Skip to content

Skip to table of contents

Belekaamwi aJehova Buzuba Abuzuba

Belekaamwi aJehova Buzuba Abuzuba

‘Tuli basimilimonyina aLeza.’—1 KOR. 3:9.

NYIMBO: 64, 111

1. Nziizili nzila nzitukonzya kubelekaamwi aJehova?

MULENGI wakatondeezya kuti bantu bamaninide bakali kuyoobelekaamwi anguwe kuti bazuzikizye makanze aakwe. Nikuba kuti bantu balaachibi pesi bantu basyomeka balakonzya kubelekaamwi aJehova buzuba abuzuba. Muchikozyano, ‘tuba basimilimonyina aLeza’ chiindi nitukambawuka makani mabotu aaBwaami bwakwe akugwasya bantu kuti babe basikwiiya. (1 Kor. 3:5-9) Tuli achilongezyo chipati loko nkaambo Mulengi wesu singuzuzyoonse wakatusala kuti tubeleke mulimu uuyandikana loko! Pesi kukambawuka akugwasya bantu kuti babe basikwiiya teenzizyo pe azilikke zipa kuti tubelekaamwi aJehova. Muchiiyo eechi, tulayiya mbutukonzya kubelekaamwi aJehova kwiinda mukugwasya bamumpuli abakombima, mukutambula beenzu amukugwasilizya akuchita zyiingi mumbunga.—Kol. 3:23.

2. Nkamboonzi nituteelede kweezyanisya zintu nzituchita mubukombi azichitwa abamwi?

2 Twanoolanga-langa chiiyo eechi, utayezyanisyi zintu nzuchita mubukombi azichitwa abamwi. Weelede kuziba kuti bantu balisiyene akaambo kaminyaka, mbubasimide mumubili,  zyiimo azintu nzibakonzya kuchita. Mwaapostolo Pawulu wakazulwidwa amuuya uusala kulemba kuti: “Pele muntu umwi aumwi alingule milimo yakwe mwini, aboobo ulajana cintu cakulikankaizizya mwini citali camweenzinyina.”—Gal. 6:4.

GWASYA BAMUMPULI ABAKOMBINYOKWE

3. Nkamboonzi nitukonzya kwaamba kuti bantu balangania mpuli zyabo babelekaamwi aLeza?

3 Jehova uyanda kuti bakombi bakwe balanganie mpuli zyabo. Muchikozyano, weelede kubeleka kuti ujane mali yakusanina mpuli yako. Bakayintu biingi basyaala ang’anda kuti balanganie bana. Bamwi bana bakakomena beelede kulangania bazyali babo bachiswa abachembeede. Kuchita milimu eeyi kulayandikana. Bbayibbele lyaamba kuti: ‘Na muntu katabambi basazinyina, kwaambisya bamung’anda yakwe, nkokuti walukaka lusyomo alubo mubi loko kwiinda muntu uutasyomi.’ (1 Tim. 5:8) Kuba amikuli iili boobu kulakonzya kupa kuti uyeeye kuti tukonzyi pe kuchita zyiingi mukubelekela Jehova. Pesi toyelede kumana manguzu pe! Jehova ulabotelwa chiindi nusanina mpuli yako.—1 Kor. 10:31.

4. Kujana bazyali bazibikka biyeni zintu zyabukombi mubusena bwakusaanguna alubo bajana mpinduunzi?

4 Bazyali bachiKristu babelekaamwi aJehova chiindi nibagwasya bana babo kuti balibikkile zipeekezyo mubukombi. Bazyali bakachita oobo bana babo bakazoonjila mumulimu wachiindi choonse. Bamwi mamishinali bamwi bapayona kumasena aayanda basikugwasilizya alubo bamwi babelekela kuBbeteli. Kukkala kule kupa kuti batajani chiindi chakubaamwi abazyali babo. Nikuba boobo, bazyali balipeda, basungwaazya bana babo kuti balisimye mumilimu yabo. Nkamboonzi? Nkaambo bajana kubotelwa kupati akukkutisikana akaambo kakuti bana babo bakabikka Bwaami mubusena bwakusaanguna. (3 Joh. 4) Kulakonzeka kuti bazyali biingi balimvwa mbuuli Hana ‘wakakweletesya’ Jehova kwiinda mukumupa Samiyele. Bazyali bachita oobo, bakubona kachili chilongezyo chipati loko kubelekaamwi aJehova munzila iili boobo.—1 Sam. 1:28.

5. Kujana twabagwasya biyeni bakombima mumbungano? (Langa chifanikisyo chili kumatalikilo achiiyo.)

5 Kuti kutakwe mikuli miingi mumpuli, kujana wabagwasya na bakombinyokwe bachiswa, bachembeede abamwi bayanda kugwasigwa? Mumbungano ulakonzya kuyanduula bantu bayanda kugwasigwa. Chimwi chiindi, ulakonzya kuswaya muchizi uulangania muzyali uchembeede mbukunga chiindi chiingi nguwe uuchita milimu myiingi. Alubo ulakonzya kugwasya bamwi kwiinda mukwiinka aabo kumiswaangano, mukubawulila zintu, naakuti kuswaya umwi kuchibbadela. Kuchita oobo kutondeezya kuti ubelekaamwi aJehova nkaambo Jehova unooli wasandula nkombyo zyabo.—Bala 1 BaKorinto 10:24.

TAMBULA BEENZU

6. Kujana twabatambula biyeni beenzu?

6 Bakombi baJehova bazibidwe akutambula beenzu. Mumagwalo aachiKristu aachiGirikki, bbala lyakasandululwa kuti ‘kusamawusya’ lyaamba “kuba aluyando kubeenzu.” (Heb. 13:2) MuJwi lyaLeza, muli zikozyano zituyiisya mbutweelede kubatondeezya luyando beenzu. (Matl. 18:1-5, NW) Tulakonzya kugwasya bamwi katutalangi kuti ‘mbachiinga chalusyomo lwesu’ na, naakuti pe.—Gal. 6:10.

7. Nkamboonzi nitweelede kutambula bakombima bali mumulimu wachiindi choonse?

7 Kujana wakonzya na kubelekaamwi  aLeza kwiinda mukutambula bakombima bali mumulimu wachiindi choonse? (Bala 3 Johane 5, 8.) Kubatambula bakwesu abachizi aaba kupa kuti ‘tusimisyanie.’ (Rom. 1:11, 12) Atulange-lange chikozyano cha-Olaf. Olaf ulayeeya kachili muniini. Mumbungano yabo, biingi teebakali kumutambula pe mulangizi wabbazu wakatakwete. Olaf wakakumbila bazyali bakwe bakatali Bakamboni kuti mulangizi wabbazu asikile kulimbabo. Bazyali bakwe bakazumina mpawo bakaambila Olaf kuti unoolala asofa. Taakakaka pe. Olaf wakati: “Imviki eeyo yakali kunoneezya loko! Ime amulangizi wabbazu twakali kufwambaana kubuka mpawo twakali kwaambuula nkani zinoneezya nitwakali kulya chakulya chakuseeni. Mulangizi wabbazu wakandisungwaazya kuti ndiyande mulimu wachiindi choonse.” Lino kwayinda minyaka iili 40 Olaf kali mumishinali muzisi zisiyene-siyene.

8. Nkamboonzi nitweelede kuba aluzyalo kubantu nikuba kabatatutambuli kabotu? Amba chikozyano.

8 Tulakonzya kubatondeezya luzyalo beenzu munzila zisiyene-siyene nikuba kuti kumasaangunino teebatutambula kabotu. Atulange-lange chikozyano chitobela. Umwi sikupupulula wakuSpain wakabona kuti muntu ngwaakali kwiiyaawe Bbayibbele uutegwa Yesica uukkala kuEcuador, wakali kulila chiindi choonse. Sikupupulula wakabuzya chakalikupa kuti Yesica akkale kalila. Yesica wakati kachili kulimbabo, wakali kufwaba zyakuti taakali achakulya pe. Nchaakali kukonzya kupa mwanaakwe, maanzi luzutu. Yesica wakali kuumbulizya mwanaakwe kumwi kalikukomba kuti Leza amugwasye. Kuzwa waawo, Bakamboni babili bakamuswaya. Pesi Yesica taakabatambula kabotu alubo wakadelula mamagazini ngibakamupa. Mpawo wakababuzya kuti: “Nchinchakulya nchimwandeetela kuti ndipe mwanaangu na eechi?” Bachizi aaba bakeezya kumuumbulizya pesi taakaswiilila pe. Nikwakiinda chiindi, bakazoosiya chisewe chakali achakulya amulyango wakwe. Zyakachitwa abachizi aaba zyakamusika amoyo Yesica zyakuti wakalipa mulandu nkaambo taakabikkila maanu Leza mbaakamusandula. Kuzwa waawo, wakaba achiyandisyo chakukomba Jehova. Kupa nkubakatondeezya bachizi aabo kwakagwasya loko!—Muk. 11:1, 6.

LIPEDE MUMULIMU WAKUYAKA

9, 10. (a) Chiindi, nziizili zyiimo nikwakali kuyandikana kuti bakombi baLeza balipede? (b) Njiili milimu iichitwa abakwesu balipeda mumbungano?

9 Muchiindi chamaIsrayeli, bantu bakali kulipeda kuchita milimu iisiyene-siyene. (Kul. 36:2; 1 Mak. 29:5; Neh. 11:2) Nikuba mazubaano tuli achilongezyo chakubelesya chiindi chesu, zintu nzitulaazyo aluzibo ndutulaalo kuti tugwasye bakwesu abachizi. Kuchita oobu kupa kuti tubotelwe akuti tukajane zilongezyo zyiingi.

10 Jwi lyaLeza lisungwaazya bakwesu mumbungano kuti babelekaamwi aJehova kwiinda mukubeleka changuzu kuti babe azyeelelo zyakuba babelesi babelekela naakuti baalu. (1 Tim. 3:1, 8, 9; 1 Pet. 5:2, 3) Bakwesu bachita oobo bayanda kugwasya bamwi muzintu zyakumubili amubukombi. (Inc. 6:1-4) Baalu bakali bakukumbila na kuti ube mulindi, kupa bantu busena bwakukambawukila, kubamba mabbuku, kubambulula zyakafwa naakuti kuchita imwi milimu? Bakwesu bachita milimu eeyi baamba kuti kulababotezya kugwasya bamwi.

Kulipeda kubeleka mulimu wakuyaka kupa kuti ujane beenzinyokwe bapya (Langa fuka 11)

11. Umwi muchizi wakagwasigwa biyeni abeenzinyina mbaakajana mumulimu wakuyaka?

11 Bantu balipeda kubeleka mulimu wakuyaka bajana beenzinyina bapya. Atulange-lange chikozyano chamuchizi uutegwa  Margie uuli aminyaka iili 18 kali mumulimu wakuyaka Maanda aaBwaami. Muminyaka yoonse eeyi, wakali kuyiisya bachizi bachili baniini kubeleka mulimu ooyu. Mumulimu ooyu, ujana chiindi chakusimya bamwi mubukombi. (Rom. 1:12) Chiindi nakataazikene mubuumi, Margie usungwaazigwa abeenzinyina mbaakajana mumulimu wakuyaka. Wakali walipeda na kugwasilizya mumulimu wakuyaka? Kujana wagwasilizya na nikuba kuti tukwe luzibo lwiingi mumulimu ooyu?

12. Kujana wagwasilizya biyeni kuti kwaba mapenzi aalichitikila?

12 Nikwaba mapenzi aalichitikila, bakombi baLeza bali achilongezyo chakubelekaamwi aLeza kwiinda mukugwasya bakombinyina. Muchikozyano, basanga mali kuti bagwasilizye. (Joh. 13:34, 35; Inc. 11:27-30) Chimwi chiindi balagwasilizya kwiinda mukusalazya naakuti kuyakulula. Muchizi Gabriela wakuPoland, wakabotelwa loko bakombinyina bamumbungano iili afwiifwi nibakasika kuzoomugwasya ng’anda yakwe niyakadilika akaambo kamaanzi. Muchizi ooyu wakati: “Tandiyandi kwaambuula atala azintu zyakasweeka pesi ndiyanda kumubuzya mbundakagwasigwa. Nzibakandichitila bakwesu zitondeezya kuti, kuba mumbungano yachiKristu nchilongezyo chipati alubo kupa kuti ndibotelwe akutakataazikana mumizeezo.” Bakwesu bagwasigwa nikwaba mapenzi aalichitikila baamba zintu zibotu nzibachitilwa abakombinyina. Alubo bakwesu babelekaamwi aJehova balabotelwa nibagwasilizya bakombinyina.—Bala Incito 20:35, NW; 2 BaKorinto 9:6, 7.

13. Kulipeda kubusimya biyeni bweenzuma mbutulaabo aJehova? Amba chikozyano.

13 Stephanie abamwi basikupupulula bakabotelwa kubelekaamwi aLeza chiindi nibakagwasya Bakamboni bakachijila kuUnited States akaambo kankondo. Stephanie abasikupupulula aaba bakagwasya Bakamboni aabo kujana aakukkala azimwi zyamung’anda. Stephanie wakati: “Twakasungwaazigwa kubona mbubakali kubotelwa ambubakalumba nibakabona luyando lutondeezegwa abazyalwanyina bamunyika  yoonse. Bakwesu aaba babonaanga twakabagwasya loko pesi andiswe twakagwasigwa. Luyando, kujatana, lusyomo akusyoma Jehova nkutwakabona, kwakasimya bweenzuma mbutulaabo aJehova akuti tulumbe zyoonse nzitujana kumbunga yaLeza.”

CHITA ZYIINGI

14, 15. (a) Ngaali maboneno musinsimi Isaya ngaakatondeezya? (b) Kujana basikupupulula baBwaami mazubaano baatobelezya biyeni maboneno aaIsaya?

14 Kujana wachita biyeni kuti uchite zyiingi mukubelekaamwi aJehova? Kujana wakonzya na kulongela kubusena buyanda basikugwasilizya? Nisimpe kuti bakombi baJehova tabayandiki kubelekela kumasena aali kule luzutu kuti babelekele Jehova. Pesi zyiimo zyabamwi bakwesu abachizi zilabazumizya kuti bakabelekele kule. Bali amaboneno akozyenie aamusinsimi Isaya. Jehova wakabuzya kuti: “Ino nguni ngunti tume? Nguni uukonzya kutwiinkila?” Mpawo Isaya wakasandula kuti: “Mpendi! Unditume mebo!” (Is. 6:8) Zyiimo zyako zilakuzumizya na kuti uchite mbuuli Isaya mukubelekela Jehova? Njiili milimu njukonzya kugwasilizya?

15 Kalikwaamba atala amulimu wakukambawuka akugwasya bantu kuti babe basikwiiya, Jesu wakati: ‘Kutebula kwavula pesi batebuzi mbache. Nkinkaako amukumbile Mwaami wamuunda kuti atume batebuzi kukutebula kwakwe.’ (Mt. 9:37, 38) Ulakonzya na kubeleka kuli payona kubusena buyanda basikupupulula biingi? Naakuti ulakonzya na kusungwaazya umwi kuti achite oobo? Bakwesu abachizi biingi bakabona kuti nzila mbotu yakutondeezya kuti tulamuyanda Leza abeenzuma, nkuba mapayona kubusena buyanda batebuzi biingi. Nziizili zimwi nzila zikonzya kupa kuti uchite zyiingi mumulimu ooyu? Kuchita oobo kupa kuti ubotelwe.

16, 17. Nziizili zimwi nzila zikonzya kupa kuti uchite zyiingi mukubelekela Jehova?

16 Zyiimo zyako zilakuzumizya na kuti ubelekele kuBbeteli naakuti mumulimu wakuyaka kwachiindi chifwiifwi naakuti kugwasilizya aamwi mazuba? Mumbunga yaJehova kuyandikana bantu balipedelede kuyoobelekela kufumbwa nkubapegwa alubo kufumbwa mulimu. Eezi zyaamba kuti balakonzya kukumbilwa kuti babeleke imwi milimu njibatakwe luzibo nikuba kabali aluzibo kuliimwi. Jehova ulabotelwa akulipeda nkubachita bakombi bakwe akaambo kakulipeda kubeleka kufumbwa mulimu.—Int. 110:3.

17 Ulaachiyandisyo na chakujana lwiiyo lukugwasya kuti uchite zyiingi? Kuti kakuli boobo, ulakonzya kunjila Chikolo Chabakambawusi baBwaami. Chikolo eechi chigwasya bakwesu abachizi basimide mubukombi bali mumulimu wachiindi choonse kuti bazwidilile mumulimu waLeza. Bakwesu balembela kunjila chikolo eechi beelede kulipeda kubeleka kufumbwa nkubakumbilwa nibamaninsya chikolo. Zyiimo zyako zilakuzumizya na kuti ukonzye kunjila chikolo eechi kuti ukonzye kubelekela Jehova munzila iili boobo?—1 Kor. 9:23.

18. Mbuubuli bubotu mbujana akaambo kakubelekaamwi aJehova buzuba abuzuba?

18 Mbutuli bakombi baJehova tulapa, tutondeezya bamwi luzyalo aluyando. Alubo tubabikkila maanu bamwi buzuba abuzuba. Kuchita oobo kupa kuti tubotelwe akuti tube aluumuno. (Gal. 5:22, 23) Kufumbwa zyiimo zyako, ulakonzya kubotelwa kwiinda mukutobelezya bube bwaJehova bwakupa akubelekaamwi anguwe!—Tus. 3:9, 10.