Skip to content

Skip to table of contents

 ZYAKACHITIKA MUBUUMI

Twakajana ‘Ngale Iiyandika Kapati’

Twakajana ‘Ngale Iiyandika Kapati’

WINSTON aPamela (Pam) Payne babelekela kuwofesi yamutabi yakuAustralasia. Nikuba kuti balabotelwa mubuumi pesi bakaswaana buyumu-yumu busiyene-siyene buswaanizya kwiiya ziyanza zisiyene-siyene akulisimya kukufwidwa amwana wakatalinazyalwa. Nikuba kuti bakaswaana zyoonse eezi, balikutondeezya kuti balamuyanda Jehova abantu bakwe alubo balabotelwa mumulimu wakukambawuka. Mumbuzisisyo iitobela, twakabakumbila kuti batubuzye zyakabachitikila.

Winston, tukumbila utubuzye atala ambuwakamuyanduula Leza.

Ndakakomenena kupulazi lyakali kule akukkala bamwi, lili kuQueensland, kuAustralia. Mpuli yesu teeyakalikwe ndaba azyabukombi. Bantu biingi teendakabazi pe nkaambo twakali kukkala kule abamwi. Kuzwa nindakaba aminyaka iili 12, ndakasaanguna kuyanduula Leza. Ndakakomba kulinguwe, kandikumbila kuti ndizibe kasimpe kali atala anguwe. Mukuya kwachiindi, ndakajana mulimu kuAdelaide, kuSouth Australia mpawo ndakazwa kupulazi. Nindakali aminyaka iili 21, ndakabonana aPam kandiswayide kuSydney mpawo wakandibuzya atala abukombi bwamaBritish amaIsrayeli. Bukombi oobu bwaamba kuti bantu bakuBritain bakazwa kumisyobo yakasweeka yamaIsrayeli. Alubo bwaamba kuti misyobo eeyo, izwa kumisyobo iili kkumi yabwaami bwakunyika yakaba mubuzike mumwaanda wamunyaka wachi8 B.C.E. Nindakabweeda kuAdelaide, ndakabuzya umwi ngundakali kubelekaawe atala ankani eeyi, wakali wasaanguna kwiiya Bbayibbele aBakamboni baJehova. Nindakaambuulaawe kwama-awa mache atala anzibasyoma Bakamboni, ndakabona kuti nkombyo njindakakomba kandichili muniini, yasandulwa. Ndakasaanguna kwiiya kasimpe kali atala aMulengi wangu aBwaami bwakwe! Ndakiijana ‘ngale iiyandika kapati.’—Mt. 13:45, 46.

Pam, anduwe wakasaanguna kuyanduula ngale kuchili muniini. Wakayijana biyeni?

Ndakakomenena mumpuli yakali kuyanda zyabukombi mudolopo litegwa Coffs Harbour, kuNew South Wales. Bazyali bangu asyaanene abanene bazyala baama, bakali kusyoma njiisyo zyabukombi bwamaBritish  amaIsrayeli. Ime, munyandumaangu, mukulana wangu, ama-cousin bangu biingi twakakomezegwa katusyoma kuti Leza uyandisya bantu bali amasyaanyinakulu maBritish. Teendakali kuzisyoma pe njiisyo eezyo alubo teendakali kulimvwa kandili aafwiifwi aLeza. Nindakali aaminyaka iili 14, ndakaswaya zikombelo zisiyene-siyene ziswaanizya chaAnglican, chaBaptist, achaSeventh-day Adventist. Pesi taakwe nizyakandigwasya kuti ndizibe Leza.

Mukuya kwachiindi, twakalongela kuSydney nkundakaakubonana aWinston naakaswayide nkuko. Mbuuli mbaawamba, kwaambuuzyania nkutwakachita atala azyabukombi, kwakapa kuti ayiye Bbayibbele aBakamboni. Kuzwa waawo, magwalo ngaakali kundilembela nitwakali kuyandana, akazwide mavesi! Kwaamba choonzyo, kumasaangunino ndakali kukataazikana alubo chimwi chiindi zyakali kundinyemya. Pesi mukuya kwachiindi ndakazoobona kuti nzyaakali kundilembela kakali kasimpe kali atala aLeza.

Mu1962, ndakaya kuAdelaide kuti ndikakkale aafwiifwi aWinston. Winston wakachitide mabambe aakuti ndikakkale aThomas Sloman amukayintu wakwe Janice, bakali kubeleka kabali mamishinali kuPapua New Guinea. Achiindi eecho, ndakali aminyaka iili 18 alubo bakandigwasya kuti ndizibe zyiingi atala aJehova. Ndakasaanguna kwiiya Jwi lyaLeza alubo ndakabona kuti nzindakali kwiiya kakali kasimpe. Ime aWinston nitwakachada, twakasaanguna buumi bubotezya bwakubelekela Jehova katuli aamwi, bwakatugwasya kuti tubone mbiiyandikana ngale njitwakajene nikuba kuti twakali kuswaana masunko.

Winston, tubuzye mbuwakasaanguna kubelekela Jehova.

A. Mepu iitondeezya nyendo zyesu nitwakali mumulimu wabbazu

B. Zitampa zyakutusuwa tumwi. Kasuwa kaKiribati akaTuvalu chiindi twakali kutegwa Gilbert aEllice

C. Kasuwa kabotu kakuFunafuti muTuvalu. Twakali kuswaya mukasuwa aaka mamishinali kabatanasika

Nitwakali aachiindi chifwiifwi katukwetene, Jehova wakatujulila mulyango wakusaanguna wakumubelekela aakati ‘kamilyango mipati’ njitwakajana. (1 Kor. 16:9) Mulyango wakusaanguna twakawubuzigwa aaMukwesu Jack Porter wakali kuswaya mbungano yesu yakali niini, kali mulangizi wabbazu. (Lino tubelekaamwi muKkomiti yaMutabi wakuAustralasia.) Jack amukayintu wakwe Roslyn, bakatusungwaazya kuti tube mapayona bachiindi choonse. Alubo twakapayona kwaminyaka iili 5. Nindakali aaminyaka iili 29, ime aPam twakakumbilwa kuti tubeleke katuli mumulimu wabbazu kuTusuwa twakuSouth Pacific twakali aansi aamutabi wakuFiji. Tusuwa ootu twakali kuswaanizya American Samoa, Samoa, Kiribati, Nauru, Niue, Tokelau, Tonga, Tuvalu aVanuatu.

Muchiindi eecho, bantu bamutusuwa ootu, bakali kuyeeyela Bakamboni baJehova kuti bachita zintu zitali kabotu, nkinkaako, twakeelede kuchenjelela zintu zyakali kuchitika. (Mt. 10:16) Mbungano zyakali ziniini alubo bamwi teebakali kukonzya pe kutupa aakoona. Nkinkaako, twakali kukumbila bamwi bamuchilawu kuti tukkale aalimbabo alubo chiindi chiingi bakali kututambula.

Winston, ulawuyandisya mulimu wabusanduluzi. Niinzi chakapa kuti uuyande?

KuSamoa, kandilikuchitisya chikolo chabaalu

Muchiindi eecho, bakwesu bamutusuwa twakuTonga, bakali aatubbuku atupepa tuche mumulaka wachiTonga, waambulwa aabantu bakuPolynesia. Mumulimu wakukambawuka, bakali kubelesya bbuku lyachikuwa litegwa The Truth That Leads to Eternal Life, nibakali kwiiya aabantu. Nikwakali kuchitwa chikolo chabaalu chamviki zine, baalu batatu bakachizi mbichaani chikuwa, bakazumina kusandulula bbuku litegwa The Truth muchiTonga chakuPolynesia. Pam nguwe wakali kutayipa, kuzwa waawo, twakalitumizya kumutabi wakuUnited States kuti likapulintwe. Kusandulula bbuku eeli kwakatutolela mviki zili 8. Nikuba kuti busanduluzi bwabbuku eeli teebwakanembene kabotu pesi lyakagwasya bantu baambuula chiTonga kuti bayiye kasimpe. Ime aPam tatweensi basanduluzi pe pesi kuchita mulimu ooyu kwakapa kuti tuuyande loko.

Pam, buumi bwamutusuwa bwakasiyene biyeni abwakuAustralia?

Bbaasi njitwakali kubelesya kayili ng’anda nitwakali mumulimu wabbazu

Bwakasiyene kule loko! Muli zimwi ndawu, kwakali mansenya miingi, kwakali kupya, kwakali makoswe, twakali kuchiswa alubo chimwi chiindi twakali kubula chakulya. Kubbazu limwi, kumamanino aabuzuba abuzuba, twakali kulyookezya  katuli mu-fale, chaamba zina lyachiSamoa lyamaanda aachiPolynesia aakavumbidwe aabwizu pesi aatakwe miduli. Amwi mazuba mweezi niwakali kubala loko, twakali kubona tukunka alubo mweezi wakali kubala mulwizi. Ziindi eezyo zibotu, zyakali kutupa mweenya wakuyeeyesesya, kukomba akuyeeya zintu zibotu kutali zibi.

Twakali kubayanda bana alubo bakali kuyanda kuziba zyiingi nibakali kubona makuwa bazwa kuli zimwi zisi mbuuli ndiswe. Nitwakaswayide kuNiue, umwi mwana mulombe wakasaanguna kubukusa maboko aWinston aakazwide boya mpawo wakati, “Ndilayiyanda milimba yako.” Taakwe naakali wabona bantu bali amaboko aali aaboya alubo taakali kukonzya kuti ulapandulula biyeni!

Zyakali kutuchisa kubona mbubakali kufwaba ambubakali kupona bantu bakubusena oobu. Bakali aabusena bubotu pesi teebakalikwe zibbadela alubo bakali amaanzi mache. Pesi bakombima aaba teebakali kukataazikana pe. Bakali babuzibila buumi buli boobo. Bakali kubotelwa nkaambo bakali kukkala ampuli zyabo, bakali aabusena bwakukombela akuti bakali aachilongezyo chakutembawula Jehova. Chikozyano chabo chakatugwasya kuti tubikkile maanu kuzintu ziyandikana akupona buumi buuba.

Pam, chimwi chiindi wakeelede kuyanduula maanzi akujika muzyiimo zipya. Wakali kuzichita biyeni?

KuTonga, Pam kalikuwacha zigogo zyesu

Ndilamulumba ndeende nkaambo wakandiyiisya. Wakandiyiisya zintu zyiingi zigwasya mbuuli kukutula mulilo akujikila aamulilo akupona kutakwe zintu zyiingi. Chimwi chiindi katuswayide kuKiribati, twakali kukkala mukaanda kaniini kabwizu, kakali a-floor iipangidwe aatufuwa twabanyama amiduli ya-bamboo. Kuti ndijike, ndakasya kkomba mung’anda kuti ndipange chikko akubelesya makwa aama-coconut kuti zibe nkuni. Kuti tujane maanzi, ndakali kwiinka kuchikala abamwi bachikayintu. Kukuteka maanzi, bakali kubelesya kasamu kakali kulampa mamita aali 2, mpawo kakuli ntambo kunembo mbuuli kalobyo. Muchiindi chakuti babikke kalabwi, bakali kwaangilila kagomo. Bakali kuchinchaana kuteka maanzi kwiinda mukuwaala kasamu kali aakagomo mumaanzi mpawo bakali kudonsa ntambo yakagomo nikasika mumaanzi. Kagomo nikasendeka, kakali kuzula maanzi. Ndakali kuyeeya kuti nkuuba pesi ndakazoolibonena nichakasika chiindi changu. Ndakawaala ntambo pesi kagomo kakali kuuma aamaanzi akwiibuka luzutu! Nibakakatala kundiseka, umwi mwanakazi wakazoondigwasya. Bantu aaba bakali abuuya, kabatugwasya.

Moonse mwakazoosaanguna kuuyandisya mulimu wanu kamuli mutusuwa. Amutubuzye zimwi zinoneezya nzimwakaswaana.

Winston: Twakatola chiindi kuti tuzibe zimwi ziyanza zyankuko. Muchikozyano, chiindi bakombima nibakali kutupa chakulya, bakali kutupa choonse nchibakali aacho mubuzuba oobo. Kumasaangunino, teetwakazi pe kuti twakeelede kubasiila. Twakali kuchimaninsya choonse nchibakali kutupa! Pesi nitwakazoochiziba chiyanza chabo, teetwakali kuchimaninsya pe. Bakombima bakali kumvwisisisya nikuba kuti chimwi chiindi twakali kuchita zintu zitali nzizyo. Alubo bakali kubotelwa kutubona nikwayinda myeezi iili 6, nitwakali kubaswaya katuli mumulimu wabbazu. Bakwesu abachizi bamutusuwa taakwe bambi pe Bakamboni mbibakali kubona kunze kwandiswe.

Kukasuwa kakuNiue, katuya kukukambawuka abamwi

Kubaswaya nkutwakali kuchita kwakali kupa bumboni kubantu bamuzilawu eezi. Bantu biingi bakali kuyeeya kuti bakwesu bakalitalisizya chikombelo. Bakali kugamba nibakali kubona mukuwa amukayintu wakwe bakali kuzwa kuli chimwi chisi, kabaswayide bakombinyina.

Pam: Chimwi chintu chakachitika nchinditalubi, chindiyeezya zyakachitika nitwakali kuKiribati, kwakali mbungano yakali aabakwesu abachizi bache. Kwakali mwaalu uumwi biyo, mukwesu Itinikai Matera, wakali kubeleka changuzu kuti atugwasye. Limwi zuba, wakaza achisewe chakali aaji limwi. Wakati, “Ndilyanu.” Kuchiindi eecho, ji lyankuku twakali kuliyanda loko nkaambo twakali twaba aachiindi katutalilyi. Chipo eechi chiniini chakatusika aamoyo.

 Nikwakayinda minyaka miche yakatobela, Pam, wakafwidwa mwana, katanazyalwa. Niinzi chakakugwasya kuti ulisimye?

Mu1973, ndakabaada, katuli kuSouth Pacific. Twakasala kubweeda kuAustralia mpawo nikwakayinda myeezi iili 4, mwaneesu wakafwa katanatumbukwa. Nikuba Winston kwakamuchisa kufwa kwamwaneesu. Kuchisigwa moyo nkundakali kumvwa, kwakali kuyabumana pesi teekwakamaninina pe kusikila nitwakabala Ngaziyakulinda (Chitonga) yamuApril 15, 2009. Chipanzi chitegwa Mibuzyo Yabasikubala, chakali aamubuzyo uuti: “Ikuti mwana wafwa kacili mwida, sena ujisi bulangizi bwabubuke?” Chiiyo eechi chakati, Jehova nguwe uuyoosala zyakuchita akuti uchita zintu zili kabotu chiindi choonse. Uyoogwisya machise oonse ngituswaana munyika eeyi mbi akuzumizya Mwanaakwe kuti ‘anyonyoone milimu yaSaatani.’ (1 Joh. 3:8) Alubo chiiyo eechi chakatugwasya kuti twiibone kayiyandikana loko “ngale” njitulaayo, mbutuli bakombi baJehova. Kuziba nzibuyootuchitila Bwaami, kupa kuti tube aabulangilizi.

Mwaneesu naakafwa, twakasaanguna lubo mulimu wachiindi choonse. Twakabeleka kwamyeezi miche kuBbeteli yakuAustralia mpawo twakazoonjila lubo mumulimu wabbazu. Mu1981, katuli twaba aminyaka iili 4, katubelekela mumyuunzi iili kuNew South Wales akuSydney, twakatambwa kuti tukabelekele kumutabi wakuAustralia, mbuuli mbwaakali kwiitwa chiindi. Alubo twali nkuko kuzwa chiindi eecho.

Winston, kubelekela kutusuwa twakuSouth Pacific kulikukugwasya na, mbukunga lino ulimuKkomiti yaMutabi kuAustralasia?

Iiyi, kulikundigwasya munzila zyiingi. Chakusaanguna, mutabi wakuAustralia wakakumbilwa kuti ulanganie American Samoa aSamoa. Mutabi wakuNew Zealand wakaswaanizigwa awakuAustralia mpawo wakazootegwa mutabi waAustralasia. Mazubaano, masena aalanganisigwa aamutabi waAustralasia aswaanizya Australia, American Samoa aSamoa, Cook Islands, New Zealand, Niue, Timor-Leste, Tokelau aTonga. Alubo masena aaya miingi ndakaba aachilongezyo chakwaaswaya kandili mwiiminini wamutabi. Kubelekaamwi abakwesu abachizi basyomeka bamutusuwa ootu, kwakandigwasya loko mbukunga lino ndibelekaabo kandili kuwofesi yamutabi.

Winston aPam kabali kumutabi waAustralasia

Kamamanino, ndiyanda kwaamba kuti, kwaminyaka myiingi, ime aPam, twakabona kuti teebapati luzutu bayanduula Leza. Twakayiya makani aaya kuzintu zyakachitika kulindiswe. Nikuba bachikula balayiyanda ‘ngale iiyandika kapati’ nikuba kuti bamwi bamumpuli teebaba aachiyandisyo. (2 Bam. 5:2, 3; 2 Mak. 34:1-3) Kwaamba choonzyo, Jehova nguLeza uuli aaluyando uuyanda kuti boonse bakajane buumi, kuswaanizya bapati abaniini!

Ime aPam nitwakasaanguna kuyanduula Leza muminyaka iili 50 yayinda, teetwakazi pe kuti kuyanduula ooku kuzootusisya kuli. Nisimpe, kasimpe kaBwaami, ningale iiyandikana loko! Tukanzide kwiijatisisya ngale eeyo iiyandikana amanguzu eesu woonse!