Skip to content

Skip to table of contents

 CHIIYO 15

Tobelezya Jesu Kuti Ukkale Kuli Aaluumuno

Tobelezya Jesu Kuti Ukkale Kuli Aaluumuno

“Luumuno lwa Leza oolo lwiinda maano oonse luyookwabilila myoyo yanu.”—FLP. 4:7.

LWIIMBO 113 Luumuno Ndotujisi

ZITAYIIGWE *

1-2. Nkamboonzi Jesu naakakataazikene?

MUBUZUBA bwakwe bwamamanino kali aanyika, Jesu wakalikataazikene. Wakali kuyoojayigwa abantu bachita zibi. Pesi Jesu taakali kukataazikana akaambo kakuti chiindi chakuti ajayigwe chakali chaba aafwiifwi. Wakali kumuyanda Wisi alubo wakali kuyanda kumubotezya. Jesu wakalizi kuti kukkala kasyomeka nikuba kubuyumu-yumu mbwaakali kuyooswaana, kwakali kuyoopa kuti agwasilizye mukusalazigwa kwazina lyaJehova. Jesu wakali kubayanda bantu alubo wakalizi kuti bantu bakali kuyooba abulangilizi bwakupona kukabe kutamani kuti wayinkilila kunembo kasyomeka kuli Jehova kusikila kulufu.

2 Nikuba kuti Jesu wakalikataazikene pesi wakali aaluumuno. Wakabuzya baapostolo bakwe kuti: “Ndamupa luumuno lwangu.” (Joh. 14:27) Jesu wakali ‘aaluumuno lwaLeza,’ chaamba kulyiiba nkwabaako muntu akaambo kakuba abweenzinyina buli aafwiifwi aJehova. Luumuno Jesu ndwaakalaalo, lwakapa kuti atakataazikani zyiindilide.—Flp. 4:6, 7.

3. Tulalanga-langaanzi muchiiyo eechi?

3 Nisimpe kuti tatukaswaani mapenzi aali mbuuli aaJesu pesi batobeli bakwe boonse bayooswaana buyumu-yumu. (Mt. 16:24, 25; Joh. 15:20) Alubo zimwi ziindi tunookataazikana mbuuli Jesu. Kujana twachita biyeni kuti kukataazikana kutatukachizyi kuba aaluumuno mumizeezo? Atulange-lange zintu zitatu Jesu nzyaakachita kali aanyika, ambutukonzya kumutobelezya nituswaana buyumu-yumu.

 JESU WAKALI KUKOMBA KWAZIINDI ZYIINGI

Tulakonzya kukkala katuli aaluumuno kwiinda mukukomba (Langa fuka 4-7)

4. Nziizili zikozyano zitondeezya kuti Jesu wakakomba twiingi mubuzuba katanafwa alubo ngaali malayilile maKristu ngibakazoolembelwa muli 1 Batesalonika 5:17?

4 Bala 1 Batesalonika 5:17. Mubuzuba bwamamanino kali aanyika, Jesu wakakomba kwaziindi zyiingi. Naakatondeezya basikwiiya bakwe mbubeelede kumuyeeya, Jesu wakakombela chinkwa awayini. (1 Kor. 11:23-25) Katanazwa aabusena mbubakali kuchitila Pasika, Jesu wakakomba kali abasikwiiya bakwe. (Joh. 17:1-26) Chiindi naakasika kuChilundu chama-Olifa abasikwiiya bakwe mansiku, wakakomba kwaziindi zyiingi. (Mt. 26:36-39, 42, 44) Alubo majwi akumaninsizya Jesu ngakaamba katanafwa, yakali nkombyo. (Lk. 23:46) Jesu wakakomba kuli Jehova muzintu zyoonse zyakachitika mubuzuba bwamamanino kali aanyika.

5. Nkamboonzi baapostolo nibakayoowa?

5 Kamwi kaambo kakagwasya Jesu kuti alisimye naakali mubuyumu-yumu nkakuti, wakali kusyoma Wisi nkaambo wakakomba kwaziindi zyiingi. Pesi baapostolo bakakachilwa kukakatila munkombyo mubusiku oobo. Eezi zyakapa kuti bayoowe nibakasunkwa. (Mt. 26:40, 41, 43, 45, 56) Andiswe twazooswaana buyumu-yumu, tuzookonzya kukkala katusyomeka kuti twatobelezya chikozyano chaJesu ‘akukomba chakutaleka.’ Niinzi nzitukonzya kukombela?

6. Lusyomo lutugwasya biyeni kuti tukkale katuli aaluumuno?

6 Tulakonzya kukomba kuli Jehova katukumbila kuti ‘atuyungizizye lusyomo.’ (Lk. 17:5; Joh. 14:1) Tweelede kuba alusyomo nkaambo Saatani uyoobasunka batobeli baJesu boonse. (Lk. 22:31) Lusyomo luyootugwasya  biyeni kuti tube aaluumuno nikuba kuti chimwi chiindi tuswaana mapenzi miingi? Kuti twachita zyoonse nzitukonzya kuti tulwane aasunko, lusyomo luyoopa kuti tusiye zintu mumaboko aaJehova. Kusyoma kuti ulizizi nzyayelede kuchita, kupa kuti tube aaluumuno mumizeezo amumoyo.—1 Pet. 5:6, 7.

7. Wayiyaanzi kumakani aakaambwa aaRobert?

7 Kukomba kutugwasya kuti tukkale katuli aaluumuno mumizeezo nikuba nituswaana masunko mapati. Atulange-lange zyakachitika kuli Robert, mwaalu uusyomeka waba aaminyaka yakuma80. Wakati: “Malayilile aali muli Bafilipi 4:6, 7, andigwasya kuti ndilwane buyumu-yumu mbundiswaana mubuumi. Ndakali apenzi lyamali. Aali chimwi chiindi ndakasweekelwa chilongezyo chakuba mwaalu.” Niinzi chakagwasya Robert kuti akkale kali aaluumuno lwamumoyo? Wakati: “Kuti ndasaanguna kukataazikana ngandakomba. Nindikomba kwaziindi zyiingi, ndilimvwa kandili aaluumuno.”

JESU WAKALI KUKAMBAWUKA CHABUSUNGU

Tulakonzya kukkala katuli aaluumuno kwiinda mukukambawuka (Langa fuka 8-10)

8. Nkaakali kamwi kaambo kalembedwe muli Johane 8:29, kakapa kuti Jesu abe aaluumuno?

8 Bala Johane 8:29. Jesu wakali aaluumuno mumizeezo nikuba naakali kusunkwa nkaambo wakalizi kuti uchita zintu zibotezya Wisi. Wakali kuswiilila chiindi choonse, nikuba nikwakali kuyumu kuchita oobo. Wakali kumuyanda Wisi alubo kukomba Jehova chakali chintu chiyandikana loko mubuumi bwakwe. Katanaza aanyika, Jesu wakali ‘mubelesi uuli aluzibo.’ (Tus. 8:30) Alubo naakali aanyika,  wakali musungu kubuzya bamwi atala aWisi. (Mt. 6:9; Joh. 5:17) Mulimu ooyu wakapa kuti Jesu abotelwe loko.—Joh. 4:34-36.

9. Nkamboonzi nitukonzya kukkala katuli aaluumuno mumizeezo kuti katujisikini mumulimu wakukambawuka?

9 Tulakonzya kutobelezya Jesu kwiinda mukuswiilila Jehova ‘akuba azintu zyiingi zyakuchita mumulimu waMwaami chiindi choonse.’ (1 Kor. 15:58) ‘Kubelesya chiindi chesu choonse’ mumulimu wakukambawuka, kupa kuti tube aamaboneno aalikabotu atala amapenzi ngituswaana. (Mil. 18:5) Muchikozyano, bantu mbitukambawukila, baswaana mapenzi aayinda eesu. Nikuba boobo, kuti bayiya kuyanda Jehova akubelesya malayilile aakwe, balachincha maponeno aabo akubotelwa. Eezi zitugwasya kubona kuti Jehova uuli aandaba andiswe. Lusyomo luli boobo, lupa kuti tukkale katuli aaluumuno mumizeezo. Muchizi uuchiswa bulwazi bwadepression alubo kalimvwa katagwasyi, wakabona kuti makani aaya ngachoonzyo. Wakati: “Kukkala kandili mumulimu wakukambawuka, kundigwasya kuti ndikonzye kulwana aamizeezo yangu akuti ndibotelwe. Ndibonaanga ndilimvwa oobo nkaambo nindili mumulimu wakukambawuka, ndilimvwa kandili aafwiifwi aJehova.”

10. Wayiyaanzi kumakani akaambwa aaBrenda?

10 Atulange-lange chikozyano chamuchizi uutegwa Brenda. Muchizi ooyu amwanaakwe musimbi, bali abulwazi bukataazya. Muchizi Brenda weenda awheelchair alubo uli amanguzu mache. Nga wakambawuka kung’anda ang’anda kuti kazikonzeka pesi chiindi chiingi, ukambawuka kwiinda mukulembela bantu magwalo. Wakati: “Nindakabona kuti bulwazi bwangu tabusilikiki pe munyika eeyi, ndakasaanguna kubikkila maanu mumulimu wakukambawuka. Kwaamba choonzyo, kukambawuka kupa kuti nditayeeyi atala amapenzi aangu. Kundigwasya kuti ndibikkile maanu kukugwasya bantu mbitukambawukila muchilawu chesu. Alubo kundiyeezya atala abulangilizi mbundili aabo atala alyajuunza.”

JESU WAKALI KUZUMINA KUGWASIGWA ABEENZINYINA

Tulakonzya kukkala katuli aaluumuno kwiinda mukuba aabeenzuma bali kabotu (Langa fuka 11-15)

11-13. (a) Baapostolo abamwi bantu bakatondeezya biyeni kuti bakali beenzinyina baJesu bachoonzyo? (b) Beenzinyina baJesu bakapa kuti alimvwe biyeni?

11 Muchiindi choonse Jesu nchaakakambawuka, baapostolo bakwe basyomeka bakali beenzinyina bachoonzyo. Bakali mbuuli mweenzinyina waambwa mukasimpi kati, ‘kuli mweenzinyina uukakatila kwiinda mwanookwanu.’ (Tus. 18:24) Jesu wakali kubayanda beenzinyina aabo. Naakali kukambawuka aanyika, taakwe naba umwi wabanike bakwe, wakamusyoma. (Joh. 7:3-5) Aali chimwi chiindi, zibbululu zyakwe zyakayeeya kuti wapenga. (Mk. 3:21) Baapostolo baJesu bakali siyene ambabo nkaambo mubusiku katanafwa, Jesu wakaamba makani aatobela atala ambabo: “Nywebo ndinywe mwakakatila kulindime mumapenzi aangu.”—Lk. 22:28.

12 Chimwi chiindi, baapostolo bakali kuchita zintu zyakali kunyemya Jesu pesi taakali kulangisisya zibi nzibakali kuchita alubo wakabona kuti bakali kumusyoma. (Mt. 26:40; Mk. 10:13, 14; Joh. 6:66-69) Mubusiku bwamamanino Jesu kali abaalumi aaba basyomeka, wakababuzya kuti: ‘Ndimwaamba kuti muli beenzuma, nkaambo ndamuzibya zintu zyoonse nzindakamvwa kuli Taata.’ (Joh. 15:15) Nisimpe kuti beenzinyina bakali kumusungwaazya. Kumugwasya nkubakali kuchita mumulimu wakukambawuka kwakapa kuti Jesu abotelwe.—Lk. 10:17, 21.

13 Kuyungizya kubaapostolo, Jesu wakali abamwi beenzinyina bachaalumi abachanakazi, bakali kumugwasya mumulimu  wakukambawuka amuli zimwi nzila. Bamwi bakali kumutamba kumaanda aabo kuti bazoolyaamwi. (Lk. 10:38-42; Joh. 12:1, 2) Bamwi bakali kweendaawe akumugwasya kababelesya zintu zyabo. (Lk. 8:3) Jesu wakali abeenzinyina bali kabotu nkaambo wakali mweenzinyina uuli kabotu. Wakali kubachitila zintu zibotu alubo taakali kulangilila zyiingi kwiinda nzibakonzya. Jesu wakalimaninide pesi wakali kulutambula lugwasyo lwabeenzinyina bakali aachibi. Tulakonzya kuba aachoonzyo chakuti bakali kumugwasya kuti abe aaluumuno mumizeezo.

14-15. Kujana twachita biyeni kuti tujane beenzuma bali kabotu alubo kujana batugwasya biyeni?

14 Beenzuma bali kabotu batugwasya kuti tukkale katusyomeka kuli Jehova. Kuti tube aabeenzuma bali kabotu, tweelede kuba beenzinyina bali kabotu. (Mt. 7:12) Muchikozyano, Bbayibbele litusungwaazya kuti tulipede kugwasya bamwi, kapati ‘babulide.’ (Ef. 4:28) Kuli ngukonzya kugwasya na mumbungano yanu? Kuli sikupupulula uutakonzyi kweenda na akaambo kakuchembaala naakuti kuchiswa, ngukonzya kugwasya? Kuli mpuli iilikukataazikana apenzi lyamali na njukonzya kupa chakulya? Kuti kukonzya kubelesya webbusayiti iitegwa jw.org® a JW Library® app, kujana wabagwasya na bamwi mumbungano? Kugwasya bamwi, kupa kuti tubotelwe.—Mil. 20:35.

15 Beenzuma bayootugwasya chiindi nituswaana mapenzi akutugwasya kuti tube aaluumuno mumizeezo. Mbuuli Elihu mbaakaswiilila chiindi Jobu naakali kwaamba mapenzi aakwe, abeenzuma balatuswiilila amoyo  woonse chiindi nitubabuzya zitukataazya. (Job. 32:4) Tatweelede kulangilila kuti batusalile zyakuchita pesi tweelede kuswiilila chiindi nibatubuzya malayilile aazwa muBbayibbele. (Tus. 15:22) Mbuuli Mwaami Davida mbaakalibombya akuzumina kugwasigwa abeenzinyina, andiswe tweelede kulibombya akuzumina kugwasigwa abeenzuma chiindi nituyanda lugwasyo. (2 Sam. 17:27-29) Nisimpe, beenzuma bali boobo, nzipo zizwa kuli Jehova.—Jak. 1:17.

MBUTUKONZYA KUKKALA KATULI AALUUMUNO

16. Kweendelana amajwi aali muli Bafilipi 4:6, 7, njiili nzila ayilikke iipa kuti tujane luumuno? Pandulula.

16 Bala Bafilipi 4:6, 7. Nkamboonzi Jehova natubuzya kuti tujana luumuno “kwiinda muli Kristo Jesu”? Nkaambo tujana luumuno lutamani mumizeezo ambutulimvwa kuti twamvwisisisya mulimu waJesu mumakanze aaLeza akuba alusyomo mulinguwe. Muchikozyano, zibi zyesu zyoonse zilakonzya kulekelelwa kwiinda muchinunuzyo chaJesu. (1 Joh. 2:12) Kuyeeya makani aaya kulawumbulizya kaka! Mbukunga Jesu Mwaami waBwaami bwaLeza, uyoogwisya mapenzi woonse ayeetwa aaSaatani abweende bwanyika eeyi. (Is. 65:17; 1 Joh. 3:8; Ciy. 21:3, 4) Eezi zipa kuti tube abulangilizi! Alubo nikuba kuti Jesu utupede mulimu muyumu pesi unooli andiswe, katugwasya mumazubaano aakumamanino. (Mt. 28:19, 20) Eezi zipa kuti tube achibindi! Luumbulizyo, bulangilizi aachibindi, nzintu ziyandikana kuti tube aaluumuno.

17. (a) Kujana muKristu wachita biyeni kuti abe aaluumuno mumizeezo? (b) Mbuuli mbukusyomezedwe muli Johane 16:33, tuyookonzya kuchitaanzi?

17 Kujana wachita biyeni kuti ube aaluumuno mumizeezo kuti waswaana masunko aasiyene-siyene mubuumi? Ulakonzya kuchita oobo kwiinda mukuchita zintu Jesu nzyaakachita. Chakusaanguna, komba chakutaleka. Chabili, swiilila Jehova alubo ukambawuke chabusungu nikuba kakuli kuyumu kuchita oobo. Alubo chachitatu, zumina kuti beenzinyokwe bakugwasye chiindi nuli mumapenzi. Kuti wachita oobo, luumuno lwaLeza luyookwabilila moyo wako amizeezo. Alubo mbuuli Jesu uyoozunda buyumu-yumu boonse mbuswaana.—Bala Johane 16:33.

LWIIMBO 41 Komvwa Mupailo Wangu

^ par 5 Toonse tuswaana buyumu-yumu bupa kuti kutuyumine kuba aaluumuno. Muchiiyo eechi, tulalanga-langa zintu zitatu Jesu nzyaakachita, andiswe nzitukonzya kuchita kuti tukkale katuli aaluumuno nikuba nituswaana buyumu-yumu bupati.