Skip to content

Skip to table of contents

Bantu Bapa Mbabo Babotelwa

Bantu Bapa Mbabo Babotelwa

“Kupa kulakkomanisya.”—INC. 20:35, NW.

NYIMBO: 76, 110

1. Zintu zyakalengwa zitondeezya biyeni kuti Jehova ulapa?

NIKUBA kuti Jehova wakali alikke katanalenga zintu zyoonse pesi wakali kuyeeya kugwasya bamwi. Nkinkaako, wakazoolenga zilenge zichenjede ziswaanizya bangelo abantu. Jehova “Leza uukkomene” upa bantu zintu zibotu. (1 Tim. 1:11, NW; Jak. 1:17, NW) Utuyiisya kuti tupe bamwi nkaambo uyanda kuti andiswe katubotelwa.—Rom. 1:20.

2, 3. (a) Nkamboonzi kupa nikupa kuti tubotelwe? (b) Tulalanga-langaanzi muchiiyo eechi?

2 Leza wakalenga bantu muchikozyano chakwe. (Matl. 1:27) Eezi zyaamba kuti twakalengwa katuli abube buli mbuuli bwakwe akuti tubutondeezye. Kuti tubotelwe, tweelede kutobelezya chikozyano chaJehova kwiinda mukubabikkila maanu bamwi akubapa. (Flp. 2:3, 4; Jak. 1:5) Nkamboonzi nitweelede kupa? Nkaambo Jehova mbaakatulenga. Tulakonzya kuchitobelezya chikozyano chaJehova chakupa nikuba kuti tatumaninide pe.

3 Bbayibbele lilatutondeezya mbutukonzya kupa. Atulange-lange zyiiyo nzitujana muBbayibbele atala akaambo  aaka. Tulabona kupa mbukupa kuti Leza abotelwe akuti kuba abube oobu kutugwasya biyeni kuti tuchite mulimu Leza ngwatupede. Alubo tuyoolanga-langa kupa mbukupa kuti tubotelwe akuti nkamboonzi nitweelede kubelekela kuba abube oobu.

MBUTUKONZYA KUBOTEZYA LEZA

4, 5. Nziizili zintu zyakachitwa aJehova aJesu zitondeezya kuti balapa?

4 Jehova uyanda kuti tutobelezye chikozyano chakwe, nkinkaako, ulabotelwa chiindi nitupa bamwi. (Ef. 5:1) Nzila njitulengedwaayo abubotu bwazintu zili munyika zitondeezya kuti Leza uyanda kuti bantu babotelwe. (Int. 104:24; 139:13-16) Tutondeezya kumulemeka kwiinda mukuchita zintu zibotezya bamwi.

5 MaKristu bakasimpe batobelezya chikozyano chaJesu chimaninide chitondeezya mbutukonzya kupa bamwi. Jesu lwakwe wakati: “Nkaambo mbubonya obo Mwana a-Muntu tazide kuti abelekelwe, wakeza kuti abeleke, alimwi akwaaba buumi bwakwe, bube cinunuzyo cabanji.” (Mt. 20:28) Alubo mwaapostolo Pawulu wakasungwaazya maKristu kuti: “Amube amoyo oyo nguwenya iwakali muli-Kristo Jesu. Wakalilonzya, wakalisalila ciimo cabuzike.” (Flp. 2:5, 7) Umwi awumwi weelede kulibuzya kuti, ‘Kujana ndachita biyeni kuti ndiyungizye mukutobelezya chikozyano chaJesu?’—Bala 1 Petro 2:21.

6. Chikozyano chaJesu chili atala amuSamariya chituyiisyaanzi? (Langa chifanikisyo chili kumatalikilo achiiyo.)

6 Tulakonzya kubotezya Jehova kwiinda mukutobelezya chikozyano chakwe achaKristu kwiinda mukubabikkila maanu bamwi akuyanduula nzila zyakubagwasya. Jesu wakazitondeezya eezi muchikozyano chamuSamariya chiindi naakali kubuzya batobeli bakwe kuti beelede kugwasya bamwi nikuba kabazwa kumisyobo iisiyene. (Bala Luka 10:29-37.) Uchiwuyeeyede na mubuzyo wakapa kuti Jesu aambe chikozyano chamuSamariya? MuJuda wakamubuzya kuti: ‘Ino simayakilane ngwani?’ Nsandulo yaJesu itondeezya kuti tweelede kutobelezya zyakachitwa amuSamariya kuti katuyanda kuchita zintu zibotezya Leza.

7. Nzitusala zyeendelana biyeni ankani yabweendelezi?

7 Kuli twaambo twiingi tupa kuti maKristu bape bamwi. Muchikozyano, bube oobu bulaswaanizigwa munkani Saatani njaakasaanguna mumuunda waEdeni. Munzilaanzi? Saatani wakati Adamu aEva, kuswaanizya abantu boonse balakonzya kupona buumi bulikabotu kuti babikkila maanu kuzintu nzibayanda kutali kuswiilila Leza. Eva wakalisumpula nkaambo wakayanda kuba mbuuli Leza. Alubo Adamu wakatondeezya kuti ulaliyanda nkaambo wakasala kubotezya Eva. (Matl. 3:4-6) Tuli kuzibona mpindu zyakeetwa akaambo kakusala nkubakachita. Kuyandisya zintu zyiingi takweeti kubotelwa pesi kupa nkuko kweeta kubotelwa. Kupa kutondeezya kuti tusyoma kuti kuchita zintu kweendelana aziyandwa Leza kugwasya ndiswe.

KUCHITA MULIMU LEZA NGWAPEDE BAKOMBI BAKWE

8. Nkamboonzi Adamu aEva nibakeelede kutondeezya kuti balapa?

8 Leza wakapede Adamu aEva malayilile akali kubagwasya kuti bababikkile maanu bamwi nikuba kuti bakachili babili luzutu muunda waEdeni. Jehova  wakalongezya Adamu aEva akubabuzya kuti babe abana, bazuzye nyika akwiiyendelezya. (Matl. 1:28) Mbuuli Mulengi mbaakali achiyandisyo kuzilenge zyakwe, abalabo bazyali besu bakusaanguna bakeelede kuba achiyandisyo chakubabikkila maanu bana babo bakatayinazyalwa. Nyika yoonse yakali kuyooba Paradayizi kuti bana baAdamu bagwasigwe. Mulimu ooyu mupati wakali kuyanda kuti Adamu abana bakwe babelekelaamwi.

9. Nkamboonzi kuchincha nyika yoonse kuti ibe Paradayizi nikwakali kuyoopa kuti bantu babotelwe?

9 Kuti bantu bamaninide bakonzye kuzuzikizya makanze aLeza aakuti nyika yoonse ibe Paradayizi, bakeelede kubelekaamwi aJehova akunjila mukulyookezya kwakwe. (Heb. 4:11) Tulakonzya kuyeeyela mbuwakali kuyoobabotezya mulimu ooyo! Kuba achiyandisyo chakugwasya bamwi kwakali kuyoopa kuti bajane zilongezyo zyiingi akuti bakkutisikane.

10, 11. Tweelede kuchitaanzi kuti tuzwidilile mumulimu wakukambawuka awakugwasya bantu kuti babe basikwiiya?

10 Mazubaano, Jehova upede bakombi bakwe mulimu wakukambawuka akugwasya bantu kuti babe basikwiiya. Kuti tuubeleke kabotu mulimu ooyu, tweelede kubabikkila maanu bamwi. Kuyanda Leza abeenzuma kutugwasya kuti tulisimye mumulimu ooyu.

11 Mumwaanda wamunyaka wakusaanguna C.E., Pawulu wakati we abeenzinyina bakali ‘basimilimonyina aLeza’ nkaambo bakali kubyala akutiliila mbuto yakasimpe kaBwaami. (1 Kor. 3:6, 9) Andiswe mazubaano, tulakonzya kuba ‘basimilimonyina aLeza’ kwiinda mukubelesya chiindi chesu, zintu nzituli aazyo amanguzu eesu mumulimu ngutupedwe aaLeza wakukambawuka. Eechi nchilongezyo chibotu kaka!

Kugwasya bantu kuti bazibe kasimpe kulabotezya (Langa fuka 12)

12, 13. Mbuubuli bubotu bujanika kuti twagwasya bantu kuti babe basikwiiya?

12 Kubelesya chiindi chesu amanguzu eesu kuti tugwasye bantu kuti babe basikwiiya, kupa kuti tubotelwe loko. Bantu bakayiisya bamwi kuti bazibe kasimpe kusikila baba bakombi baJehova baamba kuti kwiiya abantu Bbayibbele kulabotezya. Tulabotelwa nitubona bantu mbitwiiyaabo kabamvwisisisya kasimpe, kababa lusyomo lusimide, kabachincha maponeno aabo akutalisya kubuzya bamwi kasimpe. Jesu alakwe wakabotelwa loko basikwiiya bakwe bali 70 ‘nibakaboola kababoteledwe’ nibakazwa kukukambawuka akaambo kazintu zibotu nzibakachita.—Lk. 10:17-21.

13 Basikupupulula biingi munyika yoonse balabotelwa nibabona makani mabotu kaachincha buumi bwabantu. Atulange-lange  chikozyano chamuchizi uutakwetwe uutegwa Anna wakalongela kubusena buyanda basikugwasilizya kuEurope nkwiili kuBuzwezuba. * Wakalemba kuti: “Ookuno ulakonzya kwiiya abantu biingi Bbayibbele alubo kulandinoneezya. Mulimu wakukambawuka upa kuti ndibotelwe loko. Nindibweeda kung’anda ngatandikwe chiindi chakuyeeya zintu zigwasya ndime luzutu. Ndiyeeya bantu mbindiiyaabo Bbayibbele kuswaanizya amapenzi ngibaswaana. Ndileezya kuyanduula nzila zyakubasungwaazya akubagwasya muzintu zyakunyama. Kuchita oobo kupa kuti majwi aakuti, ‘kupa kulakkomanisya kapati kwiinda kupegwa’ abe aachoonzyo kulindime.”—Inc. 20:35, NW.

Kunjila mumaanda oonse kupa kuti bantu bajane mweenya wakumvwa mulumbe waBwaami (Langa fuka 14)

14. Kujana kwatunoneezya biyeni kukambawuka nikuba kuti bantu tabaswiilili?

14 Tulakonzya kubotelwa kugwasya bantu kuti bamvwe makani mabotu nikuba kabataswiilili. Kuyungizya waawo, mulimu wesu ukozyenie aawamusinsimi Ezekkiyele Jehova ngwaakabuzya kuti: “Uleelede kubaambila majwi aangu, na balamvwa na balakaka.” (Ezk. 2:7; Is. 43:10) Nikuba kuti bamwi tabawutambuli pe mulumbe wesu pesi Jehova ulabotelwa anzituchita. (Bala BaHebrayo 6:10.) Umwi sikupupulula wakali amaboneno aalikabotu atala amulimu ooyu. Wakati, “Twakabyala, twakatiliila alubo twakakombela kuti Jehova ape kuti aabo bali amyoyo iibombede bakomene.”—1 Kor. 3:6.

MBUKONZYA KUBOTELWA

15. Bantu biingi bamvwa biyeni nitubatondeezya kuti tulapa alubo maboneno aabo apa kuti tuchite biyeni?

15 Jesu uyanda kuti tubotelwe kwiinda mukuba bantu bapa. Bantu balabotelwa nibapegwa chimwi chintu. Wakati, “Amube baabi, abalo bantu bayoomwaabila. Bayoomutilila munkomwe zyanu zyaacamba ceelelo cibotu cisindaidwe, cuumidwe-umidwe alimwi cizwide pamu. Nkaambo cipimyo ncomubelesya kupimina bamwi, ncobayoobelesya kumupimina andinywe.” (Lk. 6:38, NW) Nikuba kuti twabapa, teeboonse pe bakonzya kutambula pesi kupa nkutuchita  kulakonzya kubasungwaazya kuti abalabo bape bamwi. Nkinkaako, tutaleki kuba baabi nikuba kuti bantu tabalumbi. Nkaambo tatuzi pe kuti mbangane bakonzya kugwasigwa akaambo kakupa nkutuchita.

16. Mbaani mbitweelede kupa alubo nkamboonzi?

16 Bantu bapa chamoyo woonse tabapi bamwi kabayanda kuzoopegwa lubo. Nzizyo zyakapa kuti Jesu aambe kuti: “Pele nowabamba pobwe, tamba bantu bacete, basunkuta, balema, aboofwu, eelyo uyookkomana mbwaanga tabajisi cakukupilusizya.” (Lk. 14:13, 14, NW) Umwi mulembi waBbayibbele wakazulwidwa kuti alembe kuti, “Muntu, mwaabi uyoolelekwa.” Alubo umwi wakalemba kuti “Ulikkomene ooyo uumubikkila maano muntu uupengede.” (Tus. 22:9, NW; Int. 41:1, NW) Kuti tubotelwe tweelede kupa bamwi.

17. Nziizili nzila zyakupa zipa kuti tubotelwe?

17 Chiindi Pawulu naakazubulula majwi akaambwa aaJesu aakuti “kupa kulakkomanisya kapati kwiinda kupegwa” taakali kwaamba kuti katupana muzintu zyakunyama luzutu pesi wakali kuswaanizya akusungwaazyania, kuzulwida akugwasya aabo bayanda kugwasigwa. (Inc. 20:31-35, NW) Zintu nzyakaamba akuchita Pawulu zituyiisya mbukuyandikana kupa, kubelesya chiindi chesu, manguzu eesu kuba aluyando akubabikkila maanu bamwi.

18. Bamwi basikuyanduulisisya bakatyeni atala akupa?

18 Basikuyanduulisisya balanga-langa maponeno aabantu bakabona kuti, kupa kulakonzya kupa kuti bantu babotelwe. Amwi makani akapupululwa akatondeezya kuti bantu ngababotelwa kuti bachitila bamwi zibotu. Basikuyanduulisisya bakati kugwasya bamwi kupa kuti babe amakanze mubuumi akuti babotelwe nkaambo kupa kuti bajane ziyandikana. Alubo basyaabusongo basungwaazya bantu kuti balipede kuchita milimu iigwasya bamwi kuti batajatwi malwazi akuti babotelwe. Nikuba boobo, makani aaya taabagambyi pe bantu basyoma kuti Bbayibbele ndiJwi lyakazwa kuMulengi wesu Jehova.—2 Tim. 3:16, 17.

ATUZUMANANE KUPA

19, 20. Nkamboonzi nituyanda kuba bantu bapa?

19 Kulakonzya kutuyumina kupa bamwi kuti katukkala abantu babikkila maanu kuzintu nzibayanda kutali ziyandwa abamwi. Pesi Jesu wakati milawu mipati iibili nkuyanda Jehova amoyo wesu woonse, abuumi bwesu, amizeezo yesu amanguzu eesu akuyanda beenzuma mbuuli mbutuliyanda. (Mk. 12:28-31) Mbuuli mbutwabona muchiiyo eechi, bantu bayanda Jehova batobelezya chikozyano chakwe. Jehova aJesu balapa. Alubo batusungwaazya kuti tutobelezye chikozyano chabo nkaambo kuchita oobo kupa kuti tubotelwe. Kupa mumilimu njitubelekela Leza abeenzuma kuyoopa kuti Jehova alemekwe alubo zigwasya ndiswe kuswaanizya abamwi.

20 Toonse tulikubeleka changuzu kuti tupe bamwi kapati bakombima. (Gal. 6:10) Kuchita oobo kuyoopa kuti bamwi batuyande alubo tuyoobotelwa. Muli Tusimpi 11:25 Bbayibbele lyaamba kuti: “Moyo wamwaabi ulanenesegwa, ayooyo uutilaila ulatilaililwa alakwe.” Kupa bamwi akubafwida luzyalo munzila zisiyene-siyene zyabuumi bwesu bwachiKristu amulimu wesu kupa kuti tujane zilongezyo zyiingi. Muchiiyo chitobela tuyoolanga-langa nzila eezi.

^ par 13 Zina lyakachinchwa.