Skip to content

Skip to table of contents

Nibachikula​—“Musungwaale Kukulibelekela Lufutuko Lwanu”

Nibachikula​—“Musungwaale Kukulibelekela Lufutuko Lwanu”

“Mbuli mbumuswiilila lyoonse, . . . musungwaale kukulibelekela lufutuko lwanu cakuyoowa acakuzyangama.”​—FLP. 2:12.

NYIMBO: 133, 135

1. Nkamboonzi ntaamu yakubbabbatizigwa niyandikana? (Langa chifanikisyo chili kumatalikilo achiiyo.)

MUNYAKA amunyaka kuli bantu biingi babbabbatizigwa. Biingi babo mbachikula. Bamwi bakakomenena mumpuli yaBakamboni. Uli umwi wabo na? Ikuti kakuli boobo, wakasala munzila iilikabotu. Kubbabbatizigwa nchintu chiyandikana kumaKristu alubo nintaamu iikonzya kutugwasya kuti tukafutuke.​—Mt. 28:19, 20; 1 Pet. 3:21.

2. Nkamboonzi nituteelede kuyoowa naa kuleka kulipeda?

2 Nikuba kuti kubbabbatizigwa kupa kuti tujane zilongezyo pesi kuli zintu nzuyelede kuchita. Weelede kuchitaanzi? Mubuzuba mbuwakabbabbatizigwa wakasandula kuti iiyi kumubuzyo uti, “Kwiinda muchinunuzyo chaJesu Kristu, weempwa na kuzibi zyako alimwi walipeda na kuchita kuyanda kwaJehova?” Kubbabbatizigwa kwakatondeezya kuti wakalipeda kuli Jehova. Wakasyomezya Jehova kuti uyoomuyanda amoyo woonse akubikka zintu nzyayanda mubusena bwakusaanguna. Chisyomezyo  eechi chiyandikana loko. Weelede kulisola na kuti wakachita chisyomezyo eechi? Toyelede kulisola pe. Kulipeda kuli Jehova nchintu chiyandikana loko. Atulange-lange zikonzya kuchitika kuti waleka kulipeda kuli Jehova. Muntu utaponi kweendelana akuyanda kwaJehova weendelezegwa aSaatani. Dyabbulosi tayandi kuti tukafutuke. Alubo, ulabotelwa kuti twaba kulubazu lwakwe kwiinda mukutalibombya kubweendelezi bwaJehova, ziyoopa kuti tukasweekelwe buumi butamani.

3. Nziizili zilongezyo nzulaazyo akaambo kakuti wakalipeda kuli Jehova?

3 Yeeya zilongezyo nzulaazyo akaambo kakuti wakalipeda kuli Jehova akubbabbatizigwa kutali kuba kulubazu lwaSaatani. Eezi zilakonzya kupa kuti waambe kuti: “Jehova nguundigwasya, nsikonzyi kuyoowa. Muntu andicitilenzi?” (Int. 118:6) Taakwe chilongezyo chiinda kuba kulubazu lwaLeza akutambulika kuli nguwe.

MUKULI WAWUMWI AWUMWI

4, 5. (a) Munzilaanzi kulipeda kuli Jehova nuli mukuli wawumwi awumwi? (b) Mbuyumu-yumuunzi mbubaswaana bachikula?

4 Ikuti waba muKristu ubbabbatizidwe kubamba bweenzinyokwe aJehova mukuli ukugeme, takuli mbuli mabambe ngimukonzya kuchita kamuli mpuli kuti muule fooni yang’anda. Nikuba kuti uchikkala abazyali pesi weelede kubelekela kuti ukafutuke. Nkamboonzi nikuyandikana kukkala kuyeeya majwi aaya? Nkaambo tukonzyi kuziba buyumu-yumu mbukonzya kuswaana kunembo. Muchikozyano, kuti wabbabbatizigwa kuchili muniini pesi wasika chiindi chakukubuka nzila njulimvwaayo ilakonzya kuchincha alubo ulakonzya kuyungwa abeenzinyokwe kuti uchite zintu zitali kabotu. Umwi musimbi wakaamba kuti: “Mwana takonzyi kulisola kuti nguKamboni waJehova akaambo kakuti tachitilwi kkekke lyabuzuba bwakuzyalwa. Pesi chiindi nakomena kuti beenzinyina bamuyunga kuti awonane awumwi muntu, weelede kuba achoonzyo chakuti kutobelezya malayilile aJehova kulagwasya chiindi choonse.”

5 Bachikula baswaana buyumu-yumu busiyene-siyene. Nikuba aabo bakabbabbatizigwa kabali bakomena baswaana zintu zyiingi zisunka lusyomo lwabo. Masunko aaya aswaanizya kutamvwanana mulukwatano, kuchiswa-chiswa naa kumaninwa milimu. Kufumbwa kuti twakabbabbatizigwa katuli baniini naa katuli bapati, toonse tuswaana buyumu-yumu buyanda kuti tukkale katusyomekede kuli Jehova.​—Jak. 1:12-14, NW.

6. (a) Nkamboonzi nweelede kuchizuzikizya chisyomezyo chako chakulipeda kuli Jehova? (b) Lugwalo lwaBaFilipi 4:11-13 lutugwasya biyeni?

6 Kuziba kuti weelede kuzuzikizya chisyomezyo eechi ziyume zitete kuyoopa kuti ukkale kusyomekede kuli Jehova kufumbwa zyiimo nzutakaswaane. Chiindi nwakalipeda wakasyomezya Singuzuzyoonse kuti uyoozumanana kumukomba nikuba beenzinyokwe naa bazyali beezya kukukasya. (Int. 27:10) Kufumbwa buyumu-yumu mbukonzya kuswaana, weelede kusyoma kuti Jehova unookugwasya kuti uzumanane kupona kweendelana akulipeda kwako.​—Bala BaFilipi 4:11-13.

7. Chambaanzi kusungwaala kubelekela lufutuko “cakuyoowa acakuzyangama”?

7 Jehova uyanda kuti ube mweenzinyina. Pesi kuzumanana kuba mweenzinyina akuti ukafutuke kuyanda kuti ubeleke changuzu. Lugwalo lwaBaFilipi 2:12 luti: “Musungwaale kukulibelekela lufutuko lwanu cakuyoowa acakuzyangama.” Majwi aaya atondeezya kuti weelede kuzumanana kuba abweenzinyina aJehova akuti ukkale kusyomekede nikuba waswaana buyumu-yumu. Toyelede kulisyoma pe. Bamwi bantu bakabelekela  Jehova kwachiindi chilamfu bakazookachilwa kuzumanana kuba abweenzinyina aJehova. Niinzi nzuyelede kuchita kuti ukafutuke?

KUBALA BBAYIBBELE KULAYANDIKANA

8. Kubala Bbayibbele kuswaanizyaanzi alubo nkamboonzi nikuyandikana?

8 Bweenzuma bwesu aJehova buswaanizya zintu zibili​—kwaambuulaawe akumuswiilila. Tuswiilila Jehova kwiinda mukubala Bbayibbele. Eezi ziswaanizya kuba aluzibo kwiinda mukuyeeyesesya atala anzitubala muBbayibbele amumabbuku ambunga. Kubala Bbayibbele kulisiyene akubala mabbuku akuchikolo. Nkaambo kuchikolo bantu babalila kuti bakapase. Pesi chiindi nubala Bbayibbele weelede kuyeeyesesya akuziba zyiingi atala abube bwaJehova. Eezi ziyoopa kuti uswene afwiifwi aJehova alakwe uyooswena afwiifwi anduwe.​—Jak. 4:8.

Ulakomba na kuli Jehova chiindi choonse? (Langa fuka 8-11)

9. Nziizili zibelesyo nzubelesya chiindi nubala Bbayibbele?

9 Mbunga yaJehova yakatupa zintu zyiingi nzitukonzya kubelesya chiindi nituli kubala. Muchikozyano, ajw. org kuli chipaanzi chiti Bible Study Activitieschijanika alembedwe kuti Teenagers, chilakonzya kukugwasya kuti ujane zyiiyo kuzintu zyakachitika zilembedwe muBbayibbele. Alubo ajw. org, kuli chipaanzi chiti What Does the Bible Really Teach?, (Study Guides)” chikonzya kukugwasya kuti ube achoonzyo chakuti zintu nzusyoma nzyakasimpe. Makani aaya alakonzya kukugwasya kuti upandulwide bamwi zintu nzyusyoma. Alubo mumagazini iitegwa Awake! yamuApril 2009, kuli mutwe utii, Young People Ask . . . How Can I Make Bible Reading Enjoyable?Kubala akuyeeyesesya kulakonzya kukugwasya kuti ukafutuke.​—Bala Intembauzyo 119:105.

KUKOMBA KULAYANDIKANA

10. Nkamboonzi kukomba nikuyandikana kumuKristu ubbabbatizidwe?

10 Twayiya kuti tuswiilila Jehova kwiinda mukubala, nikuba boobo twaambuula anguwe kwiinda mukukomba. MuKristu weelede kubona kukomba kakuli chintu chiyandikana kapati kutali kwakwiinzya mulawu luzutu. Kukomba ninzila yakwaambuula aMulengi wesu. Jehova uyanda kuti tumubuzye zili mumyoyo yesu. (Bala BaFilipi 4:6.) Ikuti waswaana buyumu-yumu, Bbayibbele liti weelede ‘kubikka makani aako oonse mumaanza aaJehova.’ (Int. 55:22) Ulazisyoma na eezi? Kuli mamiliyoni  abakwesu abachizi bakabona kuti kuchita zyaambwa avesi eeyi kwakabagwasya. Anduwe zilakonzya kukugwasya.

11. Nkamboonzi nweelede kulumba Jehova chiindi choonse?

11 Kukomba kutupa mweenya wakubuzya Jehova zintu zyiingi kutali kukumbila lugwasyo luzutu. Bbayibbele lyaamba kuti: “Amube amyoyo yakulumba.” (Kol. 3:15) Chimwi chiindi tulakonzya kubikkila maanu kumapenzi ngitulawo akuluba zilongezyo nzitulaazyo. Ikuti kakuli boobo, buzuba abuzuba weelede kuyeeyesesya atala azilongezyo nikuba zitatu biyo. Mpawo weelede kumulumba Jehova akaambo kazilongezyo eezyo kwiinda mukukomba. Musimbi uutegwa Abigail wakabbabbatizigwa kali aminyaka iili 12 wakati: “Jehova nguwe alikke ngutweelede kulumba. Tweelede kumulumba chiindi choonse nkaambo utuchitila zintu zyiingi. Zindiyeezya amwi majwi ngindakamvwa akuti: Ikuti Jehova katupa zintu nzitwakumbila niinzi nchitweelede kuchita?” *

KUYEEYA ZINTU ZIBOTU NZITWAKACHITILWA KULAYANDIKANA

12, 13. Nkamboonzi nikuyandikana kuti muKristu umwi awumwi ayeeye zintu zibotu Jehova nzyakamuchitila?

12 Chiindi Davida naakazunda mubuyumu-buyumu mbwakali kuswaana wakaamba majwi aakuti: “Amulabile,mubone kuti Jehova mubotu. Ulikkomene muntu uuyubila mulinguwe.” (Int. 34:8, NW) Vesi eeyi itondeezya kuti kuyeeya zintu nzyakatuchitila Jehova kulayandikana. Chiindi nitubala Bbayibbele, mabbuku ambunga akunjila miswaangano, tulasungwaazigwa kumvwa Jehova mbakabagwasya bakombima kuti bakkale kabasyomekede. Pesi chiindi nuyabusima mubukombi weelede kubona mbakugwasya Jehova kuti ukkale kusyomekede. Nziizili zintu zibotu nzyakakuchitila Jehova?

13 Kuli chintu chimwi chibotu Jehova nchaakachitila maKristu boonse. Wakatukwelela kuli nguwe akuMwanaakwe. Jesu wakaamba kuti: “Takukwe muntu uukonzya kuza kulindime Taata uwakandituma atamukwela.” (Joh. 6:44) Majwi aaya alabeleka na kuli nduwe? Uuchikula ulakonzya kulibuzya kuti ‘Jehova wakakwela bazyali bangu ime ndikutobela luzutu.’ Pesi utalubi kuti chiindi nwakalipeda kuli Jehova akubbabbatizigwa wakatondeezya kuti uyanda kuba mweenzinyina. Alubo Jehova wakakuziba kukugama. Bbayibbele lyaamba kuti: “Muntu aakuyanda Leza, oyu muntu ulazibwa nguwe.” (1 Kor. 8:3) Nkinkaako, weelede kutondeezya kuti ulalumba kuti Jehova wakakukwelela kumbunga yakwe.

14, 15. Kukambawuka kulusimya biyeni lusyomo lwako?

14 Chimwi chintu chili kabotu Jehova nchakonzya kutuchitila nkutugwasya chiindi nituli kukambawuka. Ulakonzya kukambawukila bantu nikuba kuchikolo. Bamwi bachikula kulabayumina kukambawukila beenzinyina kuchikolo. Nkamboonzi nikubayumina? Nkaambo nga tabazi pe kuti balabaswiilila na naa kuti balakaka. Kukambawukila kkilasi yoonse kulakonzya kubayumina kwiinda kukambawukila mwanaachikolo umwi. Niinzi chikonzya kukugwasya?

15 Weelede kuyeeya kaambo kapa kuti ube achoonzyo chakuti zintu nzusyoma nzyakasimpe. Zilajanika na mumulaka wako zipaanzi zikonzya kukugwasya chiindi nulikubala Bbayibbele zili ajw.org? Ikuti kutazizi weelede kuziyanduula. Zyakabambilwa kuti zikugwasye kuti umvwisisisye kaambo kapa kuti ube achoonzyo chakuti zintu nzusyoma  nzyakasimpe, nkamboonzi nuzisyoma zintu eezyo akuti ulabapandulwida biyeni bamwi. Kuba achoonzyo chakuti zintu nzusyoma nzyakasimpe akulibambila ziyookugwasya kuti ubuzye bamwi atala azina lyaJehova.—Jer. 20:8, 9.

16. Niinzi chikonzya kukugwasya kuti utayoowi kukambawukila bamwi?

16 Chimwi chiindi ulakonzya kuyoowa kukambawukila bamwi nikuba kuti walilibambilide. Umwi muchizi uli aminyaka iili 18 wakabbabbatizigwa kali aminyaka iili13 wakati: “Ndilizi kuti zintu nzindisyoma nzyakasimpe pesi ndilayoowa kuti ndipandulwide bamwi.” Wakachita biyeni kuti azunde buyumu-yumu oobu? Wakati: “Chimwi chiindi ngandeezya kwaambuula tumwi twaambo tutali twamuBbayibbele. Mbindiyaabo tabayoowi pe kwaambuula atala azintu nzibachita. Andime tandeelede kuyoowa pe. Nkinkaako, kuti kandilikubabuzya chimwi chintu ngandaamba majwi akuti: ‘Limwi zuba ndakali kwiiya Bbayibbele awumwi muntu mpawo . . . ’ Kuzwa waawo ngandiinkilila kunembo ankani yangu. Nikuba kuti ngatandilikubabuzya atala azintu zili muBbayibbele pesi bamwi ngabayanda kuziba kuti tuchita biyeni chiindi nitulikwiiya amuntu Bbayibbele. Chimwi chiindi ngababuzya mibuzyo. Ndakabona kuti kubelesya nzila eeyi kupa kuti kunduubile kubakambawukila. Ikuti ndabakambawukila ngandabotelwa.”

17. Kumvwisisisya zintu nzusyoma kujana kwakugwasya biyeni kuti ukambawukile bamwi?

17 Bantu biingi balakonzya kukuswiilila kuti kubayanda akubalemeka. Musimbi uutegwa Olivia uli aminyaka iili 17, wakabbabbatizigwa kachili muniini wakaamba kuti: “Ndakali kuyoowa kukambawukila bamwi nkaambo ndakali kubonaanga balandisampawula kabaamba kuti ndichitaanga ndilizi loko Bbayibbele.” Wakazoochincha miyeeyo yakwe. Kwiinda kuti akkale kali kuyoowa, wakayeeya kuti: “Bachikula biingi taakwe nchibazi pe atala aBakamboni baJehova. Pesi bazi ndiswe luzutu kuti tuli Bakamboni. Nzila njitulijataayo njiyo iikonzya kupa kuti bazumine naa bakake mulumbe wesu. Niinzi chikonzya kuchitika kuti twayoowa naa twaambuula munzila iitondeezya kuti tatukwe choonzyo azintu nzitulikwaambuula? Balakonzya kuyeeya kuti nzituyanda kwaamba nzyakubeja naa kuti tulikuyeeyela biya. Balakonzya kutazisyoma zintu nzitubabuzya akaambo kakuti iswe tatukwe choonzyo pe anzizyo. Nikuba boobo, ikuti twabatondeezya kuti tuli achoonzyo chakuti zintu nzitusyoma nzyakasimpe ziyoopa kuti batulemeke.”

ZUMANANA KUBELEKELA KUTI UKAFUTUKE

18. Nziizili zintu zikonzya kukugwasya kuti ubelekele kuti ukafutuke?

18 Twayiya kuti, ikuti tukafutuke tweelede kubeleka changuzu. Zimwi zintu zikonzya kukugwasya nkubala Bbayibbele akuyeeyesesya, kukomba akuyeeya atala azintu zibotu Jehova nzyakuchitila. Kuchita zintu eezi kuyoopa kuti ube achoonzyo chakuti nchilongezyo chipati kuba abweenzinyina aJehova. Eezi ziyoopa kuti ukambawukile bamwi.​—Bala Intembauzyo 73:28.

19. Nkamboonzi nikweelela kubeleka changuzu kuti ukafutuke?

19 Jesu wakati: “Ikuti umwi kayanda kunditobela, aliimye akunyamuna cisamu cakwe cakupenzyezya akuzumanana kunditobela.” (Mt. 16:24, NW) Zili antanganana kuti maKristu beelede kuba basikwiiya akuti balipede kuli Jehova akubbabbatizigwa. Alubo kuchita oobu kulakonzya kupa kuti tujane zilongezyo zyiingi akuti tukajane buumi butamani munyika mpya. Nkinkaako, kulayandikana kuti tubeleke changuzu kuchitila kuti tukafutuke.

^ par 11 Ikuti ujane makani miingi langa chipaanzi chiti Young People Ask​—Why Should I Pray?chijanika ajw. org akapepa kali amibuzyo.