Skip to content

Skip to table of contents

Mapenzi Ninsamu Iizwa Kuli Leza Na?

Mapenzi Ninsamu Iizwa Kuli Leza Na?

MUSIMBI UUTEGWA LUZIA WEENDA BUSUNKUTA. Naakachili muniini wakachiswa bulwazi butabukila butegwa Polio. Naakali aaminyaka iili 16, mwanakazi ngwaakali kubelekela wakamubuzya kuti: “Bulwazi bwako ninsamu yakazwa kuli Leza nkaambo teewakali kubaswiilila pe bamaako.” Nikuba kuti kwiinda minyaka myiingi pesi majwi aaya achimukkede mumoyo.

DAMARIS NAAKAZIBA KUTI ULAAKKENSA YAMUBOONGO, wisi wakamubuzya kuti: “Mwanaangu, wakabisyaanzi kuli Leza? Kweelede kuti wakabisya chintu chipati loko. Nzizyo zyapa Leza kuti akunabbe ansamu.” Majwi aaya akapa kuti Damaris akataazikane loko.

Kuzwa chiindi, bantu biingi bayeeya kuti kuchiswa ninsamu iizwa kuli Leza. Bbuku litegwa Manners and Customs of Bible Lands lyaamba kuti bantu biingi muchiindi chaJesu bakali kusyoma kuti, “kuchiswa ninsamu iizwa kuli Leza akaambo kazibi nzyaakachita muntu naakuti zyakachitwa aazibbululu zyakwe.” Alubo bbuku litegwa Medieval Medicine and the Plague lyakaamba kuti, chiindi “bantu bakali kusyoma kuti Leza wakali kutuma zilwazi kuti zibachise chiindi nibabisya.” Mumwaanda wamunyaka wachi 14, bumwi bulwazi bwakajaya bantu biingi loko kuEurope, bulwazi oobu yakali nsamu yakali kuzwa kuli Leza na akaambo kazibi nzibakachita? Naakuti bulwazi oobu bwakeetwa amabacteria mbuuli mbubakaamba balanga-langa zyabusilisi. Bamwi balakonzya kulibuzya kuti: “Nichoonzyo na kuti Leza ubelesya malwazi kuti asubule bantu?” *

LIBUZYE KUTI: Nikuli Leza ubelesya kuchiswa amapenzi kuti asubule bantu, zyakali kunoochita na kuti Mwanaakwe Jesu aponie bantu bakali kuchiswa? Kuchita oobo teekwakali kuyootondeezya kuti ukazyania aaWisi na? (Matayo 4:23, 24) Jesu taakwe naakakazyania aaWisi. Wakati: “Ndacita lyoonse zintu izimubotela,” alubo “Ndacita mbuli mbwaakandilailila Taata.”—Johane 8:29; 14:31.

Bbayibbele lyaamba antanganana kuti Jehova nguLeza “uutakwe cibi.” (Deuteronomo 32:4) Muchikozyano, Leza takoonga wapa kuti bbaasi ibbewuke mpawo kufwe bantu biingi batakwe mulandu kuchitila kuti ajaye muntu uumwi wakachita chibi. Abrahamu, mukombi waJehova uusyomeka wakaamba kuti Leza ‘taakali kuyoomanisya baluleme antoomwe abasizibi.’ Alubo wakati eecho “cilatondwa” kuli Leza. (Matalikilo 18:23, 25) Alubo Bbayibbele lyaamba kuti, “kacili kule a-Leza kuti acite bubi” akuti “alubizye.”—Jobu 34:10-12.

NZILITUYIISYA BBAYIBBELE ATALA AMAPENZI

Kuchiswa teensamu iizwa kuli Leza pe. Jesu wakapandulwida basikwiiya bakwe atala ankani eeyi chiindi nibakabona mwaalumi wakazyalwa kali moofu. “Basikwiiya bakwe bakamubuzya kuti, Rabi, ino nguni uwakacita cibi, sena nguwenya muntu oyu, na mbamuzyala, ncaakazyalwa aboofu? Jesu wakavuwa kuti, Tali oyu muntu uwakacita cibi nobaba abamuzyala, pele nkuti milimo ya-Leza iyubululwe mulinguwe.”—Johane 9:1-3.

Nzyaakababuzya Jesu zyakabagambya basikwiiya bakwe nkaambo bakazi kuti muntu wakali koofwaala akaambo kazibi nzyaakachita naakuti zyakachitwa abazyali bakwe. Jesu wakaponia  mwaalumi wakali moofu alubo wakatondeezya kuti njiisyo yakuti Leza usubula bantu amapenzi njakubeja. (Johane 9:6, 7) Bantu balikuchiswa mazubaano balakonzya kuumbulizigwa kuti baziba kuti Leza teenguwe uupa kuti bachiswe.

Nikuli Leza ubelesya kuchiswa kuti asubule bantu, zyakali kunoochita na kuti Jesu aponie bantu bakali kuchiswa?

Nzilyaamba Bbayibbele

  • “Leza tatepauliki kucibi, alimwi walo mwini tatepauli muntu pe.” (JAKOBO 1:13) ‘Zintu zibi’ zikataazya bantu zili mbuuli kuchiswa alufu ziyoomana lino-lino.

  • “Balwazi boonse [Jesu Kristu] wakabaponya.” (MATAYO 8:16) Chiindi Jesu naakaponia bantu wakatondeezya zintu ziyoochitwa aaBwaami bwaLeza munyika yoonse.

  • “[Leza] Uyoosindula misozi yoonse kumeso aabo, takukooyooba limbi lufu, nikuba kuomoka nikuba kulila nikuba kuciswa, nkaambo zintu zyakale zyamaninina.”—CIYUBUNUZYO 21:3-5.

NGWANI ULIKWEETA MAPENZI?

Nkamboonzi bantu nibachiswa akuswaana mapenzi? Kuzwa chiindi, bantu balikuyanduula nsandulo yamubuzyo ooyu. Kuti Leza katali nguwe uutweetela mapenzi, ngwani ulikwayeta? Mibuzyo eeyi iyoosandulwa muchiiyo chitobela.

^ par 4 Nikuba kuti chiindi Leza wakali kubelesya malwazi kuti asubule bantu bakali kuchita zibi, pesi Bbayibbele talitondeezyi kuti Jehova uchibelesya malwazi naakuti mapenzi kuti asubule bantu akaambo kazibi nzibakachita.