana banu muyoobagwasya kuti bazoojane zilongezyo zizwa kuli Jehova.—Int. 37:5.

KUNOTA NAAKUTI KUFWABA TEEKWAKAKACHIZYA JOBU KUSWIILILA AKUBA ALUSYOMO

16, 17. Buumi bwaJobu bwakachincha biyeni?

16 Mapenzi ngaakaswaana Jobu. Jobu wakaswaana zyiimo zisiyene-siyene mubuumi bwakwe. Katanachitikilwa mapenzi, Jobu wakali “mupati kwiinda boonse bakali mumanyika aakujwe.” (Job. 1:3) Wakalinotede, wakali zibinkene alubo bantu bakali kumulemeka. (Job. 29:7-16) Nikuba boobo, Jobu taakalisumpula akuyeeya kuti tayandi kugwasigwa aLeza. Jehova wakamwiita kuti “muntu wangu” alubo wakayungizya kuti: “Muntu uutakwe mulandu, uululeme, uulemeka Leza akuyoowa cibi.”—Job. 1:8.

17 Buumi bwaJobu bwakachincha mukulaba kwaliso. Wakaba mufwabi kwiinda bantu boonse nkaambo taakwe nchaakasyala aacho. Wakaswaana mapenzi nkaambo Saatani wakabejelezya Jobu kuti wakali kukomba Leza akaambo kazintu nzyaakalaazyo. (Bala Jobu 1:9, 10.) Jehova wakazumizya  Saatani kuti apenzye Jobu kuti kuboneke kuti Jobu wakali kukomba Jehova kazizwa aansi amoyo.

18. (a) Niinzi chakubotezya atala akusyomeka kwaJobu? (b) Nzila Jehova njakamujataayo Jobu yakatondeezya kuti muntu uuli biyeni?

18 Saatani wakabelesya nzila zisiyene-siyene kuti apenzye Jobu. Eezi zyakapa kuti Jobu ayeeye kuti mapenzi aakwe akali kuzwa kuli Leza. (Job. 1:13-21) Beenzinyina baJobu batatu bakamubuzya majwi aachisa aakuti Leza nguwakali kumusubula. (Job. 2:11; 22:1, 5-10) Nikuba boobo, Jobu wakazumanana kusyomeka kuli Jehova. Nikuba kuti Jobu wakaambuula majwi aatali kabotu pesi Jehova taakamunyemena pe. (Job. 6:1-3) Leza wakabona kuti Jobu wakali kusyomeka nikuba kuti Saatani wakamupenzya azintu zichisa loko. Mukuya kwachiindi, Jehova wakalongezya Jobu azintu ziindulwidwe tubili kuzintu nzyaakalaazyo alubo wakayungizya buumi bwakwe aminyaka iili 140. (Jak. 5:11) Jobu wakazumanana kusyomeka kuli Jehova. Tuzizi biyeni eezi? Ezekkiyele naakalemba majwi aali mulugwalo luzulwida chiiyo chesu, Jobu wakali wafwa chiindi.

19, 20. (a) Kujana twachitobelezya biyeni chikozyano chaJobu? (b) Kujana twatondeezya biyeni kuti tubafwida luzyalo bakwesu?

19 Kujana twachitobelezya biyeni chikozyano chaJobu? Kufumbwa zyiimo nzitukonzya kuswaana, tweelede kukakatila kuli Jehova, kumuswiilila akumusyoma chamoyo woonse. Kusiyana aJobu, mazubaano kuli zintu zyiingi zitugwasya kuti tuswiilile akusyoma Jehova. Muchikozyano, tulizizi zintu nzyabelesya Saatani kuti atweene. (2 Kor. 2:11) Alubo, bbuku lyaJobu lilatugwasya kumvwisisisya kuti nkamboonzi Leza nazumizya mapenzi. Businsimi bwaDaniyele butondeezya kuti Bwaami bwaLeza nimfulumende yakujulu yeendelezegwa aKristu Jesu. (Dan. 7:13, 14) Alubo tulizi kuti lino-lino Bwaami oobu buyoomaninsya mapenzi woonse.

20 Chikozyano chaJobu chituyiisya kuti tweelede kubafwida luzyalo bakwesu balikulisimya mumapenzi asiyene-siyene. Chimwi chiindi bamwi balakonzya kwaambuula majwi aatali kabotu mbuuli mbaakachita Jobu. (Muk. 7:7) Nikuba boobo, tatweelede kubapa mulandu pesi tweelede kubabikkila maanu akubafwida luzyalo. Kuchita oobo kutondeezya kuti tutobelezya chikozyano chaTaateesu, Jehova chakuba aluyando aluzyalo.—Int. 103:8.

JEHOVA “ULAMUPA INGUZU”

21. Majwi aali muli 1 Petro 5:10, akazuzikizigwa biyeni kuli Nowa, Daniyele aJobu?

21 Nikuba kuti Nowa, Daniyele aJobu bakapona muziindi amuzyiimo zisiyene-siyene pesi boonse bakaazunda mapenzi ngibakaswaana. Zintu zyakachitika mubuumi bwabo zitondeezya kuti majwi amwaapostolo Petro ngachoonzyo aakuti: ‘Eno mwamana kupenga kwakayindi, Leza siluzyalo loonse . . , ulamupa nguzu ulamuzyatika akumuyumya-yumya.’—1 Pet. 5:10.

22. Tuyooyiyaanzi muchiiyo chitobela?

22 Mulugwalo lwakalembwa aPetro, Jehova utondeezya kuti ulabasimya akubapa manguzu bakombi bakwe. Andiswe majwi aaya alakonzya kutusimya. Toonse tuyanda kupegwa manguzu aJehova akuzumanana kusyomeka kulinguwe. Tuyanda kutobelezya chikozyano chaNowa, Daniyele aJobu. Muchiiyo chitobela, tuyooyiya kuziba Jehova mbukwakabagwasya kuti bazumanane kusyomeka kulinguwe. Eezi zitondeezya kuti bakali ‘kuzimvwisisisya’ zintu nzyaakali kuyanda Jehova. (Tus. 28:5) Andiswe tweelede kumvwisisisya zintu ziyandwa aJehova.

^ par 2 Ezekkiyele wakatolwa kubuzike mu617 B.C.E. Lugwalo lwaEzekiele 8:1–19:14 lwakalembwa “mumwaka wamusanu aumwi” naakuti mu612 B.C.E.

^ par 5 Lamekki wisi Nowa wakali kukomba Leza, wakafwa kakuli kwasyaala minyaka iili 5 kuti kube Zambangulwe. Kuti kakuli banyina aaNowa abanike bakwe bakachili kupona kusikila chiindi chaZambangulwe, chaamba kuti teebakafutuka pe.

^ par 13 Zilakonzeka kuti eezi nzizyo zyakachitika kubeenzinyina baDaniyele bakapedwe zyuuno zilaajulu.—Dan. 2:49.