Skip to content

Skip to table of contents

Kufumbwa Mapenzi Ngulaawo Buumi Bulagwasya

Kufumbwa Mapenzi Ngulaawo Buumi Bulagwasya

Faizal wakafwidwa mwanakazi. Kakuli kwiinda munyaka wakeelede ku-opaletwa moyo. Wakaamba kuti: “Nindakabala bbuku lyaJobu, ndakabona kuti kuli kaambo kamvwika kakapa kuti bbuku eeli lilembwe. Kuti twabala atala amuntu wakaswaana chiimo cheendelana achesu muBbayibbele, moyo nga wakkala. Eezi zyakandigwasya kubona kuti buumi bulagwasya.”

Tarsha wakafwidwa bayina kachili muniini. Wakaamba kuti: “Kuziba Mulengi wesu kwakandigwasya kuti ndibe aabulangilizi, ndikkale kandibotelwa alubo kwakandigwasya kubona kuti buumi bulagwasya kufumbwa mapenzi ngukonzya kuswaana. Jehova nguwe uukonzya kutugwasya kuti tulisimye.”

ZYIIYO zyayinda zyatondeezya kuti mapenzi ngituswaana alakonzya kupa kuti tuyeeye kuti buumi tabugwasyi. Nuzumanana kulwana mapenzi ngulaawo, ulakonzya kubonaanga buumi tabugwasyi akuti taakwe muntu ulaandaba anduwe. Baachoonzyo chakuti Leza ulaabwene mapenzi ngulaawo. Leza ulakuyanda.

Sikulemba Intembauzyo 86 wakali aachoonzyo chakuti Leza ulamugwasya. Wakaamba kuti: ‘Mubuzuba bwamapenzi ndakukwiilila, nkaambo ulandimvwa.’ (Intembauzyo 86:7) Ulakonzya kulibuzya kuti, ‘Leza uyoondimvwa na ‘mubuzuba bwamapenzi’?’

Nisimpe kuti Leza takoogwisya mapenzi aako, pesi Bbayibbele litondeezya kuti ulakonzya kukugwasya kuti ulisimye akuti ube aaluumuno lwamumizeezo. Bbayibbele lyaamba kuti: “Mutalibilikili cintu niciba comwe, pele muzintu zyoonse amupangike myoyo yanu kukukomba akukukombelezya cakulumba, kuti inkumbizyo zyanu zizibisigwe kuli-Leza, elyo luumuno lwa-Leza lwiinda miyeeyo yoonse yabantu luyooyaminina myoyo yanu amiyeeyo yanu.” (BaFilipi 4:6, 7) Mavesi aatobela alatugwasya kubona kuti Leza ulaandaba andiswe.

Leza Ulaandaba Anduwe

“Taakwe nekaba komwe [kayuni] akalubidwe kuli-Leza. . . mulayandika kwiinda tuyuni tunjitunji.”Luka 12:6, 7.

ZYAKUYEEYESESYA: Nikuba kuti tuyuni ntuniini loko pesi tulayandikana kuli Leza. Taakwe nikaba katiiti komwe kawida aansi Leza katabwene. Zintu zyoonse zipona zilayandikana kuli Leza. Bantu bayandikana loko kuli Leza kwiinda tutiiti. Bantu mbabo abalikke bakalengwa ‘muchikozyano’ chaLeza nkaambo balakonzya kutobelezya buntu bwakwe busumpukide.—Matalikilo 1:26, 27.

“O Jehova, ulandilingula, ulindizi. . . . Ulibwene miyeeyo yangu. . . . Undisunke, uzibe miyeeyo yangu.”Intembauzyo 139:1, 2, 23.

ZYAKUYEEYESESYA: Taakwe chintu nchatazi Leza atala anduwe. Ulizizi zili mumoyo wako azintu zikukataazya. Nikuba kuti bamwi bantu balakonzya kutamvwisisisya zintu zikukataazya, Leza uyanda kukugwasya nkaambo ulaandaba anduwe. Eezi zitondeezya kuti buumi bwako bulagwasya.

 Buumi Bulagwasya

“O Jehova, swiilila cikombyo cangu! Kulila kwangu kumvwigwe kulinduwe! . . . Cenjeka kutwi kwako kulindime, fwambaana kundivuwa mubuzuba bwakoongolola kwangu. . . . Waswiilila cikombyo cabaswekede.”Intembauzyo 102:1, 2, 17.

ZYAKUYEEYESESYA: Kuzwa bantu nibakanjila mumapenzi, kuli mbuuli kuti Leza wakali kubamba misozi yabo. (Intembauzyo 56:8) Ayako misozi uliibambide. Leza taakwe naluba mapenzi nguswaana nikuba kulila kwako nkaambo ulakuyanda.

“Utakankami, nkaambo ndime Leza wako. Njookuyumya, njookugwasya, . . . Mebo nde-Jehova . . . njookwaambila kuti, Utayoowi, ndime sikugwasya wako.”Isaya 41:10, 13.

ZYAKUYEEYESESYA: Leza uyanda kukugwasya alubo kuti wawa uyookubusya.

Langilila Buumi Bulikabotu Kunembo

“Nkaambo obuya Leza mbwaakayandisya nyika, wakapa Mwanaakwe simuzyalwa alike, kuti umwi umwi uumusyoma atafwidilili, pele abe abuumi ubutamani.”Johane 3:16.

ZYAKUYEEYESESYA: Leza ukuyanda loko nkaambo wakatuma Mwanaakwe Jesu kuti azookufwide. Kufwa kwaJesu kukugwasya kuti ube aabulangilizi bwakuyoopona mane kukabe akutamani. *

Nikuba kulikuswaana mapenzi, kubala Jwi lyaLeza kulakonzya kukugwasya kuti ube aalusyomo muzintu nzyaakatusyomezya Leza. Kubala Bbayibbele kuyookugwasya kuti ubotelwe akuti ubone kuti buumi bulagwasya.

^ par 19 Kuti ujane zyiingi atala ambukonzya kugwasigwa aalufu lwaJesu, yebela kavidiyo kati, Yeeya Lufu lwaJesu aawebbusayiti iitegwa www.jw.org. Langa aalembedwe kuti MABBUKU > MAVIDIYO > MISWAANGANO YESU AMULIMU WAKUKAMBAWUKA.