Skip to content

Skip to table of contents

Katusungwaazyania ‘Katuchita Oobo Lyoonse’

Katusungwaazyania ‘Katuchita Oobo Lyoonse’

“Katunga katuyeeyana . . , kamucenjezyanya twaambo, kamucita obuya lyoonse mbomukubwene kuti buzuba bwa-Kristo buli afwaafwi.”—HEB. 10:24, 25.

NYIMBO: 9087

1. Nkamboonzi mwaapostolo Pawulu naakasungwaazya maKristu bachiHebbrayo kuti ‘bachite oobo lyoonse’ mukusungwaazya bakombinyina?

NKAMBOONZI nitweelede kusungwaazya bamwi? Mulugwalo ndwaakalembela maKristu bachiHebbrayo, mwaapostolo Pawulu wakaamba kaambo kapa kuti tuchite oobo. Wakababuzya kuti: ‘Katunga katuyeeyana, katubusyanya-busyanya mukuyandana akuchita milimu mibotu. Tutanoonga katuleka kulibunga-bunga, mbuuli bamwi mbubaleka, anu kamuchenjezyanya twaambo, kamuchita obuya lyoonse mbomukubwene kuti buzuba bwaKristu buli afwiifwi.’ (Heb. 10:24, 25) Nikwakiinda minyaka iili musanu biyo, maJuda bakali kukkala muJerusalemu bakabona kuti “buzuba bwa-Jehova” bwakali bwaba afwiifwi alubo bakabona zitondeezyo Jesu nzyaakababuzizye kuti baakuzibona, bakeelede kuzwa mumuunzi. (Inc. 2:19, 20; Lk. 21:20-22) Mu70 C.E., buzuba bwaJehova bwakasika chiindi maRoma naakanyonyoona muunzi waJerusalemu.

2. Nkamboonzi nitweelede kusungwaazyania?

 2 Mazubaano, kuli zintu zyiingi zitondeezya kuti ‘buzuba bwa-Jehova bupati, buyoosya loko’ bwaba afwiifwi. (Joel. 2:11) Musinsimi Zefaniya wakati: “Buzuba bupati bwa-Jehova buli kufwaafwi, ncobeni buli kufwaafwi, bulafwambaana loko kusika.” (Zef. 1:14) Nchenjezyo eeyi ichibeleka nikuba mazubaano. Naakabona kuti buzuba bwaJehova bwakali bwaba afwiifwi, Pawulu wakati: ‘Katunga katuyeeyana, katubusyanya-busyanya mukuyandana akuchita milimu mibotu.’ (Heb. 10:24) Nkinkaako, tweelede kubabikkila maanu bakombima kuti tukonzye kubasungwaazya.

MBAANI BEELEDE KUSUNGWAAZIGWA?

3. Niinzi nchakaamba mwaapostolo Pawulu atala akusungwaazyania? (Langa chifanikisyo chili kumatalikilo achiiyo.)

3 ‘Kuusa kwamoyo wamuntu kulamulemezya, pele ijwi ibbotu lilamusekelezya.’ (Tus. 12:25) Eezi zilakonzya kutuchitikila toonse. Nkinkaako, toonse tweelede kusungwaazigwa chiindi achiindi. Mwaapostolo Pawulu wakaamba kuti nikuba bantu bali amukuli wakusungwaazya bamwi, abalabo beelede kusungwaazigwa. Wakalembela maKristu bakali kukkala kuRoma kuti: ‘Ndayandisya kumubona, kuti nkamwaabile chimwi chipo chamuuya chakumuyumya-yumya, kuti tukayumizyanye mulusyomo mebo ndikayumye ndinywe anywebo mukayumye ndime.’ (Rom. 1:11, 12) Nikuba kuti Pawulu wakali kusungwaazya bamwi, alakwe wakali kuyanda kusungwaazigwa.—Bala BaRoma 15:30-32.

4, 5. Mbaani mbitweelede kusungwaazya alubo nkamboonzi?

4 Bantu balipedelede kubelekela Jehova beelede kulumbayizigwa. Bamwi babo mapayona. Bamwi bakalyiimya zintu zyiingi kuti bakonzye kupayona. Alubo mamishinali, babelekela kuBbeteli, balangizi bamabazu abakayintu babo abantu babelekela kumawofesi aabusanduluzi, bayandikana kulumbayizigwa. Bantu boonse baambwa aawa bakalipeda kuti babelesye chiindi chabo kuti bachite mulimu waLeza. Nkinkaako, kuleelela kuti tubalumbayizye. Alubo tweelede kusungwaazya bantu bakali mumulimu wachiindi choonse pesi batachikonzyi kuba mumulimu wachiindi choonse akaambo kazyiimo.

5 Bakwesu abachizi batakwete abatakwetwe akaambo kakutobela malayilile akukwata naakuti kukwatwa ‘muli Kristu,’ beelede kulumbayizigwa. (1 Kor. 7:39) Baalumi beelede kulumbayizya bakayintu babo akaambo kakubeleka changuzu. (Tus. 31:28, 31) Alubo tweelede kusungwaazya maKristu balikuzumanana kusyomeka nikuba kabapenzegwa naakuti kabachiswa. (2 Tes. 1:3-5) Jehova aKristu balabasimya babelesi basyomeka.—Bala 2 BaTesalonika 2:16, 17.

BAALU BALABASUNGWAAZYA BAMWI

6. Nguuli mulimu ngubabeleka baalu kweendelana alugwalo lwaIsaya 32:1, 2?

6 Bala Isaya 32:1, 2. Jesu Kristu ulikubelesya maKristu bananikidwe ‘abasilutwe’ bambelele zimwi kuti basungwaazye akugwasya bantu bakataazikene. Nisimpe kuti beelede kusungwaazya bamwi nkaambo baalu ‘tebasimalelo’ kulusyomo lwabamwi pesi ‘mbaasimilimonyina.’—2 Kor. 1:24.

7, 8. Kuyungizya mukwaambuula majwi aasungwaazya, nziizili zimwi nzibeelede kuchita baalu kuti basungwaazye maKristunyina?

7 Mwaapostolo Pawulu wakatusiila chikozyano chakutobelezya. Wakalembela maKristu bakuTesalonikka bakali kupenzegwa kuti: ‘Mbuuli mbutwakali kumuyanda, chintu nchitwakali kuyanda kumwaambila  kutali Makani aaLeza luzutu pesi amyoyo yesu tubeni, nkaambo mwakali bayandwi besu.’—1 Tes. 2:8.

8 Pawulu wakatondeezya kuti tatweelede kusungwaazya amajwi luzutu naakabuzya baalu bakuEfeso kuti: “Mweelede kubagwasya aabo batajisi nguzu, alimwi lyoonse mweelede kuyeeya majwi aa Mwami Jesu, eelyo lwakwe mwini naakaamba kuti: ‘Kupa kulakkomanisya kapati kwiinda kupegwa.’” (Inc. 20:35, NW) Pawulu wakali kubasungwaazya maKristunyina alubo wakali ‘kulitakata’ akaambo kabo. (2 Kor. 12:15) Abalabo baalu beelede kusungwaazya bamwi akutondeezya kuti balababikkila maanu maKristunyina.—1 Kor. 14:3.

9. Kujana baalu balupa biyeni lulayo munzila iisungwaazya?

9 Kusungwaazya bamwi kuswaanizya kupa lulayo. Nikuba boobo, baalu beelede kutobelezya malayilile aazwa muBbayibbele kuti bakonzye kupa bamwi lulayo munzila iisungwaazya. Jesu wakatusiila chikozyano chilikabotu naakabusigwa. Nikuba kuti wakeelede kupa lulayo kumbungano zyakuAsiya Mayina, pesi wakachita chimwi chintu. Wakasaanguna kulumbayizya mbungano yakuEfesu, yakuPergamo ayakuTiyatira. (Ciy. 2:1-5, 12, 13, 18, 19) Wakalembela mbungano yakuLawodikkeya kuti: “Aabo boonse mbondiyanda ndilabasinsa akubalaya. Aboobo sungwaala akweempwa.” (Ciy. 3:19, NW) Baalu beelede kutobelezya chikozyano chaKristu nibapa lulayo.

TEEMUKULI WABAALU LUZUTU

Nibazyali, mulabayiisya na bana banu kuti basungwaazye bamwi? (Langa fuka 10)

10. Kujana twasungwaazyania biyeni?

10 Baalu teembabo luzutu beelede kusungwaazya bamwi. Pawulu wakasungwaazya maKristu boonse kuti kabaamba “ijwi lili kabotu kukuyaka bamwi kweelana abukkale aciindi eeco, kutegwa libe jwi likonzya kubagwasya aabo baswiilila.” (Ef. 4:29, NW) Toonse tweelede kuziba ‘bukkale’ bwabamwi kuti tubasungwaazye. Pawulu  wakabuzya maKristu bachiHebbrayo kuti: ‘Amwaayumye maboko aanu antoomwe amazwi aanu atontola, kamuzumanana kweenda munzila iililuzi kuti boonse basunkuta bataleyi munzila, pesi bapone.’ (Heb. 12:12, 13) Toonse tulakonzya kusungwaazya bamwi kwiinda mukubabuzya majwi aasungwaazya, kufumbwa kuti tuli bapati naakuti tuli baniini.

11. Niinzi chakagwasya muchizi Marthe naakakataazikene?

11 Muchizi uutegwa Marthe, * wakali kukataazikana. Wakati: “Limwi zuba ndakali kukombela kusungwaazigwa mpawo umwi muchizi wakomena wakandibikkila maanu. Eezi nzizyo nzindakali kuyanda achiindi eecho. Wakandibuzya zyakamuchitikila zikozyenie ambundakali kulimvwa alubo eezi zyakapa kuti ndibone kuti nsili andikke pe.” Zilakonzeka kuti muchizi ooyo wakakomena taakaziba pe kuti majwi ngaakabuzya Marthe akamugwasya loko.

12, 13. Kujana twaabelesya biyeni malayilile ajanika mulugwalo lwaBaFilipi 2:1-4?

12 Pawulu wakapa malayilile kubantu boonse bamumbungano yakuFilipi. Wakati: “Lino na mulijene lugwasyo muli-Kristo, na muli aluyando lwakutontozya moyo, na mulipedwe caabilo ca-Muuya, alimwi na muli amyoyo yabuuya alweetelelo, ndakumbila kuti mundipe olu lukondo luzulide lwakuziba kuti mulikede abuyanzane bomwe, akuyandana aluyandisyo lomwe, camoyo omwe acakuyeeya comwe. Mutaciti cintu niciba comwe cabbivwe nanka cakulisumpula, pele umwi aumwi akati kanu alibombye mumoyo, akuyeeya kuti mweenzuma mubotu kwiinda ndime. Tamweelede kuyeeya kuligwasya nubeni luzutu, pe, umwi aumwi uleelede kwiingasila kugwasya mweenzinyina.”—Flp. 2:1-4.

13 Kuti tukonzye kusungwaazya bakombima, toonse tweelede kuba “aluyando lwakutontozya moyo,” kubapa “caabilo ca-Muuya” akuba ‘abuuya alweetelelo.’

ZINTU ZIKONZYA KUTUSUNGWAAZYA

14. Niinzi chikonzya kusungwaazya bamwi?

14 Kumvwa kuti bantu mbitwakayiyaabo Bbayibbele balikwiinkilila kunembo kabakomba Jehova, kulatusungwaazya mbuuli mbaakalimvwa mwaapostolo Johane. Wakalemba kuti: “Taakwe kubotelwa kumbi nkunjisi kupati kwiinda oku kwakumvwa kuti bana bangu baleenda mulusinizyo.” (3 Joh. 4) Mapayona biingi balasungwaazigwa nibamvwa kuti bantu mbibakayiyaabo Bbayibbele balikwiinkilila kunembo kukomba Jehova akuti balapayona. Kuti mapayona kabakataazikene, kubabuzya zintu zibotu nzibakali kuchita, kulakonzya kubasungwaazya.

15. Kujana twabasungwaazya biyeni bantu bali kukomba Jehova chakusyomeka?

15 Balangizi bamabazu abakayintu babo bakaamba kuti kulembelwa kagwalo kakubalumba kulabasungwaazya nibazwa kuswaya mbungano. Alubo baalu, mamishinali, mapayona abantu babelekela kuBbeteli, balasungwaazigwa chiindi bantu nibabalumba akaambo kamilimu njibachita akulipeda kwabo.

MBUTUKONZYA KUSUNGWAAZYA BAMWI

16. Kujana twabasungwaazya biyeni bamwi?

16 Kuba amiyeeyo yakuti tatukonzyi pe kusungwaazya bamwi akaambo kakuti tatuziyandisyi pe zyakwaambuula, takuli kabotu. Takuyandikani zintu zyiingi kuti tusungwaazye bamwi. Nikuba kumwemwetela luzutu nitujuzya bamwi, kulakonzya kusungwaazya. Kuti muntu ngwaajuzya taamwemwetela, zitondeezya kuti amwi kuli zimwi zimukataazya, nkinkaako  tweelede kumuswiilila kuti tukonzye kumuumbulizya.—Jak. 1:19.

17. Umwi mukwesu uuchikula wakagwasigwa biyeni naakakataazikene?

17 Mukwesu uutegwa Henri uuli aminyaka iili 20, wakakataazikana chiindi babbululu bakwe nibakasiya kasimpe, kuswaanizya awisi. Henri wakasungwaazigwa amulangizi wabbazu wakamutola ku-restaurant kuti akamubuzye zyakali kumukataazya. Henri wakabona kuti chintu chakali kukonzya kugwasya babbululu bakwe kuti baboole lubo mukasimpe, nkukkala kasyomeka. Wakawumbulizigwa kwiinda mukubala Intembauzyo 46, Zefaniya 3:17; Marko 10:29, 30.

Toonse tulakonzya kuyakana akusungwaazyania (Langa fuka 18)

18. (a) Ngaali makani akaambwa aMwaami Solomoni? (b) Ngaali malayilile ngaakapa mwaapostolo Pawulu?

18 Zyakachitika kuli Marthe aHenri zitondeezya kuti tulakonzya kubasungwaazya bakombima chiindi nibakataazikene. Mwaami Solomoni wakalemba kuti: “Ijwi liambwa kuciindi ceelede lyabota loko! Mumuni wameso ulakondezya moyo, amakani mabotu alaponya mubili.” (Tus. 15:23, 30) Alubo kubala Ngaziyakulinda naakuti makani aajanika awebbusayiti yesu kulakonzya kusungwaazya muntu ukataazikene. Pawulu wakaamba kuti kwiimba nyimbo zyaBwaami katulaamwi, kulasungwaazya. Wakalemba kuti: “Amwiisyanye akucenjezyanya cabusongo bunji antembauzyo anyimbo zya-Leza amalelebu, akuya bwiimba lyoonse cakulumba Leza mumyoyo yanu.”—Kol. 3:16; Inc. 16:25.

19. Nkamboonzi kusungwaazyania nikuyandikana mumazubaano alubo kujana twazichita biyeni?

19 Tweelede kusungwaazyania nkaambo buzuba bwaJehova “buli afwaafwi.” (Heb. 10:25) Pawulu wakabuzya maKristunyina kuti “kamuciya bugwasyanya akuyakana, umwi aumwi kumweenzinyina, mbubonya mbomucita.”—1 Tes. 5:11.

^ par 11 Mazina akachinchwa.