Skip to content

Skip to table of contents

Nibaalumi Basalidwe—Amwiiye Timotewo

Nibaalumi Basalidwe—Amwiiye Timotewo

MUMUNYAKA wakiinda, bakwesu biingi bakasalwa kuti babe baalu ababelesi babelekela mumbungano zyaBakamboni baJehova munyika yoonse. Kuti kuli akati kabo, tusyoma kuti ulabotelwa achilongezyo eecho.

Nikuba boobo, ulakonzya kukataazikana. Umwi mwaalu uuchikula uutegwa Jason wakati: “Nindakasalwa, ndakali kuyoowa kuti ndizoowukonzya na mulimu ooyu.” Musa aJeremiya nibakapegwa mikuli mipya aJehova, bakalimvwa kabateeleli. (Kul. 4:10; Jer. 1:6) Kuti kulimvwa oobo, kujana wachita biyeni kuti uzunde muzeezo ooyo akuti uzumanane kubikkila maanu muzintu zyabukombi? Atulange-lange chikozyano chasikwiiya muKristu uutegwa Timotewo.—Inc. 16:1-3.

TOBELEZYA CHIKOZYANO CHATIMOTEWO

Timotewo wakali aminyaka iili kuma20, Pawulu naakamukumbila kuti bakakambawuke aamwi. Kumasaangunino, Timotewo wakali kuyoowa nkaambo wakali muniini, taakali kulisyoma alubo wakali kuyoowa kuchita mulimu mupya ngwaakapedwe. (1 Tim. 4:11, 12; 2 Tim. 1:1, 2, 7) Nikuba boobo, nikwakayinda minyaka iili 10, Pawulu wakabuzya maKristu bakumbungano yakuFilipi kuti: “Ndalangila ku-Mwami Jesu kuti nzoofwambaana kumutumina Timoteo . . . Nkaambo taakwe umbi uuli amoyo mbuli nguwe.”—Flp. 2:19, 20.

Niinzi chakapa kuti Timotewo abe mwaalu uulikabotu? Atulange-lange zintu zili 6 nzitukonzya kwiiya kulinguwe.

1. Wakali kubayanda bantu. Pawulu wakabuzya maKristu bakuFilipi kuti: ‘Timotewo uuyoozilanganya bweelede zintu zijatikizya ndinywe.’ (Flp. 2:20) Timotewo wakali kubayanda chachoonzyo bantu. Wakali kuyanda kuti bantu babe abweenzinyina bulikabotu aJehova alubo wakali kulipeda kuti abagwasye.

Nibaalu, tamweelede kuchita mbuuli muntu weenzya bbaasi, uubikkila maanu kuti afwambaane kusika achilindilo chamabbaasi pesi katabikkili maanu kubantu bayanda kutanta bbaasi. William, uuli aminyaka yiinda ku20 kali mwaalu, usungwaazya baalu bapya kuti: “Amubayande bakwesu abachizi. Amuzibe nzibayanda kutali kubikkila maanu kumalayilile aazwa kumbunga luzutu.”

2. Wakali kubikka mulimu wakukambawuka mubusena bwakusaanguna. Pawulu wakatondeezya kuti Timotewo wakalisiyene abamwi naakati: “Boonse buyo balayeeya kuligwasya beni luzutu, tabayeeyi makani aa-Kristo Jesu pe.” (Flp. 2:21) Pawulu wakalemba majwi aaya kali kuRoma. Wakabona kuti maKristu bakuRoma, bakali kubikkila maanu kuzintu zyakumubili. Taakwe nibakali kuuchita chakumaninina mulimu wakukambawuka. Pesi Timotewo teembaakabede pe. Timotewo wakawubelesya mweenya wakuchita zyiingi mumulimu wakukambawuka alubo wakali amaboneno aali mbuuli aIsaya wakati: “Mpendi! Unditume mebo!”—Is. 6:8.

Niinzi chikonzya kukugwasya kuti ube amaboneno aalikabotu kuzintu zyakumubili kumwi kuchita kabotu muzintu zyabukombi? Chakusaanguna, ziba nzweelede kubikka mubusena bwakusaanguna. Mwaapostolo Pawulu wakatusungwaazya kuti ‘tusalulule zintu zyiinda kubota.’ (Flp. 1: 10) Bikka zintu ziyandwa aLeza mubusena bwakusaanguna. Chabili, pona buumi buuba. Yezya kuchesya zintu zikonzya kumana chiindi chako. Pawulu wakasungwaazya Timotewo kuti: “Kotija zisusi zyabwanike, ukatobele bululami alusyomo aluyandano aluumuno.”—2 Tim. 2:22.

3. Wakabeleka changuzu mumulimu waLeza. Pawulu wakayeezya maKristu bakuFilipi kuti: “Mulibwene ziyanza zyakwe [Timotewo] mbuzibede, mulizi kuti mbubonya mbuli mwana mbwabelekela wisi, alakwe wabelekela ndime cakugwasya milimo ya-Makani Mabotu.” (Flp. 2:22) Timotewo taakali mukandu pe. Wakabeleka changuzu aPawulu alubo eezi zyakapa kuti bamvwanane loko.

Kuli mulimu mwiingi loko mumbunga yaJehova. Mulimu ooyu upa kuti tubotelwe akuti tuswene afwiifwi abakwesu abachizi. Nkinkaako, ‘pangika moyo wako lyoonse kumilimu yaMwaami.’—1 Kor. 15:58.

4. Wakabelesya nzyaakayiya. Pawulu wakalembela Timotewo kuti: “Yebo ulitobelede ndime mulwiisyo lwangu amumyeendo yangu amumakanze aangu, mulusyomo amukukazika moyo amukuyandana amulukakatilo.” (2 Tim. 3:10) Timotewo wakeelela kupegwa imwi mikuli nkaambo wakabelesya zintu nzyaakayiya.—1 Kor. 4:17.

Kuli muntu uusimide muzintu zyabukombi ngulombozya kuba mbuuli nguwe na? Kuti kutakwe ngulombozya, yezya kumuyanduula. Tom, waba aminyaka myiingi kali mwaalu wakati: “Nindakachili kutalika kuba mwaalu, umwi mukwesu wakali waba achiindi chilamfu kali mwaalu wakanditondeezya luyando alubo wakandiyiisya zintu zyiingi. Ndakali kumubuzya zintu zyakali kundikataazya alubo ndakali kuzibelesya zintu nzyaakali kundibuzya. Eezi zyakapa kuti nditayoowi pe.”

5. Wakazumanana kuliyiisya. Pawulu wakasungwaazya Timotewo kuti: “Koliyiisya omwini kojisi makanze aakubelekela Leza cakulyaaba.” (1 Tim. 4:7, NW) Nikuba kuti muntu uuchijaana uli amuntu umuyiisya pesi alakwe weelede kuliyiisya. Alubo Pawulu wakamusungwaazya kuti: “Sungwaala kukubala akukukambauka akukufundisya. . . . Sungwaala kuzintu ezi, ulitakate kulinzizyo amoyo wako woonse, kuti bantu boonse babone mboya bukomena mumilimo yako.”—1 Tim. 4:13-15.

Andinywe nibaalu, mweelede kuzumanana kuliyiisya. Mweelede kusungwaala muzintu zyabukombi alubo mweelede kuziba malayilile mapya atondeezya mbuzyeelede kuchitwa zintu mumbunga yaJehova. Alubo mutalisyomi zyiindilide kamuyeeya kuti mulakonzya kuchita kufumbwa chintu kamutachitide kuyanduulisisya. Mweelede kutobelezya Timotewo kwiinda ‘mukulibonena akufundisya kwenu.’—1 Tim. 4:16.

6. Wakali kusyoma kuti muuya uusalala ulamugwasya. Pawulu naakali kwaamba mbaakali kuchita Timotewo mumulimu wakukambawuka wakati: “Cintu eco cibotu ncowakapegwa, kocibamba kabotu kunguzu zya-Muuya Uusalala uutukalilide mukati.” (2 Tim. 1:14) Timotewo wakali kugwasigwa amuuya uusalala kuti azwidilile mumulimu wakukambawuka.

Donald, uuli aminyaka myiingi kali mwaalu wakati: “Baalumi basalidwe beelede kuba abweenzinyina bulikabotu aLeza. Kuti bachita oobo ‘balazumanana kuba anguzu zyiingi.’ Kuti bakumbila muuya uusalala akubelekela kuba amichelo yamuuya, bayooba chilongezyo kubakwesu abachizi bamumbungano.”—Int. 84:7; 1 Pet. 4:11.

AMUBOTELWE ACHILONGEZYO CHANU

Zilabotezya kubona baalu ababelesi babelekela bapya kabali kuzumina kubelekela Jehova. Jason waambwa kumatalikilo wakati: “Chiindi choonse nindali mwaalu, ndayiya zintu zyiingi alubo tandichiyoowi pe. Lino ndilabotelwa kuti ndili mwaalu alubo ndikubona kakuli chilongezyo chipati.”

Nibaalumi basalidwe, muyoozumanana na kubikkila maanu muzintu zyabukombi? Amwiiye Timotewo. Eezi ziyoopa kuti mube chilongezyo kubakombinyokwe.