Skip to content

Skip to table of contents

“Meso aako akandibona nkencili insalalila.”—INTEMBAUZYO 139:16

Leza Ulaazi Na Mapenzi Nguswaana?

Leza Ulaazi Na Mapenzi Nguswaana?

NZITWIIYA KUZWA KUZINTU ZYAKALENGWA

Yeeya atala akumvwanana nkubalaako mambile. Mambile amvwanana loko. Umwi mwanakazi uutegwa Nancy Segal, mupati wakabunga kategwa Twin Studies Center wakazyalwa kali mumbile wakapandulula kuti, amwi mambile “alakonzya kuziba zilikwaambwa amweenzinyina nikuba kuti wakachilwa kuzipandulula.” Umwi mwanakazi naakali kupandulula atala akumvwanana nkubalaako amweenzinyina mumbile wakati: “Taakwe nchinditazi pe atala anguwe.”

Niinzi chipa kuti mambile bakonzye kuzibana munzila iili boobu? Basikuyanduulisisya bayeeyela kuti maponeno, nzila njibakakomezegwaayo kuswaanizya akuba amagenes ayendelana, nzizyo zipa kuti mambile bazibane kabotu.

LIBUZYE KUTI: Mbukunga Leza nguwe wakalenga bantu kabali amagenes aaliboobu, tazili antanganana na kuti ulimwizi umwi awumwi wesu mbabede choonzyo? Sintembawuzyo Davida wakati: “Nduwe wakandinunganya [naakuti wakandisisa] mwida lyabama. Mubili wangu teewakasiswa kulinduwe, nendakapangwa cakusisa. . . . Meso aako akandibona nkencili insalalila; mubbuku lyako zizo zyangu zyoonse kazilembedwe.” (Intembauzyo 139:13, 15, 16) Leza nguwe alikke uukonzya kuziba magenes aamuntu umwi awumwi alubo ulizizi kabotu zintu nzituswaana mubuumi. Kuziba kuti Jehova wakatulenga katuli amagenes aaliboobu kutondeezya kuti taakwe nchatazi atala andiswe.

NZILYAAMBA BBAYIBBELE ATALA AMBATUZI LEZA

Davida wakakomba kati: “O Jehova, ulandilingula, ulindizi. Ulizi kukala kwangu akubuka kwangu, ulibwene miyeeyo yangu noli kule. Nkaambo taakwe ijwi lyalulimi lwangu ndotezi loko, O Jehova.” (Intembauzyo 139:1, 2, 4) Kuyungizya waawo, Jehova ulizi mbutulimvwa alubo “ulazibisya makanze oonse amiyeeyo yoonse.” (1 Makani 28:9; 1 Samuele 16:6, 7) Magwalo aaya atuyiisyaanzi atala aLeza?

Nikuba kuti chimwi chiindi tulakonzya kukachilwa kwaamba zimwi zintu nzituyanda nitulikukomba pesi Mulengi wesu ulazibona nzituchita akuti niinzi zyapa kuti tuchite munzila eeyo. Kuyungizya waawo, ulizizi zintu zibotu nzituyanda kumuchitila alubo ulatumvwisisisya kuti twakachilwa kuzichita. Akaambo kakuti Leza wakatulenga katulaaluyando, alakwe ulaachiyandisyo chakubona akuziba nzituyeeya ambutulimvwa.—1 Johane 4:7-10.

 Nzilyaamba Bbayibbele

  • “Meso aa-Jehova ali kubaluleme, amatwi aakwe alijukide kukukomba kwabo.”—1 PETRO 3:12.

  • Leza wakatusyomezya kuti: “Njookulaya akukutondezya inzila njoelede kutola, njookweenzya kukubika liso lyangu alinduwe.”—INTEMBAUZYO 32:8.

LEZA ULAALUZYALO

Kuziba kuti Leza ulaabona mapenzi ngituswaana akuti ulizi mbutulimvwa, kujana kwatugwasya biyeni kuti tulisimye chiindi nituli mumapenzi? Atulange zyakachitika kuli Anna, uukkala kuNigeria, wakati: “Ndakali kulibuzya kuti ndiponenaanzi nkaambo buumi bwangu bwakali bwamapenzi luzutu. Ndakali mukamufu, mwanaangu musimbi wakali kuchibbadela nkaambo wakali kuchiswa bulwazi bwakuzula maanzi muboongo mpawo andime ndakali abulwazi bwakkensa munkolo alubo ndakeelede ku-opaletwa akubelesya busilisi busiyene-siyene. Ndakali muchiimo chiyumu loko. Nikuba kuti ndakali kuchiswa achiindi nchicheecho, ndakeelede kulangania mwanaangu wakali kuchiswa.”

Niinzi chakagwasya Anna kuti alisimye? Wakati: “Ndakayeeyesesya atala alugwalo lwa BaFilipi 4:6, 7 luti, ‘luumuno lwa-Leza lwiinda miyeeyo yoonse yabantu luyooyaminina myoyo yanu amiyeeyo yanu.’ Chiindi nindakali kuyeeya lugwalo oolu, ndakali kulimvwa kandili afwiifwi aJehova alubo ndakabona kuti ulindizi kwiinda mbundilizi. Alubo bakombima bakandisungwaazya loko.

“Nikuba kuti bulwazi bwangu abwamwanaangu tabunamana, pesi twakaba mbubo-mbubo. Twakabona kuti tweelede kulisimya akuba amaboneno aalikabotu chiindi nituli mumapenzi nkaambo Jehova ulatugwasya. Alubo lugwalo lwa Jakobo 5:11 lwaamba kuti: ‘[Balikkomene, NW] bakakatila. Mulimvwide kale aalukakatilo lwa-Jobo, alimwi mulizi mbwaakamucitila Jehova kumamanino. Mwabona kuti Jehova ngusibuuya, ngusiluzyalo.’” Jehova wakalaazi mapenzi ngaakali kuswaana Jobu andiswe tuli achoonzyo chakuti ulaazi mapenzi ngituswaana.

Leza ulazibona zintu zyoonse zituchitikila. Ulaabona mapenzi ngituswaana nikuba kuti bamwi tabakonzyi kwaabona naakuti kutumvwisisisya nituli mumapenzi